kataltalonan iti panagsingising ti init

Daviess County, Missouri

Hunio 14–20

Doktrina ken Katulagan 64–66

“Kalikaguman ti Apo ti Puso ken ti Natallugod a Panunot”

Kinuna ni Presidente Henry B. Eyring: “Masansan a rugiak ti agbasa kadagiti nasantuan a kasuratan nga addaan kadagiti saludsod nga ‘Ania ti kayat ti Dios nga aramidek?’ wenno ‘Ania ti kayatna a mariknak?’ Masansan a masarakak dagiti baro nga ideya ken kapanunotan nga awan pay iti kaano man kaniak idi” (“How God Speaks to Me through the Scriptures,” Peb. 6, 2019, blog.ChurchofJesusChrist.org).

Isuratmo dagiti Impresionmo

Iti napalalo a pudot idi Agosto 1831, nagdaliasat nga agsubli ti sumagmamano nga elder iti Kirtland kalpasan ti panang-surveyda iti daga ti Zion, iti Missouri babaen ti panangiturong ti Apo. Saan a nasayaat a panagbaniaga daytoy. Kadagiti agbambaniaga—da Joseph Smith, Oliver Cowdery, Sidney Rigdon, Ezra Booth, ken dagiti dadduma pay—napudotan ken nabannogda, ket iti nabiit nagbalin a panaggaapa dagiti panagdandanag. Mabalin a kasla napasamak iti napaut a panawen ti panangbangon iti Zion, maysa a siudad ti ayat, kaykaysa, ken kappia.

Pagsayaatanna, ti panangbangon iti Zion—iti Missouri idi 1831 wenno iti puspusotayo ken kadagiti wardtayo iti agdama—saan a naidawat a kasapulan nga agbalintayo a perpekto. Ketdi, “nasken a pakawanenyo amin a tao,” a kas kinuna ti Apo iti (Doktrina ken Katulagan 64:10.) Indawatna a kasapulan “ti puso ken ti natallugod a panunot” (bersikulo 34). Ken kasapulanna ti anus ken kinapasnek, ta maipatakder ti Zion iti pamuon dagiti “babassit a bambanag,” nga ipatungpal dagiti saan a “mabannog nga agaramid iti nasayaat” (bersikulo 33).

Kitaen met iti Saints, 1:133–34, 136–37.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 64:1–11

Naidawat a kasapulan a pakawanek ti amin a tao.

Bayat ti panangbasam iti Doktrina ken Katulagan 64:1–11, panunotem ti maipapan iti maysa a panawen idi pinakawannaka ti Apo. Mabalin pay a panunotem ti maipapan iti maysa a tao a nasken a pakawanem. Kasano nga apektuan ti panangngaasi ti Apo dagiti riknam maipapan iti bagim ken maipapan kadagiti dadduma? Apay iti panagkunam a bilinennatayo ti Apo a “pakawanentayo ti amin”? (bersikulo 10). No marigatanka a mamakawan, ibilang no ania ti isuro dagiti sumaganad a resources maipapan iti no kasano a makatulong ti Mangisalakan: Jeffrey R. Holland, “The Ministry of Reconciliation,” Ensign wenno Liahona, Nob. 2018, 77–79; Pangiwanwan iti Nasantuan a Kasuratan, “Pakawanen,” scriptures.ChurchofJesusChrist.org

Doktrina ken Katulagan 64:31–34

Kalikaguman ti Dios ti pusok ken ti natallugod a panunotko.

Nariknam kadin ti “nabannog” gapu kadagiti amin a “nasayaat nga aramid” nga ikarkarigatam nga ipatungpal? Sapulem ti mensahe ti Apo kenka iti Doktrina ken Katulagan 64:31–34. Ania ti kayat a sawen ti itedmo ti “puso[m] ken natallugod a panunot[mo]” iti Dios? (bersikulo 34).

Doktrina ken Katulagan 64:41–43

Ti Zion agbalinto a “ wagayway kadagiti tao.”

Ti wagayway ket “maysa a bandera wenno pagrukodan iti aglawlaw a paguummongan dagiti tao a nagkaykaysa iti panggep wenno kinasiasino” (Pangiwanwan iti Nasantuan a Kasuratan, “Ensign,” scriptures.ChurchofJesusChrist.org). Kasano a ti Zion—wenno ti Simbaan ti Apo— nagbalin a kas maysa a wagayway kenka? Ibilangmo dagitoy dadduma pay a pagarigan ti bambanag a maitag-ay, kas iti wagayway, a mangbendision kadagiti tao: Dagiti Numero 21:6–9; Mateo 5:14–16; Alma 46: 11–20. Ania ti isuro dagitoy a bersikulo kenka maipanggep iti no kasano a matulongam ti Simbaan nga agbalin a maysa a wagayway iti lugar a pagnaedam? Sapulem dagiti dadduma pay a wagas nga inladawan ti Apo ti Zion iti Doktrina ken Katulagan 64:41–43.

Kapitan Moroni

Ni Kapitan Moroni a Mangig-iggem iti Wagayway ti Wayawaya, ni Gary E. Smith

Doktrina ken Katulagan 65

“Isaganayo ti dalan ti Apo.”

