Templo iti Kirtland, ni Al Rounds

Agosto 30–Septiembre 5

Doktrina ken Katulagan 94–97

“Para iti Pannakaisalakan ti Zion”

Ania dagiti pagbatayan ken doktrina ti mariknam a napateg kenka bayat ti panagadalmo iti Doktrina ken Katulagan 94–97? Penkem nga isuratmo dagiti impresionmo.

Isuratmo dagiti Impresionmo

Idi binilin ti Apo ni Moises a mangbangon iti tabernakulo, imbagana ken ni Moises nga “aramiden[na] koma dagiti isu amin a bambanag kas iti pagwadan a naipakita [kenkuana] idiay bantay” (Hebreo 8:5kitaen met iti Exodo 25:8–9). Ti tabernakulo idi ti kangrunaan a lugar ti kampo iti langalang iti Israel (kitaen iti Numero 2:1–2). Idi agangay, binilin ti Dios ni Solomon ken ti tattaona a mangbangon iti templo a mayannurot iti pagtuladan nga impalgakna (kitaen iti 1 Cronicas 28:12, 19).

Iti panangisubli ti Apo ti pakabuklan ti ebanghelio, binilinna ni Joseph Smith a mangbangon kadagiti templo a mainugot iti maysa a naipalgak a pagtuladan. “Bangonenyo ti balay, saan a babaen ti wagas ti lubong,” impakdaar ti Apo. “Ngarud, bangonenyo babaen ti wagas nga itedko” (Doktrina ken Katulagan 95:13–14; kitaen met iti 97:10). Kas iti tabernakulo iti langalang, nairanta ti templo kas maysa a kangrunaan a pasdek iti Kirtland (kitaen iti Doktrina ken Katulagan 94:1).

Ita masarakan dagiti balay ti Apo iti sangalubongan. Nupay awanda iti sentro dagiti siudadtayo, makapagbalinda a sentro iti biagtayo. Numan pay agduduma ti langa ti tunggal templo, masursurotayo ti isu met laeng a nadiosan a pagtuladan—maysa a nailangitan a plano a mangisubli kadatayo iti sanguanan ti Dios. Matulongandatayo dagiti sagrado, agnanayon nga ordinansa a mangbangon iti biagtayo ken mangpatibker kadagiti pamiliatayo a “saan a babaen iti wagas ti lubong” ngem babaen iti pagtuladan nga ipakita ti Dios kadatayo.

Kitaen iti Saints, 1:169–70; “A House for Our God,” Revelations in Context, 165–73.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 94; 97:15–17

Makaduanak ti Dios iti inaldaw a panagbiagko.

Naited dagiti pangiturong iti Doktrina ken Katulagan 94 ken 97 iti isu met la nga aldaw—Agosto 2,1833. Mainaig tibenneg 97 iti maysa a templo a naplano para iti Jackson County, Missouri, idinto a mainaig ti benneg 94 kadagiti pasdek nga administratibo iti Kirtland, Ohio. Mabalin a madlawmo ti sumagmamano a pagpapadaan iti no ania ti sawen ti Apo maipapan kadagitoy agduduma a kita ti pasdek (kitaen iti Doktrina ken Katulagan 94:2–12; 97:10–17). Bayat ti panangutobmo kadagitoy a pangiturong, ibilangmo no ania ti maaramidmo tapno mapadasam ti dayag ken kaadda ti Apo a masansansan, nga agpada iti uneg dagiti pasdek ti Simbaan ken iti inaldaw a panagbiagmo.

Doktrina ken Katulagan 95

Dusaen ti Apo dagiti ay-ayatenna.

Agarup lima a bulan ti naglabas manipud idi Enero 1833, idi binilin ti Apo dagiti Santo iti Kirtland a mangbangon iti maysa a balay ti Dios ken mangangay iti maysa a sagrado a panaguummong (kitaen iti Doktrina ken Katulagan 88:117–19). Idi naawat ti paltiing a naisurat iti benneg 95 idi Hunio 1833, dida pay nagtignay iti dayta a bilin. Ania ti masursurom manipud iti wagas a panangdusa ti Apo kadagiti Santo itoy a paltiing? Adda kadi dagiti bilin wenno balikas ti pammagbaga a saanmo pay a nakapagtignayan? Ania ti mariknam a makaparegta nga aramiden?

Kitaen met iti D. Todd Christofferson, “As Many as I Love, I Rebuke and Chasten,” Ensign wenno Liahona, Mayo 2011, 97–100.

Doktrina ken Katulagan 95:8, 11–17; 97:10–17

Bendisionan ti Dios dagiti taona iti templo.

