Templo ti Kirtland

Templo iti Kirtland, ni Al Rounds

Agosto 30–Septiembre 5

Doktrina ken Katulagan 94–97

“Para iti Pannakaisalakan ti Zion”

Agkalikagum a manggun-od iti inspirasion tapno maammuan dagiti pagbatayan manipud kadagiti benneg 94–97 a mayunay-unay bayat ti panangisurom. Mabalinmo ti mangibagay kadagiti kapanunotan iti aktibidad a para kadagiti in-inaudi nga ubbing bayat ti panangisurom kadagiti in-inauna nga ubbing, ken vice versa.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ipakita kadagiti ubbing ti ladawan ti maysa a templo, ket kiddawem nga ibinglayda ti ammoda maipapan kadagiti templo. Mabalinda met ti agsarita no kasano ti mariknada no makitada ti maysa a templo.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 95:8; 97:15–16

Ti templo ti balay ti Apo.

Uray pay dagiti ubbing sadiay Kirtland ket timmulongda, iti babassit ngem napnuan kaipapanan a wagas, tapno maipatakder ti Templo iti Kirtland. Tulongam dagiti ubbing a sursuruam a mangpapigsa iti panagayatda iti nasantuan a balay ti Apo.

Dagiti Mabalin nga Aktibidad

• Ipakita ti ladawan ti Templo iti Kirtland (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Usarem ti ragup dagiti balikas manipud iti Doktrina ken Katulagan 95:8 a mangisuro kadagiti ubbing maipanggep iti bilin ti Apo a mangbangon iti daytoy a templo. Pagsisinnublatem dagiti ubbing a mangiggem iti ladawan ken mangisao iti “Ti templo ti balay ti Apo.”

  Templo ti Kirtland

  Nangbangon dagiti Santo iti templo tapno mariknada nga as-asidegda iti Dios.

• Ibagam kadagiti ubbing nga iti tunggal templo naisurat ti “Kinasanto iti Apo. Ti Balay ti Apo.” No mabalin, mangipakita iti ladawan dagitoy a balikas nga adda iti templo. Apay a naisangsangayan a lugar ti templo? Mangbasa iti ragup dagiti balikas manipud iti Doktrina ken Katulagan 97:15–16 a mangisuro maipapan a ti templo kas balay ti Apo, ket ibinglay ti kaririknam maipapan iti templo.

• Kiddawem kadagiti ubbing nga agpammarang a tumultulongda a mangbangon iti maysa a templo (aggupguped ti kayo, agmarmartilio ti lansa, agpinpinta ti diding, ken dadduma pay. Ilawlawag no kasano ti kinapateg ti templo iti Apo, no kasano ti kinarigat dagiti Santo a nagtrabaho a mangbangon iti Templo iti Kirtland, ken no kasano ti kadakkel ti insakripisioda para iti daytoy (kitaen iti Saints. 1:210).

• Aggigiddan nga agkansion iti maysa a kanta tapno matulongan a marikna dagiti ubbing ti panagraem para iti balay ti Apo, kas iti “I Love to See the Temple” (Children’s Songbook,95). Awisem dagiti ubbing a mangibinglay kadagiti riknada maipapan iti templo.

Doktrina ken Katulagan 97:8

Makapagbalinak a napudno.

Iti Doktrina ken Katulagan 97:8, binigbig ti Apo ti kinapudno kas maysa a kababalin dagiti “nangawat kaniak.”

Dagiti Mabalin nga Aktibidad

• Ilawlawag kadagiti ubbing nga insuro iti Dios a no napudnotayo, awatennatayo (kitaen iti Doktrina ken Katulagan 97:8). Mangibinglay kadakuada iti sumagmamano nga ababa nga estoria a mangtulong kadakuada no ania ti kaipapanan ti agbalin a napudno. Dagitoy nga estoria ket mabalin nga aggapu iti kabibiagmo, iti kabibiag ti maysa nga am-ammom, wenno manipud iti Friend wenno Liahona. Tulongam dagiti ubbing a mangisalaysay manen kenka kadagiti estoria wenno mangibinglay kadagiti padas iti kinapudno manipud iti biagda.

• Tulongam dagiti ubbing a mangsursuro iti umuna a ragup dagiti balikas iti maikasangapulo-ket-tallo a Pagannurotan ti Pammati: “Mamatikami iti kinapudno.” Tulongam dagiti ubbing a mangyakem kadagiti pagwadan iti kinapudno ken iti saan a kinapudno. Kas pagarigan, mabalin a yakem dagiti ubbing ti panangalada iti maysa a banag manipud iti maysa a kabsatda ken panangibagada kadagiti nagannakda a saanda nga innala daytoy. Tulongam dagiti ubbing a mangyakem iti maysa a buya a nangibagaanda iti kinapudno kadagiti nagannakda. Ilawlawag a daytoy ti panagbalin a napudno.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 95:1–3, 8, 11–17; 97:10–17

Ti templo ti balay ti Apo.

Utobem no kasano a mausarmo dagitoy a bersikulo tapno matulongam dagiti ubbing a makaawat no kasano ti kinapateg ti templo iti Apo—ken no kasano ti kinapateg daytoy kadatayo amin.

Dagiti Mabalin nga Aktibidad

• Awisem dagiti ubbing nga agsarita maipanggep kadagiti panawen nga adda koma aramidenda a maysa a banag ngem saanda inaramid a dagus daytoy. Tulongam ti maysa nga ubing a mangbasa iti Doktrina ken Katulagan 95:3, 8, ken saludsodem kadagiti ubbing no ania ti imbilin ti Apo a saan a tinungpal dagiti Santo. Aggigiddan a basaen ti bersikulo 11. Ania ti kasapulan nga aramiden dagiti Santo a mangbangon iti templo? Ania ti masursurotayo manipud iti kari kadakuada ti Apo?

