Pagbaludan ti Carthage

Nobiembre 22–28

Doktrina ken Katulagan 135–136

“Isu ‘Pinaneknekanna ti Misionna ken dagiti Aramidna iti Bukodna a Dara’”

Bayat iti panagsaganam a mangisuro ti Doktrina ken Katulagan 135–36, kitaen dagiti pagbatayan a nangimpluensia iti biagmo. Ibilangmo no kasano a dagiti kapanunotan iti daytoy a balabala ket mabalin a makatulong kadagiti ubbing a masursuro ken mayaplikarda dagitoy a pagbatayan.

Isuratmo dagiti Impresionmo

Yawis ti Panagbibinninglay

Awisem dagiti ubbing a mangibinglay iti maysa a banag a malagipda a nasursuroda ita a tawen maipapan ken ni Joseph Smith ken no ania ti naipatungpalna. Ipakitam dagiti ladawan manipud iti daytoy a tawen iti Umaykayo, Sumurot Kaniak—Para kadagiti Indibidual ken Pamilia wenno manipud kadagiti immun-una a panid ti aktibidad a makatulong kadakuada.

Isuro ti Doktrina: In-inaudi nga Ubbing

Doktrina ken Katulagan 135:1–2

Impaay da Joseph Smith ken Hyrum Smith ti biagda para iti ebanghelio ni Jesucristo.

Makatulong kadagiti ubbing ti pakaammuan iti kinamartir da Joseph Smith ken Hyrum Smith a makatulong a marikna dagiti ubbing ti panagyaman para kadagiti pammaneknek ken sakripisio dagitoy naindaklan a lallaki.

Dagiti Mabalin nga Aktibidad

• Usarem ti “Chapter 57: The Prophet Is Killed” (Doctrine and Covenants Stories, 201–5) tapno maisaritam kadagiti ubbing ti maipapan iti no kasano ti pannakatayda Joseph Smith ken ti kabsatna a ni Hyrum Smith. Wenno kiddawem iti maysa nga ubing a mangisarita iti estoria. Iburaymo ti pammaneknekmo a pudno a propeta ni Joseph Smith ket impaayna ti biagna para iti Apo ken iti ebangheliona.

• Ibinglaymo kadagiti ubbing dagiti sumagmamano a ragup dagiti balikas manipud iti bersikulo ti Libro ni Mormon a binasa ni Hyrum Smith sakbay a napan iti Pagbaludan iti Carthage, a naisurat iti Doktrina ken Katulagan 135:5. Pagsasaritaanyo maipapan iti no kasano a mabalin a liniwliwa daytoy a bersikulo ni Hyrum. Mangibinglay kadagiti nasantuan a kasuratan a mangyeg kenka iti liwliwa no madanagan wenno malidayanka.

Doktrina ken Katulagan 135:3

Maysa a Propeta ti Dios ni Joseph Smith.

Iti unos ti tawen, nasursuro dagiti ubbing no ania ti impaltiing ti Apo babaen ken ni Joseph Smith. Mabalin a matulongam ida a manglagip ken mangdayaw no kasano a nangbendision ti aramid ni Joseph iti biagda.

Dagiti Mabalin nga Aktibidad

• I-display dagiti banag a mangibagi iti aramid ni Propeta Joseph Smith, kas iti Libro ni Mormon, ti Doktrina ken Katulagan, wenno maysa a ladawan dagiti misionario wenno maysa a templo. Babaen ti panangusar iti ragup dagiti balikas manipud iti Doktrina ken Katulagan 135:3, ibinglaymo kadagiti ubbing dagiti sumagmamano a banag nga inaramid ti Apo babaen ken ni Joseph Smith para iti pannakaisalakantayo. Awisem dagiti ubbing a mangpili iti maysa kadagitoy a banag ket ibinglayda no apay nga agyamyamanda para iti daytoy.

• Bayat ti panangkolor dagiti ubbing iti panid ti aktibidad ita a lawas, agkanta wenno agpatokarka iti maysa a kanta maipapan ken ni Joseph Smith, kas iti “Praise to the Man” (Hymns, num. 27). Ibinglaymo dagiti riknam maipapan iti Propeta.

