Far West

Far West, ni Al Rounds

Oktubre 11–17

Doktrina ken Katulagan 115–120

“Nasagsagradonto ti Sakripisiona Kaniak Ngem iti Matgedanna”

Tarigagayan ti Dios a makasaritanaka. Bayat ti panagadalmo kadagiti nasantuan a kasuratan, agkararag ken dawatem Kenkuana a tulongannaka a mangtakuat kadagiti mensahena para kenka.

Isuratmo dagiti Impresionmo

Adda gapu tapno mangnamnama maipanggep iti kabaruan a paguummongan a lugar dagiti Santo, ti Far West, Missouri, idi Hulio 1838. Alisto a dimmakkel ti siudad, kasla nataba ti daga, ken naipaltiing daytoy nga iti asideg a distansia iti amiananna ket ti Adam-ondi-Ahman, maysa a lugar a naindaklan ti naespirituan a kinapategna (kitaen iti Doktrina ken Katulagan 107:53–56; 116). Ngem, narigat latta para kadagiti Santo a saanda a panunoten maipapan iti no ania ti napukawda. Napapanawda manipud iti Independence, ti natudingan a kangrunaan a lugar ti Zion, ket kasla narigatdan a sublian pay. Mainayon pay, kinasapulan a naglibas dagiti Santo iti Kirtland, Ohio, pinanawanda ti ipatpategda a templo kalpasan laeng ti dua a tawen a pannakaleppasna. Ket iti daytoy a kanito saan laeng a kabusor iti ruar ti Simbaan ti pakaigapuan ti riribuk—adu dagiti mabigbig a miembro a nagbalin a kontra ken ni Joseph Smith, agraman dagiti Tallo a Saksi iti Libro ni Mormon ken uppat a miembro ti Sangapulo-ket-dua. Mabalin nga adda dagiti nasdaaw, Talaga kadi a pumigpigsa wenno kumapkapsut ti pagarian ti Dios?

Ngem saan nga impalubos dagiti napudno a lapdan ida dagiti kasta a saludsod. Ngem ketdi, inrugida ti nangbangon iti baro a nasantuan a lugar, itan iti Far West. Nangaramidda kadagti plano para iti maysa a baro a templo. Naawagan ti uppat a baro nga Apostol, agraman ti dua—da John Taylor ken Wilford Woodruff—nga iti saan a nabayag nagbalinda a Presidente ti Simbaan (kitaen iti Doktrina ken Katulagan 118:6). Nasursuro dagiti Santo a ti panagtrabaho iti aramid ti Dios saanna a kayat a sawen a dika pulos madaleb; kayatna a sawen a “bumangonka manen.” Ket nupay nasken nga isukomto ti sumagmamano a banag, nasagradonto dagita a sakripisio iti Dios, ta “nasagsagradonto … ngem [iti] matgedam” (Doktrina ken Katulagan 117:13).

Kitaen iti Saints, 1:296–99; “Far West and Adam-ondi-Ahman,” Revelations in Context, 235–41.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 115:4–6

Intuding ti Apo ti nagan ti Simbaan.

Kinuna ni Presidente Russell M. Nelson a ti nagan ti Simbaan “maysa a banag a naindaklan ti kinapategna” (“The Correct Name of the Church,” Ensign wenno Liahona, Nob. 2018, 87). Panunotem maipapan no apay a pudno daytoy bayat ti panangbasam iti Doktrina ken Katulagan 115:4–6. Ania ti pakainaigan ti nagan ti Simbaan iti aramid ken misionna?

Kitaen met iti 3 Nephi 27:1–11.

Doktrina ken Katulagan 115:5–6

Ti Zion ken dagiti stakena ket mangidiaya iti “pagkamangan no agbagyo.”

Iti baet dagiti rigat a nakaipaspasanguan dagiti Santo idi 1838, nangato pay laeng dagiti namnamaen ti Apo para kadakuada. Mangsapul kadagiti balikas iti Doktrina ken Katulagan 115: 5–6 a mangyunay-unay iti akem a kayat ti Apo nga ipatungpal ti Simbaanna ken dagiti miembrona iti lubong. Kas pagarigan, ania ti mariknam a rumbeng nga aramidem tapno “tumakder ket agrimat[ka]”? (bersikulo 5). Ania dagiti naespirituan a bagyo a madlawmo iti aglawlawmo, ken no kasano a masarakantayo ti “pagkamangan” babaen ti panaguummong? (bersikulo 6).

Kitaen met iti 3 Nephi 18:24.

Doktrina ken Katulagan 117

Sagrado dagiti sakripisiok iti Apo.

Ti panangpanaw iti Kirtland ket mabalin a nangnangruna a narigat kadagiti tao a kas ken ni Newel K. Whitney, a nakapundaren iti narang-ay a biag para iti pamiliana sadiay. Ania ti masarakam iti Doktrina ken Katulagan 117:1–11 a mabalin a nakatulong koma kadakuada a nangaramid iti daytoy a sakripisio? Kasano a balbaliwan dagitoy a bersikulo ti pannirigam iti no ania a talaga ti napateg?