Kalpasan ti pannakadusada gapu iti saanda a panangbangon ti balay ti Apo iti Kirtland, nangpili dagiti dadaulo iti Simbaan iti maysa a lugar iti maysa a talon ti trigo a pangbangonanda. Ni Hyrum Smith, kabsat ti Propeta, dagus a nagtaray a nangala iti maysa a kumpay ket nangrugin a nangwada iti talon. “Agsagsaganatayo a mangbangon iti balay para iti Apo,” kinunana, “ket inkeddengko a siak ti umuna nga agobra” (iti Teachings of Presidents of the Church: Joseph Smith [2007], 271, 273). Utobem ti kinagagar ni Hyrum bayat ti panangbasam iti Doktrina ken Katulagan 95:8,11–17; 97:10–17. Ania ti masarakam a mangparegta iti maysa kapadpadana a determinasion kenka tapno umawat kadagiti bendision ti templo?

Ni Hyrum Smith a Mangwadwada iti Daga, ni Joseph Brickey

Doktrina ken Katulagan 97:18–28

Ti Zion ti “natarnaw ti panagpuspusona.”

Insuro ni Propeta Joseph Smith a, “Rumbeng a ti panangbangontayo ti Zion ti kangrunaan a gannuattayo” (Teachings: Joseph Smith,186). Kadagiti Santo idi 1830, ti Zion ket maysa a lugar, literal a “siudad ti Diostayo” (Doktrina ken Katulagan 97:19). Ngem iti paltiing a naisurat iti benneg 97, inlawlawa ti Apo dayta a pannirigan. Iladawan pay ti Zion ti tattao—“ti natarnaw ti panagpuspusona.” (bersikulo 21). Bayat ti panangbasam kadagiti bersikulo 18–28, panunotem maipapan daytoy a pannakailawlawag ti kaipapananna no basaem ti balikas a “Zion.” Ania ti kayat a sawen kenka ti agbalin a natarnaw ti panagpuspusona? Kasano a mangtulong ti templo a maipatungpal iti “pannakaisalakan ti Zion”? (bersikulo 12).

Kitaen met iti Moises 7:18; Gospel Topics, “Zion,” topics.ChurchofJesusChrist.org.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 95:8Kasano a ti panagaramid ken panagtungpal kadagiti katulagan ti templo mangisangbay iti “bileg nga aggapu iti ngato” iti panagbiagtayo? Nalabit a mabalin nga ibinglay dagiti miembro ti pamilia no kasano ti riknada maipapan ti templo wenno mangibinglay kadagiti padas idi nariknada a nabendisionanda iti “bileg nga aggapu iti ngato” babaen iti panagdaydayaw iti templo.

Tapno matulongan dagiti agsagsagana a sumrek iti templo, mabalinmo nga irebyu dagiti video, ladawan, ken pangiturong a masarakan iti temples.ChurchofjesusChrist.org. Tapno matulongan dagiti ubbing a masursuruan ti maipapan iti templo, mabalinmo nga usaren ti “Your Path to the Temple” (iti Temples of The Church of Jesus Christ of Latter-day Saints [espesial nga isyu ti Ensign wenno Liahona, Okt. 2010], 72–75).

Doktrina ken Katulagan 95:1–11.Ania ti masursurotayo maipapan iti panangdusa manipud kadagitoy a bersikulo? Ania ti masursurotayo maipapan iti Apo? Kasano nga apektuan dagitoy a nauneg ken nalawag a pannakaawat (insights) ti wagas a panangawattayo iti pannakadusa wenno mangdusa kadagiti sabali?

Doktrina ken Katulagan 97:8.Segun iti daytoy a bersikulo, kasano a mabalinnatayo nga “awaten” ti Apo? Kasano a maigiddiat dayta manipud iti panangawat ti lubong? Ania ti kayat a sawen ti “mangtungpal kadagiti katulagan[tayo] babaen ti sakripisio”? Kasano nga inaramidtayo daytoy?

Doktrina ken Katulagan 97:10–21.Insuro ni Propeta Joseph Smith, “Sadino man a lugar a paguummongan dagiti Santo ket Zion, a pangbangonanto ti tunggal nalinteg a lalaki [wenno babai] iti maysa a lugar ti kinatalged para kadagiti annakna” (Teachings: Joseph Smith,186). Kasano a mabangontayo ti Zion iti pagtaengantayo? Ania dagiti pagbatayan a masarakantayo iti Doktrina ken Katulagan 97: 10–21? Kas maysa a pamilia, pumilikayo iti maysa a pagbatayan nga ipamaysa itoy a lawas.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I Love to See the Temple,” Children’s Songbook,95.

Panangpadur-as iti Bukod a Panagadal

Isuratmo dagiti padasmo. Ibinglaymo dagiti padasmo kadagiti pagbatayan ken doktrina a sursuruem. Makapagbalin dagitoy a padas a paset ti maysa a bukod a pakasaritaan a mangbendisionto kadagiti masakbayan a kaputotan.

Panangbangon iti Templo iti Kirtland, ni Walter Rane