revelation manuscript book in display case

Hunio 21–27

Doktrina ken Katulagan 67–70

“Napateg … dagiti Kinabaknang ti Sibubukel a Daga”

Sakbay a basaem dagiti singasing iti daytoy a balabala, adalem ti Doktrina ken Katulagan 67–70, ket isuratmo dagiti naespirituan nga impresion a maawatmo. Dagitoy nga impresion ti mangtulongto kenka a mangpartuat iti naparegta a plano ti pannursuro. Kalpasanna nayonam dayta a plano kadagiti kapanunotan manipud iti daytoy a balabala, manipud iti Umaykayo, Sumurot Kaniak—Para kadagiti Indibidual ken Pamilia, wenno manipud kadagiti magasin ti Simbaan.

Isuratmo dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangidrowing iti ladawan ti maysa a banag a nasursuroda manipud iti panagadal iti nasantuan a kasuratan iti pagtaengan wenno iti Primary. No ada parikutda a mangpanunot ti idrowingda, mabalinmo nga ipalagip kadakuada ti sumagmamano kadagiti topiko iti Doktrina ken Katulagan 67–70, kas kadagiti panagbuniag, panaggun-od ti pamaneknek kadagiti nasantuan a kasuratan, wenno nagannak a mangisursuro ti ebanghelio kadagiti ubbing.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 67

Naglaon ti Doktrina ken Katulagan kadagiti paltiing manipud iti Dios.

Idi Nobiembre 1831, Nagkeddeng dagiti lider ti Simbaan nga ikabil dagiti paltiing ni Joseph Smith iti libro tapno mabasa ti amin a tao. Ita naiyimprenta dagitoy a paltiing iti Doktrina ken Katulagan.

Dagiti Mabalin nga Aktibidad

• Isaritam kadagiti ubbing ti maipapan iti no kasano a naiyimprenta dagiti paltiiing ni Joseph Smith iti maysa a libro (kitaen iti “Chapter 23: The Doctrine and Covenants,” Doctrine and Covenants Stories, 90–92, wenno iti maitutop a video iti ChurchofJesusChrist.org). Ibinglaymo ti pammaneknekmo a ti Doktrina ken Katulagan ket naglaon kadagiti paltiing a makatulong kadatayo ita. Ibinglaymo ti maysa kadagiti paboritom a bersikulo manipud iti Doktrina ken Katulagan.

• Ipakitam kadagiti ubbing ti tunggal maysa kadagiti kangrunaan a pagbasaan a sinaggaysa, ket bayat nga iggemmo ti tunggal maysa ibinglaymo bassit no kasano nga adda kadatayo daytoy (kitaem ti tunggal naisurat iti Pangiwanwan iti Nasantuan a Kasuratan). No iggemmo ti Doktrina ken Katulagan, ibinglaymo kadagiti ubbing no ania ti mamagbalin kadaytoy a libro a naisangsangayan (kas pagarigan, naglaon daytoy kadagiti paltiing a naited iti aldawtayo).

Doktrina ken Katulagan 68:25–28

Mabuniagannakto inton walo ti tawenko.

Iti Doktrina ken Katulagan 68:25–28, imbaga ti Apo ken ni Joseph Smith a nasken nga agsursuro dagiti ubbing a maaddaan iti pammati ken ni Jesucristo, agbabawi. ken agpabuniag inton walo ti tawenda. Imbaganna pay a nasken nga agsursuroda nga agkararag ken agtungpal kadagiti bilin ti Dios.

Dagiti Mabalin nga Aktibidad

• Awisem dagiti ubbing nga agbilang agingga iti walo babaen kadagiti ramayda. Ania ti naisangsangayan iti agtawen ti walo? Tulongam dagiti ubbing a mangbigbig a no agtawendanton ti walo, mabalindanton a mabuniagan. Babaen ti panangusar kadagiti balikas ken ragup dagiti balikas a masarakan iti Doktrina ken Katulagan 68:25–28, ibinglaymo kadakuada ti sumagmamano a bambanag a kayat ti Apo a sursuruenda sakbay nga agtawenda ti walo (kitaem met ti Pagannurotan ti Pammati 1:4). Tulongam ida a maawatan dagiti konsepto a mabalin a saan a pamiliar kadakuada.