  

  Ti Amerikano a Propeta, ni Del Parson

Doktrina ken Katulagan 136

Ikkan na tayo ti Dios kadagiti bilin a makatulong kadatayo.

Nakapadas dagiti Santo iti adu a pannubok kadagiti tawtawen kalpasan iti ipapatay ni Joseph Smith. Kasano a makatulong ti balakad ti Apo nga inted na kadagiti Santo kadagiti ubbing a sursuruam?

Dagiti Mabalin nga Aktibidad

• Ibinglaymo kadagiti ubbing dagiti sumagmamano a karit a napadasan dagiti Santo bayat iti panagtalawda iti Nauvoo ken panaguummongda iti Winter Quarters (kitaen kadagiti kapitulo 60 ken 62 iti Doctrine and Covenants Stories, 211–16, 222–24). Mangikabil iti maysa a ladawan ti Templo iti Nauvoo iti maysa a bangir ti siled, ket mangpartuatka iti maysa a simple a pagtaengan iti sabali a bangir—nalabit a mangusar iti ules ken sumagmamano a tugaw wenno maysa a lamisaan. Awisem dagiti ubbing nga agummongda iti asideg ti ladawan, ket ibagam kadakuada nga iti maysa a tawen ket kagudua kalpasan iti ipapatay ni Joseph Smith, napilitan dagiti Santo a pumanaw iti Nauvoo. Awisem dagiti ubbing a tumalaw manipud iti templo ket agtitipon iti pagtaengan a mangibagi iti panagdaliasat iti Winter Quarters.

• Ilawlawagmo a nangted ti Apo iti maysa a paltiing ken ni Brigham Young, a masarakan iti Doktrina ken Katulagan 136, tapno matulongan dagiti Santo bayat iti panagdaliasatda iti Tanap ti Salt Lake. Basaem dagiti sumagmamano a ragup dagiti balikas manipud iti benneg 136 a naglaon iti balakad a maawatan dagiti ubbing, ket awisem ida a mangyakem wenno idrowingda no ania ti kiniddaw ti Apo nga aramidenda bayat iti panagdaliasatda. Kas pagarigan, mabalin nga idrowing dagiti ubbing ti bagbagida a mangisubsubli iti maysa a banag a binulodda manipud iti maysa a gayyem, wenno mabalinda nga agkansion iti maysa a kanta ti Primary bayat ti panagsasalada iti lawlaw ti sinan-campfire (kitaen kadagiti bersikulo 25, 28).

Isuro ti Doktrina: In-inauna nga Ubbing

Doktrina ken Katulagan 135

Impaay da Joseph Smith ken Hyrum Smith ti biagda para iti ebanghelio ni Jesucristo.

Ti pannakangngeg maipapan kadagiti sakripisio da Joseph Smith ken Hyrum Smith ti mangpapigsa iti pammati dagiti ubbing ken ti tarigagayda nga agbalin a napudno kadagiti pammaneknekda.

Dagiti Mabalin nga Aktibidad

• Kiddawen kadagiti ubbing a mangibinglay no ania ti ammoda maipapan iti no kasano a napapatay da Joseph ken Hyrum Smith. No kasapulanda iti tulong, iturongmo ida iti Doktrina ken Katulagan 135:1 wenno “Chapter 57: The Prophet Is Killed” (Doctrine and Covenants Stories, 201–5). Awisem dagiti ubbing nga iladawanda nga agnanaedda iti Nauvoo idi natay ti Propeta. Kiddawem nga ibinglayda no ania ti mabalin a nariknada. Iburay ti pammaneknekmo maipapan ken ni Joseph Smith, ket awisem dagiti ubbing nga aramidenda met daytoy.

• I-display dagiti ladawan ti propeta (kitaen iti Libro ti Arte ti Ebanghelio, num. 14, 18, 67). Ania dagiti sumagmamano a banag nga idawat ti Dios nga aramiden dagiti propeta? Ilawlawag nga inkari ti Apo a bendisionanna dagiti propeta para kadagiti sakripisio nga aramidenda iti panagserbida Kenkuana (kitaen ti Mateo 10:39).

