galaksi iti law-ang

Pagkamangan, ni Shaelynn Abel

Hulio 5–11

Doktrina ken Katulagan 76

“Naindaklanto ti Gunggonada ken Agnanayonto ti Dayagda”

Bayat ti panagadalmo ti Doktrina ken Katulagan 76, utobem no ania ti kayat ti Nailangitan nga Ama a maammuan dagiti ubbing iti klasem maipapan Kenkuana, ti Mangisalakan, ti bagbagida, ken ti agnanayon a pagtungpalanda.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ipakitam kadagiti ubbing dagiti ladawan wenno dagiti panid ti aktibidad manipud iti balabala iti daytoy a lawas wenno kadagiti napalabas a balabala. Paibagam kadagiti ubbing kenka no ania ti makitada kadagiti ladawan ken no ania ti malagipda a nasursuroda manipud kadagitoy.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 76:24

Annaknatayo amin ti Dios.

Kinuna ni Presidente Dallin H. Oaks a no isurotayo ti “agtutubo ti nabileg a kapanunotan nga isuna ket anak ti Dios,” maikkantayo isuna iti “panagraem iti bagi ken pakatignayan nga agtignay a maibusor kadagiti parikut ti biag.” (“Powerful Ideas,” Ensign, Nob. 1995, 25).

Dagiti Mabalin nga Aktibidad

• Tapno matulongan dagiti ubbing a maawatan ti kabaelanda nga agbalin a kas iti Dios, mangsapul kadagiti wagas a mangipakita kadakuada a dumakkel dagiti urbon nga animal nga agbalin a kas dagiti nagannakda—nalabit a maiyasping dagiti ubbing dagiti ladawan ti animal kadagiti ladawan dagiti urbon nga animal. Luktam dagiti nasantuan a kasuratan iti Doktrina ken Katulagan 76:24, ket ibagam kadagiti ubbing nga datayo ket “annak a lallaki ken babbai ti Dios.” Iburaymo ti pammaneknekmo a ti Dios isu ti Amatayo ken mabalintayo a dumakkel a kas kadagiti Nainlangitan a Nagannaktayo.

• Aggigiddan a kansionen ti “I Am a Child of God” (Children’s Songbook, 2–3), ket awisem dagiti ubbing nga itudoda ti bagida no kantaenda ti “Siak” Kiddawem kadakuada a kansionenda manen ti kanta, suktanda ti “Siak” iti “ sika” ket itudoda ti sabali a tao iti klase.

Doktrina ken Katulagan 76:40–42

Ni Jesucristo ti Mangisalakan ti lubong.

Ti kaipapananna ti balikas nga ebanghelio ket naimbag a damag. Ti naimbag a damag nga impaay ti ebanghelio ket isu a ni Jesucristo “immay iti lubong … mangugas itoy manipud iti amin a kinadakes” (bersikulo 41).

Dagiti Mabalin nga Aktibidad

• Isaritam kadagiti ubbing ti maipapan iti sumagmamano a naimbag a damag a kangkangngegmo. Kiddawem ida a mangibinglay ti naimbag a damag a nangngegda. Kalpasanna, ibinglaymo kaduada ti naimbag a damag ti ebanghelio babaen iti panagbasa ti Doktrina ken Katulagan 76:41-42. Saludsodem kadagiti ubbing no ania ti mariknada para iti daytoy a naimbag a damag. Ibinglaymo kadakuada ti rag-o nga iyegna kenka daytoy a naimbag a damag.

• Ipakita ti maysa a ladawan ni Jesucristo. Saludsodem kadagiti ubbing no ammoda ti inaramid ni Jesucristo para kadatayo. Ipakitam kadagiti ubbing ti maysa a banag a narugit ken maysa a banag a nadalus (kas iti puraw a panio wenno papel), ket ilawlawagmo a ti basol ket kas iti rugit ti espiritutayo, ngem immay ni Jesucristo tapno tulongannatayo nga agbalin a nadalus manen.

