Oktubre 4–10

Doktrina ken Katulagan 111–114

“Ibilinkonto Amin a Banag a para iti Pagimbaganyo”

Insuro ni Sister Cheryl A. Esplin, sigud a mammagbaga iti Primary General Presidency a rumbeng a “tulongantayo dagiti ubbing a mangipauneg iti doktrina iti puspusoda iti wagas a … mayanninaw daytoy kadagiti kababalin ken galadda iti unos ti panagbiagda” (“Teaching Our Children to Understand,” Ensign wenno Liahona, Mayo 2012, 10).

Isuratmo dagiti Impresionmo

Yawis ti Panagbibinninglay

Paregtaen dagiti ubbing a mangibinglay, mangitugot iti sumagmamano a banag nga adda pakainaiganna iti maysa a banag manipud iti napalabas nga adalen. Pagsaritaem ida maipapan iti no ania ti ipalagip kadakuada ti tunggal maysa a banag.

Isuro ti Doktrina: In-inaudi nga Ubbing

Doktrina ken Katulagan 111:2, 10–11

Mabalin a kinabaknang kaniak dagiti banag ti Dios.

No mapanunot dagiti ubbing ti balikas a kinabaknang, mabalin nga iladawanda dagiti banag a sabsabali manipud kadagiti kinabaknang nga ipasimudaag iti Doktrina ken Katulagan 111:2, 10. Kasano a matulongam ida tapno masursuroda nga ipateg dagiti banag ti Apo?

Dagiti Mabalin nga Aktibidad

• Awisen dagiti ubbing nga idrowingda no ania ti mapanunotda no mangngeganda ti balikas a kinabaknang. Paggidiaten dagiti banag a makita ti lubong a kas kinabaknang kadagiti banag nga ipateg ti Apo (kitaen iti Doktrina ken Katulagan 111:2, 10–11), kas kadagiti taona, kinasirib ken kinalinteg ken panagaramid kadagiti nasasayaat a pili.

• Tulongam dagiti ubbing a mangileppas iti panid ti aktibidad iti daytoy a lawas. Ania ti masursurotayo maipapan ken ni Jesus manipud kadagiti banag nga ipatpategna? Kasano a makapagbalintayo nga ad-adda a kas Kenkuana?

Doktrina ken Katulagan 112:10

Ket kibinennakto nga iturong ti Apo ket sungbatannanto dagiti kararagko.

TiDoktrina ken Katulagan 112:10 ket mabalin a makatulong kadagiti ubbing a sursuruam a maaddaan iti pammati a ni Jesucristo ti mangiturong ken mangidaulo kadakuada iti unos ti panagbiagda.

Dagiti Mabalin nga Aktibidad

• Tulongam dagiti ubbing a mangpanunot kadagiti situasion no kaano a napateg ti panangiggem iti ima ti maysa a miembro iti pamilia, kas iti panagballasiw iti kalsada wenno panangted iti liwliwa. Mabalin a maragsakanda a mangiyakem iti sumagmamano kadagiti pagarigan nga imbinglayda. Basaen ti Doktrina ken Katulagan 112:10. Apay a kayattayo a “kibinennatayo” ti Apo?

• Piringam ti maysa kadagiti ubbing, ken awisem isuna a bumallasiw iti siled a kaduana ti sabali pay nga ubing a mangkibin kenkuana. Ibinglaymo ti maysa a padas idi nariknam a kibkibinennaka ti Apo.

  

  Bumangon ket Magnaka ni Simon Dewey

Doktrina ken Katulagan 112:11

Kayat ni Jesus nga ayatek ti tunggal maysa.

Tulongam dagiti ubbing a maammuanda a kayat ti Mangisalakan nga ayatentayo ti tunggal maysa, uray pay dagiti natangsit kadatayo.

