Septiembre 20–26

Doktrina ken Katulagan 106–108

“Tapno Maluktan ti Langit”

Utobem no ania dagiti ammom maipapan kadagiti ubbing a sursuruam. Ania nga klase dagiti aktibidad ti ad-adda a mangyasidegto kadakuada iti Mangisalakan? Laglagipem a dagiti aktibidad para kadagiti in-inaudi nga ubbing iti daytoy a balabala ket mabalin a maibagay kadagiti in-inauna nga ubbing ken vice versa.

Isuratmo dagiti Impresionmo

Yawis ti Panagbibinninglay

Ipakita kadagiti ubbing dagiti ladawan dagiti lider ti Simbaan, kas iti propeta, dagiti Apostol, ti Primary General Presidency, ken dadduma pay a General Authority ken Officers. Awisem dagiti ubbing nga agsao maipanggep no ania ti ar-aramiden dagitoy a lider ken no apay a pagyamyamananda ida.

Isuro ti Doktrina: In-inaudi nga Ubbing

Doktrina ken Katulagan 107:18–20, 42–56

Nabendisionannak gapu iti priesthood.

Maawat ti amin nga annak ti Nailangitan nga Ama dagiti bendision a sumangbay manipud iti priesthood. Ibilangmo dagiti wagas a pakatulongam kadagiti ubbing a sursuruam a makarikna iti panagyaman para kadagidiay a bendision.

Dagiti Mabalin nga Aktibidad

• Mangidrowing iti pisara ti ladawan a mangibagi iti “maluktan ti langit [kadatayo]” (Doktrina ken Katulagan 107:19) gapu iti priesthood (kas iti rayos ti lawag nga agraniag iti ulep). Ikkan dagiti ubbing kadagiti ladawan a mangibagi kadagiti bendision a sumangbay manipud iti priesthood, kas iti panagbuniag, ti sakramento, ken ti templo. Awisem ida a mangibinglay no apay nga agyamyamanda kadagiti bendision nga adda iti ladawanda, ken palubosam ida a mangikabil iti ladawanda kadagiti rayos ti lawag iti pisarra. Paneknekam a maaddaantayo kadagitoy a bendision gapu ta insubli ti Nailangitan nga Ama ti priesthood.

• Mangaramid iti maysa a pagnaan iti datar, ken ikkam dagiti ubbing kadagiti ladawan ti ordinansa ti priesthood a kasapuladanto tapno masurotda ti pagnaan nga agsubli iti Nailangitan nga Ama (kitaen iti Libro ti Arte ti Ebanghelio, num. 103–8, 119–20). Tulongam dagiti ubbing a mangikabil kadagiti ordinansa a naurnos iti pagnaan.

• Ipakitam ti ladawan da Adan ken Eva a kaduada iti pamiliada (kitaen ti panid ti aktibidad iti daytoy a lawas wenno ti Libro ti Arte ti Ebanghelio, num. 5). Bayat ti panangkita dagiti ubbing iti ladawan, saludsodem kadakuada no kasano ti mabalin a panagrikna da Adan ken Eva maipapan iti pamiliada. Usarem iti Doktrina ken Katulagan 107:53–56 a mangibinglay kadagiti ubbing no ania ti inaramid ni Adan tapno maipakitana ti panagayatna iti pamiliana. Iburay ti pammaneknekmo maipapan iti no kasano a ti priesthood ket nagbalin a bendision kenka ken iti pamiliam.

• Inaganam dagiti miembro ti pamilia nga inordenan ni Adan iti priesthood, kas mabasa iti Doktrina ken Katulagan 107:42–50, ken saludsodem kadagiti ubbing a bilangenda no mano ti inordenanna. Tulongam ida a makaawat no apay a kayat ni Adan a maaddaan iti priesthood iti amin a miembro ti pamiliana. Awisem dagiti ubbing nga agsarita maipanggep kadagiti panawen no kaano a nakaawatda wenno iti pamiliada kadagiti bendision babaen ti priesthood.

