Nauvoo

Ti Napintas a Nauvoo, ni Larry Winborg

Oktubre 25–31.

Doktrina ken Katulagan 124–125

“Balay babaen ti Naganko”

Ania dagiti adalen manipud iti Doktrina ken Katulagan 124–25 a nasken a masursuro dagiti ubbing? Utobem daytoy a saludsod bayat ti panagadalmo iti daytoy a lawas.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ipakita ti ladawan ti maysa a templo a kaasitgan kenka. Saludsodem kadagiti ubbing no ania ti ammoda maipapan kadagiti templo. Awisem ida a mangibinglay iti riknada maipapan iti ipapandanto iti templo iti maysa nga aldaw.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 124:15, 20

Naragsak ni Jesus no agaramidak iti naimbag.

Iti paltiing a naisurat iti benneg 124, impeksa ti Apo ti pananganamongna kada Hyrum Smith ken George Miller gapu ta inkarkarigatanda ti mangsurot Kenkuana. Kasano a matulongamto dagiti ubbing a mangbigbig a maragsakan ti Apo no ikarigatanda ti agaramid iti naimbag?

Dagiti Mabalin nga Aktibidad

• Tulongam dagiti ubbing nga agpanunot kadagiti banag a mabalinda nga aramiden a nasayaat. Ipakitam dagiti ladawan a mangted kadakuada kadagiti kapanunotan (masarakam ti sumagmamano iti Libro ti Arte ti Ebanghelio wenno kadagiti magasin iti Simbaan). Kiddawen kadagiti ubbing nga itudoda dagitoy nasayaat a banag. Ibasam ti Doktrina ken Katulagan 124:15 kadagiti ubbing, ket kiddawen kadakuada a denggenda no kasano ti narikna ti Apo idi pinili ni Hyrum Smith iti nagaramid ti nasayaat. Kasano ti marikna ni Jesus no padasentayo ti agaramid kadagiti naimbag a banag?

• Ikkan dagiti ubbing iti papel a sinanpuso, ket kiddawem kadakuada nga idrowingda ti bagbagida nga agar-aramid kadagiti naimbag a banag. Awisem ida a mangibinglay iti klase no ania dagiti indrowingda. Kasano ti mariknatayo no agaramidtayo iti maysa a naimbag a banag? Paneknekan a naragsak ni Jesus no padasentayo iti agaramid iti umno a banag.

• Agkansion iti maysa a kanta maipapan kadagiti banag a kayat ni Jesus nga aramidentayo, kas iti “Jesus Wants Me for a Sunbeam” (Children’s Songbook, 60–61).

Doktrina ken Katulagan 124:28–29, 39

Bilinen ti Apo dagiti taona a mangbangon kadagiti templo.

Nagbalinen dagiti templo a paset ti plano ti Nailangitan nga Ama para kadagiti annakna. Ti pannakaawat iti daytoy ti makatulongto kadagiti ubbing a sursuruam a makarikna iti ad-adda pay a panagraem iti templo.

Dagiti Mabalin nga Aktibidad

• Tulongam dagiti ubbing a makaawat nga idi nakasarak dagiti Santo iti baro a pagtaenganda iti Nauvoo, imbaga ti Apo kadakuada a mangbangon iti templo (kitaen iti “Chapter 50: The Saints in Nauvoo” Doctrine and Covenants Stories, 183–84, wenno iti maitutop a video iti ChurchofJesusChrist.org). Awisem dagiti ubbing nga agpammarang nga agbangbangonda iti templo.

• Basaem a kaduam dagiti ubbing daytoy ragup ti balikas: “Ti nasantuan a balayko, a kanayon a maibilbilin kadagiti taok a bangonenda iti nasantuan a naganko” (Doktrina ken Katulagan 124:39). Paiggaman kadagiti ubbing ti maysa a ladawan ti nagkauna a templo (kitaen iti Libro ti Arte ti Ebanghelio, num. 52 wenno ti panid ti aktibidad iti daytoy a lawas) ken maysa a ladawan iti templo iti lugaryo. Ilawlawag a kanayon a binilin ti Nailangitan nga Ama ken ni Jesucristo dagiti taoda nga agbangon kadagiti templo—iti nagkauna a panawen ken iti aldawtayo. Ibinglay dagiti balikas ken ragup ti balikas manipud iti Doktrina ken Katulagan 124:28–29 tapno matulongan dagiti ubbing a maawatan no apay a kayat ti Apo nga agbangontayo kadagiti templo.

• Awisem dagiti ubbing a mangileppas iti panid ti aktibidad iti daytoy a lawas tapno matulongan ida a makaawat a tattaonatayo ti Dios ket kanayon a nabilin dagiti tao ti Dios nga agbangonda kadagiti templo.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 124:12–21

Maragsakan ti Apo no napudnoak.

Iti benneg 124, pinadayawan ti Apo dagiti sumagmamano a Santo gapu iti kinapudnoda. Makatulong dagiti balikasna kadagiti ubbing a mangilasin kadagiti kababalin a masapul a padur-asenda.

