Datayo a Kaduatayo Ida ken Isuda a Kaduadatayo , ni Caitlin Connolly

Nobiembre 1–7

Doktrina ken Katulagan 125–128

“Naragsak a Timek para kadagiti Sibibiag ken kadagiti Natay”

No sursuruam dagiti in-inaudi nga ubbing ken agkasapulan iti nayon a tulong, kitaen iti “Panangipaay iti Kasapulan dagiti In-inaudi nga Ubbing iti daytoy a resource.

Isuratmo dagiti Impresionmo

Yawis ti Panagbibinninglay

Awisem dagiti ubbing a mangpanunot iti maysa a banag a nasursuroda ita a lawas iti pagtaengan wenno iti Primary. Ikkam ida iti sumagmamano a minuto a mangidrowing iti ladawan no ania ti pampanunotenda, ket ibinglay daytoy iti klase.

Isuro ti Doktrina: In-inaudi nga Ubbing

Doktrina ken Katulagan 126:3

Ay-ayatek ti pamiliak.

Kalpasan a nakaawid ni Brigham Young a naggapu a nangaskasaba iti ebanghelio, imbaga ti Apo kenkuana nga ipamaysana a taripatuen ti pamiliana.

Dagiti Mabalin nga Aktibidad

• Ibinglay kadagiti ubbing ti impormasion maipapan ken ni Brigham Young iti “Chapter 50: The Saints in Nauvoo” (Doctrine and Covenants Stories, 184), wenno gupgopenyo ti Doktrina ken Katulagan 126 iti bukodmo a balikas. Ibasam ti Doktrina ken Katulagan 126:3 kadagiti ubbing, a mangyunay-unay iti ragup dagiti balikas a “taripatuen a naimbag ti kaamaam.” Ania ti kaipapanan iti panangtaripato a naimbag kadagiti pamiliatayo? Tulongam dagiti ubbing a mangpanunot kadagiti wagas a maipakitada iti panagayatda kadagiti miembro ti pamiliada.

• Sakbay ti klase, awisem dagiti ubbing a mangitugot iti ladawan ti pamiliada (wenno dawatem kadakuada a mangdrowing kadagiti ladawan). Ket kiddawem kadakuada a mangibinglay iti maysa a banag a pagaayatda maipapan iti pamiliada. Mangibinglay iti ladawan ti pamiliam, ken aramidem ti isu met laeng. Ilawlawag no apay a kayat ti Nailangitan nga Ama a taripatuentayo dagiti miembro ti pamiliatayo. Agkansion iti maysa a kanta a mangisuro iti daytoy a kinapudno, kas iti “When We’re Helping” (Children’s Songbook, 198).

Doktrina ken Katulagan 128:5, 12

Masapul ti amin nga annak ti Dios ti gundaway a mabuniagan.

Mainayon iti panangtulong kadagiti ubbing nga agsagana a mangaramid kadagiti bukodda a katulagan iti panagbuniag, isurom kadakuada a mabalintayo a tulongan dagiti natay a saan a nabuniagan nga umawat kadagiti isu met laeng a bendision.

Dagiti Mabalin nga Aktibidad

• Ipakita ti ladawan ni Jesucristo a mabumbuniagan (kitaen iti Libro ti Arte ti Ebanghelio, num. 35), wenno ipabuya ti video a “The Baptism of Jesus” (ChurchofJesusChrist.org). Saludsodem kadagiti ubbing no adda nakitadan a maysa a tao a nabuniagan. Ania ti malagipda maipapan iti daytoy? Usaren ti ladawan wenno video tapno maipakita kadagiti ubbing a no mabuniagantayo, mairaremtayo iti danum kalpasanna ket lumung-aw, kas iti inaramid ni Jesus. Lukiben iti Doktrina ken Katulagan 128:12, ken ilawlawag nga insuro ni Joseph Smith a ti panagbuniag ti mangipalagip kadatayo iti Panagungar.

