“Septiembre 6–12. Doktrina ken Katulagan 98–101: ‘Agtalnakayo ket Ammuenyo a Siak ti Dios,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Septiembre 6–12. Doktrina ken Katulagan 98–101,” Umaykayo, Sumurot Kaniak—Para kadagiti Indibidual ken Pamilia: 2021
C. C. A. Christensen (1831–1912), Napapanaw dagiti Santo manipud iti Jackson County Missouri, c. 1878, tempera on muslin, 77 ¼ × 113 inches. Brigham Young University Museum of Art, sagut dagiti appoko ni C. C. A. Christensen, 1970
Septiembre 6–12
Doktrina ken Katulagan 98–101
“Agtalnakayo ket Ammuenyo a Siak ti Dios”
Bayat ti panangbasam iti Doktrina ken Katulagan 98–101, ikasom dagiti kapanunotan ken impresion a sumangbay kenka. Kasano a mabalin a ti panangtignay kadakuada ti makatulong kenka nga agbalin a tao a kayat ti Dios a pagbalinam?
Isuratmo dagiti Impresionmo
Para kadagiti Santo iti 1830, ti Independence, Missouri, ti literal a naikari a daga. Isu idi ti “kangrunaan a lugar” ti Zion (kitaen iti Doktrina ken Katulagan 57:3)—ti siudad ti Dios iti daga—a pangipapaayanda iti adu a sakripisio a pagbangonanda. Kadakuada, ti panagummong dagiti Santo sadiay ket napnuan gagar ken nadayag kas umuna a pasamak iti Maikadua a Yaay. Ngem sabali ti panagkita dagiti kaarrubada iti dayta a lugar. Madi ti riknada iti pammati nga inteden ti Dios ti daga kadagiti Santo, ken saanda a nagustuan dagiti nagbanagan a mainaig iti politika, ekonomia, ken gimong dagiti adu a tao manipud iti saan a nalatak a relihion a simmangbay iti lugar iti kasta a kadaras. Iti saan a nagbayag nagbalin a pammutbuteng ti pakaseknan, ken dagiti pammutbuteng nagbalin a pannakaidadanes ken kinaranggas. Idi Hulio1833, nadadael ti opisina a pagimalditan iti Simbaan, ken iti Nobiembre, napilitan dagiti Santo a pumanaw kadagiti pagtaenganda iti Jackson County, Missouri.
Nalablabes ngem 800 a milia ti kaadayo ni Joseph Smith iti Kirtland, ket immabot iti dua a lawas daytoy a damag tapno dumanon kenkuana. Ngem ammo ti Apo no ania ti napaspasamak, ket impalgakna iti Propetana dagiti pagbatayan ti kappia ken pammaregta a mangliwliwa kadagiti Santo—dagiti pagbatayan a mabalin pay a makatulong kadatayo no mapadasantayo ti pannakaidadanes, no dagiti nalinteg a tarigagaytayo ket saan a maipatungpal, wenno no kasapulantayo ti maysa a palagip nga iti inaldaw a panagrigattayo ket iti kamaudianan, uray no kaskasano nga, “agbalindanto a pagimbagan[tayo]” (Doktrina ken Katulagan 98:3).
Kitaen iti Saints, 1:171–93; “Waiting for the Word of the Lord,” Revelations in Context, 196–201.
Dagiti Kapanunotan para iti Bukod a Panagadal iti Nasantuan a Kasuratan
Doktrina ken Katulagan 98:1–3,11–14; 101:1–16
Agkaykaysa ti amin a pannubokko para iti pagimbagak.
Sumagmamano kadagiti rigattayo ditoy a biag ket gapu kadagiti bukodtayo a pili. Dagiti dadduma ket gapu kadagiti pili dagiti sabali. Ket no dadduma awan maysa a mababalaw—mapasamak latta dagiti dakes a banag. Uray ania man iti gapuna, makatulong ti kinarigat a mangipatungpal kadagiti nadiosan a panggep. Bayat ti panangbasam iti no ania ti kinuna ti Apo maipapan iti rigrigat dagiti Santo iti Doktrina ken Katulagan 98:1–3, 11–14 ken 101:1–16, ania ti masarakam a makatulong kenka kadagiti pannubokmo? Kasano a makaimpluensia dagitoy a bersikulo iti wagas ti panagkitam kadagiti karit a mapadpadasam? Utobem no kasano a nagkaykaysa dagiti pannubokmo para iti pagimbagam ken mangipatungpal kadagiti panggep ti Dios iti biagmo.
Kitaen met iti 2 Nephi 2:2; Doktrina ken Katulagan 90:24.
Doktrina ken Katulagan 98:23–48
Tarigagayan ti Apo a sapulek ti talna iti wagasna.
Numan pay saan amin iti Doktrina ken Katulagan 98:23–48 ket mayaplikar kadagiti bukod a pannakilangenmo kadagiti dadduma, ania dagiti pagbatayan a masarakam a makatarabay kenka no dangrandaka dagiti dadduma? Mabalin a makatulong a markaan ti balikas wenno ragup dagiti balikas a mangiladladawan no kasano a kalikaguman ti Apo a liklikan dagiti Santo ti riri iti Missouri.
Kitaen met iti Jeffrey R. Holland, “The Ministry of Reconciliation”,” Ensign wenno Liahona, Nob. 2018, 77–79.
