Agosto 9–15

Doktrina ken Katulagan 88

“Mangbangonkayo … iti Balay ti Dios”

Ibalakad tiDoktrina ken Katulagan 88:118 , “Isuroyo ti tunggal maysa kadagiti nainsiriban a balikas” Ania “dagiti nainsiriban a balikas” iti Doktrina ken Katulagan 88 a kas adda pakainaigan unay kadagiti ubbing a sursuruam?

Isuratmo dagiti Impresionmo

Yawis ti Panagbibinninglay

Ibagam kadagiti ubbing a kayat ti Nailangitan nga Ama ken ni Jesucristo nga itultuloytayo ti agsursuro iti unos ti panagbiagtayo. Kalpasanna awisem ida a mangibinglay ti maysa a banag a nasursuroda iti pagtaengan, iti klase, wenno iti simbaan.

Isuro ti Doktrina: In-inaudi nga Ubbing

Doktrina ken Katulagan 88:63

Kayat ti Dios nga asidegak Kenkuana.

Ania ti maitulongmo kadagiti ubbing a sursuruam a mariknada ti kaadda ti Dios kadagiti biagda?

Dagiti Mabalin nga Aktibidad

• Kabayatan ti panagbasam ti Doktrina ken Katulagan 88:63, awisem dagiti ubbing nga iyakemda ti sumagmamano a balikas a mangngegda. Kas pagarigan, mabalin nga agpammarangda nga agsapsapul ti maysa a banag wenno agtuktok.

• Kiddawem ti maysa nga ubing nga iggemna ti maysa a ladawan ni Jesus iti sango ti siled bayat a nakatakder dagiti dadduma nga ubbing iti likod ti siled. Awisem dagiti ubbing nga agpasangoda iti maysa nga addang ti tunggal mangngegda nga ibagam ti maysa a banag a maaramidtayo tapno umasideg iti Mangisalakan ken maysa nga addang nga agpalikod ti tunggal ibagam ti maysa a banag nga mangiyadayo kadatayo manipud iti Mangisalakan. Ibinglaymo ti pammaneknekmo a no padpadasentayo nga umasideg iti Apo, umasideg Isuna kadatayo.

Doktrina ken Katulagan 88:118

Kayat ti Nailangitan nga Ama nga agsursuroak.

“Ti edukasion ket napateg a paset ti plano ti Nailangitan nga Ama a mangtulong kadakayo nga agbalin nga ad-adda pay a kas Kenkuana. … Ti edukasion a magun-odyo ket napategto kadakayo iti daytoy a biag ken iti biag a sumangbay” (Para iti Pigsa ti Agtutubo, 9).

Dagiti Mabalin nga Aktibidad

• I-display ti ladawan ti maysa nga eskuela, wenno mangidrowing iti maysa iti pisarra, ket awisem dagiti ubbing nga ilawlawagda no ania ti eskuela ken no ania ti mapaspasamak idiay. Isalaysaymo ti maipapan iti eskuela nga rinugian ni Joseph Smith (kitaen ti “Chapter 31: The Word of Wisdom,” Doctrine and Covenants Stories, 119–22). Ipakita kadagiti ubbing ti ladawan ti maysa a pagtaengan, simbaan, ken templo ket saludsodem kadakuada no kasano a dagitoy a lugar ket kas met dagiti eskuela.

• Agkansion iti maysa a kanta maipapan iti panagsursuro, kas iti “Search, Ponder, and Pray” (Children’s Songbook, 109). Saludsodem kadagiti ubbing no maipanggep ti ania ti pagragsakanda a masursuro.

• Basaen ti Doktrina ken Katulagan 88:118, ket yunay-unaymo ti ragup dagiti balikas nga “isuroyo iti tunggal maysa.” Ibinglaymo ti sumagmamano a sirib a nasursurom manipud iti tunggal ubing iti klasem, ket awisem ida a mangibinglay ti sirib a nasursuroda.

  

  Nasken nga agsukisoktayo iti sirib ken adal.

Doktrina ken Katulagan a 88:119

Ti templo ti balay ti Dios.

Ibilangmo no kasano a matulongam dagiti ubbing a makariknada ti ayat iti templo ken ti tarigagayda a dayawen ti Apo sadiay no nakasaganada.

Dagiti Mabalin nga Aktibidad

• Ipakitam kadagiti ubbing no kasano ti agaramid iti “pantok” ti templo babaen iti panangitag-ayda kadagiti takiagda ken panangsagidda kadagiti murdong ti ramayda. Basaem ti Doktrina ken Katulagan 88:119, ket kiddawem ida nga agaramid ti pantok iti tunggal gundaway nga ibagam ti balikas a “balay.” Ilawlawagmo a kayat ti Nailangitan nga Ama a mangipasdek ni Joseph Smith ken dagiti Santo ti maysa a templo, wenno maysa a “balay ti Dios.” I-displaymo ti ladawan ti maysa nga asideg a templo bayat ti panangisaritam maipapan iti pagdumaan ti templo ken balay a pagmimitingan ti Simbaan.

• Ibinglaymo ti pammaneknekmo iti templo, ken aggigiddan nga agkansion ti maysa a kanta maipapan iti templo kas iti “I Love to See the Temple” (Children’s Songbook, 95). Awisem dagiti ubbing a mangidrowing iti ladawan ti bagbagida a mapmapan iti templo.

Isuro ti Doktrina: In-inauna nga Ubbing

Doktrina ken Katulagan 88:68, 74

Maaramidnak ni Jesucristo a nadalus manipud iti basol.

Ti kaipapanan ti panangpasanto ket panagbalin a nadalus ken natarnaw. Kasano a matulongam dagiti ubbing a sursuruam a maawatanda a mabalinda a mapasanto no surotenda ni Jesucristo?

