Makitkita ni Joseph ti ama, ina, ken kabsatna a lalaki iti celestial a pagarian (Ti Parmata ni Joseph Smith iti Celestial a Pagarian, Robert Barrett).

Nobiembre 29–Disiembre 5

Doktrina ken Katulagan 137–138

“Ti Parmata iti Pannakasubbot ti Natay”

Kitaem dagiti pagbatayan kadagitoy a paltiing a kasla napateg para kadagiti ubbing a sursuruam. Kasano a matulongam ida a maawatan dagitoy a pagbatayan?

Isuratmo dagiti Impresionmo

Yawis ti Panagbibinninglay

Ipakitam ti maysa a ladawan ni Jesucristo iti lubong ti espiritu, kas ti maysa a makita iti balabala ita a lawas iti Umaykayo, Sumurot Kaniak—Para kadagiti Indibidual ken Pamilia. Awisem dagiti ubbing a mangibinglay no ania ti ammoda maipapan iti lubong ti espiritu.

Isuro ti Doktrina: In-inaudi nga Ubbing

Doktrina ken Katulagan 137:1–5

Inikkannak ti Dios iti wagas a makadennak ti pamiliak iti agnanayon.

Iti parmata, nakita ni Joseph Smith dagiti miembro ti pamiliana nga agkakadua iti celestial a pagarian. Kasano a mausarmo daytoy a parmata iti panangisuro kadagiti ubbing a makapagkaykaysa dagiti pamilia ti agnanayon?

Dagiti Mabalin nga Aktibidad

• Ipakita ti maysa a ladawan iti maysa a tao iti pamiliam, ket isaritam maipapan iti no kasano ti panangtarigagaymo a makadua isuna iti celestial a pagarian. Ilawlawag a natay ti kabsat a lalaki ni Joseph Smith a ni Alvin kas maysa nga agtutubo a lalaki ket kailiwna unay isuna. Basaem ti Doktrina ken Katulagan 137:1, 5, ken saludsodem kadagiti ubbing no asino ti nakita ni Joseph Smith iti parmatana iti celestial a pagarian (kitaen met iti Doctrine and Covenants Stories, 152– 53). Awisen dagiti ubbing a mangunnat kadagiti takiagda tapno ipakitada iti dakkel a panagayatda kadagiti pamiliada, ket kiddawen kadakuada a mangibinglay iti no apay a kayatda a makadua dagiti pamiliada iti celestial a pagarian.

• Usaren ti Doktrina ken Katulagan 137:1–5 ken ti panid ti aktibidad ita a lawas tapno makatulong kadagiti ubbing a mangtakuat kadagiti detalye maipapan iti parmata ni Joseph Smith iti celestial a pagarian. Awisem ida a mangidrowing iti maysa a ladawan ti bagida ken ti pamiliada iti panid ti aktibidad bayat ti panagay-ayam wenno panagkansionyo iti maysa a kanta maipapan kadagiti pamilia, kas iti “Families Can Be Together Forever” (Children’s Songbook,188).

Doktrina ken Katulagan 138:6–11

Matulongannak ti Espiritu Santo a makaawat kadagiti nasantuan a kasuratan.

Mabalin a no dadduma narigat a maawatan ti nasantuan a kasuratan, nangnangruna kadagiti ubbing. Isuro tiDoktrina ken Katulagan 138:11 a malukatan ti Espiritu Santo “dagiti mata ti panagawat[tayo].”

Matulongannatayo ti Espiritu Santo a makaawat kadagiti nasantuan a kasuratan.

Dagiti Mabalin nga Aktibidad

• Ipakitam ti ladawan ni Presidente Joseph F. Smith (kitaen iti Libro ti Arte ti Ebanghelio, num. 127 Ilawlawagmo nga isu ti maikanem a Presidente ti Simbaan, ken iti maysa nga aldaw a panagbasbasana kadagiti nasantuan a kasuratan ken panangut-utobna kadagitoy (pampanunotenna no ania iti kaipapananda). Bayat ti panangbasam iti Doktrina ken Katulagan 138:6, 11, awisem dagiti ubbing nga agpammarang nga isuda ni Presidente Smith ket agtignayda a mayannurot kadagiti balikas.

