Bangkag ti Missouri

Spring Hill, Daviess County, Missouri, ni Garth Robinson Oborn

Hunio 7–13

Doktrina ken Katulagan 63

“Sagrado Dayta Naggapu iti Ngato”

Kinuna ti Apo, “Awatenyo ti espiritu babaen ti kararag” (Doktrina ken Katulagan 63:64). Ibilang ti panagkararag para iti pannarabay ti Espiritu iti panagadalmo.

Isuratmo dagiti Impresionmo

Napili ti disso a pangpatakderan iti siudad ti Zion. Pinasiar dagiti lider ti Simbaan ti lugar ket indatonda daytoy a kas maysa a lugar a paguummongan para kadagiti Santo. Maibatay iti pakasaritaan ni Joseph Smith, “ti daga ti Zion ti kapatgan ita iti imatang iti naindagaan” (Doktrina ken Katulagan 63, paulo a benneg). Ngem nagtitipon dagiti panniriganda maipapan iti Zion. Adu a Santo ti naggagar a mangirugi iti panaguummong iti Missouri. Iti sabali a bangir, naupay dagiti tao a kas ken ni Ezra Booth maipapan iti daga ti Zion ket inpakaammoda dagiti panniriganda. Kinapudnona, idi nagsubli ni Joseph iti Kirtland manipud iti Missouri, naammuanna a nangrugin ti isusuppiat ken ikakalilis iti kinapudno iti Simbaan bayat ti yaadayona. Iti kastoy a kasasaad a ti paltiing iti Doktrina ken Katulagan 63 ket naawat. Ditoy a benneg a sinango ti Apo ti panaggatang iti daga ket panagakar dagiti Santo iti Missouri. Ngem maibilang kadagiti kasta a maaramat a bambanag ti maysa a naitiempo a palagip: “Siak, ti Apo, ipeksak ti timekko, ket matungpalto” (bersikulo 5). Ti timekna, ti pagayatanna, ti bilinna—amin dagitoy “[naggapu] iti ngato”—nasken a saan a matrato iti sinsinan wenno paspasaray. “Sagrado daytoy, ket nasken a naannad ti pannakaisaona” (bersikulo 64).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 63:1–6, 32–37

Kapungtot ti Apo dagiti nadangkes ken nasukir.

Idi naawat daytoy a paltiing, mapadpadasan ni Joseph Smith ti nagubsang a panagdillaw manipud iti sumagmamano a miembro ti Simbaan a timmallikud kenkuana (kitaen iti “Ezra Booth and Isaac Morley,” Revelations in Context,, 130–36). Ania dagiti ballaag nga inted ti Apo iti Doktrina ken Katulagan 63:1–6, 32–37 maipapan “kadagiti nadangkes ken nasukir”? Kasano a pakakitaan iti ayat ti Dios dagiti kasta a ballaag?

Doktrina ken Katulagan 63:7–12

Umay dagiti tanda gapu iti pammati ken ti pagayatan ti Dios.

Saan a makapatanor iti manayon a pammati dagiti tanda wenno milagro laeng. Iti nasapa a paset ti 1831 inkeddeng ni Ezra Booth, maysa a ministro a Metodista iti Kirtland, ti nagpabuniag kalpasan a nakitana ti namilagruan a panangpaimbag ni Joseph Smith iti takiag ti gayyemna a ni Elsa Johnson.

Nupay kasta, iti uneg ti sumagmamano laeng a bulan, napukaw ti pammati ni Booth ket nagbalin a managdillaw ti Propeta. Kasano a napasamak daytoy, iti laksid ti pannakasaksina iti milagro? Panunotem daytoy bayat ti panangbasam iti Doktrina ken Katulagan 63:7–12. Mabalin met nga ibilangmo no apay nga awaten ti sumagmamano a tao dagiti tanda “para iti pagimbagan dagiti tao iti dayag [ti Dios]” (bersikulo 12) ket inawat ida dagiti dadduma “iti …pakakednganda” (bersikulo 11). Maibatay iti no ania ti nabasam, kasano iti panagkunam a kayat ti Apo a panunoten ken riknaem maipapan kadagiti tanda?

Kitaen met iti Mateo 16:1–4; Juan 12:37; Mormon 9:10–21; Ether 12:12, 18.

Doktrina ken Katulagan 63:13–23

Ti kinadalus ti dayaw kayatna a sawen a panangpatalinaed a natarnaw dagiti pampanunot ken tignayko.

Bigbigen ti kaaduan a tattao a biddut ti pannakiabig. Ngem iti Doktrina ken Katulagan 63:13–19, nalawag nga imbaga ti Mangisalakan a dagiti naderrep a pampanunot addaan met kadagiti nadagsen a naespirituan a bunga. “Apay a makapatay a basol ti kinaderrep?” Sinaludsod ni Elder Jeffrey R. Holland. “Kinapudnona, kas mainayon iti naan-anay a panangdadael ti Espiritu nga adda epektona kadagiti kararuatayo, panagkunak daytoy ket maysa a basol gapu ta daytoy ti mangrugit iti kangatuan ken kasantuan a relasion nga ited ti Dios kadatayo iti daytoy a biag—ti ayat nga adda iti lalaki ken babai para iti tunggal maysa ken ti tarigagay ti agassawa nga adda kadakuada a mangyeg kadagiti annak iti maysa a pamilia a naisangrat nga agbalin nga agnanayon” (“Place No More for the Enemy of My Soul,” Ensign wenno Liahona, Mayo 2010, 44).

