C. C. A. Christensen (1831–1912), Kampo ti Zion, c. 1878, tempera iti muslin, 78 × 114 pulgada. Brigham Young University Museum of Art, sagut dagiti appoko ni C. C. A. Christensen, 1970

Septiembre 13–19

Doktrina ken Katulagan 102–105

“Kalpasan ti Adu a Panagtutuok … Umay ti Bendision”

Ti panagadalmo iti Doktrina ken Katulagan 102–5 ket maysa a napateg a paset ti panagsaganam a mangisuro. Dumngeg kadagiti naespirituan nga impresion maipapan iti no kasano a matulongam dagiti ubbing a nasaysayaat a maawatanda dagiti nasantuan a kasuratan.

Isuratmo dagiti Impresionmo

Yawis ti Panagbibinninglay

Tulongam dagiti ubbing a mangpili iti maysa a kanta a mangpalagip kadakuada iti maysa a banag a sursuruenda iti pagtaengan wenno iti simbaan.

Isuro ti Doktrina: In-inaudi nga Ubbing

Doktrina ken Katulagan 103:9

Makapagbalinak “a silaw iti lubong.”

Kasano a maallukoymo dagiti ubbing a sursuruam a mangibinglay iti silaw ti ebanghelio iti aglawlawda?

Dagiti Mabalin nga Aktibidad

• Ibasa ti Doktrina ken Katulagan 103:9 kadagiti ubbing, ket awisem ida nga iggamanda dagiti ladawan iti maysa a bombilia, kandela, wenno sabali a pagtaudan iti silaw. Kiddawem kadakuada nga ipakitada ti ladawanda iti sabali a tao iti klase. Ibagam kadagiti ubbing no kasano a maipadada iti silaw kadagiti dadduma no surotenda ni Jesucristo.

• Makikansionka kadagiti ubbing iti maysa a kanta maipapan iti panagbalin a pagwadan, kas iti “Jesus Wants Me for a Sunbeam” wenno “I Am like a Star” (Children’s Songbook, 60–61, 163). Tulongam dagiti ubbing a mangpanunot kadagiti tignay a maibagay kadagiti balikas. Kasano a makapagbalintayo a silaw, wenno nasayaat a pagwadan, kadagiti tao iti aglawlawtayo?

  

  Makapagbalinak a silaw iti lubong.

Doktrina ken Katulagan 104:42

Bendisionannakto ti Apo no tungpalek dagiti bilinna.

Iti sumagmamano a daras iti benneg 104, ikari ti Apo ti “ad-adunto nga amang ti bendision” para kadagiti napudno a mangtungpal kadagiti bilinna. Kasano a matulongam dagiti ubbing a mangrikna a kayat ti Apo a sipaparabur a bendisionannatayo?

Dagiti Mabalin nga Aktibidad

• Awisem dagiti ubbing nga agtignay, kas iti alisto a panangikuti kadagiti ramay iti imada, no tunggal mangngeganda ti balikas a “bendision” bayat ti panangbasam iti Doktrina ken Katulagan 104:42. Ibagam kadagiti ubbing no kasano a nabendisionannaka ti Nailangitan nga Ama gapu iti panagtungpalmo kadagiti bilinna. Kiddawem dagiti ubbing a mangibinglay no kasanona a binendisionan ida. Awisem iti tunggal ubing a mangibinglay iti maysa a bilin a mabalinda a tungpalen.

• Tapno matulongam dagiti ubbing a maawatan no ania ti kayat a sawen iti “panangpaadu”, mangidrowingka ti maysa a sirkulo iti pisarra wenno iti maysa a papel. Kiddawem dagiti ubbing a tulongandaka a mangpaadu kadagiti bilang ti sirkulo—mangidrowing iti dua, kalpasanna ket uppat, kalpasanna ket walo, kalpasanna ket sangapulo ket innem, ken dadduma pay—inggana a mapno ti pisarra wenno papel kadagiti sirkulo. Iti tunggal panangnayon iti sirkulo, tulongam dagiti ubbing a mangpanunot iti maysa a parabur a naited ti Nailangitan nga Ama kadakauda. Ilawlawag a ti kayat a sawen ti “ad-adunto nga amang ti bendision” ket punnuento iti Apo ti biagtayo kadagiti bendision no tungpalentayo dagiti bilinna.