Detalye manipud iti Ni Cristo ken ti Nabaknang nga Agtutubo nga Agturay, ni Heinrich Hofmann
Aywananto ti Apo dagiti agserbi Kenkuana.
Sumagmamano laeng a lawas kalpasan a naammuan ni Joseph ti pammarparigat iti Missouri, maysa a kabumbuniag a kumbert ti nangawis kenkuana nga agdaliasat nga agturong iti Canada tapno ibinglay ti ebanghelio kadagiti annakna a lallaki. Immanamong ni Joseph, nupay nagdanag maipapan iti panangpanawna iti pamiliana, nangnangruna a gapu iti pannakaidadanes ken pammutbuteng iti pamiliana ken ti Simbaan. Iti dalanda nga agpa-Canada, nagkararag ni Joseph ken ti kaduana, a ni Sidney Rigdon, para iti liwliwa, ket ti benneg 100 ti sungbat ti Apo kadakuada. Ania ti makitam iti sungbat ti Apo a mabalin a nangpasingked manen ken nangtulong kadakuada?
Nalabit a naaddaanka met kadagiti padas a nagkasapulan kenka tapno timbengem ti pakaseknan kadagiti pagrebbengam iti Simbaan ken ti pakaseknam para iti pamiliam. Kasano a matulongannaka dagiti balikas ti Apo iti benneg 100 kadagita a situasion?
Kitaen met iti “A Mission to Canada,” Revelations in Context, 202–7.
Doktrina ken Katulagan 101:43–65
Ti panangsurot iti balakad ti Dios ti mangtulong a mangpatalged kaniak.
Naited ti pangngarig iti Doktrina ken Katulagan 101:43–62 a mangilawlawag no apay nga impalubos ti Apo dagiti Santo a napapanaw iti Zion. Bayat ti panangbasam kadagitoy a bersikulo, adda kadi ania man a makitam a pagpadaan ti bagim ken dagiti katulongan iti daytoy a pangngarig? Nalabit a mabalin a saludsodem iti bagim: Pagduaduaak kadi dagiti bilin ti Dios? Kasano a mabalin a ti panagkurang ti pammati wenno panagkumit ti mangpalugod “ti kabusor” a maaddaan iti impluensia iti biagko? Kasano a maipakitak iti Dios a “siaayatak a paiwanwan iti umno ken umisu a wagas a para iti pannakaisalakan[ko]”? (kitaen kadagiti bersikulo 63–65).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Doktrina ken Katulagan 98:16, 39–40.Ania kadagitoy a bersikulo a makatulong kadatayo a maaddaan iti ad-adda a talna iti pamiliatayo? Agkansion ti maysa a kanta maipapan iti talna wenno pammakawan, kas iti “Truth Reflects upon Our Senses” (Hymns, no. 273). Mabalin met a magustuan dagiti ubbing ti mangyakem iti panangpakawan iti tunggal maysa.
-
Doktrina ken Katulagan 99.Idi naawagan ni John Murdock a panawan ti pagtaenganna “a mangipakdaar [iti] agnanayon nga ebanghelio” (bersikulo 1), kasubsublina laeng idi manipud iti maysa a narigat, naunday a tawen a mision iti Missouri (kitaen iti “John Murdock Mission to Missouri,” Revelations in Context 87–89). Ania ti masarakam iti benneg 99 a mabalin a makatulong wenno mangallukoy ken ni Kabsat a Murdock? Ania dagiti adda a mensahe ti Apo para kadatayo iti daytoy a paltiing?
-
Doktrina ken Katulagan 100:16; 101:3–5,18.Kalpasan ti panangbasam kadagitoy a bersikulo, mabalinmo nga ilawlawag no kasano a nasken a papudoten a nasayaat dagiti agpampanday ti landok a mangikkat iti rugit sa sukogedanda babaen iti panangpitpit nga ulit-uliten daytoy (kitaen iti “The Refiner’s Fire” on ChurchofJesusChrist.org). Mabalinyo met nga aggigiddan a sursuruen maipapan iti no kasano a madalusan dagiti dadduma pay a banag, kas iti danum wenno asin. Nalabit a mapatarnaw wenno madalusanyo ti maysa a banag a kas maysa a pamilia. Apay a kayattayo ti agbalin a nadalus? Ania ti isuro kadatayo dagitoy a pagarigan maipapan iti no kasano a makatulong dagiti pannuboktayo a mamagbalin kadatayo a “natarnaw a tattao”?
-
Doktrina ken Katulagan 101:22–36.Kasano a makatulong dagitoy a bersikulo kadagiti Santo a maipaspasango iti pannakaidadanes? Kasano a makatulongda kadagiti tao a makarikna iti buteng maipapan kadagiti kasasaad ti lubongtayo ita nga agdama?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Help Me, Dear Father,” Children’s Songbook, 99.
Panangpadur-as iti Bukod a Panagadal
Agsapul kadagiti pagbatayan. Insuro ni Elder Richard G. Scott: “Bayat ti panagkalikagummo a manggun-od iti naespirituan a pannakaammo, sukisokem dagiti pagbatayan. … Dagiti pagbatayan ket nabileg a kinapudno, nabuangay para iti pannakaipakat kadagiti adu a nadumaduma a kasasaad” (“Acquiring Spiritual Knowledge,” Ensign, Nob. 1993, 86).
Ti Missouri a Maur-uram, ni Glen S. Hopkinson