• Isaritam kadagiti ubbing maipapan iti maysa a tao nga am-ammom (kas iti maysa a kapuonan) a natay a saan a nabuniagan. Basaem ti Doktrina ken Katulagan 128:5, ket pagsisinnublatem ida a mangiggem iti ladawan ti maysa a puente a pagbuniagan iti templo (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Paneknekan a palubosannatayo ti Nailangitan nga Ama a mabuniagan ditoy rabaw ti daga para kadagiti tao a natayen. Iti kastoy a wagas amin nga annak ti Dios ket mabuniagan ken makaaramid kadagiti katulagan Kenkuana.

Doktrina ken Katulagan 128:18

Kayat ti Nailangitan nga Ama nga agsursuroak maipapan iti pakasaritaan ti pamiliak.

Adda dagiti simple a wagas a mabalin a makiraman dagiti in-inaudi nga ubbing iti aramid a family history. Tulongam ida a makarikna iti ayat kadagiti tattao iti family treeda.

Dagiti Mabalin nga Aktibidad

• Mangaramid iti kadena a papel nga addaan iti nagan ti tattao iti pamiliayo (kitaen iti panid ti aktibidad iti daytoy a lawas), ken itugot daytoy tapno ipakita iti klase. Isarita ti sumagmamano a banag maipapan iti tattao nga adda iti kadenam. Ibasam kadagiti ubbing ti Doktrina ken Katulagan 128:18, ken ilawlawag nga insuro ni Joseph Smith nga “adda mamagtugmok a saanen nga agsina … iti nagbaetan dagiti amma ken dagiti annakda.” Tulongam dagiti ubbing a mangaramid iti bukodda a family chain, ket awisen ida a mangyawid kadagitoy a kadena ket agpatulong kadagiti nagannakda nga agnayon kadagiti nagan dagiti inapoda.

• Kiddawen dagiti ubbing a mangibinglay ti maysa a banag maipapan iti maysa kadagiti lelong ken lelangda. Isalaysaymo ti maysa kadagiti paboritom nga estoria maipapan kadagiti nagannak wenno dagiti lelong ken lelangmo. Mangipakita kadagiti ladawan, no mabalin. Allukoyem dagiti ubbing a mangadal iti ad-adu pay maipapan kadagiti lelong ken lelangda wenno dagiti dadduma pay a kapuonan.

Isuro ti Doktrina: In-inauna nga Ubbing

Doktrina ken Katulagan 126

Makatulongak a mangaywan iti pamiliak.

Kasano a matulongam dagiti ubbing a sursuruam a makapagserbi kadagiti miembro ti pamiliada iti addaan kaipapanan a wagas?

Dagiti Mabalin nga Aktibidad

• Aggigiddan a basaen ti Doktrina ken Katulagan 126:3. Apay ngata a kiniddaw ti Nailangitan nga Ama ken ni Brigham Young a “taripatuen[na] a naimbag ti kaamaan[na]”? Kasano a maaramidtayo ti isu met laeng para kadagiti pamiliatayo? Mangaramid iti listaan dagiti banag a mabalin nga aramidentayo itan tapno mapagserbiantayo dagiti pamiliatayo. Kasano a makatulong kadatayo iti panagaramid kadagitoy a banag nga ad-adda nga agbalin a kas iti Nailangitan nga Ama?

• Ibinglaymo kadagiti ubbing dagiti estoria ni Sister Carole M. Stephens maipapan iti apokona a lalaki a ni Porter iti (kitaen iti “We Have Great Reason to Rejoice,” Ensign wenno Liahona, Nob. 2013, 115). Ania ti inaramid ni Porter a panangtaripato iti pamiliana? Kasano a masurottayo ti pagwadanna?

Doktrina ken Katulagan 128:1, 15–18

Makaaramid ti panagbuniag para kadagiti natay ti “maysa a mamagtugmok (welding link)” iti nagbaetan dagiti kapuonak ken siak.

Insuro ni Joseph Smith nga ti panagbuniag para kadagiti natay iti mamagkappeng kadatayo ken dagiti kapuonantayo a kas kadagiti silpo iti maysa a kadena. Kasano a matulongam dagiti ubbing a makariknada iti ragsak nga aggapu iti pannakaammo maipapan kadagiti kapuonantayo ken maisigurado a dagiti aramid ti templo ket maaramid para kadakuada?

