Agosto 16–22

Doktrina ken Katulagan 89–92

“Pagbatayan nga addaan iti Kari”

Bayat ti panagadalmo kadagiti kinapudno ti Doktrina ken Katulagan 89–92, utobem dagiti baro ken kinamanagpartuat a wagas a makatulong kadagiti ubbing a maawatan dagitoy.

Isuratmo dagiti Impresionmo

Yawis ti Panagbibinninglay

Awisem dagiti ubbing a mangidrowing ken pagsaritaan ti maipapan kadagiti naimbag a banag nga inaramidda ita a lawas a maaywananda dagiti bagi ken espirituda.

Isuro ti Doktrina: In-inaudi nga Ubbing

Doktrina ken Katulagan 89

Mabendisionannakto no tungpalek ti Nainsiriban a Balikas.

Suruam dagiti ubbing a dagiti bagitayo ket sagut manipud iti Nailangitan nga Ama ken kayatna a maaywanantayo dagitoy.

Sagut manipud iti Dios dagiti bagitayo.

Dagiti Mabalin nga Aktibidad

• Tapno makatulong kadagiti ubbing a maawatan dagiti bilin ti Dios iti Doktrina ken Katulagan 89:10–17, mangidrowing wenno mangipakita kadagiti ladawan dagiti naimbag a banag a mabalintayo a kanen wenno dagiti naimbag a banag a mabalintayo nga aramiden tapno mapagbalintayo a nasalun-at dagiti bagitayo (kitaen met ti panid ti aktibidad ita a lawas). Tulongam met dagiti ubbing a maawatan a ti arak, tabako, tsaa, kape, ken dadduma pay a makadangran a droga ket makapasakit kadagiti bagitayo ken pinakdaarannatayo ti Apo a saantayo nga usaren dagitoy. Awisem dagiti ubbing a mangpili ti maysa a banag a mabalinda nga aramiden ita a lawas tapno nasalun-at dagiti bagida.

• Awisem dagiti ubbing nga agsisinnublatda nga agdrowing kadagiti ladawan iti pisarra a mangibagi ti maysa a banag nga insuro ti Nainsiriban a Balikas. Papugtuam kadagiti dadduma pay nga ubbing no ania ti idrodrowing ti tunggal tao. Pagsasaritaan ti maipapan iti bilin ti Dios iti benneg 89 a mainaig iti drowing.

• Usarem ti sumaganad a pagarigan, wenno dagiti sabali pay a mapanunotmo, tapno maipakitam a mabendisionantayo no tungpalentayo ti Nainsiriban a Balikas (kitaen ti Doktrina ken Katulagan 89:18–21). Aggigiddan nga aramiden ti simple nga ehersisio, kas iti pannagna wenno panagtartaray ngem di umal-alis iti lugar, ket kalpasanna agpammarang a “mabannog” wenno “agkapsut” (bersikulo 20). Paneknekam dagiti kari ti Apo.

• Ipakita ti ladawan ti maysa a templo, ken kiddawem kadagiti ubbing nga iladawanda no ania ti makitada. Usarem ti maysa a kanta a maipapan iti pisikal a salun-at, kas iti “The Lord Gave Me a Temple” (Children’s Songbook, 153), tapno maisuro kadagiti ubbing a dagiti bagitayo ket kas templo dagiti espiritutayo ken kayat ti Dios nga agtalinaed a nasalun-at dagiti bagitayo. Tulongam dagiti ubbing a mangpanunot kadagiti wagas a mabalintayo a maaywanan dagiti bagitayo, ket ipayakemmo kadagiti ubbing dagitoy.

Doktrina ken Katulagan 90:5

Inikkannatayo ti Dios kadagiti propeta tapno maiwanwan ken masalaknibantayo.

Tulongam dagiti ubbing a makaawat no kasano a makatulong kadatayo dagiti propeta ti Apo tapno makasaraktayo iti kinatalged manipud kadagiti bagyo ti biag.

