“Agosto 23–29. Doktrina ken Katulagan 93: ‘Maawat iti Pakabuklanna,’” Umaykayo, Sumurot Kaniak—Para iti Primary: Doktrina ken Katulagan 2021 (2020)
“Agosto 23–29. Doktrina ken Katulagan 93,” Umaykayo, Sumurot Kaniak—Para iti Primary
Makitak ti Anak ti Tao nga Agtaktakder iti Makanawan ti Dios, ni Walter Rane
Agosto 23–29
Doktrina ken Katulagan 93
“Maawat iti Pakabuklanna”
Napateg dagiti ubbing a sursuruam nga espiritu nga annak a lallaki ken babbai iti Nailangitan a Nagannak a nakipagnaed Kadakuada sakbay nga immayda ditoy daga. Kalpasan a naadal iti Doktrina ken Katulagan 93, ania ti mariknam a makaparegta nga aramidem tapno matulongam dagitoy nga ubbing a dumakkel “iti silaw ken kinapudno”? (bersikulo 40).
Isuratmo dagiti Impresionmo
Yawis ti Panagbibinninglay
Ipakitam dagiti ladawan ti Mangisalakan (kas kadagidiay adda iti Libro ti Arte ti Ebanghelio wenno magasin ti Simbaan), ket kiddawem dagiti ubbing a mangibinglayda no ania ti ammoda maipapan Kenkuana. Mabalin a mangibinglay dagiti in-inauna nga ubbing iti maysa a nasantuan a kasuratan manipud iti Doktrina ken Katulagan 93 a nangtulong kadakuada a masursuro ti maipapan ken ni Jesucristo.
Isuro ti Doktrina: In-inaudi nga Ubbing
Doktrina ken Katulagan 93:2–21
Ni Jesucristo ti Anak ti Dios.
Napateg a maammuan dagiti ubbing a sursuruam no siasino ni Jesucristo ken no apay a nasken a sumurotda Kenkuana. Dagiti kinapudno maipapan ken ni Jesucristo a masarakan iti benneg 93 ti makatulong.
Maawattayo ti silaw ni Jesucristo no tungpalentayo dagiti bilinna.
Dagiti Mabalin nga Aktibidad
-
Piliem dagiti sumagmamano a kinapudno a nasursurom maipapan ken ni Jesucristo iti benneg 93 a mangparparegta kenka. Para iti tunggal maysa a kinapudno a mapilim, ibasam kadagiti ubbing no sadinno ti pakasarakan iti bersikulo, ket ikkam ida iti maysa a kangrunaan a balikas a denggenda bayat ti panagbasam. Ibinglaymo ti maysa nga ababa a pammaneknekmo maipapan iti Mangisalakan, ket palubosam dagiti ubbing a mangibinglay kadagiti bukodda a pammaneknek. Ti sumaganad a listaan dagiti kinapudno ti makaited kenka kadagiti kapanunotan:
Inaramid ni Jesucristo dagiti aramid iti Ama (bersikulo 5).
Ni Jesucristo ti Silaw iti Lubong (bersikulo 9).
Ni Jesucristo ti Namarsua iti lubong (bersikulo 10).
Naawat ni Jesucristo ti amin a bileg iti langit ken iti daga (bersikulo 17).
Kadua ni Jesucristo ti Dios idi punganay (bersikuo 21).
-
Kiddawem kadagiti ubbing a denggenda ti maysa a banag a masursuroda maipapan iti Mangisalakan bayat iti pananggupgopmo iti bukodmo a balikas dagiti sumagmamano a kinapudno a maisuro iti bersikulo 93. (Mabalinmo met nga usaren iti “Chapter 33: A Revelation about Jesus Christ” [Dagiti Estoria iti Doktrina ken Katulagan, 126–27].)
Doktrina ken Katulagan 93:23, 29
Nakipagnaedak iti Nailangitan nga Ama sakbay nga immayak iti daga.
Apay a mabalin a napateg a tulongan dagiti ubbing a sursuruam a mangawat a nakipagnaedda iti Nailangitan nga Ama sakbay a nayanakda? Kasano a nabendisionanka iti daytoy a pannakaammo iti kinapudno?
Dagiti Mabalin nga Aktibidad
-
Uliten a sangkamaysa a kadua dagiti ubbing dagiti balikas a “Kaduayo met idi punganay iti Ama” (Doktrina ken Katulagan 93:23). Ilawlawag a sakbay a nayanaktayo iti daga, nakipagnaedtayo iti Nailangitan nga Ama iti langit. Aggigiddan a kantaen ti “I Am a Child of God” wenno “I Lived in Heaven” (Children’s Songbook, 2–3, 4).
-
Awisem dagiti ubbing a mangkolor ti panid ti aktibidad ken mangidrowing kadagiti bukodda a ladawan a kadua ti Nailangitan nga Ama ken Jesucristo iti biag sakbay daytoy a biag. Iburaymo ti pammaneknekmo nga ay-ayatennatayo amin iti Dios ket annaknatayo amin.
Isuro ti Doktrina: In-inauna nga Ubbing
Doktrina ken Katulagan 93:2–21
Ni Jesucristo ti Anak ti Dios.
No ad-adu ti maawantantayo maipapan ken ni Jesucristo, ad-adda a nasged ken napasnek ti kayattayo a panangdayaw Kenkuana ken umasideg iti Ama babaen Kenkuana (kitaen ti Doktrina ken Katulagan 93:19).