Dagiti Mabalin nga Aktibidad

• Awisem ti maysa nga ubing a mangbasa ti Doktrina ken Katulagan 88:68 iti napigsa ken ti maysa pay a mangbasa ti bersikulo 74. Kiddawem kadagiti ubbing a dumngegda iti ragup dagiti balikas nga agpada nga adda kadagiti bersikulo. Kasano ti “panangpasantotayo” kadagiti bagitayo? (No kasapulan, tulongam dagiti ubbing a mangkita iti “Pannakapasanto” iti Pangiwanwan ti Nasantuan a Kasuratan.) Mangidrowing iti ladawan ti maysa a puso, ima, ken saka iti pisarra. Tulongam dagiti ubbing nga agpanunot ti mabalin a kaipapanan ti “gugoran” ken “dalusan” dagiti puso, ima, ken saka. Kasano a tulongannatayo ti Mangisalakan a maaramid daytoy? Kasano a mausartayo dagiti puso, ima, ken sakatayo nga agbalin a kas ken ni Jesus?

• Ilawlawagmo a kayat ti Apo a mapasanto dagiti taona sakbay a mapanda iti templo. Ibilangmo ti panangawis ti agtutubo a lalaki wenno babai nga addaan iti rekomenda iti templo a sarungkaran ti klase. Awisem isuna tapno maipakitam kadagiti ubbing no ania ti kita ti rekomenda iti templo, isarita no ania ti aramidenda tapno maikari iti daytoy, ken ibinglaymo no apay a napateg nga addaan iti rekomenda iti templo uray pay saantayo nga agnaed iti asideg ti maysa a templo.

Doktrina ken Katulagan 88:77–80, 118

Kayat ti Nailangitan nga Ama nga agsursuroak.

Mabalinmo a tulongan dagiti ubbing a maawatanda a ti panagsursuro ti maipapan kadagiti naespirituan ken temporal a banag ket maisaganada nga agserbi iti Apo.

Dagiti Mabalin nga Aktibidad

• Isurat iti pisarra ti Ania, Apay, ken Kasano. Awisem dagiti ubbing a basaen ti Doktrina ken Katulagan 88:77–79 nga agpaparis ken mangaramidda iti listaan iti ania ti kayat ti Apo a masursurotayo. Kalpasanna kiddawem dagiti ubbing a sukisoken ti bersikulo 80 tapno maammuanda no apay a kayatna nga agsursurotayo. Kalpasanna mabalindanto a sukisoken ti bersikulo 118 tapno maammuan no kasano ti panagsursurotayo. Ania ti masursurotayo manipud kadagitoy a bersikulo maipanggep iti no kasano ti panangkita ti Apo iti edukasion ken sursurotayo?

• I-displaymo ti mapa ti lubong, ken aggigiddan a basaenyo ti Doktrina ken Katulagan 88:79. Apay a napateg a maammuantayo ti maipapan kadagiti nagduduma a pagilian ken kultura? No sika wenno dagiti ubbing a sursuruam ket nakasarungkaren wenno nagnaeden iti sabali a pagilian, ipakita dagiti banag a mangibagi ti kultura, ken mangibinglay kadagiti banag a nasursurom.

Doktrina ken Katulagan 88:119–26

“Mangbangonkayo … iti Balay ti Dios”

Dagiti pammilin ti Apo maipanggep iti “balay ti Dios” ket mabalin a makatulong a maiwanwantayo bayat iti panangipasdektayo kadagiti biag ken pagtaengantayo.

Dagiti Mabalin nga Aktibidad

• Awisem dagiti ubbing nga agpili kadagiti pito a balikas a mangiladawan kadagiti pagtaenganda wenno sabali a pagtaengan a nasarungkarandan. Kalpasanna kiddawen kadakuada a mangbasa iti Doktrina ken Katulagan 88:119 ken sapulenda dagiti pito a balikas nga us-usaren ti Apo tapno mailadawan ti balayna. Tulongam dagiti ubbing a mangpanunot kadagiti wagas a mapagbalinda a “balay ti Dios.” dagiti pagtaenganda.

• Ikkam ti tunggal ubing ti maysa a ragup dagiti balikas manipud iti Doktrina ken Katulagan 88:119–26 a maidrowingda. No ipakitada dagiti ladawanda iti tunggal maysa kadakuada, pagsukisokem ida kadagiti bersikulo ket pugtuanda no ania ti ragup dagiti balikas a mangibagi iti tunggal ladawan.

• Isurat iti pisarra Aramiden ken Saan nga aramiden. Awisem dagiti ubbing a basaenda ti Doktrina ken Katulagan 88:119–26 ken ilistada dagiti banag a kayat ti Apo nga aramiden dagiti Santo wenno saanda nga aramiden tapno maisaganada nga agsursuro iti templo. Mabalinda a kitaen dagiti saan a pamiliar a balikas iti maysa a diksionario. Awisem dagiti ubbing a mangpili ti maysa a banag a rugiandanto nga aramidenen wenno maysa a banag a isardengdanto nga aramidenen.

Yallukoy ti Panagsursuro iti Pagtaengan

Awisem dagiti ubbing a mangisurat wenno mangidrowing ti maysa a banag a nasursuroda a kayatda nga ibinglay kadagiti pamiliada.

Panangpadur-as iti Panangisurotayo

Tulongam dagiti ubbing a makiraman kadagiti panagsasaritada iti ebanghelio. Mabalin a kasapulam ti mangpanunot kadagiti managpartuat a wagas a maaddaan kadagiti panagsasarita iti ebagnhelio kadagiti in-inaudi nga ubbing. Kas pagarigan, mabalin a mangitugotka iti klase iti maysa a banag a mabalin nga iggaman dagiti ubbing no naipatangda nga agsarita.