Templo iti Kirtland, ni Jon McNaughton

Septiembre 27–Oktubre 3

Doktrina ken Katulagan 109–110

“Balaymo Daytoy, ti Lugar ti Kinasantom”

Tapno maaddaan kadagiti naespirituan a padas iti panagadal ti Doktrina ken Katulagan 109-10 kadagiti ubbing iti klasem, umuna a sapulem ti maaddaan iti naespirituan a padas iti panangadal kadagitoy iti bukodmo.

Isuratmo dagiti Impresionmo

Yawis ti Panagbibinninglay

Mangipakita kadagiti ladawan a makatulong kadagiti ubbing a manglagip ken mangibinglay iti maysa a banag a nasursuroda maipanggep kadagiti prinsipio wenno paspasamak iti Doktrina ken Katulagan 109–10. Kas pagarigan, mabalinmo nga ipakita ti maysa a ladawan manipud iti balabala ita a lawas iti Umaykayo, Sumurot Kaniak—Para kadagiti Indibidual ken Pamilia.

Isuro ti Doktrina: In-inaudi nga Ubbing

Doktrina ken Katulagan 109:12–13; 110:1–7

Ti templo ti balay ti Apo.

Utobem no kasano a matulongam dagiti ubbing a mariknada ti panagrukbab para iti balay ti Apo ket kumita iti masakbayan iti aldaw no kaano a mabalindan ti sumrek iti “lugar ti Kinasanto[na]” (Doktrina ken Katulagan 109:13).

Dagiti Mabalin nga Aktibidad

• Kiddawem kadagiti ubbing nga ibagada kenka ti maysa a banag a magustuanda maipapan kadagiti pagtaenganda. Ipakita kadagiti ubbing ti maysa a ladawan ti Templo ti Kirtland, ken usaren ti Doktrina ken Katulagan 109:12–13; 110:1–7 a mangibaga maipanggep iti aldaw a naidaton ti templo ket nagbalin a balay ti Apo (kitaen met iti “Chapter 39: The Kirtland Temple Is Dedicated,” Doctrine and Covenants Stories, 154). Tapno maipakita a ti templo iti balay ti Apo, basaen ti sumaganad manipud iti kararag a pangidaton nga inted ni Joseph Smith: “Balaymo daytoy, ti lugar iti kinasantom” (Doktrina ken Katulagan 109:13). Kiddawen dagiti ubbing a mangibinglay no ania ti magustuanda maipapan iti templo.

• Ikkan iti tunggal ubing iti ladawan ti templo, wenno awisen ida a mangidrowing iti maysa. Sangkamaysa nga agkansion iti maysa a kanta maipapan iti templo, kas iti “I Love to See the Temple” (Children’s Songbook, 95). Awisem dagiti ubbing nga ingatoda dagiti ladawanda tunggal kantaenda ti balikas a “templo.” Ilawlawag kadakuada dagiti dadduma pay a balikas iti kanta a mangisuro kadatayo iti maysa a napateg a banag maipapan iti templo. Ibaga kadagiti ubbing no kasano ti mariknam maipapan iti templo ken no kasano nga ammom a balay daytoy ti Apo.

Doktrina ken Katulagan 110

Dagiti tulbek ti priesthood a kasapulan tapno maaramid iti trabaho ti Dios ket adda iti Simbaan ita a panawen.

Ti Templo ti Kirtland ket napateg iti pakasaritaan ti Simbaan. Nagpakita ni Jesucristo sadiay, kasta met dagiti nagkauna a propeta. Impaay dagitoy a propeta ken ni Joseph Smith dagiti tulbek ti priesthood a kasapulan para iti trabaho ti Dios iti ud-udina nga aldaw.

Dagiti Mabalin nga Aktibidad

• Usaren ti panid ti aktibidad ita a lawas wenno ti “Chapter 40: Visions in the Kirtland Temple” (Dagiti Estoria iti Doktrina ken Katulagan, 155–57) tapno isalaysay kadagiti ubbing maipapan kadagiti nailangitan a parsua a nagbisita iti templo. Mangibinglay ti ragup dagiti balikas manipud iti Doktrina ken Katulagan 110 a makatulong kenka ken dagiti ubbing tapno maawatan ti kinasagrado dagitoy a pasamak.

