ni Cristo ken ti nabaknang nga agtutubo nga agturay

Ni Cristo ken ti Nabaknang nga Agtutubo nga Agturay,, ni Heinrich Hofmann

Hulio 19–25

Doktrina ken Katulagan 81–83

No “Adu ti Maited, Adu Met ti Kasapulan”

Kasano a makatulong kadagiti ubbing a sursuruam dagiti paltiing iti Doktrina ken Katulagan 81–83 a mangaramid ti naimbag kadagiti pamilia ken gayyemda?

Isuratmo dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangibinglay ti maysa a banag nga inaramidda tapno makatulong ti maysa a tao ita a lawas. Kasano a makatulong kadatayo nga agbalin a kas iti Mangisalakan ti panagserbi kadagiti dadduma ?

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 81:3

Masapul nga agkararagak a kankanayon.

Idi inawagan ti Apo ni Frederick G. Williams nga agbalin a mamagbaga ken ni Propeta Joseph Smith, binalakadanna ni Frederick nga agbalin a “napudno … a kanayon nga agkararag.”

Dagiti Mabalin nga Aktibidad

• Ibasam kadagiti ubbing ti balakad ti Apo nga agbalin a “napudno … a kanayon nga agkararag, napigsa ken naimpusuan, iti tallaong ken iti nalimed” (Doktrina ken Katulagan 81:3). Ilawlawagmo ti kaipapanan ti naimpusuan a panagkararag, ken ibinglaymo ti bukodmo a pagarigan. Tulongam dagiti ubbing nga agpanunot kadagiti panawen a mabalinda ti agkararag “iti tallaong ken iti nalimed.”

• Isurom dagiti ubbing no kasano ti agkararag. Iyunay-unaymo a mabalinda a pagyamanan ti Nailangitan nga Ama para kadagiti bendisionda ken dumawat Kenkuana no ania ti kasapulanda. Ti maysa a kanta maipapan iti kararag, kas iti, “I Thank Thee, Dear Father” (Children’s Songbook, 7), ket makatulong kadagiti ubbing a maammuan no ania ti ibagada kadagiti karararagda. Ikkam ti tunggal ubing ti batang a mangted iti ababa a kararag.

• Kiddawem kadagiti ubbing a mangpanunot kadagiti banag a mabalinda a pagyamananan iti Nailangitan nga Ama wenno dagiti dawatenda Kenkuana. Pagdrowingem ida kadagiti ladawan dagitoy ken ibinglayda dagitoy iti klase.

Doktrina ken Katulagan 81:5; 82:19

Makapagserbiak kadagiti adda iti aglawlawko.

Ammo ti Nailangitan nga Ama dagiti kasapulan ti tunggal ubing, ket masansan nga usarenna dagiti dadduma a tao—a kas kadagiti ubbing a sursuruam—tapno maipaay dagitoy a kasapulan. Kasano a matulongam dagiti ubbing a mangilasin kadagiti kasapulan dagiti dadduma ken mangserbi kadakuada?

Dagiti Mabalin nga Aktibidad

• Basaem ti Doktrina ken Katulagan 81:5 kadagiti ubbing, ket tulongam ida a maawatan ti ragup dagiti balikas a kas iti “saranayem dagiti nakapsut” ken “itag-aymo dagiti ima dagiti maidasay.” Ipayyakem ti mabalin a maaramidtayo no ania ti kiddaw ti Apo iti daytoy a bersikulo. Usarem dagiti ladawan wenno video tapno maisalaysay dagiti simple nga estoria ti Mangisalakan nga agserserbi kadagiti dadduma (kitaen ti Libro ti Arte ti ebanghelio, kadagiti num. 41, 42, 46, 47, 55; biblevideos.ChurchofJesusChrist.org). Kasano a masurottayo ti pagwadan ti Mangisalakan iti panangtulong kadagiti dadduma?

• Kantaen ti maikapat a bersikulo ti “I Feel My Savior’s Love” (Children’s Songbook, 74–75) wenno sabali a kanta maipapan iti panagserbi. Isalaysaymo maipapan iti panawen idi timmulong ti maysa a tao kenka a mariknam ti ayat ti Mangisalakan babaen iti panaserbina kenka.

