Far West, ni Al Rounds

Oktubre 11–17

Doktrina ken Katulagan 115–120

“Nasagsagradonto ti Sakripisiona Kaniak ngem iti Matgedanna”

Ipalubosmo a ti Espiritu ti mangtarabay kenka kadagiti pagbatayan a kasapulan unay dagiti ubbing. Mabalin a makakitaka kadagiti makatulong a kapanunotan kadagiti aktibidad para kadagiti in-inaudi nga ubbing wenno para kadagiti in-inauna nga ubbing.

Isuratmo dagiti Impresionmo

Yawis ti Panagbibinninglay

No dadduma, mabalin a nasayaat no makasarita dagiti nagannak iti maysa kadagiti ubbing iti nasaksabay ken mangisingasing nga umay iti klase ti ubing a nakasagana a mangibinglay iti maysa a banag a nasursurona iti pagtaengan. Mabalin a maragsakan ti ubing a mangidaulo iti klase iti maysa nga aktibidad a naaramidna kadagiti miembro ti pamilia.

Isuro ti Doktrina: In-inaudi nga Ubbing

Doktrina ken Katulagan 115:4–5

Kamengak iti Ti Simbaan ni Jesucristo dagiti Santo iti Ud-udina nga Aldaw.

Kasano a matulongam dagiti ubbing a mangbigbig kadagiti bendision ti panagbalin a paset ti Simbaan ni Jesucristo?

Dagiti Mabalin nga Aktibidad

• Saludsodem dagiti ubbing no adda kadakuada ti makaibaga iti naan-anay a nagan ti Simbaan. Ipakitam kadakuada ti logo ti Simbaan (iti pablaak ti Simbaan wenno name tag ti misionario), isuratmo ti nagan iti pisarra, wenno basaem daytoy kadakuada manipud iti Doktrina ken Katulagan 115:4. Kiddawem kadagiti ubbing nga ibagada ti nagan kenka bayat ti panangitudom ti tunggal balikas. Ilawlawagmo dagiti napapateg a balikas iti nagan, ket tulongam dagiti ubbing a mangawat no apay a napateg dagitoy a balikas (kitaen ti “Chapter 43: Jesus Christ Names His Church,” Dagiti Estoria iti Doktrina ken Katulagan, 164).

• Aggigiddan a kantaen ti “The Church of Jesus Christ” (Children’s Songbook, 77), ken ibinglaymo kadagiti ubbing no kasano ti mariknam maipapan iti panagbalinmo a miembro iti Simbaan ni Jesucristo. Paibinglaymo kadakuada no ania ti mariknada maipapan iti Simbaan.

• Awisem dagiti ubbing nga agtakder no mabasam ti balikas a “tumakderkayo” iti Doktrina ken Katulagan 115:5. Awisem ida a mangunnat kadagiti ramay ti imada a kas kadagiti raniag ti init no basaem ti “agrimatkayo.” Aggigiddan a kantaen iti maysa a kansion maipapan iti panagbalin a silaw kadagiti dadduma, kas iti “I Am like a Star” (Children’s Songbook, 163). Ipalagipmo kadagiti ubbing a naggapu dagiti silawtayo ken ni Jesucristo, ket tulongam ida a mangpanunot kadagiti wagas a mabalinda ti “agrimat.”

Doktrina ken Katulagan 117:6

Inaramid ni Jesucristo ti daga ken ti amin a banag nga adda iti daytoy.

Tapno maallukoy da William Marks ken Newel K. Whitney nga isakripisioda ti sanikuada ket mapanda iti Missouri, impalagip ti Apo kadakuada a pinarsuana ti amin a banag iti daga. Kasano a mabendisionan dagiti ubbing babaen iti pannakaammoda iti daytoy a kinapudno?

