Napateg iti Puso ti Pastor, ni Simon Dewey

Hunio 28–Hulio 4

Doktrina ken Katulagan 71–75

“Awan ti Armas a Maaramid a Maibusor Kenka a Rumang-ayto”

Adu ti masursuro dagiti ubbing a sursuruam iti klasem, ngem ad-adunto pay ti masursuroda no ipaugalida ti panagadal kadagiti nasantuan a kasuratan iti pagtaengan. Ibilangmo no kasano a mayallukoymo ken masuportaram ti panagadal ti ebanghelio iti pagtaengan.

Isuratmo dagiti Impresionmo

Yawis ti Panagbibinninglay

Awisem dagiti ubbing a patimbukel nga agtugawda iti suelo, ket mangitulatid ti bola iti maysa kadakuada. Kiddawem iti dayta nga ubing a mangibinglay ti maysa a banag a nasursurona itay nabiit pay maipapan iti ebanghelio iti pagtaengan wenno iti Primary. Kalpasanna awisem ti ubing a mangitulatid ti bola iti sabali pay a tao. Uliten agingga a naaddaanen ti tunggal ubing ti gundaway a mangibinglay iti maysa a banag.

Isuro ti Doktrina: In-inaudi nga Ubbing

Doktrina ken Katulagan 72:2, 10

Inawagan ti Apo ti maysa a bishop tapno matulongannak.

Nalabit saan nga adu ti ammo dagiti babassit nga ubbing maipapan iti ar-aramiden ti bishop tapno agserbi kadakuada ken dagiti dadduma a miembro ti ward. Matulongam ida a dayawen ti serbisio ti bishopda.

Dagiti Mabalin nga Aktibidad

• Mangitugotka kadagiti aytem iti klase a mangibagi kadagiti pagrebbengan ti maysa a Bishop, kas iti tithing slip, nasantuan a kasuratan, wenno maysa a ladawan ti Bishop a mangbalbalakad (kitaen ti ladawan iti maudi a paset ti balabala ita a lawas iti Umaykayo, Sumurot Kaniak—Para kadagiti Indibidual ken Pamilia). Basaen ti Doktrina ken Katulagan 72:2, ket ilawlawagmo nga inawagan ti Apo ti Bishop tapno mangtulong kadatayo. Usarem dagiti banag nga intugotmo a mangtulong kadagiti ubbing a maawatan ti sumagmamano a banag nga ar-aramiden ti Bishop nga agserbi iti ward.

• Magnakayo kadagiti ubbing a mapan iti opisina ti Bishop (nalabit kayatmo a makitulag kadagiti dadduma a mannursuro). Iladawam kadakuada ti sumagmamano a kasasaad a mabalinda a makisarita iti Bishop iti opisinana (kas iti interbyu ti panagbuniag wenno tithing settlement). Isaritam kadagiti ubbing no kasano a nabendisionanka babaen iti serbisio ti bishop.

• Tulongam dagiti ubbing a mangaramid kadagiti kard a maited iti bishop, panagyaman ti ar-aramidenna a mangtulong iti aramid ti Apo.

Doktrina ken Katulagan 75:3

Maaramidko ti amin a kabaelak iti Apo.

Uray no ubbingda pay, makasarakda ti rag-o iti panagaramidda iti amin a kabaelanda a mangtungpal kadagiti bilin ti Apo.

Dagiti Mabalin nga Aktibidad

• Awisem ti tunggal ubbing nga agsisinublatda a mangyakem no kasano ti pamay-anda nga agserbi, kas iti panagdalus ti maysa a siled iti simbaan wenno aginnaw ti pinggan iti pagtaengan. Basaen ti Doktrina ken Katulagan 75:3, ken kiddawem kadagiti ubbing no kasano a sisasadut nga aramidenda daytoy no ibagam ti “saankayo nga agbalin a sadut” ken ipakitam no kasano ti sigagaget nga agtrabaho no ibagam ti “agtrabahokayo iti kabaelanyo.” Apay a napateg nga agtrabahotayo iti kabaelantayo no agserbitayo iti Apo?

• Ibinglaymo kadagiti ubbing dagiti estoria ni Presidente Dieter F. Uchtdorf maipapan iti trabaho manipud iti “Two Principles for Any Economy” (Ensign wenno Liahona, Nob. 2009, 55–58). Kasano ti riknatayo no ammotayo nga inaramidtayo ti amin a kabaelantayo?

• Agkansion iti maysa a kanta maipapan iti panagtrabaho a sangsangkamaysa, kas iti “When We’re Helping” (Children’s Songbook, 198). Tulongam dagiti ubbing a mangaramid kadagiti tignay a maibagay kadagiti balikas.

  

  Nangted dagiti nagkauna a miembro ti Simbaan sagpaminsan ti taraon iti Simbaan tapno makatulong kadagiti dadduma.

Isuro ti Doktrina: In-inauna nga Ubbing

Doktrina ken Katulagan 71

Masalaknibak ti kinapudno babaen ti panangibinglayko ti pammaneknekko.

Saan a namnamaen ti Apo dagiti ubbing nga agresponde kadagiti kritiko ti Simbaan a kas nangayabanna kada Joseph Smith ken Sidney Rigdon nga aramidenda. Ngem matulongamto dagiti ubbing a makaawat a dagiti simple a pammneknekda iti kinapudno ket addaan iti nabileg nga epekto kadagiti dadduma.

