Dagiti Santo nga agtartaray manipud iti bunggoy a mangriribuk

C. C. A. Christensen (1831–1912), Dagiti Santo a Mapapanaw manipud iti Jackson County Missouri, c. 1878, tempera iti muslin, 77 ¼ × 113 pulgada. Brigham Young University Museum of Art, sagut dagiti appoko ni C. C. A. Christensen, 1970

Septiembre 6–12

Doktrina ken Katulagan 98–101

“Agtalnakayo ken Ammuenyo a Siak ti Dios”

Ania dagiti mensahe a kasapulan a mangngegan dagiti ubbing iti klasem ita a lawas? Kasano a makatulong kadakuada dagiti pagbatayan iti Doktrina ken Katulagan 98–101 tapno agbalinda a nasaysayaat a disipulo ni Jesucristo?

Isuratmo dagiti Impresionmo

icon iti panagbibinninglay

Yawis ti Panagbibinninglay

Allukoyem dagiti ubbing mangibinglay ti maysa a banag a nasursuroda manipud iti Doktrina ken Katulagan iti pagtaengan wenno iti Primary. Saludsodem kadakuada no ania ti pagragsakanda unay maipapan iti panagsursuro manipud iti Doktrina ken Katulagan.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 98:93–40

Mabalinko a pakawanen dagiti saan a nasayaat kaniak.

Kiniddaw ti Apo kadagiti Santo a maidaddadanes iti Jackson County, Missouri, a pakawanenda dagidi nangdangran kadakuada. Bayat ti panangisurom kadagiti ubbing iti kinapateg ti panangpakawan, siguraduem a maawatanda met a no adda ti mangdangran kadakuada, nasken a kanayon nga ibagada daytoy iti maysa a mapagtalkan a nataengan.

Dagiti Mabalin nga Aktibidad

• Tapno matulongam dagiti ubbing a maawatanda dagiti karit a sagsagabaen dagiti Santo ti Zion, ibinglaymo kadakuada ti “Chapter 34: God Warns the People of Zion” (Doctrine and Covenants Stories, 128–31, wenno ti maitutop a video iti ChurchofJesusChrist.org). Basaem ti Doktrina ken Katulagan 98:39–40, ket kiddawem kadagiti ubbing a denggenda no ania ti imbaga ti Apo nga aramidenda no dumawat ti pammakawan dagiti kabusorda. Apay a kayat ti Apo a pakawanentayo dagiti tao, uray pay dagidiay saan a nasayaat kadatayo?

• Mangikabil iti ladawan ti maysa a naragsak a rupa iti diding ken maysa a naliday a rupa iti bangir a diding. Mangibinglay kadagiti ubbing iti nagduduma a kasasaad a kas ti maysa a tao ket saan a nasayaat (mabalin a makakitaka ti sumagmamano nga estoria iti Friend wenno Liahona). Mangisingasing kadagiti wagas a mabalin a panagsungbattayo kadagiti saan a nasayaat nga ar-aramid, ket tulongam dagiti ubbing nga agdesision no ti tunggal sungbat ket mangparagsak wenno mangpaliday kadakuda. Awisem dagiti ubbing a mangitudo iti maitutop a rupa iti diding.

Doktrina ken Katulagan 101:16

Mangisangbay ni Jesucristo iti talna kaniak.

Idi nakapadpadas iti pannakaidadanes dagiti Santo, liniwliwa ida ti Apo babaen ti panangibagana, “Agtalnakayo ket ammuenyo a siak ti Dios.” Ibilang no kasano a makatulong daytoy a ballaag kadagiti ubbing a sursuruam.

Dagiti Mabalin nga Aktibidad

• Awisem dagiti ubbing nga agkuti-kuti kadagiti tugawda. Kalpasanna kiddawem ida nga agsardeng nga agkuti no itag-aymo ti maysa a ladawan ti Mangisalakan ket ibagam ti ragup dagiti balikas nga “Agtalnakayo ket ammuenyo a Siak ti Dios” (Doktrina ken Katulagan 101:16). Ulitem daytoy nga aktibidad iti sumagmamano a daras. Ilawlawagmo nga idi narigat ti biag para kadagiti Santo iti panawen ni Joseph Smith, kayat ni Jesus nga agtalna ken agtalekda Kenkuana imbes nga agdandanagda. Kasano a matulongannatayo ni Jesus no agrigrigattayo?

