“Septiembre 27–Oktubre 3. Doktrina ken Katulagan 109–110: ‘Balaymo Daytoy, ti Lugar ti Kinasantom,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Septiembre 27–Oktubre 3. Doktrina ken Katulagan 109–110,” Umaykayo, Sumurot Kaniak—Para kadagiti Indibidual ken Pamilia: 2021
Templo iti Kirtland, ni Jon McNaughton
Septiembre 27–Oktubre 3
Doktrina ken Katulagan 109–110
“Balaymo Daytoy, ti Lugar ti Kinasantom”
Mangibasbasar iti Doktrina ken Katulagan 109:24– 28, kinuna ni Elder David A. Bednar, “Awisenkayo nga ulit-uliten nga adalen ken sikakararag nga utobenyo dagiti ibunga dagitoy nasantuan a kasuratan iti biagyo ken para iti pamiliayo” (“Honorably Hold a Name and Standing,” Ensign wenno Liahona, Mayo 2009, 99). Ibilangmo daytoy nga awis bayat ti panagadalmo.
Isuratmo dagiti Impresionmo
Saan koma idi nga aglukat dagiti ridaw iti Templo iti Kirtland agingga iti 8:00 iti bigat ti Marso 27, 1836. Ngem dagiti Santo a mangnamnama a dumar-ay iti serbisio iti dedikasion ket nangrugin a nakipila kas kasapa ti alas siete ti bigat (7:00). Idi alisto a napno dagiti pagtutugawan ken pasilio kadagiti nagagar nga agdaydayaw, insingasing ni Joseph Smith ti nayon a sabali pay a lokasion. Idi napnon dayta, naplano iti maikadua a sesion. Ken saan laeng a dagiti sibibiag ti nagagaran a makapan. Adu a saksi ti nangpaneknek a nakitada dagiti anghel, iti uneg ti templo ken uray pay iti atep, kabayatan ken kalpasan ti dedikasion. Ket talaga a kasla immay “dagiti buyot ti langit” nga “agkanta ken agrag-o” kadagiti Santo iti Ud-udina nga Aldaw (“The Spirit of God,” Hymns, no. 2).
Apay adda dakkel a panaggagar—iti agsumbangir ti belo? Ti kari a “matalugadinganto [dagiti Santo] iti bileg manipud iti ngato” ket kangrunaan a maysa a gapu a nagguummongda iti Ohio (Doktrina ken Katulagan 38:32). Ken dagiti nain-indaklan a banag ket naikari para iti masakbayan. “Daytoy,” impalawag ti Apo, “ti pangrugian ti bendision a maibukbokto kadagiti ulo dagiti taok” (Doktrina ken Katulagan 110:10). Ti panawen a pagbibiagantayo ita—nga addaan iti naparpartak nga aramid iti templo ken ordinansa a sidadaan a magun-od ti minilmilion a sibibiag ken natay—ket nangrugi iti Kirtland, idi “ti belo iti rabaw ti daga [ket] nangrugi a maray-ab“ (“The Spirit of God”).
Kitaen iti Saints, 1:232–41; “A House for Our God,” Revelations in Context, 169–72.
Dagiti Kapanunotan para iti Bukod a Panagadal iti Nasantuan a Kasuratan
Tarigagayan ti Apo a bendisionannak iti nasantuan a balayna.
Iti sumagmamano a wagas, maigiddiat ti Templo iti Kirtland kadagiti agdama a templo nga ammotayo ita. Awan idi dagiti altar ken awan ti puente a pagbuniagan, ken saan pay a naisubli dagiti ordinansa kas panagbuniag para kadagiti natay ken pannakailantip. Ngem dagiti bendision a nailadawan iti benneg 109, ti pangidaton a kararag para iti Templo iti Kirtland, ket dagiti bendision a maawattayo iti balay ti Apo iti agdama. Irebyu dagiti sumaganad a bersikulo tapno masarakan ti sumagmamano kadagitoy a bendision. Bayat ti panangbasam maipapan kadagitoy, utobem no apay a napateg dagitoy kenka ken iti pamiliam.
Dagiti bersikulo 5, 12–13 (kitaen met iti Doktrina ken Katulagan110:6–8): Maipakita iti templo ti Apo ti Bagina kadatayo ken mariknatayo ti bilegna.
Dagiti bersikulo 9, 17–19, 26, 78–79: Iti templo awatentayo iti bagbagitayo ti nagan ti Apo.
Dagiti bersikulo 22–23: Bayat ti panagaramid ken panangraemtayo kadagiti katulagan iti templo, ikkannatayo ti Apo iti bileg a mangaramid iti trabahoda.
Dagiti bersikulo 24–33: Bayat ti idadar-ayrtayo iti templo a maikari, maawattayo ti pannalaknib ti Apo.
Dadduma pay a bendision:
Ania ti pangparegta kenka ti Espiritu nga aramidem tapno maawatmo dagitoy a bendision?
Ti pangidaton a kararag ti Templo ti Kirtland ti makaisuro kaniak maipapan iti kararag.
