Septiembre 20–26

Doktrina ken Katulagan 106–108

“Tapno Maluktan ti Langit”

Insuro ni Elder Ulisses Soares, “Kasapulantayo a tungpalen [ti Mangisalakan], masansan a basaen ken adalen a nasayaat dagiti nasantuan a kasuratan, agrag-o kadagitoy, ken adalen ti doktrinana, ken agkagumaanan nga agbiag iti wagas ti panagbiagna” (“How Can I Understand?” Ensign wenno Liahona, Mayo 2019, 7). Bayat ti panangiraremmo iti bagim iti Doktrina ken Katulagan, 106–8, isuratmo dagiti wagas a kabaelam nga ikagumaan nga agbiag kadagiti kinapudno a matakuatam.

Isuratmo dagiti Impresionmo

Iti umuna a panagkitam, ti Doktrina ken Katulagan 107 mabalin a kasla maipapan laeng iti panangbukel kadagiti saad ti priesthood iti maysa a nga istraktura iti panangidaulo para iti Simbaan ti Apo. Kinaagpaysona, idi panawen a naipablaak daytoy a paltiing, narimbawanen ti bilang ti miembro ti Simbaan dagiti sumagmamano a lider nga addan iti Simbaan. Isu a ti pannakailanad dagiti akem ken pagrebbengan ti Umuna Panguluen, ti Korum dagiti Sangapulo-ket-dua, ti Seventy, dagiti bishop, ken dagiti panguluen ti korum ket awan duadua a kasapulan ken makatulong. Ngem ad-adu pay nga amang ti kaipapananna dayta a nasantuan a pangiturong iti benneg 107 ngem iti no kasano a buklen dagiti saad ken korum ti priesthood. Suruannatayo ditoy ti Apo maipapan ti nagkauna nga urnos ti priesthood a “nairugi kadagiti aldaw ni Adan” (bersikulo 41). Panggepna manipud idi punganay a mangaramid a posible para kadagiti annak ti Dios—a pakairamanam— tapno umawat kadagiti pangisalakan nga ordinansa ti ebanghelio ken mangnanam iti “amin a naespirituan a bendision ti simbaan—tapno maaddaan iti pribilehio nga umawat kadagiti kindatdatlag iti pagarian ti langit, [ken] tapno maluktan ti langit kadakuada” (bersikulo 18–19).

Kitaen iti “Restoring the Ancient Order,” Revelations in Context, 208–12.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 106; 108

Iturong, paregtaen, ken tulongan ti Apo dagiti awaganna nga agserbi.

Iti Doktrina ken Katulagan 106 ken 108, nangted ti Apo iti pammagbaga ken kari iti dua a miembro a naawagan nga agserbi iti Simbaan. Ania dagiti ragup ti balikas kadagitoy a paltiing ti mangidiaya iti pammaregta ken nalawag a pannakaammo ken pannakaawat maipapan iti bukodmo a panagserbi iti pagarian ti Dios? Adtoy ti dua nga ibilang:

• Kasano a naawatmo ti “kaasi ken pammatalged” tapno kabaelam ti “tumakder”? (Doktrina ken Katulagan 106:8).

• Kasano a mabalinmo a “yad-adda ti agannad manipud ita iti panagtungpalmo kadagiti sapatam,” wenno katulagam? (Doktrina ken Katulagan 108:3).

Ania dagiti dadduma pay a ragup ti balikas manipud iti benneg 106 ken 108 a napnuan kaipapananna kenka?

Kitaen met iti Russell M. Nelson, “Ministering with the Power and Authority of God,” Ensign wenno Liahona, Mayo 2018, 68–75; “Warren Cowdery,” Revelations in Context, 219–23; “‘Wrought Upon’ to Seek a Revelation,” Revelations in Context, 224–28.

Doktrina ken Katulagan 107

Idauluan ti Apo ti Simbaanna babaen iti turay ti priesthood.

Bayat ti panagadalmo ti Pannakaisubli ti ebanghelio, mabalin a nadlawmo a di gagangay nga ilawlawag ti Apo ti maysa a doktrina iti naan-anay iti maysa a paltiing. Ngem ketdi, ipalgakna iti “tunggal binatog” (Doktrina ken Katulagan 98:12) no agkasapulan daytoy kadagiti kasasaad. Numan pay nangteden ti Apo iti pangiturong maipapan iti priesthood a nasapsapa a kas idi 1829 (kitaen, kas pagarigan kadagiti, benneg 20 ken 84), nangted Isuna iti nayon a pangiturong kadagiti Santo idi 1835 maipapan kadagiti naipangpangruna a saad iti priesthood a kasapulan a mangimaton ken mangtarabay iti umad-adu nga arbanna.

Bayat ti panangbasam maipapan kadagiti sumaganad a saad ti priesthood, ibilangmo no kasano nga itandudom dagiti agserserbi kadagitoy a takem babaen iti “panagtalekmo, pammatim ken [kar]kararagmo” (Doktrina ken Katulagan 107:22).