Dagiti Mabalin nga Aktibidad

• Usarem ti paulo a benneg para iti Doktrina ken Katulagan 71 wenno “Chapter 25: Joseph Smith and Sidney Rigdon Go on a Mission” (Doctrine and Covenants Stories, 96) tapno maisuro dagiti ubbing maipapan kadagiti kasasaad a nangparegta ti benneg 71. Basaem ti Doktrina ken Katulagan 71:1 kadagiti ubbing, ket tulongam ida a mangtakuat no ania ti kayat ti Apo nga aramiden da Joseph ken Sidney maipapan iti “sumagibar a rikna” dagiti tao iti Simbaan (paulo a benneg). Ania ti imbagana nga maited kadakuada a mangtulong kadakuada? Kasano nga agbalintayo a kas kada Joseph ken Sidney?

• Awisem dagiti ubbing nga agsanayda nga agpaparis a mangibinglay kadagiti dadduma no ania ti ammoda maipapan iti Simbaan. Kas pagarigan, mabalin a mangibinglayda ti maysa a simple a pammaneknek wenno ibinglayda ti maysa kadagiti Pagannurotan ti Pammati.

Doktrina ken Katulagan 72:8

Inawagan ti Apo dagiti bishop a mangtulong Kenkuana a mangaramid ti trabahona.

Mabalin nga adda napigsa a positibo nga impluensia ti Bishop iti biag ti maysa nga agtutubo. Ania iti maaramidmo a makatulong kadagiti ubbing a makitada a ti bishop ket mangibagi iti Apo a ni Jesucristo?

Dagiti Mabalin nga Aktibidad

• Ilawlawagmo nga idi 1831 inawagan ti Apo ti bishop ti Simbaan, ni Edward Partridge, nga umakar iti Kirtland, Ohio, tapno agbalin a bishop ti Independence, Missouri (kitaen ti “Chapter 17: The First Bishops of the Church,” Doctrine and Covenants Stories, 64–66). Basaen ti Doktrina ken Katulagan 72:8 kadagiti ubbing, ket kiddawen kadakuada a denggenda no siasino ti inawagan ti Apo nga agserbi kas baro a bishop ti Kirtland. Apay a mangawag ti Apo kadagiti bishop? Ibinglaymo kadagiti ubbing ti maysa a padasmo idi nabendisionanka babaen ti serbisio ti maysa a bishop.

• Awisem dagiti ubbing a mangaramid ti listaan ti sumagmamano a banag a nakitada nga ar-armiden ti bishop a mangtulong kadagiti tao ti ward. Awisem dagiti ubbing nga agdrowing kadagiti ladawan ti bishop nga agar-aramid ti maysa a banag a nadakamatda. Ibinglaymo ti pammaneknekmo a ti bishopmo ket inawagan ti Apo nga agbalin a katulonganna. Apay nga agyamantayo a nangawag ti Apo ti maysa a bishop iti wardtayo?

Doktrina ken Katulagan 73:3

Binilin ti Apo ni Propeta Joseph Smith nga isubli dagiti napapateg a kinapudno a napukaw manipud iti Biblia.

Kas paset ti awagna a propeta, binilin ti Apo ni Joseph Smith nga agaramid iti naparegta a panangatur iti Biblia. Dagitoy a panangatur, nga inawagan ti Apo a “panagipatarus” (Doktrina ken Katulagan 90:13), ket insublina dagiti napateg a kinapudno a napukaw wenno naikkat manipud iti Biblia iti panaglabas dagiti siglo.

Dagiti Mabalin nga Aktibidad

• Ilawlawagmo nga idi nagsubli da Joseph Smith ken Sidney Rigdon manipud iti nabiit a misionda iti asideg ti Kirtland, Ohio, kayat ti Apo nga ituloyda ti trabaho iti maysa a napateg a proyekto. Awisem dagiti ubbing a basaen ti Doktrina ken Katulagan 73:3 tapno maammuanda no ania daytoy a proyekto. Tapno matulongan dagiti ubbing a maawatan no ania ti kayat ti Apo nga ipatarus da Joseph ken Sidney, basaem kadakuada dagiti paset nga inlanad iti Pangiwanwan iti Nasantuan a Kasuratan“Patarus ni Joseph Smith (PJS).”

• Ipasa iti aglawlaw ti maysa a kopia ti Biblia. ket palubosam dagiti ubbing a luktan daytoy ken kitaenda no manu a panid ti nailaon daytoy. Awisem dagiti ubbing a mangipapan a nakiddawda a mangipatarus ti Biblia iti sabali a pagsasao. Ania dagiti gundaway a mabalin a makaaramidda iti sumagmamano a kamali? Ilawlawagmo nga idi naipatarus wenno kinopia dagiti tao ti Biblia sakbay iti panawen ni Joseph Smith, nakaaramidda ti sumagmamano a biddut, ken no dadduma inikkatda dagiti napateg a kinapudno. Binilin ti Apo ni Propeta Joseph Smith nga agaramid iti naparegta a panangatur. Apay a napateg ti trabaho ni Joseph Smith kadatayo?

Yallukoy ti Panagsursuro iti Pagtaengan

Awisem dagiti ubbing a mangpili iti maysa a banag a maaramidda gapu iti nasursuroda ita, kas iti panagyaman iti bishop para iti serbisiona wenno panagsagana a salakniban dagiti pammatida babaen ti panangsursuro ti Pagannurotan ti Pammati.

Panangpadur-as iti Panangisurotayo

Iraman dagiti panagrikna. “Kaaduan kadagiti ubbing (ken nataengan) ti makasursuro a naimbag no mairaman dagiti adu a panagrikna. Mangsapul kadagiti wagas tapno matulongan dagiti ubbing a mangusar kadagiti panagriknada iti panagkita, panagdengngeg, ken panagsagid kabayatan ti panagadalda” (Panangisuro iti Wagas ti Mangisalakan, 25).