Dagiti Mabalin nga Aktibidad

• Ipakita kadagiti ubbing dagiti ladawan dagiti nagkauna a propeta, ket ibagam kadakuada no kasano a pinakdaaranda dagiti tattao iti panawenda. (Para kadagiti kapanunotan, kitaen ti “Follow the Prophet,” Children’s Songbook, 110–11.)

• Apay a nasken nga imdengantayo dagiti propeta ti Dios? Ipakitam ti ladawan ti agdama a propeta, ket ibinglaymo dagiti sumagmamano a banag nga insuro wenno imballaagna kadatayo iti nabiit pay. Tulongam dagiti ubbing a mangpanunot kadagiti wagas a masurottayo ti propeta. Ibinglaymo ti pammaneknekmo kadagiti kinapudno nga insuro ti Doktrina ken Katulagan 90:5. (Mapaliiwmo a ti kaipapanan dagiti “padles” ket dagiti paltiing wenno dagiti propeta a makaawat kadagitoy.)

Isuro ti Doktrina: In-inauna nga Ubbing

Doktrina ken Katulagan 89

Ti Nainsiriban a Balikas ti mangtulong kaniak nga agbalin a nasalun-at iti bagi ken espiritu.

Imbalakad ni Elder Gary E. Stevenson kadagiti agtutubo nga agplanoda iti nasaksakbay no ania ti aramidenda no masulisogda iti arak wennno dagiti droga. Kalpasanna insurona, “Maammuanyo a ti sulisog ket bumassit ti kontrolna kadakayo. Nakapangeddengkayon no ania ti reaksionyonto ken no anianto ti aramidenyo. Saan a nasken a mangeddengkayo iti tunggal kanito” (“Your Priesthood Playbook,” Ensign wenno Liahona, May 2019, 48). Allukoyem dagiti ubbing a sursuruam a mangeddeng itan—iti unos ti panagbiagda—a tungpalen ti Nainsiriban a Balikas.

Dagiti Mabalin nga Aktibidad

• Bingayem ti klase iti dua a grupo, ket kiddawem ti maysa a grupo a basaen ti Doktrina ken Katulagan 89:1–4 ken ti sabali a grupo ti bersikulo 18–21. Kiddawem kadakuada nga utoben dagiti saludsod a kas iti sumaganad: Apay nga inted kadatayo ti Apo ti Nainsiriban a Balikas? Kasano a ti panangtungpal ti Nainsiriban a Balikas ket mabendisionannak iti pisikal ken naespirituan?

• Mangpartuat iti suratam dagiti blangko a palawag a mangusar ti ragup dagiti balikas manipud iti Doktrina ken Katulagan 89, kas iti “ naisangrat para iti tao ken kadagiti ayup” wenno “Ket ken di agkapsut” (dagiti bersikulo 14, 20). Awisem dagiti ubbing nga agpaparis a mangsapul kadagiti sungbat iti benneg 89. Mabalin nga urnosen dagiti ubbing dagiti sasao iti sumaganad a kategoria: dagiti naimbag a banag para kadagiti bagitayo, dagiti madi a banag para kadagiti bagitayo, ken dagiti bendision.

• Awisem ti maysa nga ubing a mangbasa iti Doktrina ken Katulagan 89:4 ken ti maysa pay a mangbasa iti adaw manipud ken ni Elder Stevenson iti ngato. Apay a nasken nga ikeddengtayo itan a mangtungpal ti Nainsiriban a Balikas imbes nga urayentayo agingga iti oras ti pannakasulisog? Tulongam dagiti ubbing a mangyakem no kasanoda nga agresponde no maysa a tao, uray pay maysa a gayyem, ti mangted kadakuada iti maysa a banag a maibusor iti Nainsiriban a Balikas. Kasano a masalaknibannatayo ti Nainsiriban a Balikas?

Doktrina ken Katulagan 90:2, 5, 14–16

Iggem ti Umuna a Panguluen “dagiti tulbek ti pagarian.”

