Pagbaludan ti Liberty

Primabera iti Pagbaludan iti Liberty ni Al Rounds

Oktubre 18–24

Doktrina ken Katulagan 121–123

“O Dios, Sadino ti Yanmo?”

Bayat ti panagadalmo iti Doktrina ken Katulagan 121–23, ibilangmo no ania ti ammon dagiti ubbing iti klasem. Agkararagka tapno maammuam no kasano a mapabilegmo no ania ti ammodan.

Isuratmo dagiti Impresionmo

icon iti panagbibinninglay

Yawis ti Panagbibinninglay

No inallukoymo dagiti ubbing a mangibinglay iti maysa a banag a nasursuroda iti klase iti napalabas a lawas kadagiti pamiliada, ikkam ida iti panawen a mangibinglay kadagiti padasda.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 121:7–8; 122:7

Mabalin a pagsayaatantayo dagiti naririgat a panawen.

Dagiti balikas ti Apo ken ni Joseph Smith iti Pagbaludan ti Liberty ket mangipaay iti gundaway tapno matulongam dagiti ubbing a mangbigbig a no dadduma narigat ti panagbiag, ngem matulongannatayo ti Nailangitan nga Ama ken ni Jesucristo.

Dagiti Mabalin nga Aktibidad

• Awisem dagiti ubbing a dumngeg iti balikas a “talna” bayat ti panangibinglaymo kadakuada iti “Chapter 46: Joseph Smith in Liberty Jail” (Doctrine and Covenants Stories, 172–74) wenno Doktrina ken Katulagan 121:7–8. Tulongam dagiti ubbing a mangpanunot kadagiti wagas a makapagtalektayo iti Apo kas iti inaramid ni Joseph tapno mariknatayo ti talna. Ilawlawag nga uray pay napadasan ni Joseph dagiti narigat a banag, adda kenkuana ti Apo.

• Tapno matulongam dagiti ubbing a mangbigbig a dagiti pannuboktayo “agbalindanto a pagsayaatan[tayo]” (Doktrina ken Katulagan 122:7), kasaritam ida maipapan iti no kasano a dumakkel dagiti piskeltayo no agbagkattayo iti maysa a nadagsen a banag. Pagpammarangem ida a mangbagbagkat iti maysa a nadagsen a banag wenno agtrabaho iti narigat. Ilawlawag a ti panagsagaba kadagiti narigat a panawen ket makatulong a mangpabileg iti espiritutayo—no umasidegtayo iti Apo para iti tulong. Ibinglaymo dagiti sumagmamano a pagwadan a mainaig kadagiti ubbing a sursuruam. Awisem ida nga ulitenda kenka ti ragup dagiti balikas nga “Amin dagitoy a banag … agbalindanto a pagsayaatan [tayo].”

Doktrina ken Katulagan 122:8

Ammo ni Jesucristo no kasano ti mariknak.

Iti Pagbaludan ti Liberty, imbaga ni Jesucristo ken ni Joseph Smith a bimmaba Isuna iti babaenda amin (kitaen ti Doktrina ken Katulagan 122:8). Kayat na a sawen nga ammona ti sagsagabaentayo ket mabalintayo nga umasideg Kenkuana.

Dagiti Mabalin nga Aktibidad

• Tapno matulongam dagiti ubbing a makasursuro nga agtalek ken ni Cristo no mapadpadasanda dagiti narigat a banag, kiddawem kadakuada nga ipakitada kenka no ania ti langa dagiti rupada no naliday wenno nadangran wenno mabutengda. Ania ti makatulong kadatayo no kastoy ti mariknatayo? Basaem ti Doktrina ken Katulagan 122:8, ket ilawlawagmo a ti kaipapanan daytoy ket ammo ni Jesucristo no kasano ti mariknatayo, ket matulongannatayo.