Ti benneg 109 ket maysa a pangidaton a kararag a naited ken ni Joseph Smith babaen ti paltiing (kitaen iti paulo ti benneg). Ania ti masursurom maipapan iti kararag manipud iti daytoy a benneg? Bayat ti panangbasam, mabalinmo a panunoten maipapan kadagiti bukodmo a kararag. Ania dagiti impresion a maawatmo a makatulong kenka a mangpadur-as ti pannakisaritam iti Nailangitan nga Ama? Kas pagarigan, maipapan ti ania ti inkararagan ti Propeta iti daytoy a kararag?
Doktrina ken Katulagan 110:1–10
Maipakita ti Apo ti Bagina kaniak iti templo.
Ania ti mariknam maipapan iti Mangisalakan kalpasan ti panagbasam iti Doktrina ken Katulagan 110:1–10? Kasano ti panangipakitana iti Bagina kenka iti templo? Iti ania a wagas a matulongannaka a mangammo nga awatenna dagiti panagkagumaam ken sakripisiom?
Addaan ti tunggal ungto ti Templo iti Kirtland kadagiti pulpito para kadagiti lider ti priesthood.
Doktrina ken Katulagan 110:11–16
Dagiti tulbek ti priesthood a kasapulan a mangipatungpal iti aramid ti Dios ket adda iti Simbaan iti agdama.
Tapno maawatan dagiti tulbek ti priesthood nga impakumit da Moises, Elias, ken Elijah kada Joseph Smith ken Oliver Cowdery iti Templo iti Kirtland, mabalinyo a basaen ti mensahe ni Elder Quentin L. Cook iti “Prepare to Meet God” (Ensign wenno Liahona, Mayo 2018, 114–17). Inladawan ni Elder Cook no kasano a mayannatup dagitoy a tulbek kadagiti aramid ti Simbaan iti agdama. Mabalin met nga ibilangmo ti panagsursuro maipapan kadagitoy a nagkauna a propeta babaen ti panagadal iti “Moises,” “Elias, ken “Ni Elias a Propeta” iti Pangiwanwan iti Nasantuan a Kasuratan (scriptures.ChurchofJesusChrist.org). Utobem no ania ti mabalinmo nga aramiden tapno makatulong iti aramid nga adda pakainaiganna kadagitoy a tulbek.
Kitaen met iti “Dagiti Tulbek ti Priesthood,” Napudno iti Pammati, 126–27; Henry B. Eyring, “He Goes before Us,” Ensign wenno Liahona, Mayo 2020, 66–69.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Doktrina ken Katulagan109.Kas maysa a pamilia, sapulem dagiti sumagmamano a bersikulo iti benneg 109 a mangparegta kenka a mangbubos iti ad-adu pay nga oras iti templo (kas pagarigan, kitaen dagiti bersikulo a nakalista iti babaen ti “Dagiti Kapanunotan para iti Bukod a Panagadal iti Nasantuan a Kasuratan”). Isarita maipapan no kasano a maaramidmo no ania ti insingasing ni Presidente Russell M. Nelson: “Mangsapul iti maysa a wagas a regular a pannakipagkita iti Apo—nga addaka iti nasantuan a balayna—kalpasanna tungpalem dayta a pannakipagkita nga addaan iti kinaeksakto ken rag-o” (“Becoming Exemplary Latter-day Saints,“ Ensign wenno Liahona, Nob. 2018, 114). No saanka pay wenno ti pamiliam a nakapan iti templo, mabalinyo a bisitaen ti temples.ChurchofJesusChrist.org tapno matulonganyo ti bagbagiyo nga agsagana a mapan.
-
Doktrina ken Katulagan 109:78–80.Naisurat ti himno a “The Spirit of God” (Hymns, no. 2) para iti dedikasion ti Templo iti Kirtland—ket nakanta daytoyen iti pannakaidaton ti tunggal templo manipud idin. Mabalin nga aggigiddan a kantaenyo daytoy a himno ket sapulenyo dagiti ragup ti balikas a mangnayon iti panagyamanyo para kadagiti templo iti ud-udina nga aldaw. Kasano a mainaig daytoy a himno iti mensahe ti Doktrina ken Katulagan 109:78–80?
Masarakanyo ti panangidaton a kararag para iti templo iti asidegyo iti temples.ChurchofJesusChrist.org.
-
Doktrina ken Katulagan 110.Bayat ti panangbasa dagiti miembro ti pamiliam ti benneg 110 ken panangkita iti ladawan iti paggibusan daytoy a balabala, awisem ida a mangipapan no kasano ti mariknada no nakaduada koma da Joseph Smith ken Oliver Cowdery iti Templo iti Kirtland. Ikkam ti pamiliam iti gundaway a mangibinglay no ania ti riknada maipapan iti Mangisalakan.
