Campfire iti Missouri, ni Bryan Mark Taylor

Mayo 31–Hunio 6

Doktrina ken Katulagan 60–62

“Adda iti Imak ti Amin a Lasag”

Insuro ni Presidente Ezra Taft Benson a no agadaltayo kadagiti nasantuan a kasuratan, “dumakkelto dagiti pammaneknek. Pumigsanto dagiti panagkumit. Mapatibkerto dagiti pamilia. Sumangbay ti personal a paltiing” (“The Power of the Word,” Ensign, Mayo 1986, 81).

Isuratmo dagiti Impresionmo

Idi Hunio 1831, inangay ni Joseph Smith ti maysa a komperensia kadagiti elder ti Simbaan iti Kirtland. Sadiay, binukel ti Apo ti sumagmamano kadagiti elder iti sagdudua ket imbaonna ida iti Jackson County, Missouri, nga addaan iti daytoy a bilin: “Mangasaba iti dalan” (Doktrina ken Katulagan 52:10). Adu kadagiti elder ti sipapasnek a nangaramid, ngem saan nga inaramid dagiti dadduma. Ket idi dimteng ti panawen a panagbiahe nga agsubli iti Kirtland, kinuna ti Apo, “Saanak unay a maragsakan kadagiti dadduma nga [elder], ta dida ungapen dagiti ngiwatda, ngem ilemmengda ti talento nga intedko kadakuada, gapu iti butengda iti tao” (Doktrina ken Katulagan 60:2). Adu kadatayo ti makarikna iti simpatia kadagitoy nga elder—mabalin a mariknatayo pay ti agkedked a mangungap kadagiti ngiwattayo ken mangibinglay iti ebanghelio. Nalabit a lapdannatayo pay ti “buteng iti tao.” Nalabit nga agduaduatayo iti pannakaikari wenno kabaelantayo. Ania man dagiti rasontayo, ti Apo “ammona ti pagkapsutan ti tao ken no kasano a matulonganna[tayo]” (Doktrina ken Katulagan 62:1). Iti kaaduan a paset dagitoy a paltiing para kadagiti nagkauna a misionario ket pammatalged a makatulong kadatayo a mangparmek kadagiti panagbutengtayo maipapan iti panangibinglay iti ebanghelio—wenno dadduma pay a panagbuteng a mabalin a pakaipasanguantayo: “Siak, ti Apo, ti agturay iti langit iti ngato.” “Ta mabalinkayonto nga aramiden a nasantuan.” “Adda iti imak ti amin a lasag.” Ket “agragsakkayo, babassit nga ubbing; ta addaak iti tengngayo.” (Doktrina ken Katulagan 60:4, 7; 61:6, 36.)

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 60; 62

Maragsakan ti Apo no ungapek ti ngiwatko a mangibinglay iti ebanghelio.

Naaddaantayo amin iti padas no nakaibinglaytayo koma iti ebanghelio iti maysa a tao, ngem gapu iti sumagmamano a rason, ditayo naaramid. Bayat ti panangbasam kadagiti balikas ti Apo kadagiti nagkauna a misionario a napaay a “nangungap kadagiti ngiwatda,” panunotem maipapan kadagiti bukodmo a gundaway a mangibinglay iti ebanghelio. Kasano a kasla maysa a “talento,” wenno maysa a gameng manipud iti Dios ti pammaneknekmo iti ebanghelio? Iti ania a wagas a no dadduma “ilemmeng[tayo] ti talentotayo”? (Doktrina ken Katulagan 60:2; kitaen met iti Mateo 25:14–30.

Inatur ti Apo dagituy nagkauna a misionario, ngem pinadasna pay a pinaregta ida. Ania dagiti makaparegta a mensahe manipud Kenkuana a masarakam kadagiti benneg 60 ken 62? Kasano a papigsaen dagitoy a mensahe ti panagtalekmo iti panangibinglay iti ebanghelio? Kadagiti masungad nga aldaw, mangkitaka kadagiti gundaway nga ungapem ti ngiwatmo ket ibinglaymo no ania ti intalek ti Dios kenka.

Kitaen met iti Doktrina ken Katulagan 33:8–10; 103:9–10; Dieter F. Uchtdorf, “Missionary Work: Sharing What Is in Your Heart,” Ensign wenno Liahona, Mayo 2019, 15–18.

Kayat ti Dios nga ibinglayko ti ebanghelio kadagiti dadduma.

Doktrina ken Katulagan 61:5–6, 14–18

Inlunod kadi ti Apo dagiti amin a danum?

Ti ballaag ti Apo iti Doktrina ken Katulagan 61 ket, paset ti ballaag maipapan kadagiti peggad a mabalin a pakaipasanguan dagiti taona bayat ti panagdaliasatda iti Zion iti Karayan Missouri, a naam-ammo idi dayta a panawen a nagbalin a napeggad. Nasken a saan a mayulog daytoy a ballaag a kayatna a sawen a nasken a liklikantayo ti panagdaliasat babaen iti danum. Ti Apo addaan iti “amin a bileg,” agraman ti bilegna iti dandanum (bersikulo 1).