• Makipagkansion kadagiti ubbing iti kanta maipapan iti panagbuniag, kas kadagiti “Baptism” wenno “When I Am Baptized” (Children’s Songbook, 100–101, 103). Kiddawen kadagiti ubbing a mangibinglay iti no kasano ti riknada maipapan iti panagbuniag ken no ania ti mabalin nga aramidenda tapno makasaganada.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 67:4, 9

Pudno dagiti naited a paltiing ken ni Joseph Smith.

Kaaduan ti pammilin iti Doktrina ken Katulagan 67–70 ket maipapan kadagiti panangikagumaan dagiti Santo a maipablaak dagiti paltiing ni Joseph Smith. Mabalin a maysa daytoy a gundaway tapno matulongan dagiti ubbing a mangbigbig a kadagitoy a paltiing, a maipabpablaaken ita iti Doktrina ken Katulagan, masarakantayo ti timek ti Apo.

Bayat ti panagsaganam a mangisuro, mabalinmo nga irebyu ti Saints, 1:140–43 wenno “Kapitulo 23: Ti Doktrina ken Katulagan” (Dagiti Estoria iti Doktrina ken Katulagan, 90–92).

Dagiti Mabalin nga Aktibidad

• Ipakitam kadagiti ubbing ti Biblia, ti Libro ni Mormon, ti Doktrina ken Katulagan, ken ti Perlas a Kapatgan. Tulongam dagiti ubbing a mangaramid ti listaan iti pisarra no ania ti mamagbalin a sabali ti tunggal maysa kadagiti libro ti nasantuan a kasuratan ken no ania ti mamagbalin a pagpapadaanda. No kasapulanda ti tulong, ibinglaymo kadakuada dagiti panangiladawan kadagitoy a libro iti Pangiwanwan iti Nasantuan a Kasuratan. Saludsodem kadagiti ubbing no kasano a maammuantayo a pudno dagiti nasantuan a kasuratan. Ania ti masursurotayo manipud iti Doktrina ken Katulagan 67:4, 9 maipanggep kadagiti paltiing nga inted ti Apo ken ni Joseph Smith?

• Ibinglaymo ti maysa a bersikulo manipud iti Doktrina ken Katulagan a mangpabileg iti “pammaneknek[mo] iti kinapudno dagitoy a bilin” (besikulo 4). Ikkam dagiti ubbing kadagiti gundaway a mangibinglay iti bukodda a paborito a bersikulo. Ilawlawagmo kadagiti ubbing nga inkeddeng dagiti lider ti Simbaan iti daytoy a panawen nga ipablaakda dagiti pammaneknekda kadagiti paltiing a naawat ni Joseph Smith. Idi inaramidda daytoy, maysa kadagiti lider, ni Levi Hancock, ti nangisurat iti abay ti naganna ti, “Saan pulos a mapunas”(kitaen ti “Testimony, circa 2 November 1831,” Revelation Book 1, 121, josephsmithpapers.org). Apay ngata a kayat ni Levi Hancock a “saan a pulos a mapunas” ti naganna manipud iti naipablaak a pammaneknek? Ikkam dagiti ubbing ti gundaway a mangisurat kadagiti pammaneknekda kadagiti nasursurodan iti Doktrina ken Katulagan.

  dagiti ubbing nga agbasbasa

  Kiniddaw ti Dios kadatayo nga agadal kadagiti nasantuan a kasuratan.

Doktrina ken Katulagan 68:3–4

No agsao dagiti lider ti Simbaan babaen ti inspirasion, isaoda “ti balikas ti Apo.”

