Agosto 2–8

Doktrina ken Katulagan 85–87

“Agtakderkayo kadagiti Nasantuan a Lugar”

Gapu ta limitado ti panawenmo kadagiti ubbing, mangsarakka ti naespirituan a panarabay tapno maammuam no ania kadagiti pagbatayan manipud kadagiti nasantuan a kasuratan ti nasken nga ipaganetgetmo. Agtalekka kadagiti parikna a maawatmo.

Isuratmo dagiti Impresionmo

Yawis ti Panagbibinninglay

Ipakitam kadagiti ubbing ti sumagmamano kadagiti ladawan wenno panid ti aktibidad a nausarmo kadagiti nabiit pay a leksion, ket awisem dagiti ubbing a mangibinglay iti no ania ti malagipda a nasursuroda maipapan kadagitoy, iti klase wenno iti pagtaengan.

Isuro ti Doktrina: In-inaudi nga Ubbing

Doktrina ken Katulagan 85:6

Agsarita ti Espiritu iti “naalumamay a bassit a timek”

Kinuna ni Richard G. Scott, “No awan a pulos ti nagapuanam iti relasionyo kadagiti estudianteyo malaksid iti panagtulongyo kadakuada a mangbigbig ken mangsurot kadagiti parikna iti Espiritu, mabendisionanyo dagiti biagda iti di marukrukod ken iti agnanayon” (“To Learn and to Teach More Effectively” [Brigham Young University Education Week devotional, Aug. 21, 2007], 5, speeches.byu.edu).

Dagiti Mabalin nga Aktibidad

• Ibasam kadagiti ubbing no kasano nga inladawan ni Joseph Smith ti Espiritu: “Wen, kastoy ti kuna ti naalumamay a bassit a timek” (Doktrina ken Katulagan 85:6). Kiddawem kadagiti ubbing a manginagan iti sumagmamano a bassit a banag (ipakitam dagiti ladawan no kasapulanda ti tulong). Awisem dagiti ubbing nga agrukob iti daga tapno agbalinda a kas bassit ken naalumamay inggana a kabaelanda. Tulongam ida nga agpanunot iti no kasano nga ikabassit ti timek, ken pagpraktisem ida nga agdengngeg ken agsao iti bassit a timek. Isalaysaymo ti maipapan iti panawen idi nagsao ti Espiritu kenka iti naalumamay, a bassit a timek.

• Suruam dagiti ubbing iti maysa a kanta maipapan iti Espiritu, kas iti “The Holy Ghost” (Children’s Songbook, 105). Awisem ida a kantaenda daytoy kenka iti arasaas. Ania ti isuro daytoy a kanta maipanggep iti Espiritu Santo? Tulongam dagiti ubbing a mangbigbig no marikriknada ti impluensiana (a kas no agkarkararag, agkankansion ti himno, wenno tumultulong kadagiti dadduma).

Doktrina ken Katulagan 86:11

Makapagbalinak a silaw kadagiti dadduma.

Iladladawan tibenneg 86 ti napateg nga aramid a kayat ti Apo nga aramiden dagiti katulonganna kadagiti ud-udina nga aldaw. Ti maysa a wagas a makatulong dagiti ubbing iti daytoy nga aramid ket isu iti panagbalinda a silaw kadagiti tao iti lawlawda.

Dagiti Mabalin nga Aktibidad

• Basaem kadagiti ubbing ti sumaganad a ragup dagiti balikas manipud iti Doktrina ken Katulagan 86:11: “Mabendisionankayo no itultuloyyo iti kinaimbagko, ti lawag kadagiti Gentil, [wenno dagiti tao nga awan ti ebanghelio].” Kasano a bendisionannatayo ti silaw? Ania ti kapadpadana no awan ti silaw kadatayo? Kasano a makapagbalintayo a silaw kadagiti dadduma a tao a saan pay a makaammo maipapan iti ebanghelio? Tulongam dagiti ubbing a mangpanunot kadagiti wagas a maibinglaytayo ti kinaimbag ni Jesus kadagiti dadduma.

