Iti Amin a Maikari a Lallaki a Miembro, ni Emma Allebes

Disiembre 6–12

Ti Pagannurotan ti Pammati ken Opisial a Palawag 1 ken 2

“Mamatikami”

Bayat ti panagadalmo ita a lawas ken panagaramidmo iti plano a mangisuro, ibilangmo no kasano a matulongam dagiti ubbing iti klasem a mapabileg ti pammatida kadagiti kangrunaan a kinapudno ti ebanghelio.

Isuratmo dagiti Impresionmo

Yawis ti Panagbibinninglay

Mangipallangatokka iti bola iti maysa nga ubing, ket kiddawem iti ubing a mangibinglay iti maysa a banag a patienna maipapan ken ni Jesucristo wenno iti Nailangitan nga Ama. Uliten agingga a naaddan ti tunggal ubing iti gundaway a mangibinglay.

Isuro ti Doktrina: In-inaudi nga Ubbing

Ti Pagannurotan ti Pammati

Mamatiak iti ebanghelio ni Jesucristo.

Mabalinmo nga usaren ti Pagannurotan ti Pammati tapno irebyum kadagiti ubbing ti sumagmamano kadagiti kangrunaan a pammati iti Simbaan ni Jesucristo. Apay a napateg a mamati dagiti ubbing a sursuruam kadagitoy a simple a kinapudno?

Dagiti Mabalin nga Aktibidad

• Piliem ti sumagmamano kadagiti pagannurotan iti pammati a mariknam a nangnangruna a napateg kadagiti ubbing a sursuruam. Iti tunggal pagannurotan ti pammati, ibinglaymo ti maysa a ladawan (kitaen iti panid ti aktibidad ita a lawas) wenno maysa nga estoria (manipud kadagiti nasantuan a kasuratan wenno bukodmo a biag) a mangiladawan wenno mangilawlawag iti maysa a kinapudno a maisursuro iti dayta a pagannurotan. Ibagam kadagiti ubbing no apay a napateg kenka dayta a kinapudno, ket palubosam ida a mangibinglay no apay a napateg daytoy kadakuada.

• Mangsapul kadagiti himno wenno kanta dagiti ubbing a makatulong kadagiti ubbing a maawatan ti maysa wenno ad-adu pay kadagiti pagannurotan ti pammati. Nalabit makatulong kenka dagiti ubbing a mangpili. Aggigiddan a kansionen dagiti kanta, ket tulongam dagiti ubbing a mangkita no kasano a mainaig dagiti kanta kadagiti pagannurotan ti pammati.

Pagannurotan ti Pammati 1:9; Opisial a Palawag 1 ken 2

Iwanwan ti Apo ti Simbaanna babaen ti propetana.

Bayat ti pannakapasango dagiti miembro ti Simbaan iti nagduduma a karit, mabalin a makakitatayo iti talna iti pannakaammo a sidadaan ti Nailangitan nga Ama a mangipaay iti paltiing a mangiwanwan kadatayo. Tulongam dagiti ubbing a sursuruam a mangpapigsa iti pammatida nga iwanwan ti Dios ti Simbaan babaen ti maysa a sibibiag a propeta.

Iwanwannatayo ti Nailangitan nga Ama babaen kadagiti propeta.

Dagiti Mabalin nga Aktibidad

• Ipakitam ti maysa a set dagiti nasantuan a kasuratan ken maysa a ladawan ti sibibiag a propeta (wenno maysa a nabiit pay a kopia ti komperensia iti Ensign wenno Liahona). Tulongam dagiti ubbing a mangikeddeng no ania nga aytem ti mainaig iti ragup dagiti balikas nga “amin nga impalgak ti Dios” ken no ania nga aytem ti mainaig iti ragup dagiti balikas nga “amin nga ipalpalgakna ita” (Pagannurotan ti Pammati 1:9).

• Iddepem dagiti silaw, ket ikabilmo ti maysa a ladawan ni Jesucristo iti pisarra. Pagsilawem ti maysa a flashlight iti imahe tapno mailadawan no kasano a ti propeta, a kas iti flashlight, ket tulongannatayo nga nalawlawag a makitatayo ti Mangisalakan.

• Mangsapul kadagiti simple a direksion tapno makaaramid iti maysa a banag, kas iti taraon wenno maysa nga ay-ayam. Surotem dagiti pangiturong a kadua dagiti ubbing, ket ilawlawagmo a babaen iti propeta, mangipapaay kadatayo iti pangiturong ti Nailangitan nga Ama tapno tulongannatayo nga agsubli a makipagnaed Kenkuana. Ania ti sumagmamano a banag nga insuro kadatayo ti propeta tapno makasublitayo iti Dios?

Isuro ti Doktrina: In-inauna nga Ubbing

Ti Pagannurotan ti Pammati

Mangisuro ti Pagannurotan ti Pammati kadagiti simple a kinapudno ti ebanghelio.

No dadduma mabalin a kasla dakkel ken narikut ti ebanghelio, nangnangruna kadagiti ubbing. Makatulong ti Pagannurotan ti Pammati kadagiti ubbing a makaawat, iti simple a wagas, iti sumagmamano a kangrunaan a kinapudno a patientayo kas Santo iti Ud-udina nga Aldaw.

Dagiti Mabalin nga Aktibidad

• Awisem ti tunggal ubing a mangpili ti kangrunaan a balikas wenno ragup dagiti balikas manipud iti maysa kadagiti pagannurotan ti pammati ken ibinglayna daytoy iti klase. Kalpasanna papugtuam kadagiti ubbing (wenno sapulenda) no ania a pagannurotan ti pammati ti naggapuan ti dayta a balikas wenno ragup dagiti balikas. Kiddawem kadagiti ubbing a mangibinglay no apay a napateg ti pinilida a balikas wenno ragup dagiti balikas.