Dagiti Mabalin nga Aktibidad

• Mangitugot wenno mangidrowing kadagiti ladawan dagiti pinarsua iti Doktrina ken Katulagan 117:6 nga imbaga ti Apo nga inaramidna (wenno awisem dagiti ubbing a mangidrowing kadagiti bukodda a ladawan). Awisem dagiti ubbing nga itag-ay wenno itudoda dagiti ladawan bayat ti panangbasam iti bersikulo. Ibagam kadagiti ubbing no apay a napateg kenka a maammuan a ni Jesucristo ti nangparsua kadagitoy a banag.

• Aggigiddan a kantaen ti maysa a kansion maipapan kadagiti pinarsua ti Apo, kas iti “My Heavenly Father Loves Me” (Children’s Songbook, 228–29). Pagsaritaem dagiti ubbing maipapan iti sumagmamano a banag a pinarsua ti Dios a nakatulong kadakuada a marikna iti ayatna.

Doktrina ken Katulagan 119–20

Makatulong ti apagkapullo iti Simbaan a mangaramid ti trabaho ti Dios.

Mabalin nga adu kadagiti ubbing a sursuruam ti naubing pay unay a mangged iti kuarta ken agbayad iti apagkapullo, ngem nasayaat para kadakuada a maawatan no kasano a makatulong ti apagkapullo iti naindaklan a trabaho ti Simbaan iti intero a lubong.

Dagiti Mabalin nga Aktibidad

• Ilawlawag no kasano ti panagbayadtayo iti apagkapullo ken no ania iti pakausaranna daytoy (kitaen ti “Chapter 44: Tithing,” Doctrine and Covenants Stories, 165–66, wenno ti maitutop a video iti ChurchofJesusChrist.org). Mangidrowing iti 10 a sinsilio iti pisarra, ket kiddawem dagiti ubbing a tulongandaka a bilangen dagitoy. Ammuen no mano ti maited iti Apo para iti apagkapullo.

• Aggigiddan nga agkansion iti maysa a kanta maipapan iti apagkapullo, kas iti “I Want to Give the Lord My Tenth” (Children’s Songbook, 150), ket ibagam kadagiti ubbing no apay a piliem nga agbayad ti apagkapullo. No mabalin, mangibinglay iti bukod nga estoria.

Isuro ti Doktrina: In-inauna nga Ubbing

Doktrina ken Katulagan 115:4–6

Makatulong ti pagwadak iti dadduma nga umasideg ken ni Cristo ken mangsapul iti kinatalged.

Nalabit ammo dagiti ubbing a sursuruam dagiti tao a naapektuan dagiti bagyo iti biag ket agkasapulanda iti “pagkamangan” (bersikulo 6) nga ipaay ti Simbaan. Ibilang no kasano a maparegtam dagiti ubbing a “tumakder ken agrimat” (bersikulo 5) ket ibinglay ti silawda kadagitoy a tattao.

Dagiti Mabalin nga Aktibidad

• Pagpapasaem ti maysa a flashlight, ladawan ti init, wenno sabali pay a banag a mangibagi iti silaw ti ebanghelio ti Mangisalakan. No isudanto ti mangiggem iti silaw, awisem dagiti ubbing a basaen ti Doktrina ken Katulagan 115:4–5 ket nagananda ti maysa a banag a mabalinda nga aramiden tapno “agrimat” a kas silaw kadagiti dadduma (kitaen ti 3 Nephi 18:24).

• Awisem dagiti ubbing a mangidrowing iti maysa a ladawan a mangipakita iti Doktrina ken Katulagan 115:6. Kas pagarigan, mabalinda a mangidrowing iti bagyo, nga adda dagiti tattao nga agkamang iti maysa a pasdek ti Simbaan. Ania dagiti sumagmamano a banag a mabalin a mangibagi iti bagyo? Kasano a mangipaay ti Simbaan iti pagkamangan manipud kadagitioya banag?

Doktrina ken Katulagan 117

Sagrado dagiti sakripisiok iti Apo.

