Ni Joseph Smith a mangaw-awat ti Melchizedek Priesthood

Pannakaisubli, ni Liz Lemon Swindle

Hulio 26–Agosto 1

Doktrina ken Katulagan 84

“Ti Bileg ti Kinadios”

Bayat ti panangbasam iti Doktrina ken Katulagan 84, ania dagiti kinapudno a mariknam a mangawis iti riknam a mangyunay-unay kadagiti ubbing a sursuruam? Isuratmo dagiti pannakatarus nga umay kenka manipud iti Espiritu Santo.

Isuratmo dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangibinglay kadagiti banag nga ammoda maipapan iti priesthood. Mabalinmo nga idisplay ti ladawan ti maysa a tao a mabenbendisionan babaen iti bileg ti priesthood, kas iti Libro ti Arte ti Ebanghelio, num. 103–10, ket saludsodem kadagiti ubbing no kasano a mabendisionan ti priesthood dagiti pamilia.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 84:19–22, 26–27

Ti priesthood isu ti bileg ti Dios.

Ammo kadi dagiti ubbing a sursuruam no ania dagiti panggep ti priesthood? Iti Doktrina ken Katulagan 84, impalgak ti Apo ti maysa a panggep: tapno mangtulong kadatayo nga agsubli iti Nailangitan nga Ama. (Tapno masursuro ti ad-adu pay, kitaen ti Gospel Topics “Priesthood,” topics.ChurchofJesusChrist.org.)

Dagiti Mabalin nga Aktibidad

• Basaem ti Doktrina ken Katulagan 84:20, ket kiddawem kadagiti ubbing nga agtakderda no mangngeganda ti balikas nga “ordinansa.” Tapno mangtulong kadakuada a maawatan no ania ti ordinansa, i-displaymo dagiti ladawan ti sumagmamano kadagiti ordinansa ti priesthood, kas kadagiti Libro ti Arte ti Ebanghelio, num. 103–8, ken kiddawem kadagiti ubbing nga iladawanda no ania ti mapaspasamak iti tunggal ladawan (kitaen met ti Pangiwanwan ti Nasantuan a Kasuratan, “Dagiti Ordinansa,” scriptures.ChurchofJesusChrist.org). Ilawlawagmo a nangted ti Nailangitan nga Ama kadagiti ordinansa tapno makatulong kadatayo nga agsubli a makipagnaed Kenkuana.

• Bay-am a koloran dagiti ubbing ti panid ti aktibidad. Bayat ti panangaramidda iti daytoy, ilawlawagmo dagiti nadumaduma nga ordinansa ti priesthood a naipakita iti panid ken no apay nga agyamyamanka para kadagidiay nga ordinansa.

Doktrina ken Katulagan 84:77

Gayyemnak ni Jesus no sumurotak Kenkuana.

Kasano a matulongam dagiti ubbing a maammuan nga ad-adda pay nga ay-ayatenatayo ti Mangisalakan ngem ti panagayat ti patpatgen a gayyem?

Dagiti Mabalin nga Aktibidad

• I-displaymo ti ladawan ti Mangisalakan bayat ti panangbasam ti Doktrina ken Katulagan 84:77. Awisem dagiti ubbing nga itudoda ti ladawan ti Mangisalakan ti tunggal mangngeganda ti balikas a “dagiti gaggayem.” Ilawlawagmo a no padasentayo ti mangtungpal kadagiti bilin, ipakpakitatayo ken ni Jesus nga ay-ayatentayo Isuna. Ibinglaymo no ania ti kaipapanan kenka a gayyemmo ni Jesus.

• Tulongam dagiti ubbing a mangilista kadagiti banag a mabalinda a maaramid tapno maipakitada kadagiti gayyemda nga ay-ayatenda ida. Ania ti inaramid ni Jesus tapno maipakitana kadatayo a gayyemtayo Isuna? Ania ti maaramidtayo tapno maipakitatayo iti Mangisalakan a gayyemnatayo? Aggigiddan nga agkansion iti maysa a kanta maipapan ken ni Jesus, kas iti “Jesus Is Our Loving Friend” (Children’s Songbook, 58).

