Campfire iti Missouri, ni Bryan Mark Taylor

Mayo 31–Hunio 6

Doktrina ken Katulagan 60–62

“Adda iti Imak ti Amin a Lasag”

Laglagipem a ti kasayaatan a panagsaganam a mangisuro ti Doktrina ken Katulagan 60–62 ket umayto babaen ti bukod ken sangapamiliaan a panagadalyo kadagitoy a benneg.

Isuratmo dagiti Impresionmo

Yawis ti Panagbibinninglay

Ikkam ti tunggal ubing ti gundaway a mangibinglay iti maysa a banag a nasursurona manipud kadagiti nasantuan a kasuratan bayat iti napalabas a lawas wenno manipud iti klase ti Primary iti naudi a Domingo. Kalpasan ti panangibinglay ti tunggal ubing, awisem ti sabali nga ubing iti klase a gupgopen no ania ti imbagana.

Isuro ti Doktrina: In-inaudi nga Ubbing

Doktrina ken Katulagan 60:4; 61:1–2, 36; 62:1

Isuronak ti nasantuan a kasuratan ti maipapan ken ni Jesucristo.

Linaon tiDoktrina ken Katulagan 60–62 dagiti adu a salaysay a makatulong kadagiti ubbing a sursuruam a maawatanda no asino ni Jesucristo ken padur-asenda ti ayatda Kenkuana.

Dagiti Mabalin nga Aktibidad

• I-display ti maysa a ladawan ni Jesucristo, ken kiddawem kadagiti ubbing nga ibinglayda no apay nga ay-ayatenda ni Jesus. Piliem dagiti sumagmamano a ragup dagiti balikas manipud iti Doktrina ken Katulagan 60–62 a mangisuro kenka ti maipapan iti Mangisalakan, ken ibinglaymo ida kadagiti ubbing (kitaem, kas pagarigan ti, Doktrina ken Katulagan 60:4; 61:1–2, 36; 62:1). Tulongam dagiti ubbing a mangulit kadagiti ragup dagiti balikas kenka. Ibinglaymo no kasano ti riknam maipapan ken ni Jesucristo.

• Ipakitam ti sumagmamano a ladawan ni Jesus manipud iti naindagaan a ministeriona (kitaen iti Libro ti Arte ti Ebanghelio, num.34–61). Palubosam dagiti ubbing a makatulong kenka a mangipalawag no ania ti ar-aramiden ni Jesus kadagiti ladawan. Kasano ti panangipakitana ti ayatna kadagiti annak ti Nailangitan nga Ama? Ibagam kadagiti ubbing ti maipapan iti maysa kadagiti paboritom a nasantuan a kasuratan a mangisursuro maipapan ken ni Jesus.

• Makikansion kadagiti ubbing iti “I’m Trying to Be like Jesus” (Children’s Songbook, 78–79; kitaen met ti sing-along video iti ChurchofJesusChrist.org). Bayat ti panagkansionmo ti maipapan iti wagas nga agbalin a kas ken Jesus, agsardengka sagpaminsan ket kiddawem kadagiti ubbing a kompletuenda ti binatog a “Makapagbalinak a kas ken Jesus babaen ti …”

  

  Daytoy ti Gapu nga Immayak, ni Yongsung Kim

Doktrina ken Katulagan 62:3

Kayat ni Jesucristo nga ibinglayko ti ebangheliona.

Paggugusto dagiti ubbing a mangibinglay no ania ti ammoda kadagiti dadduma. Tulongam ida a makaawat a no ibinglayda no ania ti ammoda maipapan iti ebanghelio, maragsakan ti Nailangitan nga Ama kadakuada.