Doktrina ken Katulagan 61–62

Ti Apo ti kabilgan ti amin ken mataginayonnak.

Iti dalan nga agsubli iti Kirtland, naaddaan iti padas a pannakapangta iti biag da Joseph Smith ken dadduma pay a lider ti Simbaan iti Karayan Missouri (kitaen iti Saints, 1:133–34). Inusar ti Apo daytoy a gundaway a mangballaag ken mangiwanwan kadagiti katulonganna. Ania ti masarakam iti Doktrina ken Katulagan 61 a mangparegta kenka nga agtalek iti Apo bayat ti panangsangom kadagiti bukodmo a karit? Kas pagarigan, apay a napateg nga ammuen a ti Dios “nagtaud iti agnanayon agingga iti agnanayon”? (bersikulo 1).

Adda dagiti maipada a nalawag a pannakaammo ken pannakaawat [insights] iti benneg 62. Ania ti isuro kenka ti Apo maipapan iti Bagina ken bilegna iti daytoy a paltiing?

Utobem dagiti padas a pangpatibker iti pammati a napasaramon idi tinulongannaka ti Apo a mangparmek iti panagrigat iti espiritu ken bagim.

Doktrina ken Katulagan 62

Kayat ti Apo nga aramidek dagiti sumagmamano a pangngeddeng “kas namnama[ek] a nasayaat.”

No dadduma ikkannatayo ti Apo iti nalawag a pangiturong, ken dadduma pay a banag a bay-annatayo a mangngeddeng. Kasano ti panagkitam iti daytoy a pagbatayan a nailadawan iti Doktrina ken Katulagan 62? (kitaen met iti Doktrina ken Katulagan 60:5; 61:22). Kasano a nakitamon daytoy a pagbatayan iti biagmo? Apay a nasayaat para kadatayo ti agaramid iti sumagmamano a pangngeddeng nga awan ti nalawag a pangiturong manipud iti Dios?

Kitaen met iti Ether 2:18–25; Doktrina ken Katulagan 58:27–28.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 60:2–3.Apay nga agkedked dagiti nagkauna a misionario a mangibinglay iti ebanghelio? Apay a no dadduma agkedkedtayo? Ibilang ti panangyakem no kasano a maibinglay dagiti miembro ti pamilia iti ebanghelio iti agduduma a kasasaad.

Doktrina ken Katulagan 61:36–39.Ania dagiti rason a makitatayo kadagitoy a bersikulo nga “agragsakkayo”? (kitaen iti Juan 16:33). Nalabit a makapagsurat wenno makapagdrowing ti pamiliam kadagiti ladawan ti bambanag a mangyeg kadakuada iti rag-o ken ummongem dagitoy iti maysa a “naragsak” a garapon. (Penken nga iraman dagiti ladawan ti Mangisalakan ken dagiti mangipalagip iti ayatna kadatayo.) Iti uneg ti makalawas no masapul dagiti miembro ti pamilia ti maysa a pammalagip kadagiti rason tapno agbalin a naragsak, makapilida iti maysa a banag manipud iti garapon.

Doktrina ken Katulagan 61:36.Kasano a matulongam ti pamiliam a manglagip nga “adda iti tengnga[tayo]” ti Mangisalakan? Mabalin a mangngeddengkayo a sangkamaysa no sadino ti nalawag a pangikabilanyo iti maysa a ladawanna iti pagtaenganyo. Kasano a maawistayo ti Mangisalakan iti inaldaw a panagbiagtayo?

Doktrina ken Katulagan 62:3.Mabalin a maddaankayo iti maysa a miting ti panagpaneknek ti pamilia kalpasan ti panangbasam iti daytoy a bersikulo. Tapno mailawlawag no ania ti maysa a pammaneknek, mabalinmo nga ibinglay dagiti paset ti mensahe ni Presidente M. Russell Ballard “Pure Testimony” (Ensign wenno Liahona, Nob. 2004, 40–43). Apay a nasayaat nga isurattayo dagiti pammaneknektayo?

Doktrina ken Katulagan 62:5, 8.Apay a saan a mangted ti Apo kadagiti bilin maipapan iti tunggal aspeto ti biagtayo? Segun iti bersikulo 8, kasano a makaaramidtayo kadagiti pangngeddeng?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Testimony,” Hymns no. 137.

Panangpadur-as iti Bukod a Panagadal

Agpatarabayka iti Espiritu iti panagadalmo. Agpatarabayka iti Espiritu Santo. Agbalinka a managrikna kadagiti arasaas bayat ti panangtarabayna kenka kadagiti banag a kasapulam a sursuruem iti tunggal aldaw, uray pay no isingasing dagiti arasaasna a basaem wenno sursuruem ti maysa a maigiddiat a topiko ngem iti gagangay nga ar-aramidem wenno iti maysa a maigiddiat a wagas.

Naimbag a Pastor, ni Del Parson