  Ni Jesus a kaduana dagiti ubbing

  Palubosan dagiti Ubbing, ni J. Kirk Richards

Doktrina ken Katulagan 76:62

Kayat ti Nailangitan nga Ama nga agsubliak tapno makipagnaed Kenkuana iti agnanayon.

Ti parmata da Joseph Smith ken Sidney Rigdon iti pagarian a celestial ket impalgakna dagiti naindaklan a bendision nga insagana ti Dios para kadagiti annakna, kasta met kadagiti banag a nasken nga aramidentayo tapno maawattayo dagidiay a bendision.

Dagiti Mabalin nga Aktibidad

• Ibagam kadagiti ubbing ti maipapan iti tallo a pagarian ti gloria a nakita da Joseph ken Sidney iti parmatada. (Mabalin nga ibasam kadagiti ubbing ti maysa a paset wenno isu amin iti “Chapter 26: The Three Kingdoms of Heaven” [Doctrine and Covenants Stories, 97–103] wenno ipabuyam ti maitutop a video iti ChurchofJesusChrist.org.) Saludsodem kadagiti ubbing no ania ti kayatda maipapan iti parmata. Ipokusmo a kangrunaan ti panangiladawanmo ti celestial a pagarian, ket paneknekam a daytoy ti kayat ti Nailangitan nga Ama a papanan ti tunggal maysa kadatayo.

• Basaem kadagiti ubbing ti Doktrina ken Katulagan 76:62, ket awisem dagiti ubbing nga idrowingda ti bagbagida a kadua ti Nailangitan nga Ama ken ni Jesucristo iti celestial a pagarian.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 76:5, 41–42, 69

Ni Jesucristo ti Mangisalakanko.

Tulongam dagiti ubbing a maawatanda a dagiti nagloriaan a bendision nga inkari ti Dios para kadagiti napudno iti sumaruno a biag ket mabalin laeng gapu iti Mangisalakan a ni Jesucristo.

Dagiti Mabalin nga Aktibidad

• Isurat iti pisarra ti Ania ti naaramid ni Jesucristo para kaniak? Kiddawem ti tunggal ubbing a siuulimek a mangbasa iti bersikulo 5, dagiti bersikulo 41–42, wenno bersikulo 69 iti benneg 76, a mangsapsapul kadagiti posible a sungbat iti saludsod iti pisarra. Paibinglaymo kadakuada dagiti sungbatda (kitaen met iti “He Sent His Son,” Children’s Songbook, 34–35). Kasano a maipakitatayo ti panagyamantayo iti inaramid ti Mangisalakan para kadatayo?

• Isuratmo ti maikatlo a pagannurotan ti pammati iti pisarra, mangibatika kadagiti blanko iti lugar dagiti kangrunaan a balikas [key words]. Ikkam dagiti ubbing kadagitoy napukaw a balikas kadagiti babassit a papel, ket awisem ida nga ikabil iti umiso a lugar iti pisarra. Ania ti isuro daytoy a pagannurotan ti pammati maipapan iti no apay a kasapulantayo ni Jesucristo? (kitaen met iti video a “Why We Need a Savior,” ChurchofJesusChrist.org).

Doktrina ken Katulagan 76:12, 15–19, 114–16

Ti panagadal kadagiti nasantuan a kasuratan ket makatulong kadatayo a “maawatan dagiti banag ti Dios.”

Naawat da Joseph Smith ken Sidney Rigdon ti Doktrina ken Katulagan 76 idi ut-utobenda dagiti nasantuan a kasuratan. Tulongam dagiti ubbing a makita no kasano a makaawis ti paltiing iti panagadal kadagiti nasantuan a kasuratan babaen ti Espiritu Santo.