• Ipakitam kadagiti ubbing iti sumagmamano a tulbek ken pagsasaritaan maipapan iti no ania ti pakausaran dagiti tulbek. Pagsisinnublatem dagiti ubbing a mangiggem kadagiti tulbek ken agpammarangda a manglukat iti nakandaduan a ridaw. Bayat ti panangaramidda kadaytoy, ilawlawag nga inawat ni Joseph Smith dagiti tulbek ti priesthood iti Templo ti Kirtland. Dagitoy a tulbek ti manglukat iti bileg ken dagiti bendision tapno maaramidtayo iti trabaho ti Dios iti Simbaanna, kas iti panangibinglay ti ebanghelio ken aramid iti templo.

• Tapno matulongan dagiti ubbing a maawatanda dagiti tulbek nga impakumit ni Elijah ken ni Joseph Smith, aggigiddan nga agkanta iti maysa a kansion maipapan ken ni Elijah, a kas iti “Truth from Elijah” (Children’s Songbook, 90–91). Isalaysay ti maysa a padas a nakatulong iti panangiturong ti pusom kadagiti kapuonam. Kiddawen kadagiti ubbing a mangibinglay iti sumagmamano a banag nga ammoda maipapan iti maysa nga lelong wenno lelang wenno sabali pay a kapuonanda.

Isuro ti Doktrina: In-inauna nga Ubbing

Doktrina ken Katulagan 109; 110:1–10

Ti templo ti balay ti Apo.

Kasano nga ibinglaymo kadagiti ubbing ti panagayatmo iti balay ti Apo? Ibilangmo no kasano a maguyugoymo ida a mangawat ti karit ni Elder Quentin L. Cook “para iti tunggal maysa kadatayo, sadino man ti pagnanaedantayo, a makitatayo ti bagbagitayo iti templo” (“See Yourself in the Temple,” Ensign wenno Liahona, Mayo 2016, 98).

Dagiti Mabalin nga Aktibidad

• Pumili kadagiti bersikulo manipud iti benneg 109 wenno 110 a mariknam a mangitampok kadagiti bendision ti templo (sumagmamano ti naisingasing iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia). Ilistam dagitoy a bendision iti pisarra, ken awisem dagiti ubbing a mangsukisok kadagiti bersikulo a pinilim a pakasarakanda kadagita a bendision. Kasano a mailawlawagtayo iti maysa a tao no apay a napateg iti templo kadatayo?

• Awisem dagiti ubbing a mangbasa a siuulimek iti Doktrina ken Katulagan 110:1–10, ken awisen ida a mangibinglay iti maysa a banag a nasursuroda maipapan ken ni Jesucristo wenno ti templo manipud kadagitoy a bersikulo. Awisem dagiti ubbing a mangidrowing iti ladawan ti bagbagida ken ti Mangisalakan iti templo.

• Awisem dagiti ubbing a mangipapan nga adda maysa a gayyem a mangbirbirok iti balayda. Kasano a matulongantayo ti gayyemtayo a maammuanna no sadino a balay ti kukuatayo? Kasano nga ammotayo a ti templo iti balay ti Dios? Basaen ti Doktrina ken Katulagan 109:12–13 a kadua dagiti ubbing, ket isaritam kadakuada no kasano nga ammom a balay ti Apo ti templo. Ipakitam ti ladawan dagiti templo, ket awisem dagiti ubbing a mangibinglay kadagiti riknada maipapan iti balay ti Apo.

• Kantaem a kaduam dagiti ubbing ti “The Spirit of God” (Hymns, num. 2), ken isaritam kadakuada a nakanta daytoy iti pannakaidaton ti Templo iti Kirtland—ken kadagiti pannakaidaton ti templo iti agdama. Apay a napintas daytoy a kanta para iti pannakaidaton ti Templo iti Kirtland?