Dagiti pammilin ti Apo maipapan ti Umuna a Panguluen idi 1833 (Joseph Smith, Sidney Rigdon, and Frederick G. Williams) ket makatulong kadagiti ubbing a mapapigsa dagiti pammaneknekda iti Umuna a Panguluen itatta.

Dagiti Mabalin nga Aktibidad

• Awisem dagiti ubbing a mangbiruk iti Doktrina ken Katulagan 90:14-16 ken mangisurat kadagiti sumagmamano a banag a kiniddaw ti Apo nga aramiden ti Umuna a Panguluen. Ipakitam kadagiti ubbing ti maysa a ladawan ti agdama nga Umuna a Panguluen, ken mangibinglay ti maysa a banag maipapan kadakuada. (Mabalinmo a basaen ti pakasaritaanda iti baba ti“Living Prophets and Church Leaders” iti ChurchofJesusChrist.org.) Iburaymo ti pammaneknekmo iti nasagraduan nga awagda ken dagiti bendision a naawatmo manipud iti panangsurotmo kadagiti balakadda.

• Irebyum kadagiti ubbing ti maysa a banag nga insuro ti maysa a miembro ti Umuna a Panguluen. Aggigiddan a mangbasa ti Doktrina ken Katulagan 90:5. Itudo a ti kaipapanan dagiti “padles” ket dagiti paltiing wenno dagiti propeta a makaawat kadagitoy. Ania ti kayat a sawen ti “umawat kadagiti padles … a kas nalag-an a banag”? Kasano a maipakitatayo a dagiti propeta ken dagiti banag nga isursuroda ket napateg kadatayo?

Doktrina ken Katulagan 91

Matulongannak ti Espiritu a mangammo no ania ti pudno.

Bayat ti panangbasam no ania ti imbaga ti Apo ken ni Joseph Smith maipapan iti Apocripa, panunotem no kasano a makatulong kadagiti ubbing daytoy a balakad tapno mailasinda ti pudno ken biddut a maipasango kadakuada iti unos ti panagbiagda.

Dagiti Mabalin nga Aktibidad

• Aggigiddan a basaen ti paulo ti benneg para iti Doktrina ken Katulagan 91 tapno matulongam dagiti ubbing a maawatan no ania ti Lima a Libro (kitaen met ti Pangiwanwan iti Nasantuan a Kasuratan, “Lima a Libro [Apocrypha],” scriptures.ChurchofJesusChrist.org). Tulongam dagiti ubbing a mangpanunot kadagiti dadduma pay a lugar, kas iti media, a masarakantayo dagiti “adu abanag … a pudno” ken “adu a banag … a saan a pudno” (bersikulo 1–2). Kalpasanna awisem dagiti ubbing a mangbirok iti benneg 91 tapno mammuan no ania ti kuna ti Apo a maaramidtayo tapno malasintayo ti pudno ken biddut.

• Aggigiddan a basaen ti Doktrina ken Katulagan 91:4–6, ket saludsodem kadagiti ubbing no ania ti isuro dagitoy a bersikulo maipapan iti Espiritu Santo. Awisem dagiti ubbing a mangibinglay ti personal a padasda idi “[ipakita] ti Espiritu ti kinapudno” kadakuada. Ibinglaymo met dagiti bukodmo a padas. Ania pay dagiti sabali a wagas a makatulong ti Espiritu kadatayo?

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada no ania ti nasursuroda ita maipapan iti panangay-wan kadagiti bagi ken espirituda wenno dagiti panggepda a tun-oyen iti panagtungpalda ti Nainsiriban a balikas.

Panangpadur-as iti Panangisurotayo

Sarakem ti bukodmo a pammaregta. Dagitoy a balabala ket saan a pammilin nga kapilitan a surotem bayat ti panangisurom. No di ketdi, ti kaipapananna dagitoy isu iti pangrugian iti bukodmo a pammaregta bayat ti panangutobmo iti kasapulan dagiti ubbing a sursuruam. (Kitaen iti Panangisuro iti Wagas ti Mangisalakan, 7.)