• Ibagam kadagiti ubbing maipapan iti panawen idi inutobmo ti maysa a banag iti nasantuan a kasuratan ket tinulongannaka ti Espiritu Santo a maawatan daytoy. Aggigiddan nga agkansion iti maysa a kanta maipapan iti panagadal iti nasantuan a kasuratan, kas iti “Search, Ponder, and Pray” (Children’s Songbook, 109). Ania ti ibaga daytoy a kanta a nasken nga aramidentayo tapno maawatan dagiti nasantuan a kasuratan?

Doktrina ken Katulagan 138:18–35

Maaddaanto dagiti amin nga annak ti Nailangitan nga Ama iti gundaway a dumngeg iti ebanghelio.

Kalpasan a nailansa iti krus ni Jesucristo, sinarungkaranna dagiti napudno a Santona iti lubong ti espiritu. Binilinna ida nga ikasaba ti ebanghelio kadagidiay saan pay a nakaawat iti daytoy.

Dagiti Mabalin nga Aktibidad

• Ipakitam ti ladawan ti maysa a tanem (kitaen iti Libro ti Arte ti Ebanghelio, num. 58, 59 wenno Dagiti Ladawan iti Biblia, num. 14), wenno mangidrowing iti maysa a ladawan ti tanem iti pisarra. Ipakitam ti maysa a ladawan ni Jesucristo iti lubong ti espiritu bayat ti kaadda ti bagina iti tanem, (kas iti maysa iti balabala ita a lawas iti Umaykayo, Sumurot Kaniak—Para kadagiti Indibidual ken Pamilia). Bayat nga ar-aramidem daytoy, agsaludsodka tapno matulongan dagiti ubbing a mangkita kadagiti kangrunaan a detalye iti Doktrina ken Katulagan 138:18–19, 23–24, 27–30, kas iti no asino ti sinarungkaran ni Jesus, no kasano ti nariknada, ken no ania ti kiniddawna kadakuada nga aramidenda.

• Ipakitam iti maysa a ladawan dagiti misionario (kitaen iti Libro ti Arte ti Ebanghelio, num. 109, 110), ket kiddawem kadagiti ubbing a mangibinglay iti no ania ti ar-aramiden dagiti misionario. Mabalinmo pay nga awisen ida a mangiyakem iti sumagmamano a banag nga ar-aramiden dagiti misionario. Ibasam ti Doktrina ken Katulagan 138:31–34 kadagiti ubbing. Ilawlawag a no adda dagiti misionario ditoy daga, adda met dagiti misionario iti lubong dagiti espiritu a mangisursuro kadagiti tao sadiay.

Isuro ti Doktrina: In-inauna nga Ubbing

Doktrina ken Katulagan 137:1–5

Inikkannak ti Dios iti wagas a makadennak ti pamiliak iti agnanayon.

Naaddaan ni Joseph Smith iti parmata ti celestial a pagarian ket nakitana dagiti nagannak ken kabsatna a lalaki a ni Alvin sadiay. Isuro daytoy a parmata a no nalintegtayo, mabalin nga agtultuloyto ti relasion ti pamiliatayo iti sumaruno a biag.

Dagiti Mabalin nga Aktibidad

• Awisem dagiti ubbing a mangbasa iti Doktrina ken Katulagan 137:1–5 ket mangidrowing iti maysa a ladawan iti no ania ti nabasada (kitaen met iti panid ti aktibidad ita a lawas). Kasano koma ti narikna ni Joseph Smith idi nakitana dagiti miembro ti pamiliana iti celestial a pagarian?

• Ipabuyam ti video a “Families Can Be Together Forever” (ChurchofJesusChrist.org), wenno agkansion iti maysa a kanta a maipapan kadagiti pamilia, kas iti “Families Can Be Together Forever” (Children’s Songbook, 188). Ania ti isuro ti video wenno ti kanta maipapan iti no ania ti mabalin nga aramidentayo tapno agbalin nga agnanayon dagiti pamiliatayo?