• Iti sumagmamano nga aldaw a nasapsapa, kiddawem iti sumagmamano kadagiti ubbing nga agsagana a mangibinglay iti klase iti maysa nga ababa a mensahe maipapan iti paggugustoda a pagannurotan ti pammati. Mabalin nga iraman iti mensaheda ti maysa a ladawan, kanta, estoria wenno padas, wenno dadduma pay a nasantuan a kasuratan. Awisem dagiti ubbing a mangibinglay iti no apay a kayatda ti napilida a pagannurotan ti pammati.

• Isuratmo iti pisarra dagiti sumagmamano a saludsod a mabalin nga adda kadagiti tao maipapan iti pammatitayo a mabalin a masungbatan iti maysa kadagiti pagannurotan ti pammati. Kiddawem dagiti ubbing a mangpili iti maysa a saludsod ket sapulenda ti maysa a pagannurotan ti pammati a kas sungbatna daytoy. Pagsanayem iti isusungbat ti saludsod iti panangusar iti pagannurotan ti pammati.

DagitiOpisial a Palawag 1 ken 2

Tulongannatayo dagiti propeta a mangammo iti pagayatan ti Nailangitan nga Ama.

TiOpisial a Palawag 1 ken 2 ti kasayaatan a pagarigan no kasano nga umawat ken agtignay dagiti propeta iti paltiing manipud iti Dios. Kasano a matulongam dagiti ubbing a mapapigsa ti pammatida nga iturturong ti Dios ti Simbaanna babaen iti paltiing?

Dagiti Mabalin nga Aktibidad

• Kiddawem dagiti ubbing a mangkita iti maysa a pagannurotan ti pammati a mangisuro iti maipapan kadagiti propeta wenno paltiing. Awisem ida a mangibinglay no apay nga agyamanda nga addaantayo iti maysa a sibibiag a propeta. Ibinglay ti sumagmamano a pagarigan iti no kasano nga inwanwan ti Dios ti Simbaan babaen iti paltiing, agraman dagiti pagarigan a nailadawan iti Opisial a Palawag 1 ken 2, ket paibinglay kadagiti ubbing dagiti pagarigan nga ammoda (kas kadagiti nabiit pay a panagbalbaliw dagiti programa wenno annuroten iti Simbaan).

• Ikkam dagiti ubbing kadagiti sumaganad a reperensia iti nasantuan a kasuratan: 2 Nephi 26:33; Jacob 2:27. Awisem ida a mangikeddeng no ania a nasantuan a kasuratan ti mainaig iti Opisial a Palawag 1 (a nangiturong iti gibus ti panagasawa iti ad-adu ngem maysa) ken mainaig iti Opisial a Palawag 2 (a namagbalin a sidadaan a magun-od dagiti bendision ti priesthood ken iti templo dagiti tao iti amin a puli). Paneknekam nga ipalgak ti Apo ti pagayatanna kadagiti nagkauna ken moderno a propeta.

• Isuratmo ti sumaganad manipud iti Opisial a Palawag 1 iti pisarra: “Nasken a kednganyo ti bagbagiyo.” Ania ti kaipapanan ti kedngan ti bagbagitayo no umawat ti propeta iti paltiing? Tapno matulongan ida a mangsungbat iti daytoy a saludsod, mabalinmo nga ibinglay daytoy a palawag manipud ken ni Presidente Russell M. Nelson: “Maammuanyo iti bagbagiyo no ania ti pudno ken no ania ti saan babaen iti panangsursuro a mangbigbig kadagiti arasaas ti Espiritu” (“The Love and Laws of God” [Brigham Young University devotional, Sept. 17, 2019], 4, speeches.byu.edu).

• Idrowing wenno i-display ti maysa a ladawan iti lubong iti pisarra. Awisem ti maysa kadagiti ubbing a mangbasa ti maudi a dua a parapo iti surat ti Umuna a Panguluen a napetsaan iti Hunio 8, 1978 a naadaw iti Opisial a Palawag 2 (mangrugi iti “Dinengngegna dagiti kararagmi …”). Idawatmo kadagiti ubbing a mangbilang no mamin-ano a gundaway a nagparang dagiti balikas a “bendision” ken “dagiti bendision.” Ania dagiti bendision a sumangbay manipud iti ebanghelio? Awisem dagiti ubbing a mangilista kadagitoy iti pisarra iti lawlaw ti drowing wenno ladawan ti lubong. Paneknekam nga ay-ayaten ti Dios dagiti amin nga annakna iti intero a lubong ken kayatna a bendisionan ida iti Ebangheliona.

Yallukoy ti Panagsursuro iti Pagtaengan

Tulongam dagiti ubbing a mangpili iti maysa a pagannurotan ti pammati a kayatda a yulo, ket tulongam ida nga agaramid iti plano nga aramidenda daytoy.

Panangpadur-as iti Panangisurotayo

Kayat dagiti ubbing ti mangibinglay iti nasursuroda. Nupay ubbingda pay laeng, mapapigsa dagiti ubbing ti pammati dagiti miembro ti pamiliada. Allukoyem ida a mangibinglay kadagiti pamiliada iti maysa a banag a nasursuroda iti Primary. (Kitaen iti Panangisuro iti Wagas ti Mangisalakan, 30.)