Ni Joseph Smith a mangaskasaba

Oktubre 4–10

Doktrina ken Katulagan 111–114

“Ibilinkonto Amin a Banag para iti Pagimbaganyo”

Nainkararagan a dumawat ti pannarabay ti Espiritu bayat ti panangbasam iti Doktrina ken Katulagan 111– 14, ket isuratmo dagiti impresionmo. Kalpasanna ibilangmo dagiti wagas a pakapagtignayam kadagita nga impresion.

Isuratmo dagiti Impresionmo

Naaddaanka kadin iti naespirituan a padas a nakariknaam iti panagtalek ken talged iti pammatim—ngem kalpasanna ti rigat ti panagbiag ti nangsubok iti pammatim, ket natakuatam ti bagim nga agkarkarigatan a mangpasubli iti talna a nariknam idi? Adda maysa a banag a kapada a napasamak kadagiti Santo iti Kirtland. Nakurkurang ngem makatawen kalpasan dagiti naespirituan a panangibukbok a nainaig iti pannakaidaton ti Templo iti Kirtland, rimsua dagiti riribuk. Maysa a krisis iti pakaseknan ti kuarta, kinaawan ti panagkaykaysa ti Korum dagiti Sangapulo-ket-dua, ken dadduma pay a pannubok ti nakaigapu iti sumagmamano tapno maisin iti pammatida.

Saantayo a maliklikan dagiti pannubok, isu a kasano a mapagtalinaedtayo ida manipud iti panangbutbutengda iti pammati ken pammaneknektayo? Nalabit a paset ti sungbat ti masarakan iti balakad ti Apo iti Doktrina ken Katulagan 112, a naited kabayatan ti panagpalalo iti panagrigrigat iti Kirtland. Kinuna ti Apo, “Patarnawenyo ti puspusoyo iti imatangko” (bersikulo 28), “Saankayo nga agsukir” (bersikulo 15), “Patibkerem dagiti lomom para iti aramid” (bersikulo 7), ket “Agpakumbabaka ”(bersikulo 10). Bayat ti panangsurottayo iti daytoy a balakad, “kibinenna[tayonto] nga iturong” ti Apo a mangsaranget iti rigat ken iti pannakapaimbag ken talna (kitaen iti bersikulo 10, 13).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 111

Kabalinan ti Apo nga “ibilin amin a banag para iti pagimbag[ak].”

Idi 1836, nakaurnong ti Simbaan iti nadagsen nga utang iti panangaramid iti aramid ti Apo. Bayat ti pannakaburibor da Joseph Smith ken dagiti dadduma pay maipanggep kadagitoy nga utang ken nangibilang kadagiti wagas a panangbayad kadagitoy, nagbiaheda iti Salem, Massachusetts, nalabit a gapu ta adda sayangguseng a sumagmamano a kuarta ti nabaybay-an iti maysa a balay sadiay (kitaen iti paulo ti benneg ti Doktrina ken Katulagan 111). Kalpasan a nakadanonda idiay Salem, impakdaar ti Apo, “Ta ad-adu ti kinabaknang ngem iti maysa kadakayo iti daytoy a siudad” (bersikulo 10)—dagiti kinabaknang a pakairamanan dagiti tao nga “ummongen[na] iti naituding a panawen para iti pagimbagan ti Zion” (bersikulo 2; kitaen met iti Exodo 19:5). Nupay awan iti kuarta a nasarakan iti Salem, dagiti napasurot [convert] a bunga dagiti kallabes a panagkagumaan iti aramid ti misionario ket pasetda iti pannakaipatungpal ti kari ti Apo.

Bayat ti panagbasam iti benneg 111, panunotem maipapan kadagiti banag a pakaburiburam. Ibilangmo no kasano a mayaplikar kenka dagiti balikas ti Mangisalakan ken ni Joseph. Kasano a natulongannaka ti Apo a mangsarak kadagiti saan a ninamnama a “kinabaknang”? (bersikulo10). Panunotem maipapan iti no ania ti inaramidna tapno mangibilin iti amin a banag para iti pagimbaganyo” (bersikulo 11). Ania ti isuro kenka ti ragup dagiti balikas a “kas iti kapardas ti kabaelanyo a mangawat kadakuada” maipapan iti Nailangitan nga Ama?

Kitaen met ti Mateo 6:19–21, 33; “More Treasures Than One,” Revelations in Context, 229–34.

Doktrina ken Katulagan 112:3–15

Idalanto ti Apo dagiti sipapakumbaba a mangsapul iti pagayatanna.

Ti panagkaykaysa iti Korum dagiti Sangapulo-ket-dua ket kumapkapsut iti kalgaw ti 1837. Adda dagiti saan a panagkikinnaawatan maipapan kadagiti pagrebbengan, ket sumagmamano kadagiti miembro ti nagsaosao a maibusor ken ni Propeta Joseph Smith. Ni Thomas B. Marsh, Presidente idi ti Korum dagiti Sangapulo-ket-dua, ket maseknan, ket immay nanipud iti Missouri inggana ti Ohio, agsapsapul ti balakad manipud iti Propeta. Naawat ni Brother Marsh daytoy babaen ti paltiing iti benneg 112. Kasano a mabalin a makatulong kenkuana ken iti korumna ti balakad ti Apo? Ania dagiti adalen nga adda kadagitoy a para kenka bayat ti panagkalikagummo a maparmek ti panagsusupanget ken natangken a rikna?