Doktrina ken Katulagan 108:7

Mapapigsak dagiti dadduma.

Masurot uray dagiti in-inaudi nga ubbing ti balakad a mangpatibker iti dadduma “iti amin a pannakisarsaritam, iti amin a kararagmo, … ken iti amin nga aramidmo.”

Dagiti Mabalin nga Aktibidad

• Mangidrowing iti maysa a tao iti pisarra, ken saludsodem kadagiti ubbing a manginagan iti sumagmamano a bambanag a mabalin nga aramiden ti tao tapno ad-adda a pumigsa iti bagi. (Mabalinmo nga idrowing dagiti daddadakkel a piskel (muscle) iti tao kabayatan ti pananginagan dagtiti ubbing iti bambanag. Basaen ti Doktrina ken Katulagan 108:7, ket kiddawen kadagiti ubbing a denggenda dagiti wagas a “mangpatibker kadagiti kakabsat [tayo] a lallaki [ken babbai].” Ilawlawag dagiti balikas a mabalin a narigat.

• Tulongam dagiti ubbing a mangpanunot kadagiti tao nga am-ammoda a mabalin nga agkasapulan iti pammatibker. Ania ti mabalin nga isaotayo kadakuada wenno aramidentayo a para kadakuada? Agtitinnulong iti panagaramid kadagiti card para kadagitoy a tattao, wenno allukoyem dagiti ubbing a manglaglagipen kadakuada iti bukod ken sangapamilian a panagkararagda.

Isuro ti Doktrina: In-inauna nga Ubbing

Doktrina ken Katulagan 107:1–8, 13–14, 18–20

Tulongannakto ti priesthood a makapagsubli iti Nailangitan nga Ama.

Naisubli dagiti Priesthood ti Melchizedek ken Aaronic tapno makatulong iti panagsubli dagiti annak ti Dios Kenkuana. Tulongan dagiti ubbing a sursuruam a makaawat no ania dagiti nadumaduma a pagrebbengan ti priesthood ken no kasano a makatulongda kadatayo a makasubli iti Dios.

Dagiti Mabalin nga Aktibidad

• Awisen dagiti ubbing a mangsukisok iti Doktrina ken Katulagan 107:1–8, 13–14, 18–20 para kadagiti napapateg a balikas ken ragup ti balikas a mangisuro kadakuada maipapan iti priesthood. Ania dagiti pagrebbengan nga adda kadagiti addaan iti priesthood? Kasano a makatulong kadatayo ti priesthood tapno makasublitayo iti Dios?

• Mangisurat kadagiti saludsod a masungbatan iti Doktrina ken Katulagan 107:1–8, 13–14, 18–20, kas iti “Ania ti sabali pay a nagan para iti Melchizedek Priesthood?” Ikkam dagiti ubbing iti sumagmamano a minuto nga agbirok iti sungbat manipud kadagiti bersikulo kas kaadu a saludsod agingga iti kabaelanda. Ibinglay kadagiti ubbing dagiti bendision a naawatmo babaen iti priesthood.

• Basaen a kaduam dagiti ubbing maipapan iti Melchizedek iti Bible Dictionary wenno (scriptures.ChurchofJesusChrist.org). Ania ti masursurotayo manipud iti biagna maipanggep iti no ania iti kaipapanan ti panangaramat iti turay ti priesthood?

Doktrina ken Katulagan 107:21–26, 33–35, 65–66

Dagiti pinili ti Apo a katulonganna ti mangidaulo iti Simbaanna.

Ania dagiti padas a nangbukel iti pammaneknekmo maipapan kadagiti lider iti Simbaan? Kasano a matulongam dagiti ubbing a mangbukel ti bukodda a pammaneknek?

Isuro kadatayo ti propeta no ania ti kayat ti Dios a maammuantayo.