Dagiti Mabalin nga Aktibidad

• Ilawlawag a kiniddaw ti Apo ken ni Propeta Joseph Smith ken dagiti dadduma a lider ti Simbaan nga agdaliasatda manipud iti Kirtland, Ohio, agingga iti Jackson County, Missouri. Kiniddawna kadakuada a mangikasaba ti ebanghelio bayat ti kaaddada iti dalan ken iti pananagawidda. Basaen ti Doktrina ken Katulagan 62:3, ket kiddawen kadagiti ubbing a denggenda no ania ti inaramid dagiti misionario a nakaay-ayoan iti Apo. Paneknekam a maay-ayo ti Apo kadatayo no ibinglaytayo ti ebanghelio kadagiti dadduma.

• Tulongam dagiti ubbing a mangaramid kadagiti tsapa a mangipakita a kayatda nga agbalin a misionario iti Simbaan. Ipausarmo kadakuada dagiti tsapada ken agsanayda a mangibinglay kadagiti pammaneknekda iti tunggal maysa.

• Aggigiddan nga agkansion iti maysa a kanta maipapan iti panangibinglay iti ebanghelio kas iti “I Want to Be a Missionary Now” (Children’s Songbook, 168). Tulongam dagiti ubbing a mangpanunot ti mabalinda nga ibaga no adda maysa a tao nga agdamag kadakuada no ania ti paggugustoda maipapan ken ni Jesucristo ken ti Simbaanna. Awisem dagiti ubbing a mangidrowing kadagiti ladawan dagiti banag a paggugustoda maipapan iti ebanghelio ni Cristo.

Isuro ti Doktrina: In-inauna nga Ubbing

Doktrina ken Katulagan 60:7, 13; 62:3, 9

Kabaelak nga agsarita tapno maibinglayko ti ebanghelio ni Jesucristo.

Ti pamaneknek ti maysa nga ubing ket kas kabileg a kas kadagiti nataengan, gapu ta ti bileg ti pamaneknek ket saan a naggapu manipud iti tawen ti tao wenno kapadasanna ngem manipud iti Espiritu Santo. Tulongam dagiti ubbing a manggun-od iti panagtalek a makasaoda ken mangibinglay kadagiti dadduma no ania ti ammoda a pudno.

Dagiti Mabalin nga Aktibidad

• Ania dagiti bendision nga inkari ti Apo iti Doktrina ken Katulagan 60:7; 62:3, 9 kadagiti mangibinglay ti ebangheliona? Kasano a mabendisionan dagiti dadduma ti panangibinglay iti ebanghelio ? Ibilangmo ti mangibinglay ti padasmo manipud iti biagmo idi imbinglaymo ti ebanghelio—ania dagiti bendision a naggapu manipud kadagiti panagreggetmo? Awisem dagiti ubbing a mangibinglay kadagiti ania man a napadasanda. Mabalinyo met ti agkansion iti maysa a kanta maipapan iti aramid ti misionario, kas iti “Go Forth with Faith” (Hymns, num. 263), ken pagsaritaan ti maipapan kadagiti bendision a nadakamat iti kanta.

• Tulongam dagiti ubbing a mangyakem kadagiti kasasaad a mabalinda a pangibinglayan ti ebanghelio kadagiti gagayyemda. Kas pagarigan, ania koma ti isaoda no ti maysa a tao ti nagsaludsod kadakuada no apay a mapmapanda iti simbaan? Wenno ania kuma no adda makakita kaniada a maysa a gayyemda nga us-usarenda ti singsing a CTR wenno agbasbasada ti Libro ni Mormon ket agsaludsodda? Ania koma ti ibagada?

Doktrina ken Katulagan 60:7; 61:1–2, 36; 62:1

Sidadaan ti Apo a mangpakawan kaniak no agbabawiak.

Saan a perpekto ni Joseph Smith ken dagiti dadduma a lider ti Simbaan. No dadduma nagsusupiatda ken dida makatuttutor (kitaen ti “Ezra Booth and Isaac Morley,” Revelations in Context, 133). Ngem manangngaasi ti Apo kadakuada ken impaayna ti pammakawan kadakuada no agbabawida.