• Kadagiti card, isurat dagiti pagbatayan maipapan iti templo a masarakan iti Doktrina ken Katulagan 95 ken97, a mainayon kadagiti maitutop a reperensia iti nasantuan a kasuratan, ken ipan dagiti card iti maysa a bag. Kas pagarigan: Ti panangbangon kadagiti templo ket agkasapulan iti panagsakripisio(Doktrina ken Katulagan 97:11–12) ken Masapul a maikaritayo a sumrek iti templo (Doktrina ken Katulagan 97:15–17). Bingayem dagiti ubbing iti kada paris. Paalaem iti tunggal paris ti maysa a card manipud iti bag ken kalpasanna agtitinnulongda a mangbasa iti nasantuan a kasuratan iti card ket pagsaritaanda maipapan iti no ania ti kayat a sawen dayta a pagbatayan kadakuada. Tulongam dagiti ubbing a makaawat no ania ti basbasaenda no kasapulan.

• Awisen ti maysa nga agtutubo manipud iti ward wenno branchmo a nakapanen iti templo tapno mangibinglay iti padasna ken mangibaga kadagiti ubbing no ania ti aramidenda a panagsagana para iti templo.

• Usaren ti artikulo a “Your Path to the Temple” ( iti Temples of The Church of Jesus Christ of Latter-day Saints ispesial nga isyu iti Ensign wenno Liahona, Okt. 2010], 72–75) tapno matulongan dagiti ubbing a mangawat no ania dagiti mapaspasamak iti uneg dagiti templo ken no kasano a makapagsaganada. Ibilang ti panangted iti tunggal ubing ti maysa a benneg ti artikulo a basaen ken palubosam ida a mangibinglay no ania ti masursuroda.

• Ibinglay ti video “Two Apostles Lead a Virtual Tour of the Rome Italy Temple” (ChurchofJesusChrist.org), ken awisen dagiti ubbing a mangibinglay no kasano ti riknada maipapan iti ipapanda iti templo iti maysa nga aldaw.

• Aggigiddan nga agkanta maipapan iti templo kas iti “I Love to See the Temple” (Children’s Songbook, 95). Ania dagiti ragup ti balikas iti daytoy a kanta a mangisuro kadatayo no apay a sagrado ti templo?

Doktrina ken Katulagan 97:1–2, 8–9, 21

Ti Zion ti “natarnaw ti panagpuspusona.”

Tulongam dagiti ubbing a makaawat nga iti Zion ket saan laeng a maysa a lugar; daytoy pay ti “natarnaw ti panagpuspusona”Doktrina ken Katulagan 97:21).

Dagiti Mabalin nga Aktibidad

• Awisem dagiti ubbing a mangbasa iti Doktrina ken Katulagan 97:21, ken damagem kadakuada no ania ti kayat na a sawen ti “natarnaw.” Kas pangiladawan, mangipakita kadakuada iti sangabaso a nadalus a danum, ken pagsasaritaan no apay a napateg ti maaddaan iti nadalus a danum. Mangikabil iti danum iti maysa a banag a makaparugit itoy (kas iti rugit wenno pamienta). Awisem dagiti ubbing a mangbasa manen iti Doktrina ken Katulagan 97:21 ket ikabilda ti ramayda iti balikas a “natarnaw.” Ania ti kayat na a sawen ti mapatarnaw dagiti pusotayo? Tulongam dagiti ubbing a makaawat a ti panagbalin a natarnaw ti puso saan na kayat a sawen a saantayo pulos makaaramid iti biddut. Ania ti maaramidtayo tapno agbalintayo a natartarnaw iti puso? Kasano a tulongannatayo ti Mangisalakan?

• Tulongam dagiti ubbing a mangsukisok iti Doktrina ken Katulagan 97:1–2, 8–9, 21, a mangsapsapul kadagiti balikas wenno ragup ti balikas a mangiladawan iti no kasano nga agbalin a natarnaw iti puso. Kiddawem kadakuada a pumili iti balikas wenno ragup ti balikas, isurat iti maysa a papel, ket ikabil iti maysa a pagkargaan. Mangala iti maysa a papel a saggaysa iti maminsan, ket kiddawen kadagiti ubbing a mangisingasing kadagiti banag a mabalinda nga aramiden a mangusar iti dayta a kapanunotan iti biagda. Kas pagarigan, ania ti maaramidtayo tapno “agsapul iti kinapudno” (bersikulo 1) wenno agbalin nga ad-adda pay a “napudno” (bersikulo 8)?

icon iti panagsursuro

Yallukoy ti Panagsursuro iti Pagtaengan

Awisen dagiti ubbing a mangusar iti panid ti aktibidad iti daytoy a lawas tapno mangibinglay kadagiti pamiliada no ania ti nasursuroda ita maipapan iti templo.

Panangpadur-as iti Panangisurotayo

Allukoyen dagiti ubbing nga agsaludsod. “Ikarigatam a makita dagiti saludsod [dagiti ubbing] a kas gundaway, saan a pannakasinga wenno lapped iti leksionmo. … Dagiti kasta a saludsod ti mangted kenka kadagiti napapateg a nauneg a pannakaawat ken pannakaammo maipapan iti pampanunoten dagiti ubbing, no ania dagiti pakaseknanda, ken no kasano ti panangrespondeda kadagiti banag a sursuruenda. Tulongam ida a mangkita a dagiti sungbat kadagiti saludsodda ket masarakan kadagiti nasantuan a kasuratan ken balikas dagiti sibibiag a propeta” (Panangisuro iti Wagas ti Mangisalakan, 25–26).

panid ti aktibidad: ti templo ti balay ti Apo