Inladawan ni Mateo ni Juan Bautista kas maysa nga immararaw iti, “Isaganayo ti dalan ti Apo” (Mateo 3:3; kitaen met iti Isaias 40:3). Iti Doktrina ken Katulagan 65, us-usaren ti Apo ti isu met la a pagsasao a mangiladawan iti aramidna iti ud-udina nga aldaw. Ania dagiti pagpapadaan a makitayo iti no ania ti inaramid ni Juan Bautista (kitaen iti Mateo 3:1–12) ken no ania ti kayat ti Apo nga aramidentayo ita? Ania ti masarakam itoy a paltiing a mangparegta kenka a mangtulong a mangipatungpal kadagiti linaonna a padto? Utobem dagiti wagas a mabalinmo a “maipakaammo dagiti nakaskasdaaw nga aramid ti [Dios] kadagiti tao” (bersikulo 4).

Doktrina ken Katulagan 66

Ammo ti Apo dagiti sumken a pampanunot iti pusok.

Kalpasan iti nabiit a panawen a panagkamengna iti Simbaan, indawat ni William E. McLellin ken ni Joseph Smith nga ipalgakna ti pagayatan ti Dios para kenkuana. Saan nga ammo ni Joseph daytoy, ngem adda lima a bukod a saludsod ni William a ninamnamana a sungbatan ti Apo babaen ti Propetana. Ditayo ammo no ania dagiti saludsod ni William, ngem ammotayo a naiturong ti paltiing kenkuana, itan ti Doktrina ken Katulagan 66, nasungbatan ti tunggal saludsod a “naan-anay ken sibubukel a pannakapnek” ni William (“William McLellin’s Five Questions,” Revelations in Context, 138).

Bayat ti panangbasam iti benneg 66, panunotem maipapan ti no ania ti naammuan ti Apo maipapan ken ni William McLellin ken dagiti pakaseknan ken panggep ti pusona. Kasano nga impalgak ti Apo nga am-ammonaka? No addaankan iti bendision ti patriarka, ibilang ti panangadal iti daytoy. Bayat ti panangaramidmo, ania ti maitulong kenka ti Espiritu Santo tapno maawatam iti maipapan ti pagayatan ti Dios para kenka?

Kitaen met iti Saints, 1:138–40; Gospel Topics, “Patriarchal Blessings,” topics.ChurchofJesusChrist.org.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 64:8–10.Mangted dagiti relasion ti pamilia iti adu a gundaway a masursuruan a mamakawan. Nalabit a makapagsarita dagiti miembro ti pamilia maipapan no kasano a ti panagpipinnakawan iti tunggal maysa ket nangbendision iti pamiliayo. Kasano a matulongannatayo ti Apo a mamakawan iti tunggal maysa? Kasano nga “agsagaba[tayo]” (bersikulo 8) no ditayo pakawanen dagiti dadduma?

Doktrina ken Katulagan 64:33.Ania ti kayat ti Nailangitan nga Ama nga aramiden ti pamiliam a mangipatungpal iti “naidaklan nga aramidna”? Nalabit nga iti ipapan iti templo, panangibinglay iti ebanghelio iti maysa a kaarruba, wenno panangparmek ti panagsusupanget. Nalabit a mabalin nga agkolekta ti tunggal miembro ti pamilia iti babassit a banag, a kas kadagiti bato wenno butones wenno pedaso ti puzzle, ket usaren dagitoy a mangibagi kadagiti “babassit a bambanag” a mabalintayo nga aramiden iti inaldaw a “[mangisagana] ti pundasion” para iti naindaklan nga aramid ti Dios. Kas maysa a pamilia, pumilikayo iti maysa kadagitoy babassit a bambanag nga itrabahoyo itoy a lawas.

Doktrina ken Katulagan 66:3.Kasano a maisuromto ti kinapateg ti panagbabawi? Mabalinmo ti mangidasar iti sumagmamano a taraon iti maysa a pinggan a medio nadalus ket ibasam dagiti balikas ti Apo ken ni William McLellin: “Nadaluska, ngem saan nga amin.” Kalpasanna, mabalinmo a dalusan ti pinggan ket ibinglaymo ti makan bayat ti panangilawlawag no kasano nga inaramid ni Jesucristo a posible kadatayo ti agbalin a naespirituan a nadalus.

Doktrina ken Katulagan 66:10.Kasano a matungpal ti pamiliam ti balakad ti Apo a “kalikagumanyo a di pakaringgoran,” wenno pakadagsenan iti adu a banag nga aramiden? Mabalinmo nga isarita maipapan ti estoria da Maria ken Marta (kitaen iti Lucas 10:38–42), ket paglilinnawagan no kasano a mapagtalinaed ti pamiliam a di maringgoran kadagiti banag nga awan ti agnanayon a pategna.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Help Me, Dear Father,” Children’s Songbook, 99.

Panangpadur-as iti Panangisurotayo

Agbalin a sidadaan a magun-od ken maasitgan. Sumagmamano kadagiti kapintasan a kanito iti panangisuro ket mangrugi kadagiti saludsod wenno pakaseknan iti puso dagiti miembro ti pamilia. Ipakaammom kadagiti miembro ti pamilia babaen kadagiti balikas ken tignaymo a magagaranka a dumngeg kadagitoy. (Kitaen ti Panangisuro iti Wagas ti Mangisalakan, 16.)

Babai a nakaparintumeng iti sango ni Jesus

Napakawanen, ni Greg K. Olsen Naaramat nga addaan pammalubos. www.GregOlsen.com