• Basaem ti Doktrina ken Katulagan 82:19 kadagiti ubbing, a mangyunay-unay iti ragup dagiti balikas a “maseknan ti pagimbagan ti padana a tao.” Ilawlawagmo nga ti kaipapananna daytoy ket ti panagaramid kadagiti banag a mangtulong kadagiti padatayo a tao—agraman dagiti pamiliatayo. Tulongam dagiti ubbing a mangpanunot kadagiti wagas a makapagserbida iti maysa a tao ita a lawas.

  dagiti ubbing a lallaki nga agkal-kali

  Kidkiddawen kadatayo ti Dios nga agserbitayo kadagiti dadduma tapno maipakitatayo ti ayattayo para Kenkuana.

Doktrina ken Katulagan 82:10

Ikari ti Dios dagiti bendision no agtungpalak Kenkuana.

Bayat iti panagdakkelda, nalabit a masdaaw dagiti ubbing no apay a ti Dios impaayannatayo kadagiti nakaad-adu a bilin. Makatulongka kadagiti ubbing a makaawat nga ipapaayna kadatayo digiti bilin tapno mabendisionannatayo.

Dagiti Mabalin nga Aktibidad

• Tulongam dagiti ubbing a mangpanunot kadagiti bilin nga inted ti Dios kadatayo (kitaen, kas pagarigan ti, Exodo 20:4–17}; Mateo 22:37–39; Doktrina ken Katulagan 89:5–17). Mangidrowing kadagiti ladawan iti pisarra tapno mangtulong kadagiti ubbing a maawatan ken malagip dagitoy a bilin. Mangtedka kadagiti pagarigan no kasano a mabendisionan ken masalaknibannatayo dagiti bilin ti Dios.

• Ibasam kadagiti ubbing ti, “Siak, ti Apo, ikarik nga aramidek ti sawek no agtungpalkayo” (Doktrina ken Katulagan 82:10). Kiddawem kadagiti ubbing nga ulitenda kenka daytoy a ragup dagiti balikas iti sumagmamano a daras, ken agpanunotka kadagiti wagas a mangtulong kadakuada a lagipenda daytoy, kas iti panangawis kadakuada nga agpalakpakda iti ritmo ti ragup dagiti balikas. Paneknekam a no tungpalentayo dagiti bilin ti Apo, tungpalenna dagiti karina kadatayo.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 81:3

Makapagkararagak a “napigsa ken naimpusuan.”

Kasano a maparegtam dagiti ubbing nga agturong iti Apo “a kanayon nga agkararag” no agkasapulanda?

Dagiti Mabalin nga Aktibidad

• Awisem ti maysa nga ubing nga basaen ti Doktrina ken Katulagan 81:3, ken saludsodem kadagiti ubbing no ania ti kaipapanan ti “naim[puso]an.” Ibinglaymo ti maysa a padas idi nagkararagka iti napigsa wenno naimpusoan ken tinulongannaka ti Apo. Kiddawem met kadagiti ubbing a mangibinglay kadagiti bukodda a kapadasan. Kasano a ti kararag ket mangyasideg kadatayo iti Nailangitan nga Ama?

• Makibasa wenno makikansion kadagiti ubbing ti maysa a kanta maipapan iti kararag, kas iti “Did You Think to Pray?” wenno “Secret Prayer” (Himno, num. 140, 144). Awisem dagiti ubbing a mangibinglay ti ragup dagiti balikas manipud iti himno a makatulong kadakuada a maawatan ti maysa a banag maipapan iti kararag. Ikkam ida iti panawen a mangutob no ania ti mabalinda nga aramiden tapno maparang-ayda dagiti kararagda ket kalpasanna isuratda dagiti kapanunotanda.

Doktrina ken Katulagan 81:5

Kayat ti Dios nga agserbiak ken papigsaek dagiti agkasapulan.

Tulongam dagiti ubbing a makaawat nga adu dagiti wagas a makapagserbida kadagiti pamilia, gaggayem, ken kaarrubada iti inaldaw.

