Springhill, Daviess County, Missouri, ni Garth Robinson Oborn

Hunio 7–13

Doktrina ken Katulagan 63

“Sagrado dayta Naggapu iti Ngato”

Makatulong kadagiti ubbing a sursuruam dagiti kinapudno nga insuro iti Doktrina ken Katulagan 63 a mangpapigsa iti pammatida iti Nailangitan nga Ama ken ni Jesucristo. Gapu ta limitado ti orasmo kadakuada, ibilangmo no ania kadagiti kinapudno ti napnuan kaipapananna kadakuada, batay kadagiti kasapulanda.

Isuratmo dagiti Impresionmo

Yawis ti Panagbibinninglay

Panunotem ti simple, kinamanagpartuat a wagas tapno makaited ti gundaway kadagiti ubbing a mangibinglay no ania ti masursuroda. Kas pagarigan, mangisaganaka ti nagduduma kadakkelna a papel, ken paalaem ti tunggal maysa kadagiti ubbing a saanda a pilpilien. Awisem ti ubing nga addaan iti kaatiddogan a papel nga umuna a mangibinglay.

Isuro ti Doktrina: In-inaudi nga Ubbing

Doktrina ken Katulagan 63:23

Kayat ti Nailangitan nga Ama nga masursurok ti ebanghelio.

Kankanayon nga agsursuro dagiti ubbing. Tulongam ida a mangkita a ti Nailangitan nga Ama ket tulonganna ida a makasursuro ti maipapan Kenkuana no tungpalenda ti bilinna.

Dagiti Mabalin nga Aktibidad

• Basaen ti Doktrina ken Katulagan 63:23 kadagiti ubbing, ket kiddawen kadakuada a denggenda no ania ti ited ti Dios no tungpalentayo dagiti bilinna. Tulongam ida a maawatan a dagiti “misterio” ket dagiti banag nga ad-adda a maisuro pay kadatayo ti Dios, kas iti no kasanotayo nga agbalin a kas ken ni Jesucristo.

• Mangitugot iti klase kadagiti ladawan a mangibagi kadagiti topiko ti ebanghelio a mabalin nga ad-adda a pakaisuruan dagiti ubbing, kas iti panagbuniag, ti Mangisalakan, dagiti templo, ken dadduma pay. Ikabil dagiti ladawan a nakapakleb iti suelo, ken pagsisinublatem dagiti ubbing a mangibaliktad ti maysa. Kiddawem kadakuada nga ibinglayda no ania ti ammoda ken uray ania dagiti saludsodda maipapan ti tunggal topiko.

Doktrina ken Katulagan 63:49

Agungarakto.

Ita man wenno iti masakbayan, maliwliwa dagiti ubbing a sursuruam a maammuan a gapu iti Pannubbot ti Mangisalakan, amin dagiti natayen ket agungarto iti maysa nga aldaw.

Dagiti Mabalin nga Aktibidad

• Ipakita kadagiti ubbing ti maysa a ladawan ti maysa kadagiti ay-ayatem a natayen, ken ibinglaymo ti estoria maipapan iti daytoy a tao. Basaen ti Doktrina ken Katulagan 63:49 kadagiti ubbing, ket paneknekam a iti maysa nga aldaw dayta a tao “agungarto manipud kadagiti natay” ket saanto a matayen. Saludsodem kadagiti ubbing no adda am-ammoda a maysa a tao a natayen. Paneknekam nga agungartayonto amin gapu ken ni Jesucristo.

• Mangipakita kadagiti ladawan ti pannakaitanem ken Panagungar ti Mangisalakan (kitaen iti Libro ti Arte ti Ebanghelio, num. 58, 59). Awisem dagiti ubbing nga agsarita maipapan iti no ania ti mapaspasamak kadagiti ladawan. Awisem dagiti ubbing nga agiddada bayat ti panangisaritam maipapan ti pannakaitanem ni Jesus ken agtakderda bayat nga isarsaritam ti maipapan iti Panagungarna. Basaen ti Doktrina ken Katulagan 63:49, ket paneknekam a bumangontayonto manipud kadagiti natay iti maysa nga aldaw a kas iti inaramid ni Jesus.