Iti benneg 117, binalakadan ti Apo da William Marks ken Newel K. Whitney nga isakripisioda dagiti sanikuada iti Kirtland para kadagiti nain-indaklan pay a bendision iti Missouri. Dinayawna pay ni Oliver Granger para kadagiti sakripisio nga inaramidna. Ania ti mariknam a mabalin a nasursuro dagiti ubbing manipud kadagiti pagwadanda?

Dagiti Mabalin nga Aktibidad

• Awisem dagiti ubbing a mangipapan nga isuda ti maysa a naballigian nga agtagikua iti paglakuan iti Kirtland, a kas ken ni Newel K. Whitney. Ania koma ti mariknada no kiddawen ti Apo ida a talawanda ti paglakuanda ket umakarda iti maysa a baro a lugar? Basaem kadagiti ubbing ti Doktrina ken Katulagan 117:1–11, ket kiddawem dagiti ubbing a pagsardengendaka no mangngegda ti maysa a banag a makatulong kadakuada a maaddaan iti pammati a mangaramid kadagiti sakripisio ken agtungpal iti Apo. Ania ti isakripisiotayo ita nga agtungpal iti Apo?

• Ibagam iti ababa a palawag kadagiti ubbing no apay a nasken a talawan dagiti Santo ti Kirtland, wenno palubosam ti maysa nga ubing nga aramiden daytoy (kitaen ti “Chapter 41: Trouble in Kirtland,” Doctrine and Covenants Stories, 158–60). Ilawlawag a kiniddaw ti Apo ni Oliver Granger nga agbati iti Kirtland ken bayadanna dagiti utang ti Simbaan. Apay a narigat nga aramiden daytoy? Ania ti imbaga ti Apo iti Doktrina ken Katulagan 117:13 a makatulong ken ni Oliver—wenno siasino man kadatayo—a mangaramid kadagiti sakripisio nga agtungpal iti Apo?

Doktrina ken Katulagan 119–20

Makatulong ti apagkapullo iti Simbaan a mangaramid ti trabaho ti Dios.

Utobem no kasano a matulongam dagiti ubbing a maawatan no kasano a ti apagkapullo—uray pay dagiti babassit a gatad a bayadanda—ket makatulong iti panangbangon iti pagarian ti Apo (kitaen iti Napudno iti Pammati, 180–82).

Dagiti Mabalin nga Aktibidad

• Awisem dagiti ubbing a mangipapan nga adda maysa a gayyem a makakita iti pasdek ti Simbaan ket agsaludsod, “Kasano ti panangbayad ti Simbaanyo iti dayta a pasdek?” Kasano nga ilawlawagtayo ti apagkapullo iti daytoy a gayyem? Isingasing nga agibasar dagiti ubbing iti Doktrina ken Katulagan 119:4; 120:1 bayat ti panangibilangda iti daytoy a saludsod.

• Tulongam dagiti ubbing a mangpanunot kadagiti banag a kabaelan ti Simbaan nga aramiden gapu iti apagkapullo. Kasano a mabendisionan ti biagtayo kadagitoy a banag? Ibinglaymo ti kaririknam maipapan iti linteg ti apagkapullo ken no kasano a nabendisionanka iti daytoy.

  

  Babaen ti panagbayad iti apagkapullo, maipakitatayo ti ayattayo iti Dios ken makatulong iti aramidna.

Yallukoy ti Panagsursuro iti Pagtaengan

Awisem dagiti ubbing a kitaenda no ania ti nariknada kadagiti puso wenno panunotda bayat iti Primary ita nga aldaw. Allukoyem ida a mangibinglay kadagiti rikna ken panunotda kadagiti pamiliada.

Panangpadur-as iti Panangisurotayo

Mangsuportar kadagiti nagannak. Mangsapul kadagiti wagas a mangibinglay kadagiti nagannak no ania dagiti nasursuro dagiti annakda iti Primary, ket saludsodem kadakuada no kasano a masuportaram dagiti panagkagumaanda kas nagannak (kitaen ti Panangisuro iti Wagas ti Mangisalakan, 25).