• Aggigiddan a mangkansion iti maysa a kanta maipapan iti panagraem, kas iti “Reverently, Quietly” wenno “To Think about Jesus” (Children’s Songbook, 26, 71). Tulungam dagiti ubbing a mangbigbig kadagiti natalna a karirikna a sumangbay no datayo ket natalna ken agpampanunot maipapan ken ni Jesus—kas pagarigan, no agkarkararag wenno makiranranudtayo iti sakramento.

• Tulongam dagiti ubbing a mangitrabaho iti panid ti aktibidad iti daytoy a lawas. Bayat ti panagkolorda, ibagam kadakuada no kasano a ti panangpampanunot ken ni Jesucristo nakatulong kenka a nakarikna iti talna, uray pay kadagiti naririgat a panawen.

  Jesucristo

  Detalye manipud iti Ni Cristo ken ti Nabaknang nga Agtutubo nga Agturay, ni Heinrich Hofmann

icon iti panangisuro

Isuro ti Doktrina: In-inauna nga Ubbing

Doktrina ken Katulagan 98:1–3, 11–14; 101:16

Makatulongto dagiti pannubokko nga agbalin nga ad-adda pay a kas ken ni Jesucristo?

Bayat ti pannakaipasango dagiti ubbing kadagiti karit iti unos ti panagbiagda, kasapulandanto iti pammati a ti Mangisalakan ti makatulongto kadakuada bayat kadagiti pannubokda ken dagitoy a pannubok “agbalindanto a pagimbagan[da]” (Doktrina ken Katulagan 98:3).

Dagiti Mabalin nga Aktibidad

• Kiddawen kadagiti ubbing a tulongandaka a mangaramid ti listaan iti pisarra kadagiti karit a mabalin a mapadasan ti maysa nga ubing a katawenanda. Ibagam kadagiti ubbing maipapan iti sumagmamano a karit dagiti Santo nga agnaed iti Jackson County, Missouri, idi 1833 (kitaen iti kapitulo 34 ken 35 iti Doctrine and Covenants Stories, 128–34). Ania a ballaag ti maiteddanto iti maysa nga ubing a mapadpadasanna dagitoy a karit? Kiddawem dagiti ubbing a mangbasa iti Doktrina ken Katulagan 98:1–3, 11–14, a mangkitkita iti pannarabay nga inted ti Apo. Kasano a masurotda daytoy a ballaag bayat ti panangsangoda kadagiti karit a kas kadagiti nailista iti pisarra?

• Awisem dagiti ubbing nga agtalna ken agulimek iti uneg ti sumagmamano a minuto bayat ti panangkitkita iti maysa a ladawan ti Mangisalakan wenno panangdengdengngeg iti maysa a kanta maipapan Kenkuana. Kalpasanna awisem ida a mangibinglay no ania ti narikna kan napadasanda bayat iti kinatalna. Basaen ti Doktrina ken Katulagan 101:16. Kasano a ti panagbalin a natalna ken iti panangpampanunot ken ni Jesus makatulong kadatayo? Tulongam dagiti ubbing a maawatan ti koneksion ti naraem a kinatalna ken iti kabaelantayo a mangrikna ti Espiritu ken agpanunot maipapan ken ni Jesus.

Doktrina ken Katulagan 98:23, 39–40

Kayat ni Jesus a pakawanek dagiti saan a nasayaat kaniak.

Nabilintayo nga ayaten ti tunggal maysa, pakawanen dagiti dadduma “mamimpitopulo a pito, ken itaya pay ti bangir a pingping” (kitaen ti Mateo 5:39, 43–44; 18:21–22). Kasano a mausarmo dagitoy a bersikulo tapno maisurom dagitoy a kinapudno kadagiti ubbing?