Dagiti Mabalin nga Aktibidad

• Bingayem ti klase iti dua a grupo, ket kiddawem ti maysa a grupo a basaen ti Doktrina ken Katulagan 128:1 tapno takuatenda no ania a banag ti adda iti panunot ni Joseph Smith. Kiddawen iti sabali a grupo a basaenda ti bersikulo 17 ket takuatenda no ania a banag ti ibilangna a “kadayagan.” Paibinglaymo no ania ti natakuatanda, ken pagsasaritaan no apay a daytoy a topiko ti kadayagan. No mabalin, awisen ti maysa nga agtutubo a nakaaramiden iti panagbuniag para kadagiti natay a mangibinglay iti padasna ken mangilawlawag no apay nga ar-aramidentayo daytoy a trabaho.

• Agusarka iti maysa nga adalen a banag (object lesson) a mangipakita a kasapulan a tulongantayo dagiti kapuonantayo a saan a nabuniagan. Kas pagarigan, mangipakita iti maysa a regalo wenno makan, ngem ikabil daytoy iti saan a magaw-at ti maysa kadagiti ubbing. Ibagam iti dayta nga ubing a mabalinna nga alaen dayta a banag ngem saanna mabalin ti pumanaw iti tugawna. Saludsodem kadagiti dadduma nga ubbing no ania ti mabalinda nga aramiden tapno matulonganda ti ubing a makaawat iti daytoy. Aggigiddan a basaen ti Doktrina ken Katulagan 128:15, ket pagsasaritaan no kasano a mainaig daytoy iti adalen a banag.

• Awisen dagiti ubbing nga agaramid iti kadena a papel nga addaan kadagiti nagan dagiti nagannak, dagiti lelong ken lelang, dagiti lelong ken lelangda iti tumeng, ken dadduma pay (kitaen ti panid ti aktibidad kadaytoy nga adalen). No saan nga ammo dagiti ubbing dagiti nagan ti kapuonanda, guyugoyen ida a mangsukisok kadagiti nagan ken isurat dagitoy iti kadena iti pagtaenganda. Aggigiddan a basaen ti Dokrina ken Katulagan 128:18 tapno maammuan no ania ti “mamagtugmok (welding link)” nga mamagbalin a “sibubukel ken naan-anay” ti pakasaritaan ti pamiliatayo. Isarita ti maysa nga estoria maipapan iti maysa a kapuonam a nakatulong kenka a nangrikna a konektadoka kenkuana. Wenno ipabuya iti video a “Courage: I Think I Get It from Him” (ChurchofJesusChrist.org).

• Ipakitam kadagiti ubbing iti maysa a temple recommend, ket ibagam kadakuada no kasano a nakaalaka iti maysa. Tulongan ida a kitaen ti masakbayan iti panangaladanto iti bukodda a temple recommend tapno makapanda iti templo ket agpabuniagda para kadagiti bukodda a kapuonan.

  

  Mabalin a masarakantayo dagiti nagan dagiti kapuonantayo ket maaramidtayo dagiti ordinansa iti templo para kadakuada.

Yallukoy ti Panagsursuro iti Pagtaengan

Awisem dagiti ubbing nga agdamag iti maysa a tao iti pagtaenganda a mangtulong kadakuada a mangammo ti ad-adu pay maipapan iti pakasaritaan ti pamiliada. Mabalin nga agdamagda tapno makangngegda kadagiti estoria maipapan kadagiti kapuonanda wenno usaren ti FamilySearch.org a mangsapul iti nagnagan dagiti kapuonan a saan pay a nabuniagan.

Panangpadur-as iti Panangisurotayo

Tulongam dagiti ubbing a mangipakita iti kinamanagpartuatda. No dagiti ubbing ti agaramid, agdrowing, wenno agkolor iti maysa a banag a mainaig iti estoria wenno pagbatayan a sursuruenda, masansan a nasaysayaat a malagipda daytoy. Mabalinda pay nga usaren no ania ti partuatda tapno maisuroda dagiti dadduma. (Kitaen iti Panangisuro iti Wagas ti Mangisalakan,25).