Kangrunaanna, mabalinmo nga utoben ti bersikulo 10. Ania ti kayat a sawen ti panangiturong kenka ti Apo a “[mang]kibin” kenka? Apay a kasapulan ti kinapakumbaba para iti kastoy a kita ti pannarabay?

Kitaen met iti Ulisses Soares, “Be Meek and Lowly of Heart,” Ensign wenno Liahona, Nob. 2013, 9–11; “The Faith and Fall of Thomas Marsh,” Revelations in Context, 54–60.

dua a tao nga agkarkararag

No napakumbabatayo, tarabayennatayonto ti Apo ken sungbatanna dagiti kararagtayo.

Doktrina ken Katulagan 113

Ni Joseph Smith ket “maysa a katulongan kadagiti ima ni Cristo.”

Intudo ni Isaias ti maysa kadagiti an-annabo ni Jesse kas maysa a “saringit” ken maysa a “ramut” (Isaias 11:1, 10). Iti benneg 113, ilawlawag ti Apo a daytoy nga an-annabo, ti maysa a katulongan ni Cristo, agbalinto a ramit iti pannakaummong dagiti tao ti Apo iti ud-udina nga aldaw (kitaen iti Doktrina ken Katulagan 113:4, 6)—maysa a padto a mangiladawan a nasayaat ken ni Propeta Joseph Smith. Kasano a mabalin a nangparparegta daytoy ken dagiti dadduma pay a kinapudno iti benneg 113 kadagiti Santo bayat ti rigat a napadpadasanda iti Kirtland? Ania ti masarakam itoy a paltiing a mangparegta kenka a makiraman iti aramid ti Apo iti agdama?

Kitaen met iti Pangiwanwan iti Nasantuan a Kasuratan, “Jesse,” scriptures.ChurchofJesusChrist.org; 2 Nephi 21:10–12; JosephSmith—Pakasaritaan 1:40.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 111:2, 9–11.Mabalin a mangparegta dagitoy a bersikulo iti maysa a panaglilinnawag maipapan iti no ania dagiti ipateg ti pamiliam kas agnanayon a “kinabaknang.” Makaaramidka iti maysa a panagbirok iti gameng (treasure hunt) babaen ti panangilemmeng kadagiti banag iti lawlaw ti balay a mangibagi kadagiti banag nga ipateg wenno ti ik-ikkan pateg ti Apo. Bayat ti panangsapul ti pamiliam ti tunggal banag, paglilinnawagan no ania ti maaramidyo a mangipakita nga ik-ikkanyo iti pateg daytoy.

Doktrina ken Katulagan 112:10.Inladawan ni Elder Ulisses Soares dagiti napakumbaba a tao iti kastoy: “Dagiti napakumbaba ket nalaka a masursuruan, bigbigbigenda no kasano nga agpannurayda iti Dios ken agtarigagayda nga agtulnog iti pagayatanna. Naemma dagiti napakumbaba ken adda kabaelanda a mangaring kadagiti dadduma nga agbalinda met a kasta” (“Meek and Lowly of Heart,” Ensign wenno Liahona, Mayo 2013, 10). Ibilang dagiti wagas a pakatulongan ti pamiliam a maawatanda no ania ti kayat a sawen ti agbalin a napakumbaba. Mabalinyo a kansionen ti maysa a kanta maipapan iti kinapakumbaba, a kas iti “Be Thou Humble” (Hymns, no. 130), bayat ti “panangkibin” ti maysa a miembro ti pamilia kadagiti dadduma ket iturongna ida iti lawlaw ti pagtaenganyo. Wenno mangibinglay kadagiti padas idi inturong ti Apo dagiti miembro ti pamiliam a “kinibin” ken nangted iti “sungbat dagiti kararag[da].”

Doktrina ken Katulagan 112:11–14, 26.Ania ti pagdumaan ti panangammo ti nagan ti maysa a tao ken panangammo kadakuada? Ania ti masursurotayo manipud kadagiti bersikulo 11–14 maipapan iti kayat a sawen ti mangam-ammo iti Apo?

Doktrina ken Katulagan 112:15.Ania ti kayat a sawen ti “agalsa” a maibusor iti propeta? Ania ti masarakantayo iti daytoy a bersikulo a makatulong kadatayo a mangkanunong iti Apo?

Doktrina ken Katulagan 113:7–8.Ania ti masursurotayo manipud iti bersikulo 8 a makatulongto a “mangbangon manen iti Zion” ken mangsubbot iti Israel?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Be Thou Humble,” Hymns, no. 130.

Panangpadur-as iti Panangisurotayo

Agbiagka iti pammaneknekmo. “‘Isurom no aniaka,’ insuro ni Elder Neal A. Maxwell. ‘Dagiti kababalinmo ket ad-adda a malaglagipto … ngem iti maysa a maipangpangruna a kinapudno iti maipangpangruna a leksion’” (Panangisuro iti Wagas ti Mangisalakan,13).

Da Thomas B. Marsh ken Joseph Smith

Isurat ni Thomas B. Marsh ti paltiing a naited kenkuana babaen ken ni Joseph Smith. Agpakumbabaka, ni Julie Rogers.