Doktrina ken Katulagan 105:38–40

Kabaelak ti agbalin a mamagkappia.

Adu dagiti leksion a maadaltayo manipud kadagiti kapadasan ti Kampo ti Zion. Ti maysa a mabalin a napateg kadagiti ubbing ket ti panagsisinnuppiat ken panagririnnanget ti mangisangbay iti panagrigrigat, ket ti panagkaykaysa ken talna ti mangisangbay iti bendision.

Dagiti Mabalin nga Aktibidad

• Iti bukodmo a balikas, isaritam kadagiti ubbing ti estoria ti Kampo ti Zion (kitaen iti pakauna iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia; Saints, 1:194–206; wenno “The Acceptable Offering of Zion’s Camp” [Revelations in Context, 213–18]). Agsardengka iti kada paset tapno ipakitam dagiti leksion a mabalin a masursurotayo manipud iti Kampo ti Zion—kas pagarigan, a ti Apo kayatna nga agbalintayo a natalna ken agtitinnulong imbes nga agsisinnupiat ken agririnnanget.

• Basaem ti Doktrina ken Katulagan 105:38–40, ket kiddawem kadagiti ubbing nga agtakderda iti tunggal kanito a mangngeganda ti balikas a “kappia.” Ilawlawag a kayat ti Apo a makikappia dagiti Santo kadagiti tao a natangsit. Tulongam dagiti ubbing nga agpanunot kadagiti banag a mabalinda nga aramiden tapno agbalinda a mamagkappia, ket awisem ida nga mangyakem iti sumagmamano a situasion.

• Ibinglaymo ti maysa nga estoria maipapan iti maysa nga ubing a mamagkappia manipud iti bukodmo a biag wenno manipud iti Friend wenno Liahona. Agkansion ti maysa a kanta maipapan iti panangayat kadagiti dadduma, kas iti “Jesus Said Love Everyone” (Children’s Songbook, 61), wenno kumpletuem ti panid ti aktibidad ita a lawas.

Isuro ti Doktrina: In-inauna nga Ubbing

Doktrina ken Katulagan 104:13–18

Kayat ti Apo nga ibinglayko no ania ti adda kaniak kadagidiay agkaspulan.

Ibilangmo no kasano a matulongam dagiti ubbing a maawatan iti wagas ti panangipaay ti Apo kadagiti taona no agkasalupanda.

Dagiti Mabalin nga Aktibidad

• Ikkam dagiti ubbing ti sumagmamano a minuto a mangaramid ti listaan dagiti bendision nga inted ti Dios kadakuada. Allukoyem ida nga agilista agingga iti kabaelanda. Kalpasanna basaen iti Doktrina ken Katulagan 104:13–18., a mangkitkita kadagiti sungbat kadagiti saludsod a kas iti: Asino ti pudno a makinkukua kadagiti amin a banag? Apay nga itedna dagitoy kadatayo? Ania ti kayatna nga aramidentayo kadagitoy a banag? Tulongam dagiti ubbing a mangpanunot kadagiti wagas a mabalinda nga ibinglay dagiti bendisionda kadagiti dadduma.

• Mangibinglay iti maysa a padas nga adda maysa a tao a nangted kenka iti maysa a banag a kasapulam, ket kiddawem kadagiti ubbing a mangibinglayda iti kasta met laeng a kapadasan. Wenno mangipakita iti maysa a video maipapan iti panagserbi kadagiti dadduma, kas iti “The Coat” (ChurchofJesusChrist.org). Ania ti masursurotayo manipud kadagitoy a padas maipapan iti panagserbi kadagiti dadduma? Awisem dagiti ubbing nga ammuenda dagiti agkasapulan ken mangkita iti maysa a tao a pagserbian ita a lawas, kas iti maysa a tao iti eskuela wenno nangnangruna iti maysa tao iti pamiliada.

