Disiembre 13–19

Ti Kaamaan: Maysa a Waragawag iti Lubong

“Ti Kaamaan ti Sentro iti Plano ti Namarsua”

Ania dagiti pagbatayan a masarakam iti “Ti Kaamaan: Maysa a Waragawag iti Lubong” a mariknam a naparegtaka a mangibinglay kadagiti ubbing? Bayat ti panagsaganam a mangisuro, isuratmo dagiti parikna a maawatmo manipud iti Espiritu.

Isuratmo dagiti Impresionmo

Yawis ti Panagbibinninglay

Awisem dagiti ubbing a mangitugot wenno mangidrowing iti ladawan ti pamiliada nga ibinglay iti klase. Awisem dagiti ubbing a mangibinglay iti maysa a banag a magustuanda maipapan iti pamiliada wenno ti nasursuroda maipapan iti pamilia ita a lawas.

Isuro ti Doktrina: In-inaudi nga Ubbing

Napateg dagiti pamilia iti plano ti Nailangitan nga Ama.

Kasano a mausarmo ti waragawag iti kaamaan tapno matulongam dagiti ubbing a makaawat no kasano ti kapateg dagiti pamilia iti plano ti Dios?

Dagiti Mabalin nga Aktibidad

• Tulongam dagiti ubbing a mangpanunot kadagiti banag a napateg unay a kayatda nga ibaga iti tunggal maysa maipanggep kadagitoy. Ipakitam kadagiti ubbing ti kopia ti “Ti Kaamaan: Maysa a Waragawag iti Lubong,” ken ilawlawag nga insurat dagiti propeta ken apostol daytoy tapno ibaga iti tunggal maysa no kasano ti kapateg dagiti pamilia iti Nailangitan nga Ama. Saludsodem kadagiti ubbing no apay nga iti panagkunada ket napateg unay dagiti pamilia iti Nailangitan nga Ama. Mangibinglay iti maysa a banag manipud iti waragawag a mariknam a masapul a maammuan ti tunggal maysa.

• Ipakitam kadagiti ubbing ti ladawan iti maysa a templo ken ladawan ti maysa a pamilia. Ipaiggem kadagiti ubbing dagiti ladawan bayat ti panangbasam iti maudi a binatog ti maikatlo a parapo ti waragawag iti kaamaan. Kiddawem kadakuada a mangitudo kadagiti umno a ladawan no mabasam dagiti balikas a “dagiti templo” ken “dagiti pamilia.” Paneknekam a gapu kadagiti ordinansa ti templo, makapagdedenna dagiti pamiliatayo iti agnanayon. Aggigiddan nga agkansion iti maysa a kanta maipapan iti agnanayon a pamilia, kas iti “I Love to See the Temple” (Children’s Songbook, 95), ken tulongan dagiti ubbing a dumngeg para kadagiti balikas a kas iti “templo” ken “pamilia.”

• Saludsodem kadagiti ubbing no ania ti maaramidtayo a mangpatibker kadagiti nadumaduma a banag—kas dagiti ngipentayo, dagiti bagitayo, wenno ti maysa a pasdek. Ania ti mabalin nga aramidentayo tapno agbalin a natibker ti pamiliatayo? Tulongam dagiti ubbing a makaawat kadagiti pagbatayan a mangiturong iti kinaragsak iti biag ti pamilia, a masarakan iti maikapito a parapo iti waragawag iti kaamaan (kitaen met iti panid ti aktibidad iti daytoy a lawas). Tulongam dagiti ubbing nga agplano kadagiti wagas a mangpatibkerto kadagiti pamiliada.

  

  Nasken a padakkelen dagiti nagannak dagiti annakda iti ayat ken kinalinteg.

Maysaak a “maipatpateg nga espiritu nga anak a lalaki wenno anak a babai dagiti nailangitan a nagannak.”