-
Doktrina ken Katulagan 110:15.Ania ti makatulong a “mangisubli iti puspuso” dagiti annakmo kadagiti kapuonanda? Makasarakka iti sumagmamano a naragsak a kapanunotan iti FamilySearch.org/discovery. Wenno mabalinyo ti agtitinnulong a mangilasin kadagiti kapupuon nga agkasapulan kadagiti ordinansa iti templo ken mangplano a mangannong kadagita nga ordinansa iti templo. Mabalinmo pay nga isarita maipapan no kasano a ti aramid nga insubli ni Elijah iti Templo iti Kirtland ket mangpadakkel iti ayatmo kadagiti kapuonam.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “The Spirit of God,” Hymns, no. 2.
Dagiti Timek ti Pannakaisubli
Dagiti Naespirituan a Parangarang ken ti Templo iti Kirtland
Kas Apuy a Dumardarang, ni Glen S. Hopkinson
Iti baba ti dagiti balikas dagiti Santo iti Ud-udina nga Aldaw nga adda idi iti Templo ti Kirtland kabayatan ti dedikasionna ken dagiti dadduma pay a miting a simmaruno. Adu ti mangidilig kadagiti padasda iti no ania ti nagpadasan dagiti nagkauna a Santo idi isuda ket “maramenan[kayo] iti bileg nga aggapu iti ngato” iti aldaw ti Pentecostes (Lucas 24:49; kitaen met iti Dagiti Aramid 2:1–4; Doktrina ken Katulagan109: 36–37).
Eliza R. Snow
“Dagiti seremonia iti dayta a dedikasion ket mabalin nga estoriaen, ngem awan ti pagsasao ti tao a makailadawan dagiti nailangitan a parangarang dayta a nakallalagip nga aldaw. Nagparang dagiti anghel iti sumagmamano, idinto a narikna dagiti amin nga adda a timmabuno ti nadiosan a presensia, ket tunggal puso ket napno iti “di mayebkas a rag-o ken napnuan iti dayag.’”1
Sylvia Cutler Webb
“Maysa kadagiti kaunaan a pannakalagipko ket ti dedikasion ti Templo. Sinaklotnakami ti amak ket imbagana kadakami no apay a mapankami ken no ania ti kayat a sawen ti mangidaton ti maysa a templo ti Dios. Ket nupay nakaub-ubingak idi kadagita a panawen, malagipko unay ti okasion. Mataliawko dagiti pasamak iti napalabasa tawtawen ket makitak kas pannakakitak idi ken ni Joseph ti Propeta, a nakatakder a nakangato dagiti imana iti langit, nabessag ti rupana, agar-arubos dagiti luana kadagiti pingpingna bayat ti panagsaritana iti dayta a nakallalagip nga aldaw. Nakalua ti dumani amin. Napno ti balay ta kaaduan kadagiti ubbing ti nakatugaw iti saklot dagiti nataengan a tao; nagtugaw ti kabsatko a babai iti saklot ti amak, siak iti saklot ti inak. Malagipko pay dagiti bado nga inkawesmi. Naganus unay ti panunotko kadagita a panawen a makaawat iti pateg ti amin, ngem iti panaglabas ti panawen nalawlawagan ti panunotko iti kinapategda, ket agyamanak unay ta maysa a pribilehio kaniak nga addaak idi sadiay.”2
Oliver Cowdery
“Iti rabii, nakipagkitaak kadagiti opisial ti simbaan iti balay ti Apo. Naibukbok ti Espiritu—nakitak ti dayag ti Dios, a kas dakkel nga ulep, bimmaba ken nagdisso iti balay, ken nangpunno kadagitoy a kas maysa a napigsa a pul-oy ti angin. Nakakitaak met kadagiti sinan dila, kas iti uram a nagdisso iti kaaduan, … bayat ti panagsaoda iti sabali a pagsasao ken nagipadtoda.”3
Benjamin Brown
“Adu [dagiti] nakita a parmata. Maysa ti nakakita ti maysa a pungan wenno ulep a nagdisso iti balay, nalawag a kas no silnagan ti init ti ulep a kasla laeng balitok. Adda dua a sabali pay a nakakita kadagiti tallo a personahe a magmagna iti siled ti addaan kadagiti nasileng a tulbek kadagiti imada, ken maysa pay a nasileng a kawar kadagiti imada.”4
Orson Pratt
“Adda sadiay ti Dios, adda sadiay dagiti anghelna, adda ti Espiritu Santo iti tengnga dagiti tao … napnuanda iti bileg ken inspirasion ti Espiritu Santo manipud iti korona dagiti uloda agingga iti tukot dagiti dapanda.”5
Nancy Naomi Alexander Tracy
“[Idi] nalpas ken naidatonen ti Templo … isuda ti dua a kararagsakan nga aldaw iti biagko. Ti maibagay a himno a naputar para iti okasion ket ‘Ti Espiritu ti Dios Kas Apuy a Manguram.’ Pudno la unay a ti Nailangitan nga Impluensia nagdisso iti dayta a balay. … Nariknak a daytoy ti langit iti rabaw ti daga.”6
Agparang da Moises, Elias, ken Elijah iti Templo ti Kirtland, ni Gary E. Smith