  

  Tanem iti Minuyongan, ni Jon McNaughton

Doktrina ken Katulagan 63:64

Nasken a tratuek dagiti sagrado a banag nga addaan iti panagraem.

Agbibiagtayo iti panawen a masansan a di-maikankano wenno uray pay marabrabak dagiti sagrado a bambanag. Matulongam dagiti ubbing a mangpadur-as iti nauneg a panagraem kadagiti sagrado a bambanag.

Dagiti Mabalin nga Aktibidad

• Basaem kadagiti ubbing ti manipud iti Doktrina ken Katulagan 63:64: “Sagrado dayta naggapu iti ngato.” Kiddawem kadagiti ubbing a mangpanunot ti maysa a banag a naisangsangayan kadakuada, kas iti paborito nga ay-ayam wenno libro. Kasanoda nga ay-aywanan ken salakniban daytoy? Tulongam dagiti ubbing nga agpanunot kadagiti banag a nasangsangayan—wenno sagrado—iti Nailangitan nga Ama. Kasano ti nasken a panangisaritatayo kadagitoy a banag? Kasano ti nasken a panangtratotayo kadagitoy?

• Aggigiddan nga agkansion a kadua dagiti ubbing iti maysa a kanta maipapan iti panagraem, kas iti “Reverently, Quietly” (Children’s Songbook, 26). Tulongam ida nga agpanunot kadagiti wagas a maipakitada ti panagraemda kadagiti sagrado a bambanag.

Isuro ti Doktrina: In-inauna nga Ubbing

Doktrina ken Katulagan 63:9–10

Sumangbay ti pagilasinan babaen iti pammati ken ti pagayatan ti Dios.

Nakumbert ni Ezra Booth iti Simbaan kalpasan a nakitana a napalaing ni Joseph Smith ti takiag ni Elsa Johnson. Ngem iti kamaudiananna napukaw ni Ezra ti pammatina, ken nagbalin isuna a kritiko ti Propeta. Doktrina ken Katulagan 63 ket naglaon kadagiti pakdaar a maibusor iti mangpadur-as iti pammati babaen kadagiti pagilasinan, kas kadagiti namilagruan a panangpaimbag, imbes a naespirituan a pammatalged iti kinapudno.

Dagiti Mabalin nga Aktibidad

• Ipakitam ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket ibagam kadagiti ubbing nga inusar ni Joseph Smith ti priesthood tapno mapaimbag ti takiag ni Elsa Johnson, a saanna a nausar a naan-anay iti dua a tawen. Awisem dagiti ubbing a basaen ti Doktrina ken Katulagan 63:9–10, ket kiddawem kadagiti ubbing a mangibinglay ti maysa a banag nga imbaga ti Apo maipapan iti pammati ken dagiti pagilasinan (wenno dagiti milagro).

• Awisem dagiti ubbing a mangidrowing ti balay iti rabaw ti maysa a rektanggulo ken ti maysa pay a balay iti tulnek ti maysa trianggulo. Ibagam kadagiti ubbing a dagiti balay ket mangibagi kadagiti pammati ken pammaneknektayo. Kiddawem kadakuada a basaen ti Doktrina ken Katulagan 63:9–10 ken Helaman 5:12. Kalpasanna paisuratmo kadakuada iti rektanggulo no ania ti nasken a pagbangonan ti pammatitayo ken iti trianggulo no ania ti nasken a ditay pangbangonan iti pammatitayo. Ilawlawag a ti rektanggulo ket mangipaay iti natibker a lugar a pagbangonan ngem ti trianggulo ket saan a natalged ken nasaluad. Apay a napateg a bangonen ti pammatitayo ken ni Jesucristo imbes a kadagiti dadduma a bambanag?