Dagiti Mabalin nga Aktibidad
-
Ipakita ti maysa a ladawan ti Mangisalakan, ket saludsodem kadagiti ubbing no apay a napateg a maamuantayo iti maipapan ken ni Jesucristo. Awisem ida a mangkita kadagiti mainayon a sungbat iti Doktrina ken Katulagan a 93:19. Awisem ida a mangpanunot iti maysa a wagas a mabalin nga ad-adda a masursuroda iti maipapan ken ni Jesus bayat iti umay a lawas, ken ikkam ida iti gundaway a mangibinglay kadagiti kapanunotanda.
-
Agpanunot iti maysa a managpartuat a wagas tapno maallukoy dagiti ubbing a mangbasa ti maipapan iti Mangisalakan iti benneg 93. Mabalin a mangisuratka iti babassit a papel dagiti sumagmamano a reperensia dagiti bersikulo manipud iti benneg 93 a mangisuro kadagiti kinapudno maipapan ken ni Jesucristo (kas pagarigan, kitaen dagiti bersikulo 5, 9–10, 17, 21). Ikabil dagiti babassit a papel iti maysa a pagyanan, ket kiddawem dagiti ubbing nga agsisinublatda a mangpili iti maysa ken mangbasa ti bersikulo iti nasantuan a binatog iti klase. Ania ti masursurotayo maipapan ken ni Jesucristo manipud kadagitoy a binatog?
Doktrina ken Katulagan 93:23, 29, 38
Nakipagnaedak iti Nailangitan nga Ama sakbay nga immayak iti daga.
Namintallo nga inyunay-unay ti Mangisalakan iti benneg 93 a nakipagnaedtayo iti Dios “iti punganay” (dagiti bersikulo 23, 29, 38). Apay a mabalin a kayatna a maamuantayo daytoy? Kasano a mabendisionan dagiti ubbing a sursuruam ti panangammo iti daytoy a kinapudno?
Dagiti Mabalin nga Aktibidad
-
Basaen ti Doktrina ken Katulagan 93:23, 29, 38 nga aggigiddan ket awisem dagiti ubbing a mangkita iti maysa a kinapudno maipapan kadakuada a naulit kadagitoy a bersikulo. Kiddawem kadagiti ubbing a mangibinglay ti uray ania a banag nga ammoda maipapan iti biagtayo a kadua ti Nailangitan nga Ama sakbay a nayanaktayo. Ikkam ti tunggal ubing iti maysa kadagiti sumagmamano a reperensia ti nasantuan a kasuratan, ket tulongam ida a mangkita ti maysa a banag nga isursuro dagitoy a nasantuan a kasuratan maipapan iti biag sakbay nga immaytayo iti daga: Jeremias 1:5; Doktrina ken Katulagan 138:53–56; Moises 3:5; Abraham 3:22–26.
-
Aggigiddan a kantaen ti “I Am a Child of God” wenno “I Lived in Heaven” (Children’s Songbook, 2–3, 4). Ania dagiti kinapudno a masursurotayo manipud iti daytoy a kanta maipapan iti panggeptayo nga immay ditoy daga?
Ti kinapudno isu ti pannakaammo kadagiti banag ti kasasaad idi, kasasaad ita, ken kasasaad iti masakbayan.
Adu ti nagduduma a pannrigan ti lubong no ania ti kinapudno ken no kasano ti mangsarak iti daytoy. Kasano a matulongam dagiti ubbing a sursuruam a maawatanda a ti kinapudno ket pudno uray aniaman ti mabalin nga ibaga dagiti dadduma ken ammo ti Nailangitan nga Ama iti amin a kinapudno?
Dagiti Mabalin nga Aktibidad
-
Isurat ti balikas a kinapudno iti pisarra, ket kiddawem kadagiti ubbing a mangisurat ti kayuloganna iti abay daytoy. Aggigiddan a basaen no kasano nga inlawlawag ti Apo ti kaipapanan ti kinapudno iti Doktrina ken Katulagan 93:24. Agkanta iti maysa a himno maipapan iti kinapudno, kas iti “Oh Say, What Is Truth?” (Hymns, no. 272), ket awisem dagiti ubbing a mangsapul iti himno dagiti dadduma pay a wagas a mangiladawan iti kinapudno.
-
Tapno makatulong kadagiti ubbing a mangyaplikar kadagiti kinapudno iti Doktrina ken Katulagan 93, isuratmo ti sumagmamano a reperensia iti nasantuan kasuratan manipud iti daytoy a benneg iti babassit a papel. Iti dadduma a babassit a papel, isurat dagiti kinapudno nga isuro iti tunggal maysa kadagitoy a bersikulo. Awisem dagiti ubbing nga agtitinnulong a mangbasa kadagiti bersisulo ket idilig dagiti kinapudno kadagiti bersikulo a binasada. Apay a managyamantayo nga adda kadatayo ti pannakaammo iti kinapudno?
Yallukoy ti Panagsursuro iti Pagtaengan
Awisem dagiti ubbing a mangisurat wenno mangidrowing iti maysa a banag a nasursuroda iti klase ken mangibinglay iti daytoy kadagiti pamiliada no agawidda.
Panangpadur-as iti Panangisurotayo
Tulongam dagiti ubbing a mangilasin iti Espiritu. Idinto nga addaanka iti naespirituan a padpadas kadagiti ubbing (kas pagarigan, bayat ti panagbasam kadakuada ti nasantuan a kasuratan, panagdengngeg kadagiti pamaneknekda, wenno aggigiddan a panagkanta), tulongam ida a mangbigbig ti impluensia ti Espiritu Santo.