Doktrina ken Katulagan 138:1–11

No utobek dagiti nasantuan a kasuratan, mabalin a tulongannak ti Espiritu Santo a maawatak dagitoy

Ania ti mabalin a masursuro dagiti ubbing manipud iti pagwadan ni Presidente Joseph F. Smith a mabalin a makapasayaat iti wagas a panagadalda kadagiti nasantuan a kasuratan?

Dagiti Mabalin nga Aktibidad

• Awisem dagiti ubbing a basaen ti Doktrina ken Katulagan 138:1–11, ket tulongam ida a mangisurat iti maysa a binatog a manggupgop iti padas ni Presidente Joseph F. Smith. Ania ti inaramidna a nakaigapuan iti nakaskasdaaw a parmatana? Ania ti kayat a sawen ti panangutob wenno panangamiris kadagiti nasantuan a kasuratan?

• Saludsodem kadagiti ubbing no ania ti aramidenda no addaanda kadagiti saludsod maipapan iti ebanghelio? Ibinglaymo ti sumagmamano a pagarigan manipud kadagiti nasantuan a kasuratan wenno iti bukodmo a biag idi ut-utobem dagiti nasantuan a kasuratan ket nangyeg kenka iti pannakaawat manipud iti Espiritu (kitaen, kas pagarigan ti, 1 Nephi 11:1–6; Doktrina ken Katulagan 76:19–24; Joseph Smith—Pakasaritaan 1:11–12).

Doktrina ken Katulagan 138:12–35

Maaddaanto dagiti amin nga annak ti Nailangitan nga Ama iti gundaway a dumngeg iti ebanghelio.

Naammuan ni Presidente Joseph F. Smith a ti aramid a panangikasaba iti ebanghelio ket agtultuloy iti lubong ti espiritu. Ipanamnama daytoy nga aramid a maaddaanto ti tunggal maysa iti gundaway nga umawat iti ebanghelio.

Dagiti Mabalin nga Aktibidad

• Iti pisarra, ilistam ti sumagmamano a bersikulo manipud iti benneg 138. Kalpasanna ilistam, iti sabali nga urnos, dagiti palawag a manggupgop ti tunggal asmang dagiti bersikulo. Awisem dagiti ubbing a mangiparis kadagiti palawag kadagiti umisu a bersikulo. Mabalin a mairaman dagiti bersikulo 12–16 (naguummong dagiti nalinteg nga espiritu tapno urayenda nga agparang ni Jesus ), 18–19 (agparang ni Jesus kadagiti nalinteg nga espiritu), 29–30 (mangtuding ni Jesus kadagiti mensahero a mangikasaba ti ebanghelio), 31–35 (ikasaba dagiti nalinteg nga espiritu ti ebanghelio), ken dadduma pay. Kalpasan a makaaramid dagiti ubbing iti panagparis, kiddawem kadakuada a mangibinglay iti no ania ti nasursuroda manipud kadagiti bersikulo.

• Kiddawen iti sumagmamano nga ubbing a mangbasa iti Doktrina ken Katulagan 138:33 tapno maammuan no ania dagiti pagbatayan iti ebanghelio ti naisuro kadagiti espiritu dagiti natay. Kiddawen iti dadduma pay nga ubbing a mangbasa kadagiti pagbatayan a naisuro iti Pagannurotan ti Pammati 1:4. Ania ti nagpadaan dagitoy a bersikulo, ken ania ti nagdumaanda? Ania ti isuro daytoy kadatayo maipapan iti Nailangitan nga Ama ken iti planona?

Yallukoy ti Panagsursuro iti Pagtaengan

Awisen dagiti ubbing a mangplano iti oras ita a lawas no kaano nga utobendanto dagiti nasantuan a kasuratan a basbasaenda.

Panangpadur-as iti Panangisurotayo

Yallukoy ti panagraem. Tulongam dagiti ubbing a makaawat a ti panangpanunot maipapan iti Nailangitan nga Ama ken ni Jesucristo ti napateg a paset ti panagraem. Mabalinmo a palagipan dagiti ubbing nga agbalin a managraem babaen ti siuulimek a panagkanta wenno panagdayyeng iti kanta ti Primary wenno panangi-display iti maysa a ladawan ni Jesus.