Doktrina ken Katulagan 63:23

No tungpalek dagiti bilbilin, isuronakto ti Dios kadagiti kinapudnona.

Magun-odan laeng dagiti “misterio ti pagarian ti [Dios]” dagiti mangtungpal kadagiti bilin ti Dios. Isu daytoy ti gapuna a misterio dagitoy para kadagiti adu a tao. Makatulongto kadagiti ubbing daytoy a pagbatayan bayat iti panangsarakda ti kinapudno.

Dagiti Mabalin nga Aktibidad

• Ipakita kadagiti ubbing ti maysa a bubon, ket kiddawem kadakuada a mangidrowingda ti maysa a ladawan iti daytoy. Kalpasan ti aggigiddan a panangbasa iti Doktrina ken Katulagan 63:23, tulongam dagiti ubbing a mangpanunot kadagiti kinapudno nga ammoda maipapan iti ebanghelio, ket awisem ida a mangisurat kadagitoy a kinapudno iti lawlaw ti bubonda. Kasano a maipada dagitoy a kinapudno iti “sibibiag a danum”?

Doktrina ken Katulagan 63:58–64

Nasken a saanko nga aramaten a barengbareng ti nagan ti Dios.

Mabalin a mangngeg dagiti ubbing nga ar-aramaten dagiti dadduma ti nagan ti Dios iti awan panagraemna ken iti managtabbaaw a wagas. Kasano a matulongam ida a maawatan a dagiti nagan ti Nailangitan nga Ama ken ni Jesucristo ket “nasken a naannad nga isao”? (Doktrina ken Katulagan 63:64).

Dagiti Mabalin nga Aktibidad

• Ibasam kadagiti ubbing manipud iti Doktrina ken Katulagan 63:58, “Ta adtoy ti aldaw a panamallaag.” Kiddawem kadakuada nga agsarita maipapan kadagiti pammallaag a mangngegda manipud kadagiti nagannak, mannursuro, ken liderda iti Simbaan. Kalpassanna tulongam ida a mangsarak kadagiti pammallaag manipud iti Apo iti bersikulo 58–64. Ania dagiti sumagmamano nga umno a wagas a “mangaramat iti nagan ti Apo”? (bersikulo 62).

• Aggigidan nga irebyuyo ti “Panagsasao” iti Para iti Pigsa ti Agtutubo (panid 20–21). Kiddawem kadagiti ubbing a mangaramid kadagiti babassit a poster a mangipalagip kadakuada ti maysa a banag a nasursuroda maipapan iti no kasano nga usaren dagiti nagan ti Nailangitan nga Ama ken ni Jesucristo.

• Aggigiddan nga agkansion iti maysa a kanta maipapan iti panagraem, kas iti “Reverence Is Love” (Children’s Songbook, 31). Kasano a maipasigurotayo a managraemtayo no isaotayo ti maipapan iti nagan ti Nailangitan nga Ama ken ni Jesucristo?

Yallukoy ti Panagsursuro iti Pagtaengan

No awan ti panawenmo nga nangaramid ti panid ti aktibidad iti klase ita a lawas, ibilangmo ti mangted iti tunggal ubing ti maysa a kopia a maiyawidda tapno makompletoda a kadua dagiti pamiliada.

Panangpadur-as iti Panangisurotayo

Bangonem ti panagtalek dagiti ubbing. Mabalin a marikna dagiti sumagmamano nga ubbing a saanda a kabaelan ti agsursuro iti ebanghelio iti bukodda. Ti maysa a wagas tapno mapatibker ti panagtalekda isu ti panangidaydayaw kadakuada no makiramanda iti klase. Ikarim kadagiti ubbing a tulonganto ida ti Espiritu Santo bayat ti panagsursuroda.