Dagiti Mabalin nga Aktibidad

• Mangidrowing kadagiti ima ken tumeng iti pisarra. Kiddawen dagiti ubbing a basaen ti Doktrina ken Katulagan 81:5 tapno masursuro no ania ti kuna ti Apo maipapan kadagitoy a parte ti bagi. Buyaen ti video a “Pass It On” (ChurchofJesusChrist.org), wenno ibinglaymo no kasanom ken dagiti ubbing a nakakita kadagiti tao nga agserbi ti tunggal maysa. Kasano nga agbalintayo nga ad-adda a makabigbig kadagiti tao nga agkasapulan iti lawlawtayo? Awisem dagiti ubbing nga agserbi iti uray maysa a tao laeng iti daytoy a lawas. Para kadagiti kapanunotan maipapan kadagiti wagas nga agserbi kadagiti dadduma, agkansion ti maysa a kanta maipapan iti pangserbi, kas iti “Have I Done Any Good?” (Himno, num. 223).

• Awisem dagiti ubbing nga agsisinublatda a mangisimpa kadagiti domino (wenno dagiti kapadana a banag) bayat ti panangnagnaganda kadagiti wagas a makapagserbida kadagiti dadduma. Awisem ti maysa nga ubing a tumbaen ti maysa a domino ken kitaenna no kasano a maapektaran dagiti dadduma. Kasano a ti panagserbitayo ket kasta met ti epektona kadagiti tao iti lawlawtayo? (Kitaen met iti video a “Dominoes,” ChurchofJesusChrist.org.) Isalaysaymo no kasano a naallukoyka nga agserbi ti sabali a tao gapu iti naayat a panagserbi ti maysa a tao.

Doktrina ken Katulagan 82:8–10

Ikari ti Dios dagiti bendision no agtungpalak Kenkuana.

Bayat iti panagdur-as iti panagtalek dagiti ubbing kadagiti kari ti Dios, ti kinatallugodda nga agtungpal kadagiti bilinna ket dumakkelto.

Dagiti Mabalin nga Aktibidad

• Awisem dagiti ubbing a mangipapan nga addaanda iti maysa a gayyem nga iti panunotna ket adu unay dagiti inted ti Dios a bilin. Awisem ida a mangsarak iti Doktrina ken Katulagan 82:8–10 ti maysa a banag a makatulong iti gayyemda a maawatan no apay a mangmangted ti Dios kadagiti bilin. Ibinglaymo no kasano a nabendisionannaka dagiti bilin ti Dios, ket awisem met dagiti ubbing a mangibinglay kadagiti kapanunotanda.

• Tapno makatulong kadagiti ubbing a maawatan dagiti kari ti Nailangitan nga Ama kadatayo, bingayem ti klase iti tallo a grupo,ket ikkam ti tunggal grupo ti maysa kadagiti sumaganad a nasantuan a kasuratan a basaenda: Doktrina ken Katulagan 1:37–38; 82:10; 130:20–21. Awisem ida a mangibinglay no ania ti nasursuroda maipapan kadagiti kari ti Nailangitan nga Ama. Kasano a mangapekto ti panagtungpaltayo kadagiti bendision a maawattayo? Tulongam dagiti ubbing a mangpanunot kadagiti pagarigan manipud iti biagda wenno manipud kadagiti nasantuan a kasuratan idi nangyeg kadagiti bendision manipud iti Dios ti panagtungpal.

• Mangibinglayka ti maysa a personal a padasmo a mangpaneknek kadagiti pagbatayan a nasuro iti Doktrina ken Katulagan 82:8–10. Kasano a nagtalekkayo iti Apo ken kadagiti karina?

icon ti panagsursuro

Yallukoy ti Panagsursuro iti Pagtaengan

Awisem dagiti ubbing a mangpanunot no kasano a kayatda a pagserbian ti maysa a tao iti pamiliada ita a lawas. Kabayatan ti adalen iti sumaruno a lawas , paibinglaymo kadakuada no ania ti inaramidda.

Panangpadur-as iti Panangisurotayo

Tulongam dagiti ubbing nga agbalin a nalalaing nga agad-adal. Ti panangisuro ket kaipapananna saan laeng a panangted iti kinapudno. Ti kaipapananna daytoy ket isu iti panangtulong kadagiti dadduma a mangpadur-as iti naespirituan a panagpannuray iti bukod a kabaelan. Imbes a ti simple a panangisalaysay kadagiti ubbing no kasano a makapagserbida kadagiti dadduma, kas pagarigan, allukoyem ida nga agpanunot kadagiti bukodda a kapanunotan.

panid ti aktibidad: makapagserbiak kadagiti dadduma