Doktrina ken Katulagan 84:88

Tulongan ti Nailangitan nga Ama dagiti misionariona.

Ti kapanunotan nga agbalin a maysa a misionario iti maysa nga aldaw ket mabalin a nakaragragsak ngem makapadanag met para kadagiti sumagmamano nga ubbing. Mabalin a makaisuro kadakuada tiDoktrina ken Katulagan 84:88 no kasano a mangtulong ti Nailangitan nga Ama kadagidiay baonenna a mangikasaba ti ebangheliona.

Dagiti Mabalin nga Aktibidad

• Tulongam dagiti ubbing nga agpanunot kadagiti am-ammoda a misionario. Ibagam kadakuada a nagaramid ti Nailangitan nga Ama kadagiti naisansangayan a kari para kadagiti misionario. Basaem ti Doktrina ken Katulagan 84:88, ken tulongam dagiti ubbing a mangpanunot kadagiti tignay a mangikadua kadagiti kari iti daytoy a bersikulo. Isalaysaymo ti maysa a panawen idi nagserbika iti Apo ket nariknam a kaduam Isuna, kas iti nailadawan iti bersikulo 88.

• Ibinglaymo ti estoria ti uppat ti tawenna nga ubing a lalaki iti mensahe ni Elder Takashi Wada “Feasting upon the Words of Christ” (Ensign wenno Liahona, Mayo 2019, 38–40). Tulongam dagiti ubbing a mangpanunot iti maysa a banag a mabalinda nga ibaga tapno mangibinglay ti pammaneknekda iti maysa a tao—kas iti panangibinglay ti pagannurotan ti pammati. Kiddawem iti maysa nga ubing nga agpammarang a mangibinglay ti ebanghelio iti maysa a gayem. Paneknekam a tulongannatayo ti Nailangitan nga Ama a mangammo no ania ti ibagatayo no makisaritatayo kadagiti dadduma maipapan iti ebanghelio.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 84:4–5, 18–28, 30

Tulongannak dagiti ordinansa ti priesthood nga agsagana a makipagnaed manen iti Nailangitan nga Ama.

Bayat iti panagdakkelda, mabalin a makiraman dagiti ubbing a sursuruam iti adu nga ordinansa ti priesthood, a pakairamanan dagiti panagbuniag ken kumpirmasion para kadagiti natay iti templo. Kasano a matulongam ida a maawatan dagiti panggep ken bileg dagiti ordinansa ti priesthood?

Dagiti Mabalin nga Aktibidad

• Isurat ti Aaronic Priesthood ken Melchizedek Priesthood iti pisarra. Aggigiddan a basaen ti Doktrina ken Katulagan 84:18, 26–28, 30, ken tulongam dagiti ubbing a mangilista kadagiti kinapudno a nasursuroda maipapan iti Aaronic Priesthood manipud kadagitoy a bersikulo. Kalpasanna aggigiddan a basaen ti Doktrina ken Katulagan 84:18–25, ken ilista dagiti kinapudno maipapan iti Melchizedek Priesthood.

• Awisem dagiti ubbing a mangilista kadagiti ordinansa ti priesthood a nakairamananda wenno nakitadan, kas iti panagbuniag, kumpirmasion, dagiti bendision ti priesthood, wenno ti sacramento. Kiddawem kadakuada a mangibinglay kadagiti padasda kadagitoy nga ordinansa. Aggigiddan a basaenyo ti Doktrina ken Katulagan 84:20 (tulongam ida a makaawat kadagiti saan a pamiliar a balikas). Apay nga awisennatayo ti Apo a makiraman kadagiti ordinansa? Kasano a makatulong kadatayo ti priesthood tapno makasublitayo iti Nailangitan nga Ama?

  dagiti ubbing a makiranranud iti sakramento

  Makatulong kadatayo dagiti ordinansa a manglagip kadagiti karitayo iti Dios.

• Mangpartuat iti maysa a puzzle babaen iti maysa a ladawan ti templo. Basaem kadua dagiti ubbing ti Doktrina ken Katulagan 84:5, ket kiddawem kadakuada a denggenda no ania ti imbilin ti Dios a bangonen dagiti Santo. Ikkam ti tunggal ubing ti maysa a pidaso ti puzzle, ket kiddawem kadakuada a mangibinglay ti maysa a banag a mabalinda nga aramiden tapno makasaganada a sumrek iti templo.