Doktrina ken Katulagan 135:3

Maysa a Propeta ti Dios ni Joseph Smith.

Kas kadagiti amin a propeta, pinaneknekan ni Joseph Smith ni Jesucristo ken insurona kadatayo no kasano nga umasidegtayo Kenkuana. Tulongam dagiti ubbing a makitada no kasano a nga impatungpal ni Joseph Smith ti misionna.

Dagiti Mabalin nga Aktibidad

• Aggigiddan a basaen ti Doktrina ken Katulagan 135:3, ket kiddawen kadagiti ubbing nga ilasinda no ania dagiti naileppasen ni Joseph Smith. Isuratmo iti pisarra no ania ti masarakanda. Awisem dagiti ubbing a mangpili iti maysa kadagitoy a banag ket ibinglayda no apay nga agyamyamanda para iti daytoy.

• Allukoyem dagiti ubbing nga tunggal maysa agpanunot iti maipapan iti maysa a gayyem wenno maysa nga ay-ayatenda a bassit ti ammona maipapan ken ni Joseph Smith. Ania koma ti sungbatda no agsaludsod dayta a tao iti, “Apay a napateg unay ni Joseph Smith para kenka?” Awisen dagiti ubbing nga agpraktis no ania ti sungbatda iti daytoy a tao.

Doktrina ken Katulagan 136:4, 10–11, 18–30

Mabalin a bendisionannak ti Apo no mangikarkarigatannak.

Kalpasan a napapatay ni Joseph Smith, napagtalaw dagiti Santo iti Nauvoo. Inturong ni Brigham Young ida iti Winter Quarters, a sadiay a nagsaganada para iti napapaut pay a panagdaliasat iti Tanap ti Salt Lake.

Dagiti Mabalin nga Aktibidad

• Gupgopem dagiti padas dagiti Santo kalpasan a napapatay ni Propeta Joseph Smith (kitaen kadagiti kapitulo 58, 60, ken 62 iti Doctrine and Covenants Stories, dagiti panid 206–8, 211–16, 222–24). Awisem dagiti ubbing a mangipapan no kasano ti mariknada no nasken a talawanda dagiti pagtaenganda ket agsapulda iti baro a lugar a pagyananda iti langalang. Ilawlawag nga iti Doktrina ken Katulagan 136, nangted ti balakad ti Apo tapno matulongan dagiti Santo iti panagdaliasatda. Dutokam iti tunggal ubing ti sumagmamano a bersikulo manipud iti daytoy a paltiing, kas kadagiti bersikulo 4, 10–11, 18–30, ket kiddawen dagiti ubbing a mangsapul iti maysa a banag a makatulong kadakuada kadagiti pagdandanagan wenno pagbutbutnganda.

• Tulongam dagiti ubbing a mangpanunot kadagiti pannubok a mapadpadasan dagiti tao ita. Awisem ida a mangsapul iti maysa a banag iti benneg 136 a mabalin nga ibinglayda a mangparegta iti maysa a tao a makapadpadas iti kasta a pannubok. Mabalin met a mangsapul dagiti ubbing kadagiti makaparegta a mensahe iti “Come, Come, Ye Saints” (Hymns, no. 30), maysa a himno a kinanta dagiti Santo iti panagdaliasatda.

Yallukoy ti Panagsursuro iti Pagtaengan

Awisem dagiti ubbing a mangibinglay iti pamiliada wenno iti maysa a gayyem no apay nga agyamanda ken ni Propeta Joseph Smith.

Panangpadur-as iti Panangisurotayo

Naregta dagiti ubbing. No dadduma mabalin a mariknam a ti enerhia dagiti ubbing ti pakasingaan iti panagsursuro. Ngem mabalinmo nga usaren dagiti aktibo a kababalinda babaen iti panangawis kadakuada nga agdrowing, agkanta, wenno mangyakem iti maysa a pagbatayan ti ebanghelio (kitaen iti Panangisuro iti Wagas ti Mangisalakan, 25–26).