Ania dagiti bunga a dakdakamaten ti Apo iti Doktrina ken Katulagan 63:13–19 a sumangbayto kadagiti saan nga agbabawi kadagiti naderrep a pampanunot ken tignay? Isurat dagiti bendision nga ikari ti Mangisalakan kadagiti bersikulo 20 ken23 kadagiti napudno. Ania dagiti bendision nga immay iti biagmo manipud iti panagtulnogmo iti paglintegan ti kinadalus ti dayaw? Kasano a tulongannaka ti Mangisalakan nga agtalinaed wenno agbalin a natarnaw?

Kitaen met iti Doktrina ken Katulagan 121:45; Linda S. Reeves, “Worthy of Our Promised Blessings,” Ensign wenno Liahona, Nob. 2015, 9–11.

lalaki ken babai iti templo

Mabendisionantayo bayat ti panagpatalinaedtayo a natarnaw dagiti pampanunot ken tignaytayo.

Doktrina ken Katulagan 63:24–46

Iturong ti Apo iti naespirituan ken temporal a pakaseknan dagiti Santona.

Kalpasan a nabigbig ti Apo no sadino ti pakaipasdekan ti Zion, kasapulan pay laeng dagiti Santo ti Ohio maipapan iti no kaano a mangrugida nga umakar ken no sadino ti pangalaanda iti kuarta nga igatang iti daga. Bayat ti panagbasam iti Doktrina ken Katulagan 63:24–46, sarakem ti naespirituan ken temporal a panangiturong ti Apo nga intedna maipanggep iti Zion. Ania ti naespirituan ken temporal a panangiturong ti inted ti Apo kenka?

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 63:7–12.Ti estoria maipapan kenni Ezra Booth a mangpampanaw iti Simbaan iti baet ti pannakasaksina iti pannakapaimbag ni Elsa Johnson (kitaen iti ababa a detalye iti “Dagiti Kapanunotan para iti Bukod a Panagadal” ken iti aramid ti arte [artwork] a naipakuyog iti daytoy a balabala) mabalin a mangparegta iti maysa a panaglilinnawag maipapan kadagiti milagro. Nalabit mabalin a pagsasaritaan dagiti miembro ti pamilia maipapan kadagiti milagro a nangpapigsa iti pammatida, agraman dagiti padas manipud iti pamiliam wenno pakasaritaan ti pamiliam. Kasano nga inaramatda ti pammati a kasapulan iti panangawat kadagitoy a milagro? Ania ti isuro ti Doktrina ken Katulagan 63:7–12 maipapan iti pagnaigan ti pammati ken dagiti milagro?

Doktrina ken Katulagan 64:13–19Kasano a masaluadantayo ti bagbagitayo manipud kadagiti di maikanatad nga impluensia, pakairamanan ti pornograpia? (Masarakam ti adu a makatulong a resources para kadagiti pamilian iti AddressingPornography.ChurchofJesusChrist.org.) Ania dagiti bendision ti panagbiag iti linteg ti kinadalus iti dayaw?

Doktrina ken Katulagan 63:23.Kasano a matulongam a maipaawat iti pamiliamn no kasano a maipada dagiti “kinadatdatlag [iti] pagarian,” wenno dagiti kinapudno ti ebanghelio, iti “ubbog ti nabiag a danum”? Kas pagarigan, mabalinyo ti agdaliasat iti maysa nga asideg nga ubbog wenno karayan (wenno ipabuya ti maysa a video wenno ladawan ti maysa nga ubbog wenno karayan). Kasano a maipada dagiti kinapudno ti ebanghelio iti danum?

Doktrina ken Katulagan 63:58.Ania dagitiballaag a masarakantayo iti benneg 63? Ania dagiti sumagmamano a ballaag a mangmangngegantayo ita manipud kadagiti lidertayo iti Simbaan?

Doktrina ken Katulagan 63:58–64Ipakitam iti pamiliam ti maysa a napateg a gameng ti pamilia. Kasano a maiduma a tratuentayo daytoy a banag kadagiti dadduma a bambanag a di unay kasta ti kapategna? Ania ti isuro ti Doktrina ken Katulagan 63:58-64 kadatayo maipapan iti no ania ti kabaelantayo a mangraem kadagiti nasagraduan a banag?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Reverence is Love,” Children’s Songbook, 31.

Panangpadur-as iti Bukod a Panagadal

Agbiag iti no ania ti masursurom. “Bayat ti pannakariknam iti rag-o a sumangbay manipud iti pannakaawat iti ebanghelio, kayatmonto a yaplikar no ania ti nasursurom. Ikarigatam ti agbiag a maitunos iti pannakaawatmo. Ti panangaramidmo iti daytoy ket mangpapigsanto iti pammatim, pannakaammom, ken pammaneknekmo” (Preach My Gospel, 19).

Ni Joseph Smith a mangig-iggem iti ima ti babai

Panangpaimbag iti Abaga ni Elsa Johnson, ni Sam Lawlor