Ti waragawag iti kaamaan isurona nga annaknatayo amin dagiti Nailangitan a Nagannak ken addatayo ditoy rabaw ti daga tapno ad-adda pay nga agbalintayo a kas Kadakuada.

Dagiti Mabalin nga Aktibidad

• Aggigiddan a mangkanta ti “I Am a Child of God” (Children’s Songbook, 2–3). Kalpasanna mangibansag iti bola wenno nalukneng a banag iti maysa nga ubing bayat ti panagkunam, “Adda am-ammok nga anak ti Dios nga agnagan iti [nagan ti ubing].” Idawatmo iti ubing a mangibansag iti banag iti sabali nga ubing, nga isasaona met laeng dagiti isu met la a balikas ket ibagana ti nagan dayta nga ubing. Uliten ti aktibadad agingga a naaddaan iti batang ti tunggal maysa. Paneknekam a ti tunggal ubing ket “maipatpateg nga anak a lalaki wenno anak a babai dagiti nailangitan a nagannak.”

• Mangibilang kadagiti wagas a mabalinmo nga iladawan a gapu ta annaknatayo dagiti Nailangitan a Nagannak, makapagbalintayo a kas Kadakuada. Kas pagarigan, mangipakita kadagiti ladawan dagiti ayup ken dagiti maladagada, wenno sika ken dagiti nagannakmo wenno annakmo, ket tulongan dagiti ubbing a mangkita dagiti pagpapadaan. Paneknekam a kas kadagiti maladaga a dumakkel nga agbalin a kas kadagiti nagannakda, maysa nga aldaw agbalintayto met a kas kadagiti Nailangitan a Nagannaktayo.

Isuro ti Doktrina: In-inauna nga Ubbing

Dagiti kaamaan ti sentro iti plano ti Nailangitan nga Ama.

Ti waragawag iti kaamaan ket naited tapno mangpatalged kadagiti agnanayon a kinapudno maipapan iti pamilia Panunotem no kasano a tulongamto dagiti ubbing a mangpatibker kadagiti pammaneknekda maipanggep kadagitoy a kinapudno.

Dagiti Mabalin nga Aktibidad

• Saludsodem kadagiti ubbing no am-ammoda no siasino ti nangisurat iti ti waragawag iti kaamaan. (Iti mensahena a “The Plan and the Proclamation” [Ensign wenno Liahona, Nob. 2017, 28–31], inladawan ni Presidente Dallin H. Oaks no kasano a naisurat daytoy.) Tulongam dagiti ubbing a makaawat no ania ti kaipapanan dagiti balikas a “sipapasnek a mangiwaragawag” iti pakauna a parapo. Idawat kadakuada a mangibinglay kadagiti kapanunotanda maipapan no apay a kayat dagiti propeta ken apostol a “sipapasnek a mangiwaragawag” kadagiti kinapudno maipapan iti pamilia iti aldawtayo.

• Ibinglay ti sumagmamano a palawag manipud iti ti waragawag ti kaamaan a napnuan kaipapanan kenka. Awisem dagiti ubbing a mangibinglay kadagiti riknada maipapan kadagita a kinapudno. Kasano a maiduma ti biagtayo no saantayo koma nga ammo dagitoy a banag? Aggigiddan nga agkansion iti maysa a kanta a mainaig kadagiti kinapudno iti waragawag, kas iti “I Will Follow God’s Plan” wenno “Families Can Be Together Forever” (Children’s Songbook, 164–65, 188).

• Ipakita kadagiti ubbing dagiti ladawan (wenno awisen ida nga agdrowing ti sumagmamano) a mangiladladawan kadagiti kinapudno a masarakan iti ti waragawag ti kaamaan. Mabalin a dagitoy ket ladawan iti templo, maysa a pamilia nga agkarkararag wenno agay-ayam, wenno maysa a pareha nga agsagsagana nga agkasar. Awisem dagiti ubbing a mangsapul kadagiti binatog iti ti waragawag ti kaamaan a mainaig kadagiti ladawan. Ania ti isuro kadatayo dagitoy a binatog?