Dagiti Mabalin nga Aktibidad

• Bayat ti panangibinglaymo iti “Chapter 41: Trouble in Kirtland” (Doctrine and Covenants Stories, 158–60), idawat kadagiti ubbing a mangaramid iti sinanpuso kadagiti imada no mangngegda ti maipapan iti maysa a tao nga agar-aramid iti maysa a naimbag a banag. Tulongam a maawatanda a kayat ti Mangisalakan nga ayatentayo iti tunggal maysa, uray pay dagiti mabalin nga agaramid kadagiti dakes a pili.

• Mangidrowing iti naliday a rupa iti pisarra, ken damagem kadagiti ubbing no kasano a maipakita ti panagayattayo kadagiti malmalday (kitaen iti Doktrina ken Katulagan 112:11). Bayat ti panangibinglay dagiti ubbing kadagiti kapanunotanda, sabaliam ti pannakaidrowing ti naliday a rupa ket pagbalinem a naragsak a rupa. Ibinglay ti pammaneknekmo iti bileg a sumangbay manipud iti panangayat kadagiti dadduma. Aggigiddan nga agkansion iti maysa a kanta maipapan iti panagayat, kas iti “Jesus Said Love Everyone” (Children’s Songbook, 61).

Isuro ti Doktrina: In-inauna nga Ubbing

Doktrina ken Katulagan 112:10

Makapagpakumbabaak ken maikagumaak a sapulen ti pannarabay ti Dios.

Kayat ti Nailangitan nga Ama nga agbalintayo a napakumbaba tapno matarabaynatayo. Tulongan dagiti ubbing a maawatanda no kasano a maipakitada ti panagpakumbaba iti sango ti Dios babaen ti panagaramid kadagiti banag kas iti panagkararag Kenkuana ken panangawat iti pammagbagana.

Dagiti Mabalin nga Aktibidad

• Saludsodem kadagiti ubbing no ania ti kaipapanan ti agpakumbaba. (Mabalinda a basaen ti “Kinapakumbaba” iti Napudno iti Pammati [panid 86–87] no kasapulan). Tulungam ida a mangpanunot kadagiti balikas wenno ragup ti balikas a mainaig iti “napakumbaba,” ken awisem ida a mangbasa iti Doktrina ken Katulagan 112:10, a sukatanda ti maysa kadagitoy a balikas wenno ragup ti balikas iti “napakumbaba” iti daytoy a bersikulo. Apay a kayat ti Nailangatan nga Ama nga agpakumbabatayo? Tapno ad-adu pay ti masursuro, mabalin a basaen dagiti ubbing dagiti mainayon a nasantuan a kasuratan a nailista iti “Napakumbaba, Kinapakumbaba” iti Pangiwanwan iti Nasantuan a Kasuratan (scriptures.ChurchofJesusChrist.org).

• Isurat dagiti balikas iti Doktrina ken Katulagan 112:10. iti pisarra, ket kiddawem kadagiti ubbing a basaenda iti napigsa. Mangawis iti ubing a manguged kadagiti bendision para kadagiti napakumbaba kas nailanad iti daytoy a bersikulo. Allukoyen dagiti ubbing a mangibinglay kadagidi panawen a sipapakumbabada a nangbirok iti tulong ti Dios ken inturongna ida, a kas idi nasungbatan dagiti kararagda.

Doktrina ken Katulagan 112:11

Kayat ni Jesus nga ayatek ti tunggal maysa.

Ni Jesucristo ti naan-anay a pagwadan ti panagayat iti tunggal maysa, uray pay dagiti nangirurumen Kenkuana. Uray pay ni Joseph Smith nagibtur met kadagiti panangidadanes kenkuana dagiti sigud a gagayyemna. Tulongan dagiti ubbing a makasursuro a mabalintayo nga ayaten dagiti dadduma a kas met laeng iti inaramid ti Mangisalakan ken ni Joseph Smith.