• Aggigiddan a kantaen ti “Jesus Once Was a Little Child” (Children’s Songbook, 55), ken paneknekam a matulongannatayo ni Jesucristo gapu ta ammona no kasano ti mariknatayo.

  Ni Jesus iti daga ti Getsemani

  Maawatan ni Jesus ti panagsagabatayo. Saan a ti Pagayatak, no di ket ti Pagayatam, ni Walter Rane

Doktrina ken Katulagan 123:17

Kayat ti Dios a siraragsakak nga agaramid no ania iti kabaelak.

Uray pay adda ni Joseph Smith iti pagbaludan ken napatalaw dagiti Santo manipud kadagiti pagtaenganda, inallukoyna dagiti Santo nga “agraragsak koma nga aramiden amin dagiti naipakumit iti bilegtayo.”

Dagiti Mabalin nga Aktibidad

• Ibasam kadagiti ubbing ti Doktrina ken Katulagan 123:17, ket awisem ida a tumakder ken agragsak no mangngeganda ti balikas nga “agraragsak.” Awisem ida nga agpammarang nga agar-aramid kadagiti nagduduma a tignay ti panagserbi iti siraragsak a wagas.

• Aggigiddan a mangkansion iti maysa a kanta maipapan iti panagserbi, kas iti “When We’re Helping” (Children’s Songbook, 198). Tulongam dagiti ubbing a mangpanunot kadagiti wagas a mabalinda a siraragsak nga agserbi kadagiti pamilia ken gagayyemda.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 121:7–9; 122:7–9

Mabalin a pagsayaatak dagiti pannubokko.

Maysa a wagas a liniwliwa ti Mangisalakan ni Joseph Smith idi nagsagaba iti Pagbaludan ti Liberty ket babaen iti panangisurona kenkuana nga “amin dagitoy a banag ipaayandaka iti padas, ket agbalindanto a pagsayaatam.” (Doktrina ken Katulagan 122:7). Mabalin a mangbendision kadagiti ubbing daytoy a kinapudno no maipasangoda kadagiti bukodda a pannubok.

Dagiti Mabalin nga Aktibidad

• Awisem dagiti ubbing a mangibinglay iti no ania ti ammoda maipapan iti padas ni Joseph Smith iti pagbaludan ken dagiti Santo a napagtalaw manipud iti Missouri (kitaen kadagti kapitulo 45–47 iti Doctrine and Covenants Stories, 167–75). Saludsodem kadagiti ubbing no kasano koma ti mariknada no isuda ni Joseph Smith wenno maysa kadagiti Santo iti dayta a panawen. Basaem a kadua dagiti ubbing ti Doktrina ken Katulagan 121:7–9; 122:7–9, ket awisem ida a mangkita iti maysa a banag nga imbaga ti Apo a makaipaay kadakuada iti talna. Kasano a dagiti narigat a padastayo “agbalindanto a pagsayaatan[tayo]”?

• Kiddawem iti dua nga ubbing nga iggamanda dagiti murdong iti maysa a tali a ti kaatidogna ket maunnat iti intero a siled. Kiddawem iti maysa nga ubing nga iggamanna ti maysa a punto iti tali. Basaem ti Doktrina ken Katulagan 121:7–8., ket ilawlawagmo a ti tali ti mangibagi kadagiti agnanayon a tawen ken ti bassit a punto a naiggaman ket kas kadagiti tawentayo iti daga. Ania ti kaipapanan a dagiti pannuboktayo iti daga ket “saan nga agbayag”?

• Tulongam dagiti ubbing a mangipapan no kasano iti mangbubos iti uppat a bulan iti maysa a lugar a kas iti Pagbaludan iti Liberty. Ania koma ti kailiwtayo unay? Kasano a bubosentayo ti panawentayo? Ania ti nasursuro ni Joseph Smith iti Doktrina ken Katulagan 121:7–9; 122:7–9 a nakatulong kenkuana a nagibtur iti daytoy a padas? Allukoyem dagiti ubbing nga agaramid iti maysa a surat para iti maysa a tao a marigrigatan, ket isingasing a mangusarda iti maysa a banag manipud iti Dotrina ken Katulagan 121:7–9; 122:7–9 kadagiti suratda.