• Mangisagana iti sumagmamano a saludsod a masungbatan iti ti waragawag ti kaamaan, kas iti “Kasano ti rikna ti Apo maipapan iti panagasawa?” ken “Ania ti mangaramid a naragsak ti maysa a pamilia?” Pagpiliem ti tunggal ubing iti maysa a saludsod ken mangsapul kadagiti sungbat iti waragawag.

• Awisem ti maysa nga ina ken ama ti maysa kadagiti ubbing a mangibinglay iti klase no kasano nga “agtinnulong ti kas agpada nga agkadua” iti “sagrado a responsibilidadda” iti pamiliada. Awisem dagiti ubbing a makilinnawag no ania ti mabalinda nga aramiden ita kas panagsagana nga agbalin a nalinteg nga asawa a babbai ken lallaki, inna ken amma.

Karagsakan dagiti pamilia no inda suroten ni Jesucristo.

Ay-ayaten ti Nailangitan nga Ama iti tunggal maysa kadagiti annakna, ken kayatna ida nga agbalin a naragsak. Kasano a matulongam dagiti ubbing a sursuruam a maawatanda nga aggapu ti pudno a kinaragsak iti panangsurot kadagiti sursuro ken pagwadan ti Mangisalakantayo a ni Jesucristo?

Dagiti Mabalin nga Aktibidad

• Agdrowing iti maysa a dakkel a sinanpuso iti pisarra, ken awisen dagiti ubbing a mangbasa ti maikapito a parapo iti waragawag. Kiddawem kadakuada a mangsapul iti no ania ti nasken nga aramidenda tapno matulonganda dagiti pamiliada nga agbalin a naragsak, ken isurat iti uneg ti puso dagiti sungbatda. Awisem dagiti ubbing a mangpili iti maysa a banag nga aramidenda tapno ad-adda a maparagsakda dagiti pagtaenganda.

• Awisem dagiti ubbing a mangibinglay kadagiti padasda idi nariknada nga inayat ida ti maysa a miembro ti pamilia. Tulungan dagiti ubbing a mangilasin kadagiti prinsipio iti maikapito a parapo ti waragawag a makatulong kadagiti miembro ti pamilia a makarikna a maipatpategda. Kasano a ti pannakaammotayo iti ebanghelio ni Jesucristo ket makaapekto iti wagas a panangtratotayo kadagiti pamiliatayo?

• Saludsodem kadagiti ubbing no ania ti makunada no adda maysa a gayyem a nagsaludsod kadakuada no apay a napateg ti panagasawa wenno maaddaan kadagiti annak. Kasano a matulongam daytoy a gayyem a makaawat no kasano ti kinapateg dagiti pamilia iti Nailangitan nga Ama? Tulungam dagiti ubbing a mangsapul kadagiti palawag iti ti waragawag ti kaamaan a mabalin a makatulong; buyaen met ti video “What Is the Purpose of Family?” (ChurchofJesusChrist.org).

Yallukoy ti Panagsursuro iti Pagtaengan

Allukoyem dagiti ubbing a mangplano nga agaramid iti maysa a banag a mangpapigsa kadagiti pamiliada. Allukoyem ida a mangibinglay iti planoda kadagiti miembro ti pamilia iti pagtaenganda.

Panangpadur-as iti Panangisurotayo

Agbalin a managrikna. Bayat ti panangisurom kadagiti kinapudno iti ti waragawag ti kaamaan, mannakaammoka koma nga adu nga ubbing ti napadakkel kadagiti pamilia a saan a maitunos kadagiti pagulidanan a nailadawan iti waragawag. Agannad koma tapno saan a makaisawang iti aniaman a banag a mabalin a pakariknaanda iti pannakaupay wenno panangipapan iti bagida a nababbaba.