Dagiti Mabalin nga Aktibidad

• Basaem a kadua dagiti ubbing ti Doktrina ken Katulagan 60:7; 61:2, ken kiddawem kadakuada a mangsarak kadagiti balikas a pagpapadaan kadagiti bersikulo. Ipalagip kadagiti ubbing a dagiti paltiing ket naited ken ni Joseph Smith ken dagiti dadduma a lider ti Simbaan. Ania ti kayat ti Apo nga ammuenda? Ania ti masursurotayo manipud kadagitoy a bersikulo maipanggep iti no kasano ti rikna ti Mangisalakan maipapan kadatayo no makaaramidtayo ti biddut?

• Isurat ti Ania ti langa ni Jesucristo? iti pisarra. Aggigiddan a basaen ti Dokrita ken Katulagan 61:1–2, 36; 62:1, ken mangaramid iti listaan dagiti sungbat iti daytoy a saludsod a masarakan dagiti ubing kadagiti bersikulo. Kasano a makatulong kadatayo dagitoy a kababalin iti pisarra a maawatantayo no apay a situtulok ti Mangisalakan a mangpakawan kadatayo? Ania dagiti wagas a mabalintayo a masurot ti pagwadanna?

Doktrina ken Katulagan 60:5; 61:22; 62: 5–8

Kayat ti Apo nga usarek ti karbengak nga agpili ken kayat ti Espirituna nga agpiliak iti rumbeng.

Kasano a mausarmo dagitoy a bersikulo a mangisuro kadagiti ubbing no kasano a tulongan ida ti Apo nga agaramid kadagiti nasayaat a pili?

Dagiti Mabalin nga Aktibidad

• Kiddawen kadagiti ubbing nga agsaritada maipanggep iti maysa a panawen idi kasapulanda ti agaramid iti pangngeddeng. Kasano nga inkeddengda no ania ti aramidenda? Aggigiddan a basaen ti Doktrina ken Katulagan 62:5, 7–8 tapno maammuan no ania ti imbaga ti Apo kadagiti elder maipapan iti panagdaliasatda manipud iti Missouri agingga iti Kirtland, Ohio. Ania dagiti pili a nasken nga aramidenda maipapan iti panagdaliasatda? Ania ti inted ti Apo kadatayo a makatulong kadatayo nga agpili? Isaritam kadagiti ubbing no kasanom nga inusar ti pannarabay ti Espiritu ken ti bukodmo a kasayaatan a pangngeddeng tapno makaaramid kadagiti desision.

• Bingayem ti klase iti tallo a grupo, ket kiddawem ti tunggal grupo a basaen ti maysa kadagiti sumaganad a bersikulo, a nangbilinan ti Apo iti sumagmamano a misionario maipapan iti no kasanoda a tungpalen dagiti misionda: Doktrina ken Katulagan 60:5; 61:22; 62:5. Ania ti madlawtayo maipapan iti imbilin ti Apo kadagitoy a bersikulo? Apay a no dadduma ket nasasayaat para kadatayo nga usaren ti bukkodtayo a pangngeddeng imbes nga ur-urayentayo ti naipangruna a bilin manipud iti Dios iti tunggal banag?

Yallukoy ti Panagsursuro iti Pagtaengan

Awisem dagiti ubbing nga agsanayda a mangibinglay ti ebanghelio iti maysa a miembro ti pamilia. Kas pagarigan, mabalinda nga ibinglay ti maysa a banag a nasursuroda iti Primary.

Panangpadur-as iti Panangisurotayo

Iburay ti pammaneknekmo iti klasem. Ti masansan a panangiburaymo ti pammaneknekmo ket makatulong kadagiti ubbing a sursuruam a makagun-od iti bukodda a pammaneknek. Ti pamaneknek ket mabalin a simple kas iti “Ammok nga ay-ayaten ti Nailangitan nga Ama ti tunggal maysa kadakayo” wenno “Nasayaat ti rikna iti kaunggak bayat ti panagsursurok maipapan ken ni Jesucristo.”