Doktrina ken Katulagan 121:34–46

Nasken a nalintegtayo tapno maaddaan kadagiti “bileg iti langit.”

Tulongam dagiti ubbing a sursuruam a mangbigbig a mabalin a maaddaantayo iti bileg ti Dios iti biagtayo no laeng nalintegtayo.

Dagiti Mabalin nga Aktibidad

• Mangidrowing iti maysa a linia nga addaan kadagiti balikas a nangato a bileg iti maysa a murdong ken nababa a bileg iti sabali. Mangidrowing iti maysa nga arrow a mangitudtudo iti tengnga ti linia. Mangpili iti sumagmamano a balikas wenno ragup ti balikas manipud iti Doktrina ken Katulagan 121:34–46 a mangisuro no kasano a pakapsuten wenno papigsaen ti nailangitan a bileg iti biagtayo (kas dagiti “ilimed dagiti basoltayo,” “dayawtayo,” “kinaanus,” ken “ayat”). Awisem dagiti ubbing nga agsisinublat a mangpili iti balikas, a mangikeddeng no ti balikas ket agturong iti panagkapsut wenno panagpigsa ti bileg, ken iti maitunos a panangiturong ti arrow. Kasaritam dagiti ubbing maipapan kadagiti tao nga ammoda a nasayaat nga impluensia kadagiti dadduma gapu ta sursurotenda ti balakad ti Apo kadagitoy a bersikulo.

• Basaem ti Doktrina ken Katulagan 121:41–42, 45, ket kiddawem dagiti ubbing nga ilistada dagiti kababalin kadagitoy a bersikulo a kayat ti Apo nga adda kadatayo. Tulongam ida a mangilawlawag iti kaipapanan ti ania man kadagiti balikas a saanda a maawatan. Tudingam ti tunggal ubing iti maysa a kababalin, ket tulongam ida a mangpanunot iti wagas a mabalinda nga ipakita daytoy. Apaman a nakaibinglayda aminen, kiddawem ida a basaenda dagiti bersikulo 45–46 ket ilistada dagiti bendision a maawatdanto no patanorenda dagitoy a kababalin.

• Aggigiddan a mangbasa iti umuna a linia manipud iti Doktrina ken Katulagan 121:46. Kasano nga agbalin ti Espiritu Santo a “kanayon a kaduatayo”? Aggigiddan a mangkanta iti “The Holy Ghos” (Children’s Songbook, 105) wenno sabali a kanta maipapan iti sagut ti Espiritu Santo. Ania ti isuro ti kanta kadatayo maipapan iti no apay a kayattayo nga agbalin ti Espiritu Santo a kanayon a kaduatayo?

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangpanunot iti maysa a tao nga agsagsagaba. Tulongam ida a mangbigbig iti maysa a banag a nasursuro ni Joseph Smith iti Pagbaludan ti Liberty a mabalinda nga ibinglay iti daytoy a tao.

Panangpadur-as iti Panangisurotayo

Suportaran ti Panagsursuro iti Pagtaengan “Dagiti nagannak ti kaskenan a mannursuro iti ebanghelio para kadagiti annakda—agpadada nga addaan iti kangrunaan a pagrebbengan ken kaindaklan a bileg a makaimpluensia kadagiti annakda (kitaen iti Deuteronomio 6:6–7). Bayat ti panangisurom kadagiti ubbing iti simbaan, sikakararag a mangsapul kadagiti wagas a pakatulongam kadagiti nagannak iti napateg nga akemda” (Panangisuro iti Wagas ti Mangisalakan,25).

panid ti aktibidad: ammo ni Jesucristo no ania ti sagsagabaek.