Dagiti Mabalin nga Aktibidad

• Ipaskil iti pisarra ti ladawan dagiti General Authorities ken Opisial manipud iti nabiit pay nga isyu ti komperensia iti Ensign wenno Liahona. Bayat ti panagbasa dagiti ubbing iti Doktrina ken Katulagan 107:21–26, 33–35, 65–66, awisem ida a mangisurat iti pisarra no ania iti nasursuroda maipapan kadagiti pagrebbengan ti sumagmamano kadagitoy a lider. Apay nga agyamantayo para iti pannarabayda? Ibinglay iti tunggal maysa no kasano ti pannakagun-odmo iti pammaneknekmo maipapan kadagiti propeta ken apostol.

• Isurat dagiti balikas a panagtalek, pammati, ken kararag iti pisarra. Saludsoden kadagiti ubbing no kasano a maiitandudotayo ti Umuna a Panguluen ti Simbaan babaen iti panagtalek, pammati, ken kararagtayo (kitaen iti Doktrina ken Katulagan 107:22). Apay a napateg ti panangkanunong kadagiti pinili ti Dios a katulonganna?

Doktrina ken Katulagan 108:3

Ti naannad a panagbiag kadagiti katulagan ket mangyeg kadagiti bendision.

Utobem no kasano a matulongam dagiti ubbing a sursuruam nga “ad-adda nga agannad … iti panangaramid kadagiti kari[da],” wenno katulagan. Kasano a ti panangaramid iti daytoy ket mangbendisionto kadakuada ita ken iti masakbayan?

Dagiti Mabalin nga Aktibidad

• Awisem dagiti ubbing a mangaramid iti maysa a banag nga agkasapulan iti naannad nga atension tapno agballigi kas iti panangpadas a mapunno iti maysa a baso iti danum nga awan ti maibelbelleng a danum. Ania ti mapasamak no saantayo a naannad? Awisem ida a mangbasa iti Doktrina ken Katulagan 108:3 ken takuatenda no ania ti nakiddaw a siaannad nga aramiden ni Lyman Sherman. Ilistam a kadua dagiti ubbing dagiti kari nga inaramidda iti Nailangitan nga Ama idi nabuniaganda ken no makiranudda iti sakramento. Tulongam ida nga agpanunot kadagiti wagas a makapagannadda iti pannakaipatungpal dagitoy a kari.

• Agkanta iti maysa a kansion a kagiddan dagiti ubbing maipapan iti panagtungpal kadagiti katulagan, kas iti “I Will Be Valiant” (Children’s Songbook, 162). Tulongam ida a mangaramid iti maysa a tanda nga addaan iti ragup ti balikas manipud iti kanta a mangipalagip kadakuada nga agtungpal kadagiti katulagan, ken allukoyen ida a mangipaskil iti daytoy a tanda iti pagtaenganda.

• Ikkan dagiti ubbing iti paset ti sao ni Sister Becky Craven “Careful versus Casual” (Ensign wenno Liahona, Mayo 2019, 9–11), ken kiddawem ida a mangibinglay iti maysa a banag a mangparegta kadakuada nga ad-adda nga agannad iti panagtungpalda kadagiti katulaganda.

Yallukoy ti Panagsursuro iti Pagtaengan

Kontaken sagpaminsan dagiti nagannak dagiti ubbing a sursuruam tapno paregtaen ida kadagiti panangkagumaanda a makasursuro iti ebanghelio iti pagtaengan. Mabalinmo nga ibaga kadakuada maipapan iti maysa a banag nga imbinglay dagiti annakda iti Primary a nasursuroda iti pagtaenganda.

Panangpadur-as iti Panangisurotayo

Ibagay dagiti aktibidad tapno maipaay dagiti kasapulan. Dimo pagarupen a dagitoy a balabala ket kas pangiturong a nasken a surotem. No di ketdi, usarem dagitoy a kas paggapuan dagiti kapanunotan a mangparayray iti bukodmo nga inspirasion bayat ti panangutobmo iti kasapulan dagiti ubbing a sursuruam. Iti sumagmamano a kasasaad, mabalin a mariknam a naregtaka a mangibagay iti maysa nga aktibidad wenno topiko para kadagiti in-inaudi nga ubbing a maisuro kadagiti in-inauna nga ubbing, wenno vice versa.