Dagiti Mabalin nga Aktibidad

• Awisem dagiti ubbing nga agsisinnublat nga agbasa manipud iti “Chapter 41: Trouble in Kirtland” (Doctrine and Covenants Stories, 158–60). Iti estoria, siasino ti nangpakaro iti problema sadiay Kirtland? Siasino ti nangpadas a mangpasayaat kadagitoy? Awisem dagiti ubbing a mangbasa iti Doktrina ken Katulagan 112:11 ken isarita no apay a napateg nga ayaten iti tunggal maysa.

• Apay a napateg nga ayaten dagiti tattao a maiduma kadatayo? Apay ngata a nangted iti Nailangitan nga Ama kadagiti pagdudumaantayo? Kasano a “[ma]palubosantayo nga agindeg ti ayat iti amin” uray pay dagiti maiduma kadatayo? Makipagkansion kadagiti ubbing iti maysa a kanta maipapan iti panagayat iti dadduma, kas iti “I’ll Walk with You” (Children’s Songbook, 140–41).

• Tulongam dagiti ubbing a mangpanunot kadagiti pagarigan no kaano nga inayat ti Mangisalakan dagiti nangirurumen Kenkuana (kas pagarigan, kitaen iti Lucas 23:34).

Doktrina ken Katulagan 112:12–15, 26

Naam-ammo dagiti pudno a napasurot ni Jesucristo.

Ti pannakapasurot ken ni Jesucristo ket tungpal-biag a proseso, ken mangiraman iti nasursurok pay ngem iti “[panangibutaktak] nga ammom ti Nagan[na]” (Doktrina ken Katulagan 112:26). Tulongam dagiti ubbing a mangawat a nasayaat no ania ti kaipapananna ti pudpudno a pannakaammo iti Mangisalakan.

Dagiti Mabalin nga Aktibidad

• Ibinglay kadagiti ubbing nga idi 1837, sumagmamano kadagiti Apostol ti nangtallikud ken ni Propeta Joseph Smith. Apay a napateg a suroten ti propeta? (kitaen iti bersikulo 15). Tulongam dagiti ubbing a mangaramid iti listaan dagiti banag nga imbaga ti Apo ken ni Thomas B. Marsh nga aramidenna, ti Presidente ti Korum dagiti Sangapulo-ket-dua nga Apostol (kitaen iti Doktrina ken Katulagan 112:12–15). Usaren ti listaan a makapaglilinnawag no kasano nga ad-adda a mapasurottayo ken ni Jesucristo.

• Saludsoden kadagiti ubbing no ania ti kapanunotanda iti kaipapanan ti panangiwaragawag nga am-ammom ni Jesucristo ngem iti saan a pudno a pannakaam-ammo Kenkuana (kitaen iti Doktrina ken Katulagan 112:26). Ania ti isuro kadatayo ti bersikulo 14 maipapan iti no kasano a nasaysayaat ti pannakaam-ammo Kenkuana? Tulongam dagiti ubbing a makaawat no ania ti kayat a sawen ti “ibaklayna ti krus[tayo]” (Joseph Smith Translation, Matthew 16:25–26 [iti Bible appendix]) wenno ti “pakanen dagiti karnero[na].”

Yallukoy ti Panagsursuro iti Pagtaengan

Awisem dagiti ubbing a manggupgop no ania ti nasursuroda iti klase ita nga aldaw. Tulongam ida nga agaramid iti maysa a surat wenno agdrowing iti maysa a ladawan a mangipalagip kadakuada no ania ti naadalda tapno maibinglayda daytoy kadagiti pamiliada.

Panangpadur-as iti Panangisurotayo

Nausisa dagiti ubbing ken agsursuroda iti adu a wagas. Maragsakan dagiti ubbing a makasursuro babaen kadagiti baro ken nadumaduma a padas. Usarem dagiti aktibidad a makatulong kadakuada nga aggunay, usaren ti amin a panagriknada, agsukisok, ken agpadas kadagiti baro a banag. (Kitaen iti Panangisuro iti Wagas ti Mangisalakan, 25–26.)