Dagiti Mabalin nga Aktibidad

• Pumili iti sumagmamano kadagiti naimbag a kababalin a nadakamat iti Doktrina ken Katulagan 124:12–21, ket isurat dagitoy iti pisarra iti lawlaw ti ladawan ti Mangisalakan. Awisem dagiti ubbing a mangsukisok kadagiti bersikulo 12–21, a mangsapsapul kadagitoy a balikas. Tulongam ida a makaawat kadagiti balikas a mabalin a saanda a pamiliar kadagitoy. Segun kadagitoy a bersikulo, kasano ti marikna ti Apo maipapan kadagiti tao a mangpadur-as kadagitoy a kababalin?

Doktrina ken Katulagan 124:28–30, 38–41

Bilinen ti Apo dagiti taona a mangbangon kadagiti templo.

Dagiti ubbing a sursuruam iti saan a mabayag umdaston ti tawenda tapno makapanda iti templo ken makiraman kadagiti ordinansa iti templo. Ania ti maaramidmo tapno matulongan ida a makapagsagana?

Dagiti Mabalin nga Aktibidad

• Kalubam ti maysa a ladawan wenno drowing ti templo. Awisem dagiti ubbing a mangbasa iti Doktrina ken Katulagan 124:38–41 para kadagiti pagilasinan maipapan iti no ania ti adda iti ladawan. Palukatam kadagiti ubbing ti ladawan ken paglilinnawagan no ania ti isuro dagitoy a bersikulo maipanggep iti no apay a kayat ti Apo a mangbangontayo kadagiti templo.

• Awisem dagiti ubbing a basaenda ti Doktrina ken Katulagan 124:28–30 a mangsapul kadagiti rason nga inted ti Apo ken ni Joseph Smith para iti pannakabangon ti Templo iti Nauvoo. Ibinglaymo ti mariknam maipapan iti templo ken ania man a padasmo iti panangaramid kadagiti panagbuniag para kadagiti natay. Tulongam dagiti ubbing a mangammo no kasano ti kabayag sakbay a mabalinda a makapagpabuniag para kadagiti natay iti templo.

• No adda temple recommendmo, ipakitam kadagiti ubbing, wenno mangawis iti maysa nga agtutubo ket ipakitana kadagiti ubbing ti recommendna. Ibagam kadagiti ubbing no apay a napateg ti temple recommend ken no ania ti rumbeng nga aramiden tapno makagun-od iti maysa. Allukoyen ida a mangrugi nga agsagana itan tapno makaalada iti bukodda a recommend.

  Ni Joseph Smith a kadua dagiti lallaki nga agbangbangon iti Templo ti Nauvoo

  Ni Joseph Smith iti Templo ti Nauvoo, ni Gary E. Smith

Doktrina ken Katulagan 124:91–92

Makaited kaniak ti bendision ti patriarka iti naparegta a pannarabay.

No addaankan iti maysa a bendision ti patriarka, irebyum daytoy sakbay ti panangisurom kadagiti ubbing maipapan kadagitoy a bendision. Apay a pagyamanam ti bendisionmo iti patriarka? Kasano a maparegtam dagiti ubbing nga agsagana a mangawat iti bendisionda iti patriarka?

Dagiti Mabalin nga Aktibidad

• Awisem ti maysa kadagiti ubbing a mangbasa iti Doktrina ken Katulagan 124:91-92, ken awisen ti klase a dumngeg no ania ti nakaawagan nga ipaaramidi ti Apo ken ni Hyrum Smith. Ania ti ammo dagiti ubbing maipapan iti bendision ti patriarka? No naawatmon iti maysa a bendision ti patriarka, ipakitam kadagiti ubbing no ania ti langana. (Laglagipen a sagrado dagiti naipangpangruna a linaon ti bendision ti patriarka.) Ilawlawag a naisangsangayan a bendision dagiti bendision ti patriarka a maalatayo manipud kadagiti patriarka. Dagitoy a bendision ti makatulong kadatayo a makasursuro iti ad-adu pay maipanggep iti bagbagitayo ken no ania ti kayat iti Nailangitan nga Ama nga aramidentayo.

• Ibilangmo ti mangawis iti maysa a nagannak wenno kabsat ti maysa kadagiti ubbing a sursuruam a mangibinglay iti klase no apay a pagyamananda ti bendision ti patriarkada. Kiddawem kadakuada nga ibinglayda no kasano nga inkeddengda a kayatda nga alaen ti bendisionda. Iburaymo ti pammaneknekmo maipapan iti bendision ti patriarka.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangibinglay iti maysa a miembro ti pamilia iti maysa a banag a nasursuroda maipapan kadagiti templo ken no apay a kayatda ti mapan iti templo iti maysa nga aldaw.

Panangpadur-as iti Panangisurotayo

Mailasin dagiti ubbing ti impluensia ti Espiritu. Isurom kadagiti ubbing a dagiti rikna a talna, ayat, ken bara nga adda kadakuada no agsarita wenno agkantada maipapan ken ni Jesucristo ken ti ebangheliona ket naggapu iti Espiritu Santo. Makapatibker dagitoy a rikna kadagiti pammaneknekda.

panid ti aktibidad: bilinen ni Jesus dagiti taona a mangbangon kadagiti templo