• Awisem dagiti ubbing a mangsukisok iti Children’s Songbook wenno Hymns para kadagiti kanta a mainaig iti panagserbi wenno panangtulong kadagiti dadduma (kitaen dagiti indeks ti topiko). Aggigiddan a kansionen ti maysa wenno dua a kanta, ket pagsaritaan ti maipapan iti no ania ti isuro dagitoy a kanta kadatayo.

Doktrina ken Katulagan 105:9–19

Matungpalko dagiti bilin ti Apo uray pay no diak maawatan dagiti gapu para kadagitoy.

Ti padas ti Kampo ti Zion ket mabalin a nabileg a wagas a tapno mailadawan dagiti bendision a sumangbay manipud iti panagtarigagay a mangsurot iti pagayatan ti Apo.

Dagiti Mabalin nga Aktibidad

• Ipakitam ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket awisem dagiti ubbing a mangibinglay no ania ti ammoda maipapan iti Kampo ti Zion. No kasapulanda ti tulong, usarem ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia; Saints, 1:194–206; wenno “The Acceptable Offering of Zion’s Camp” [Revelations in Context, 213–18). Awisem dagiti ubbing nga agpammarangda a miembro iti Kampo ti Zion, a sarsaritaenda kadagiti ubbing maipapan kadagiti padasda. Ania ti kayatda a sursuruen dagiti annakda manipud kadagitoy a padas.

• Basaen nga aggigiddan iti Doktrina ken Katulagan 105:13–14, ket ilawlawag nga idi nadanon ti Kampo ti Zion iti Missouri, imbaga ti Apo kadakuada a saanda a padasen nga alaen manen ti daga dagiti Santo. Naupay ken masmasdaaw dagiti sumagmamano a miembro ti kampo no apay a naibilin kadakuada a mapan sadiay. Ania ti nasken nga aramidentayo no saantayo a maawatan dagiti gapu para iti maysa a bilin? Ibinglay ti sumagmamano a pakaammuan manipud iti “Voices of the Restoration: Zion’s Camp” (iti Umaykayo, Sumurot Kaniak—Para kadagiti Indibidual ken Pamilia) tapno matulongam dagiti ubbing a makitada dagiti bendision a sumangbay no tungpalentayo dagiti bilin ti Dios nga intedna kadatayo babaen kadagiti propetana, uray pay no saantayo a maawatan amin dagiti gapu.

Yallukoy ti Panagsursuro iti Pagtaengan

Allukoyem dagiti ubbing a mangibinglay kadagiti padas iti Kampo ti Zion iti maysa a tao iti pagtaengan, karaman ti maysa a leksion a nasursuroda manipud kadagitoy a padas. Wenno awisem ida a mangpanunot iti maysa a banag a nangbendisionan ti Dios kadakuada a mabalin nga ibinglayda iti maysa a tao nga agkasapulan.

Panangpadur-as iti Panangisurotayo

Risuten dagiti makasinga nga addaan iti ayat. “No dadduma agtignay ti maysa nga ubing iti wagas a pakasingaan iti panagsursuro dagiti dadduma iti klase. No mapasamak daytoy, agbalinka a naanus, managayat, ken mannakaawat maipapan kadagiti karit a mabalin a sangsanguen ti ubing. … No adda dagiti naisangsangayan a kasapulan ti ubing a mangigapu iti pannakasinga, kasaritam ti espesialista iti pagkurangan [disability especialist] iti ward wenno stake wenno bisitaem ti [disabilities.ChurchofJesusChrist.org] tapno maammuam no kasano a nasaysayaat a maipaaymo dagita a kasapulan” (Panangisuro iti Wagas ti Mangisalakan,26).