Doktrina ken Katulagan 84:64–72, 81–88

Salakniban ken pabilgen ti Apo dagiti misionario.

Linaon dagitoy a bersikulo dagiti kari ti Apo nga inaramidna para kadagidiay inawaganna a mangikasaba ti ebanghelio. Dagitoy a kari mabalin met a mangparegta kadagiti ubbing bayat iti panangibinglayda ti ebanghelio ni Jesucristo kadagiti dadduma.

Dagiti Mabalin nga Aktibidad

• Igrupom dagiti ubbing nga agpipinnaris, ken ikkam ti tunggal paris ti sumagmamano a bersikulo a basaen manipud iti Doktrina ken Katulagan 84:64–72, 81–88. Awisem ida a mangsarak kadagiti kari nga inted ti Apo kadagidiay mangibinglay ti ebanghelio. Kiddawem kadakuada nga ibinglayda iti klase dagiti nasursuroda. Tulongam dagiti ubbing a mangpanunot kadagiti tao nga am-ammoda, wenno dagiti tao iti nasantuan a kasuratan, a nakaawat iti tulong ti Apo idi mangikaskasabada ti ebanghelio (kas ken ni Samuel a Lamanite [kiaten ti Helaman 13:2–4; 16:6–7] wenno ni Ammon [kitaen ti Alma 17:32–38]). Ibinglaymo ti maysa a padas idi nariknam ti suporta ti Apo bayat ti panagserserbim Kenkuana.

• Mangitugotka kadagiti tasa wenno sabali a kapada a pagkargaan iti klase. Isuratmo kadagiti bassit a papel dagiti wagas nga agbalin dagiti ubbing a misionario itan, ken ikabilmo ti tunggal papel iti maysa a tasa. Igrupom dagiti tasa nga agaasideg, a nakadata, iti suelo. Awisem dagiti ubbing nga agsisinnublatda a mangipallangatok iti bassit a banag iti maysa kadagiti tasa ket iyakemda no ania ti naisurat iti papel iti dayta a tasa. Kasano a tulongannatayo ti Nailangitan nga Ama no mangibinglaytayo ti ebanghelio kadagiti dadduma, uray pay no narigat daytoy wenno agdandanagtayo?

• Tulongam dagiti ubbing a mangkita a miembrotayo amin ti Ti Simbaan ni Jesucristo dagiti Santo iti Ud-udina nga Aldaw gapu iti aramid ti misionario—mabalin nga insuronatayo dagiti misionario, dagiti nagannaktayo, wenno dagiti kapuonantayo. Isalaysaymo kadagiti ubbing no kasano a timmulong dagiti misionario kenka wenno dagiti kapuonam a mangawat ti ebanghelio. Pangibinglayem dagiti ubbing kadagiti kasta met la a padas. Allukoyem ida nga agdamag kadagiti nagannakda no kasano a naammuan dagiti immuna a miembro ti Simbaan kadagiti pamiliada ti maipapan iti ebanghelio.

icon ti panagsursuro

Yallukoy ti Panagsursuro iti Pagtaengan

Awisem dagiti ubbing a mangaramid ti maysa a banag ita a lawas tapno mangibinglay ti ebanghelio iti maysa a tao iti pagtaenganda wenno iti maysa a gayyem. Allukoyem ida nga agkiddaw ti tulong iti Nailangitan nga Ama ken mangkita iti no ania ti ar-aramidenna a mangtulong kadakuada.

Panangpadur-as iti Panangisurotayo

Iraman dagiti panagrikna. “Kaaduan kadagiti ubbing (ken nataengan) ti makasursuro a naimbag no mairaman dagiti adu a panagrikna. Mangsapul kadagiti wagas tapno matulongan dagiti ubbing a mangusar kadagiti panagriknada iti panagkita, panagdengngeg, ken panagsagid kabayatan ti panagadalda” (Panangisuro iti Wagas ti Mangisalakan, 25).

Gayyemko ni Jesus