  

  Addaan kadagiti pulpito ti tunggal ungto ti Templo iti Kirtland para kadagiti lider iti priesthood.

Doktrina ken Katulagan 110:11–16

Dagiti tulbek ti priesthood a kasapulan tapno maaramid iti trabaho ti Dios ket addada ditoy Simbaan kadagitoy nga aldaw .

Kinuna ni Elder Gary E. Stevenson, “Amin nga annak ti Nailangitan nga Ama ket naikandado manipud kadagiti pangisalakan nga ordinansa ti ebanghelio ni Jesucristo—agingga a maipatungpal ti nasantuan a pannakaisubli babaen kada [Moises, Elias, ken Propeta Elijah]” (“Where Are the Keys and Authority of the Priesthood?” Ensign wenno Liahona, Mayo 2016, 30).

Dagiti Mabalin nga Aktibidad

• Awisem dagiti ubbing a mangsukisok iti Doktrina ken Katulagan 110:11–16 a mangbirok iti nagan ti tallo a nagkauna a propeta a nagparang iti Templo iti Kirtland. Kalpasanna tulongam ida a mangbirok kadagiti balikas manipud kadagitoy a bersikulo a mangiladawan no ania ti “impakumit,”wenno inted ti tunggal propeta, ken ni Joseph Smith ken Oliver Cowdery. Makitam ti makatulong a panangiladawan iti “Chapter 40: Visions in the Kirtland Temple” (Doctrine and Covenants Stories, 156–57).

• Ibinglay daytoy a pangiladawan iti tulbek ti priesthood ni Presidente Russell M. Nelson: “Iti uneg ti bulsam mabalin nga adda tulbek iti pagtaengam wenno kotsem. Dagiti tulbek ti priesthood, iti sabali a bangir, saan a maarikap ken saanda a makita. Isuda ti ‘mangsindi’ iti turay ti priesthood” (“Personal Priesthood Responsibility,” Ensign wenno Liahona, Nob. 2003, 45–46). Tapno mailadawan ti kinapateg dagiti tulbek ti priesthood, ilawlawag kadagiti ubbing dagiti problema no mapukaw iti tulbek ti balay wenno tulbek ti kotse. Kasano a maipada daytoy kadagiti problema no mapukaw dagiti tulbek ti priesthood? Tulongan dagiti ubbing a maawatanda no asino dagiti agig-iggem kadagiti tulbek iti priesthood ita ken kasano a mausar dagitoy a tulbek a manglukat kadagiti bendision para kadagiti amin nga annak ti Dios (kitaen iti “Dagiti Tulbek ti Priesthood,” Napudno iti Pammati, 126–27).

• Tapno ad-adda pay ti pannakailawlawag dagiti tulbek a naisubli iti Templo iti Kirtland, ipabuya ti video “By the Hand of Elijah the Prophet” (ChurchofJesusChrist.org). Paglilinnawagan no ania ti mabalin nga aramidentayo tapno makiraman iti trabaho a naaramid a posible gapu kadagiti tulbek ni Elijah. Wenno ipabuya ti video “Gatherers in the Kingdom” (ChurchofJesusChrist.org) ken agsarita maipapan iti no kasano a makatulongtayo a mangummong kadagiti annak ti Nailangitan nga Ama nga agsubli Kenkuana.

Yallukoy ti Panagsursuro iti Pagtaengan

Awisen dagiti ubbing nga usaren iti panid ti aktibidad iti daytoy a lawas wenno ti ladawan nga indrowingda bayat ti klase tapno isuroda iti pamiliada ti maysa a banag a nasursuroda ita maipapan iti templo wenno dagiti tulbek ti priesthood.

Panangpadur-as iti Panangisurotayo

Mangparnuay iti naayat ken naraem nga aglawlaw. “Addaan ti pagwadam iti nabileg nga impluensia kadagiti galad dagiti [ubbing]. … Babaen kadagiti balikas ken tignaymo, ipakitam kadakuada nga ipatpategmo ti ebanghelio ken adda panangisakitmo maipapan iti naespirituan a panagdur-asda” (Panangisuro iti Wagas ti Mangisalakan, 15).