• Ti Umuna a Panguluen ken Presidente ti Simbaan (dagiti bersikulo 9, 21–22, 65–66, 91–92)

• Ti Sangapulo-ket-dua nga Apostol (dagiti bersikulo 23–24, 33–35, 38, 58)

• Ti Pitupulo (dagiti bersikulo 25–26, 34, 93–97)

• Dagiti bishop (dagiti bersikulo 13–17, 68–76, 87–88)

Doktrina ken Katulagan 107:1–20

Mangipaay dagiti ordinansa ti priesthood kadagiti temporal ken naespirituan a bendision iti amin nga annak ti Nailangitan nga Ama.

Insuro ni Elder Neil L. Andersen: “Ti priesthood ket ti bileg ken turay ti Dios a naited para iti pannakaisalakan ken bendision ti amin—lallaki, babbai, ken ubbing. … No maikaritayo, pabaknangen dagiti ordinansa ti priesthood dagiti biagtayo iti rabaw ti daga ket isagananatayo para kadagiti naisangsangayan a kari iti lubong nga agur-uray” (“Power in the Priesthood,” Ensign wenno Liahona, Nob. 2013, 92). Bayat ti panangbasam iti Doktrina ken Katulagan 107:1–20 (nangnangruna a kitaem dagiti bersikulo 18–20) ken ti nabati a paset ti mensahe ni Elder Andersen, ibilangmo nga isurat dagiti impresion a maawatmo maipanggep iti no kasano a pabaknangen ti bileg ti Dios ti biagmo iti daga ken isagananaka para iti kinaagnanayon. Ania ti ar-aramidem tapno naan-anay a maawatmo—ken matulongam dagiti dadduma pay nga umawat—kadagita a bendision?

Kitaen met iti Doktrina ken Katulagan 84:19–27; Dallin H. Oaks, “The Melchizedek Priesthood and the Keys,” Ensign wenno Liahona, Mayo 2020, 69–72.

Doktrina ken Katulagan 107:41–57

Bendisionan ti priesthood dagiti pamilia.

Tinarigagayan ni Adan a mabendisionan ti kaputotanna babaen iti priesthood. Ania dagiti kari a naawatna? (kitaen kadagiti bersikulo 42, 55). Bayat ti panagbasam iti no ania ti inaramid ni Adan, ibilangmo dagiti bukodmo a tarigagay para iti pamiliam tapno mangsagrap kadagiti bendision ti priesthood. Ania ti pakaregtaam nga aramiden a mangtulong iti pamiliam nga umawat kadagitoy a bendision?

Ni Adan a Mangbembendision iti Kaputotanna, ni Clark Kelley Price

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 106:6.Ania ti maaramid ti pamiliatayo a mangigapu iti “rag-o ti langit”?

Doktrina ken Katulagan 107:22.Ania ti ar-aramidentayo a mangitandudo kadagiti lidertayo “babaen ti … panagtalek, pammati ken kararag”?

Doktrina ken Katulagan 107:27–31, 85.Dagiti pagbatayan a managtarabay kadagiti konseho ti Simbaan ket makatulong met kadatayo nga agiinnuman kas maysa a pamilia. Ania dagiti pagbatayan kadagitoy a bersikulo a mayaplikartayo kadagiti konseho iti pamiliatayo? (Kitaen iti M. Russell Ballard, “Family Councils,” Ensign wenno Liahona, Mayo 2016, 63–65.)

Doktrina ken Katulagan 107:99–100.Ikkam ti maysa a miembro ti pamilia iti naisurat a pangiturong para iti maysa nga aramid iti sangakabbalayan, ket awisem isuna nga agpili no kasano nga aramidenna ti trabaho: sigagaget, sinasadut, wenno saanna a basbasaen dagiti pangiturong. Bay-am a buyaen dagiti dadduma pay a miembro ti pamilia nga aramidenna ti trabaho ken pugtuanda no ania ti pilien ti miembro ti pamilia no kasano ti panangaramidna. Kalpasanna pagsisinnublatem dagiti dadduma pay a miembro ti pamilia. Apay a kasapulan ti Apo a sursuruentayo nga agpadpada dagiti pagrebbengantayo ken aramidentayo amin dagitoy a sipapasnek? (Kitaen iti Becky Craven, “Careful versus Casual,” Ensign wenno Liahona, Mayo 2019, 9–11.)

Doktrina ken Katulagan 108:7.Kasano a mapatibkertayo ti maysa ken maysa kadagiti pannakisaritatayo? kadagiti kararagtayo? kadagiti panangigunamgunamtayo, wenno panangparegtatayo? iti amin nga ar-aramidentayo? Mabalinmo a pilien ti maysa kadagitoy a mangitrabaho a kas pamilia.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “We Listen to a Prophet’s Voice,” Hymns, no. 22.

Panangpadur-as iti Bukod a Panagadal

Isuratmo dagiti impresion. No sumangbay kenka dagiti naespirituan nga impresion wenno nauneg a pannakaammo ken pannakaawat, isuratmo dagitoy. No aramidem, ipakitam iti Apo nga ipategmo ti panangiturongna. (KItaen iti Panangisuro iti Wagas ti Mangisalakan, 12, 30.)

Bendisionan ni Melchizedek ni Abram, ni Walter Rane