No agsao dagiti katulongan ti Apo babaen iti bileg ti Espiritu Santo, dagiti balikasda ket agbalin a pagayatan, panunot, balikas, ken timek ti Apo (see bersikulo 4). Ti pannakaammoda kadaytoy a kinapudno ket makatulong kadagiti ubbing a mangayat nga agdengngeg ken mangsurot kadagiti sursuroda.

Dagiti Mabalin nga Aktibidad

• Awisem dagiti ubbing a basaen ti Doktrina ken Katulagan 68:3–4 iti babassit a grupo ken ibinglay ti tunggal maysa kadakuada no ania ti nasursuroda manipud kadagitoy a bersikulo. Awisem dagiti ubbing a mangisurat iti pisarra ti maysa a banag a nasursuroda. Apay a napateg a maammuan daytoy maysa a kinapudno?

• Kalpasan ti aggigiddan a panangbasa iti Doktrina ken Katulagan 68:3–4 ikkam dagiti ubbing kadagiti kopia ti sumagmamano a nabiit pay a mensahe manipud iti sapasap a komperensia. Awisem ida a mangsapul kadagiti mensahe dagiti kinapudno nga insuro kadatayo ti Apo babaen kadagiti katulonganna.

Doktrina ken Katulagan 69:1–2

Makapagbalinak a “pudno ken matalek.”

Idi kasapulan ni Oliver Cowdery nga agdaliasat iti Missouri, inawagan ti Apo ni John Whitmer, maysa a tao a “pudno ken matalek.” (bersikulo 1), a kumuyog kenkuana. Kasano nga agbalin dagiti ubbing a pudno ken matalek a kas ken ni John Whitmer?

Dagiti Mabalin nga Aktibidad

• Ibagam kadagiti ubbing nga idi imbaon ti Apo ni Oliver Cowdery iti Missouri, kinunana a maysa a tao a “pudno ken matalek” (bersikulo 1) ti nasken a kumuyog kenkuana, isu nga binaonna pay ni John Whitmer. Ania ti kaipapanan ti panagbalin a pudno ken matalek? Kasano a masiguradotayo a pudno ken matalektayo tapno mausarnatayo ti Apo a mabendisionan dagiti dadduma?

• Awisem ti sumagmamano kadagiti ubbing a mangibaga iti maipapan ti maysa a tao nga am-ammoda nga ipagarupda a “pudno ken matalek.” Kasano nga ammoda a pudno ken matalek dayta a tao? Tulongam ida a mangkita a nagtalek ti Apo ken ni John Whitmer gapu ta, iti daytoy a panawen, pudno ken matalek isuna (kitaem ti Doktrina ken Katulagan 69:1–2). Aggigiddan nga agkansion iti maysa a kanta a mangyallukoy kadagiti ubbing nga agbalinda a pudno ken matalek a kas iti Mangisalakan, kas iti “I’m Trying to Be like Jesus” (Children’s Songbook, 78–78).

icon ti panagsursuro

Yallukoy ti Panagsursuro iti Pagtaengan

Awisem dagiti ubbing nga ilawlawagda iti maysa a tao iti pagtaengan no ania ti Doktrina ken Katulagan, sadinno ti naggapuanna, ken no apay a napateg daytoy kadakuada.

Panangpadur-as iti Panangisurotayo

Ibagay dagiti aktibidad para iti tawen dagiti ubbing nga sursuruam. Mabalin a kasapulan dagiti in-inaudi nga ub-ubing ti ad-addu a direksion no maawis a mangibinglay. Ad-adu ti kapadasan dagiti natataengan nga ubbing ken mabalin a nasaysayaat pay iti panangibinglayda kadagiti kapanunotanda. Laglagipem daytoy a nagdudumaan bayat iti panangplanom kadagiti aktibidad.

panid ti aktibidad: Mabalinko ti mabuniagan