Dagiti Mabalin nga Aktibidad

• Isaritam kadagiti ubbing maipapan kadagiti pannakaidadanes a napasamak iti Jackson County, Missouri, idi 1833 (kitaen kadagiti kapitulo 34 ken 35 iti Doctrine and Covenants Stories, 128–34). Saludsodem kadagiti ubbing no ania ti mariknada no miembroda iti Simbaan iti dayta a panawen. Awisem ida a basaenda ti Doktrina ken Katulagan 98:23, 39–40 tapno maammuanda no ania ti kayat ti Apo nga aramiden dagiti Santo? Apay ngata a narigat ti mangpakawan iti nangdangran kadatayo? Kasano a mabendisionantayo no aramidentayo?

• Kiddawem kadagiti ubbing no mabalinda a mangpanunot iti maysa a panawen a ni Jesucristo wenno sabali a tao iti nasantuan a kasuratan ti nangaramid no ania ti isursuro iti Doktrina ken Katulagan 98:23 . Tapno makaited kadakuada iti maysa a pagarigan, mangipakita iti maysa a ladawan ti Pannakailansa iti Krus (kas iti Libro ti Arte ti Ebanghelio, num. 57). Kiddawem kadagiti ubbing a mangibinglay no ania ti ammoda maipapan iti Pannakailansa iti Krus ti Mangisalakan (kitaen ti Lucas 23). Awisem ida a mangbasa iti Lucas 23:34. Kasano a masurottayo ti pagwadan ni Jesucristo?

Doktrina ken Katulagan 101:23–32, 36, 38

Masarakak ti rag-o babaen ken ni Jesucristo.

Ti biag saan a nairanta nga agbalin a nawaya manipud iti rigat, ngem matulongam dagiti ubbing a mangtakuat a makasarakda latta iti pakabuklan ti rag-o babaen ken ni Jesucristo.

Dagiti Mabalin nga Aktibidad

• Mangikabil ti danum iti maysa a tasa. Kiddawem kadagiti ubbing a manginagan kadagiti banag nga inaramid ti Mangisalakan para kadatayo tapno maaddaantayo iti rag-o, ken awisem ida a mangitinnag iti maysa a bassit a bato iti tasa iti tunggal banag a mainagannanda agingga a mapno ti tasa. Basaem a kaduam dagiti ubbing ti Doktrina ken Katulagan 101:36, ket kiddawem kadakuada a mangkita no kasano a maaddaantayo iti pakabuklan ti rag-o. Ania dagiti sumagmamano a banag a mabalin nga aramidentayo a “[mang]sapul … iti Apo” (bersikulo 38) tapno maaddaantayo iti rag-o a kayatna nga ited kadatayo?

• Ilawlawagmo a ti Doktrina ken Katulagan 101:23–32 ti mangisuro maipapan iti no anianto ti kayarigan ti biag inton umay manen ni Jesucristo. Bayat ti aggigiddan a panangbasayo kadagitoy a bersikulo, pagsaritaan maipapan kadagiti banag a masarakan dagiti ubbing a mangyeg kadatayo iti rag-o inton umay Isuna. Apay a makatulong a maammuan iti maipapan kadagitoy a banag no marigrigatantayo?

icon iti panagsursuro

Yallukoy ti Panagsursuro iti Pagtaengan

Tulongam dagiti ubbing a mangpili ti bersikulo manipud iti Doktrina ken Katulagan 98–101 a kayatda nga ibinglay kadagiti pamiliada. Tulongam ida a mangplano no kasano nga ibinglayda no ania ti kayatda maipapan iti dayta a bersikulo.

Panangpadur-as iti Panangisurotayo

Dumur-as kas maysa a mannursuro a kas ken ni Cristo. Utobem dagiti wagas a pakapagbalinam a mannursuro nga ad-adda a kas ken ni Cristo. Ibilangmo ti panangusar kadagiti saludsod iti panangamiris iti bagi iti panid 37 ti Panangisuro iti Wagas ti Mangisalakan tapno makatulong a mangpadur-as kenka.

panid ti aktibidad: mangyeg kaniak ni Jesus iti talna