Naiduma ti sakripisio a naidawat ken ni Oliver Granger: tinudingan isuna ti Apo nga agbati iti Kirtland ken mangrisut kadagiti pakaseknan a mainaig ti kuarta (finances) iti Simbaan. Maysa daytoy a narigat nga aramid, ket bayat ti panangibagina iti Simbaan nga addaan iti integridad, awan ti adu a kuarta a napasublina iti kamaudiananna. Ibilangmo no kasano a mayaplikar dagiti balikas ti Apo kadagiti bersikulo 12–15 kadagiti banag a dinawat ti Apo kenka.

Kitaen met iti Mateo 6:25–33; Boyd K. Packer, “The Least of These,” Ensign wenno Liahona, Nob. 2004, 86–88; “Far West ken Adam-ondi-Ahman,” Revelations in Context, 239–40.

Adam-ondi-Ahman iti Daviess Country, Missouri

Nabilin ni Newel K. Whitney nga umakar iti Adam-ondi-Ahman, a nailadawan ditoy.

Doktrina ken Katulagan 119–20

Babaen ti panagbayad iti apagkapullo, makatulongak a mangbangon ken “mapasanto ti daga ti Zion.”

Dagiti pangiturong iti benneg 119 ken120 ket kapada iti wagas a pannakabayad kadagiti gastos iti aramid ti Apo iti panawentayo. Iti agdama, agbayad dagiti Santo iti “maysa nga apagkapullo iti amin a matgedanda [ita maawatan a mapastrek] iti tinawen” (Doktrina ken Katulagan 119:4), ket dagitoy a pundo ti imatonan ti maysa a konseho a buklen ti Umuna a Panguluen, Korum dagiti Sangapulo-ket-dua, ken ti Presiding Bishopric. Ibilang dagiti sumaganad a saludsod bayat ti panagadalmo kadagitoy a benneg:

• Kasano a “mapasanto ti daga ti Zion” ti panagtungpal iti paglintegan ti apagkapullo? Kasano a makatulong daytoy a paglintegan a mamagbalin ti lugar a pagnaedam a “maysa a daga ti Zion para kenka”? (Doktrina ken Katulagan 119:6).

• Ania ti napateg kenka maipapan ti ragup ti balikas “babaen ti bukodko a timek kadakuada” iti Doktrina ken Katulagan 120?

Kitaen met iti Malakias 3:8–12; David A. Bednar, “The Windows of Heaven,” Ensign wenno Liahona, Nob. 2013, 17–20; “The Tithing of My People,” Revelations in Context, 250–55.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 115:4–6.Mabalin kadi iti pamiliam a basaenda dagitoy a bersikulo bayat ti panagbuyada iti isisingising ti init? Mabalin a makatulong kenka a mangilawlawag no ania ti kaipapanan ti “tumakder ken agrimat” (bersikulo 5). Wenno mabalinmo pay nga ilawlawag no ania ti kayarigan ti agsapul iti pagkamangan kabayatan ti bagyo. Kasano a maipada dayta a padas iti panangsapul iti “pagkamangan” iti Simbaan? (bersikulo 6). Kalpasanna mabalinmo ti agsarita maipanggep kadagiti wagas a pakatulongam iti dadduma pay nga agragsak iti pagkamangan nga ited ti Simbaan.

Doktrina ken Katulagan 117:1–11.Mabalin nga idilig ti pamiliam ti maysa a “tedted” iti maysa a banag a “napatpateg” (bersikulo 8), kas iti maysa a pitser (jug) ti danum. Mabalin a mangiturong daytoy iti maysa a panaglilinnawag maipapan kadagiti saan unay a nasken a banag iti panagbiagtayo a mabalin a manglapped kadatayo nga umawat kadagiti adu a bendision.

Doktrina ken Katulagan 119.Mabalinyo ti agkansion iti maysa a kanta kas iti “I Want to Give the Lord My Tenth” (Children’s Songbook,150). Ania ti isuro ti kanta ken benneg 119 maipapan no apay nga agbayadtayo iti apagkapullo? Mabalin pay a pagimbagan dagiti babassit nga ubbing iti maysa a banag nga adalen: mabalinmo nga ikkan ida kadagiti babassit a banag, tulongam ida a mangkuenta iti maysa nga apagkapullo, ket ibagam kadakuada no apay nga agbayadka iti apagkapullo. (Kitaen met iti Napudno iti Pammati, 180–82.)

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I Want to Give the Lord My Tenth, Children’s Songbook, 150.

Panangpadur-as iti Panangisurotayo

Yallukoy ti panagpannuray iti bukod a kabaelan. “No adda saludsod [dagiti miembro ti pamilia], no dadduma nasaysayaat nga isuro kadakuada no kasano a sapulen dagiti sungbat para iti bagbagida, ngem ti mangsungbat a dagus kadagiti saludsod” (Panangisuro iti Wagas ti Mangisalakan,28).

pannakausar ti apagkapullo

Ti panangted iti 10 a porsiento iti Apo a kas apagkapullo ti makatulong a mangpadur-as iti pangisalakan nga aramidna.