• Kiddawen kadagiti ubbing a mangipapan iti maysa a gayyem a mangpadpadas a magna iti nasipnget (iddepem ti silaw no makatulong daytoy). Apay a narigat ti magna iti kasipngetan? Ania ti mabalin nga aramidentayo a makatulong iti gayyemtayo? Ilawlawag a no surotentayo ti Mangisalakan, daytoy ket kas iti panangsilawtayo tapno makita dagiti dadduma ti dalan a papananda.

• Dagiti magasin a Liahona ken Friend ket masansan nga addaan kadagiti estoria maipapan kadagiti ubbing a naimbag a pagwadan. Mangkitaka ti maysa a tao a mangibinglay kadagiti ubbing a mangparegta kadakuada nga agbalinda met a naimbag a pagwadan.

Doktrina ken Katulagan 87

Mabalin dagiti pagtaengantayo a “nasantuan a lugar.”

Awan ti perpekto a pagtaengan, ngem adda dagiti banag a mabalin nga aramidentayo amin tapno mapagbalintayo a nasantuan a lugar ti kapia dagiti pagtaengantayo.

Dagiti Mabalin nga Aktibidad

• Ilawlawagmo kadagiti ubbing a madanagan ni Joseph Smith maipapan kadagiti banag a mapaspasamak iti lubong. Gupgopem ti paulo ti benneg 87, wenno basaem ti “Chapter 30: A Revelation about War” (Doctrine and Covenants Stories, 117–18; kitaen met ti video iti ChurchofJesusChrist.org). Kiddawem kadagiti ubbing a dumngeg kadagiti banag a mabalin a nangpadanag ken ni Joseph. Tapno maisuro no ania ti kinuna ti Apo a nasken nga aramidentayo maipapan kadagidiay a parikut, basaem ti Doktrina ken Katulagan 87:8.

• Ipakitam ti ladawan ti templo, ket ibinglaymo no apay a nasantuan a lugar ti templo. Ipakitam ti ladawan ti maysa a pagtaengan, ket tulongam dagiti ubbing a mangpanunot kadagiti wagas a mapagbalinda a nasantuan dagiti pagtaenganda a kas iti templo (kitaem ti panid ti aktibidad ita a lawas). Apay a kayattayo ti adda kadagiti nasantuan a lugar?

Isuro ti Doktrina: In-inauna nga Ubbing

Doktrina ken Katulagan 85:6

Agsarita ti Espiritu iti “naalumamay a bassit a timek”

Adu ti pakariribukan ti lubong a mamagbalin a narigat a mangngeg ti Espiritu. Kasano a matulongam dagiti ubbing a dumngeg iti timek ti Espiritu?

Dagiti Mabalin nga Aktibidad

• Saludsodem kadagiti ubbing no ania ti ibagada no agdamag kadakuada ti maysa a tao no kasano nga ammoda no agsao ti Espiritu Santo kadakuada. Awisem ida a mangbasa ti maipapan iti maysa a wagas nga inladawan ni Joseph Smith ti timek ti Espiritu iti Doktrina ken Katulagan 85:6.

• Mangpatukar a siuulimek ti maysa a himno wenno kanta dagiti ubbing, ket kiddawem ti maysa kadagiti ubbing a patanganda no ania daytoy a kanta bayat ti panaangar-aramid dagiti dadduma kadagiti makariribuk nga arimbangaw, kas iti panagpalakpak wenno panagkulimbatog. Kalpasanna kiddawem dagiti dadduma nga ubbing nga agsardeng, ken pagsasaritaan no kasano a daytoy ket kas iti panangdengngeg ti Espiritu Santo no ikkatentayo dagiti riribuk manipud kadagiti biagtayo. Tulongam dagiti ubbing a mangpanunot kadagiti pakariribukan a mabalinda nga ikkaten tapno masansan a mariknada ti Espiritu.

Doktrina ken Katulagan 86

Makatulongak a mangummong kadagiti tao ti Dios.