Dagiti Mabalin nga Aktibidad

• Saludsodem dagiti ubbing no ammoda ti ar-aramiden da Joseph Smith ken Sidney Rigdon idi nakitada ti parmata iti Doktrina ken Katulagan 76. Awisem ida nga basaen ti bersikulo 15–19 tapno maammuanda. Ibinglaymo ti panawen idi nakaawatka iti inspirasion bayat iti panagbasam kadagiti nasantuan a kasuratan, ket kiddawem dagiti ubbing nga agsaritada maipapan kadagiti naespirituan a riknada bayat iti panagbasada kadagiti nasantuan a kasuratan.

• Kiddawem kadagiti ubbing nga ikidemda dagiti matada ken padasenda ti mangaramid iti maysa nga obra, kas iti panangkolor ti ladawan wenno pananglukat ti nasantuan a kasuratan iti maysa nga espisipiko a bersikulo. Ania dagiti sumagmamano a banag a narigat nga aramiden no naespirituan a nakakidem dagiti matatayo? Aggigiddan a basaen ti Dokrina ken Katulagan 76:12, 15–19, 114–16 tapno maammuan no ania ti nasken nga aramidentayo tapno naespirituan a silulukat dagiti matatayo.

Doktrina ken Katulagan 76:50–70

Nangisagana ti Nailangitan nga Ama ti pagarian iti celestial a gloria para kaniak.

Ti pannakaammo maipapan iti celestial a gloria nga insagana ti Dios ket makaparegta kadagiti ubbing nga “agballigi babaen ti pammati” (bersikulo 53) kadagiti pannubok ken sulisog a pakaipasanguanda.

Dagiti Mabalin nga Aktibidad

• No adda maysa nga agdamag, “Apay a nasken a surutek ni Jesucristo ken tungpalek dagiti bilinna?” ania ti makunatayo? Awisem dagiti ubbing a mangkita kadagiti sungbat iti Doktrina ken Katulagan 76:50–70, a mangiladawan kadagiti tao a makaawat ti biag nga agnanayon iti celestial a pagarian. Payakemmo kadagiti ubbing dagiti sungbat ti saludsod. Ibinglay ti pammaneknekmo kadagiti naindaklan a bendision nga insagana ti Nailangitan nga Ama para kadatayo no surotentayo ni Jesucristo.

• Mangidrowing ti dakkel nga init iti maysa a papel, ket gettengen daytoy iti sumagmamano a pidaso iti puzzle. Ikkam ti tunggal ubing ti maysa a piraso, agraman ti sumagmamano a binatog iti nasatuan a kasuratan a mabasa iti: Doktrina ken Katulagan76:51; 76:52; 76:53; 131:1–2. Kiddawem kadagiti ubbing a kitaenda dagiti bersikulo ti maysa a banag a nasken nga aramidentayo tapno makaawattayo iti biag nga agnanayon iti celestial a pagarian (ti sumagmamano kadagiti bersikulo ket ad-adu ngem maysa ti sungbatna), ken isuratmo daytoy kadagiti pidasoda ti init. Kabayatan ti panangar-aramidda a sangsangkamaysa ti puzzle, iyebkasmo ti panagtalekmo kadakuada a babaen iti tulong ti Mangisalakan, agbalinda a kualipikado para iti celestial a pagarian.

icon ti panagsursuro

Yallukoy ti Panagsursuro iti Pagtaengan

Awisem dagiti ubbing nga usarenda iti panid ti aktibidad ita a lawas a mangisuro kadagiti pamiliada maipapan iti no ania ti nasursuroda iti parmata da Joseph Smith ken Sidney Rigdon.

Panangpadur-as iti Panangisurotayo

Usarenyo dagiti nasantuan a kasuratan. Uray no saan pay a kabaelan dagiti ubbing a sursuruam ti agbasa, masansan nga usarem dagiti nasantuan a kasuratan bayat iti panangisurom kadakuada. Ipakitam kadakuada a dagiti kinapudno nga ibingbinglaymo ket naggapu kadagiti nasantuan a kasuratan.

panid ti aktibidad: makapagnaedakto iti sidong ti Nailangitan nga Ama iti celestial a pagarian.