Ti pangngarig ti trigo ken ruruot ket maipapan iti “maudi nga aldaw, nga itan”(Doktrina ken Katulagan 86:4). Usarem daytoy a pangngarig tapno mangtulong kadagiti ubbing a mariknada a naparegtada a makiraman iti “panangani kadagiti trigo” (bersikulo 7).

Dagiti Mabalin nga Aktibidad

• Isalaysaymo kadagiti ubbing ti pangngarig maipapan iti trigo ken ruruot, wenno awisem ti maysa nga ubing nga isalaysayna daytoy (kitaen iti Mateo 13:24–30). Awisem dagiti ubbing a mangidrowing iti maysa a ladawan ti maysa a banag manipud kadaytoy a pangngarig. Aggigiddan a mangbasa ti Doktrina ken Katulagan 86:1–7, ket awisem dagiti ubbing a mangisurat kadagiti drowingda no ania ti mangibagi ti banag nga indrowingda.

• Mangisaganaka kadagiti babassit a ladawan wenno drowing ti trigo, ket ilemmengmo dagitoy iti lawlaw ti siled. Awisem ti maysa nga ubing a mangtulong a mangummong ti trigo ken mangisurat iti daytoy ti nagan ti maysa a tao a mabalinda nga “ummongen” ken ni Jesucristo. Ania ti kayat a sawen ti ummongen dagiti tao ken ni Jesucristo? Ania dagiti sumagmamano a wagas a mabalintayo nga aramiden daytoy? Ania ti kaipapanan ti “itultuloyyo iti kinaimbag [ti Mangisalakan],” ken kasano a makatulong daytoy kadatayo a mangummong kadagiti tao para Kenkuana? (Doktrina ken Katulagan 86:11).

Doktrina ken Katulagan 87

Kabaelak ti “agtakder … kadagiti nasantuan a lugar.”

Maipasangonto dagiti ubbing a sursuruam ti naespirituan ken pisikal a peggad iti unos ti panagbiagda. Mabalin a matulongam ida nga agsagana a sanguen dagidiay a peggad babaen iti panangisuro kadakuada a mangsapul ken agtakder kadagiti nasantuan a lugar.

Ti serbisio iti templo ti maysa a wagas a makatulong kadatayo a mangummong kadagiti tao ti Dios.

Dagiti Mabalin nga Aktibidad

• Aggigiddan a mangbasa ti Doktrina ken Katulagan 87:6 tapno maammuan ti maipapan iti kuna ti Apo a mapasamak kadagiti maudi nga aldaw. Kiddawen kadagiti ubbing nga isalaysayda ti maipapan kadagiti karit a maipasango no dadduma kadagiti ubbing a kaedadda. Awisem ida a mangsapul iti bersikulo 8 no ania ti kuna ti Apo a nasken nga aramidentayo kabayatan dagiti naririgat a panawen. Isaritam kadagiti ubbing ti maipapan kadagiti nasantuan a lugar iti biagmo.

• Tulongam dagiti ubbing a mangaramid ti listaan dagiti nasantuan a lugar, nasantuan a panunot, ken nasantuan a tignay a makatulong kadakuada a sanguen ti naespirituan a peggad (para kadagiti kapanunotan, kitaen dagiti videos “Standing in Holy Places” ken “Stand Ye in Holy Places—Bloom Where You’re Planted,” ChurchofJesusChrist.org). Awisem ida nga idulinda dagiti listaanda tapno kitaenda daytoy no kasapulanda.

Yallukoy ti Panagsursuro iti Pagtaengan

Awisem dagiti ubbing a mangpili ti maysa a banag nga aramidendanto tapno mapagbalinda dagiti pagtaenganda wenno dagiti biagda a “nasantuan a lugar.”

Panangpadur-as iti Panangisurotayo

Usarem ti kinamanagpartuatmo. Saanmo a limitaran ti bagim kadagiti kapanunotan ti aktibidad a naisingasing iti daytoy a balabala. Pagbalinem dagitoy a kapanunotan a pangirugiam ti bukodmo a kinamanagpartuat. Panunotem ti maipapan iti pagragsakan dagiti ubbing iti klasem ken no ania ti makatulongto kadakuada nga agsursuro.