Hunio 21–27

Doktrina ken Katulagan 67–70

“Napateg … dagiti Kinabaknang ti Sibubukel a Daga”

Nupay adu dagiti paltiing iti Doktrina ken Katulagan a naiturong kadagiti masinunuo a tao iti masinunuo a kasasaad, isuda “ket pakaisagutan para iti amin” (“Pammaneknek dagiti Sangapulo-ket- Dua nga Apostol iti Kinapudno ti Libro ti Doktrina ken Katulagan,” pakauna iti Doktrina ken Katulagan). Bayat ti panagadalmo, sapulem dagiti kinapudno ken pagbatayan a pakairanudam.

Isuratmo dagiti Impresionmo

Manipud idi 1828 agingga iti 1831, immawat ni Propeta Joseph Smith iti adu a paltiing manipud iti Apo, agraman iti nadiosan a balakad para kadagiti indibidual, dagiti pangiturong maipapan iti pannakaituray ti Simbaan, ken dagiti makaparegta a parmata kadagiti ud-udina nga aldaw. Ngem adu kadagiti Santo ti saan a nakabasa kadagitoy. Saan pay a naipablaak dagiti paltiing, ket naisurat iti ima ti sumagmamano nga adda a magun-od a kopia kadagiti papel a naiwaras kadagiti miembro ken insursor dagiti misionario.

Kalpasanna, idi Nobiembre 1831, nagtawag ni Joseph iti maysa a council dagiti lider ti Simbaan tapno paglilinnawagan ti pannakaipablaak dagiti paltiing. Kalpasan ti panagkalikagum a manggun-od iti pagayatan ti Apo, nagplano dagitoy a lider a mangiipablaak iti Libro dagiti Bilin—ti pakauna iti agdama a Doktrina ken Katulagan. Iti kabiitan a panawen mabalinton a basaen ti tunggal maysa para iti bagbagida ti balikas ti Dios a naipalgak babaen iti maysa a sibibiag a propeta, a nalawag a palkakitaan a “dagiti tulbek ti kinadatdatlag ti pagarian ti Mangisalakan naitalek manen iti tao.” Ta dagitoy ken adu pay a dadduma a gapu, dagiti Santo idi ken ita ibilangda dagitoy a paltiing nga agbalin a “kaibatogan … ti kinabaknang iti lubong” (Doktrina ken Katulagan 70, paulo ti benneg).

Kitaen met iti Saints, 1:140–43.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 67:1–9; 68:3–6

Tulongan ti Dios dagiti katulonganna ken dagiti balikas a sawenda iti naganna.

Kasla maysa a nalag-an a pangngeddeng nga ipablaak dagiti paltiing a naawat ni Joseph Smith, ngem sumagmamano kadagiti nagkauna a lider ti Simbaan ti saan a sigurado no maysa daytoy a nasayaat nga ideya. Maysa a pakaseknan ti adda pakainaiganna kadagiti pagkurangan iti pagsasao nga inusar ni Joseph Smith a panangisurat kadagiti paltiing. Dimteng ti paltiing iti benneg 67 kas sungbat iti dayta a pakaseknan. Ania ti masursurom maipapan kadagiti propeta ken paltiing manipud iti bersikulo 1–9? Ania dagiti nayon a nalawag a pannakaammo ken pannakaawat a gun-odem manipud iti 68:3–6?

Sakbay a naimprenta ti Libro dagiti Bilin, nagpirma ti sumagmamano a lider ti Simbaan iti maysa a naisurat a pammaneknek a pudno dagiti paltiing iti libro. Tapno makita ti maysa a kopia ti pammaneknekda, kitaen iti “Testimony, circa 2 November 1831,” Revelation Book 1, 121, josephsmithpapers.org.

Doktrina ken Katulagan 68:1–8

Ti inspirasion manipud iti Espiritu Santo ti mangipakita ti pagayatan ti Apo.

Naisao dagiti balikas kadagitoy a bersikulo bayat ti pannakaawag ni Orson Hyde ken dagiti dadduma pay a “mangipakdaar iti agnanayon nga ebanghelio, babaen ti Espiritu ti sibibiag a Dios, iti tunggal tao, ken tunggal daga” (bersikulo 1). Kasano a makatulong ti palawag iti bersikulo 4 iti maysa a tao a naibaon a mangikasaba ti ebanghelio? Kasano a mayaplikar kenka dagitoy a balikas? Panunotem ti maysa a gundaway idi “natignay[naka] ti Espiritu Santo,” (bersikulo 3) nga agsao wenno agaramid iti maysa a banag. Ania ti masarakam kadagitoy a bersikulo a makaited kenka iti panagtalek a sumurot kadagiti naespirituan a parikna?

Doktrina ken Katulagan 68:25–28

Pagrebbengan dagiti nagannak nga isuro dagiti annakda.

Ni Sister Joy D. Jones, Sapasap a Presidente ti Primary, insurona, “Ti[maysa a] tulbek a mangtulong kadagiti ubbing a saan nga agaramidt iti basol ket ti panangirugi kadagiti nasapa unay a tawen a siaayat a mangisuro kadakuada kadagiti kangrunaan a doktrina ken pagbatayan ti ebanghelio—manipud kadagiti nasantuan a kasuratan, ti Pagannurotan ti Pammati, ti Para iti Pigsa dagiti Agtutubo a buklet, dagiti kanta iti Primary, dagiti himno, ken dagiti bukodtayo a pammaneknek—a mangiturongto kadagiti ubbing iti Mangisalakan” (“A Sin-Resistant Generation,” Ensign wenno Liahona, Mayo 2017, 88).

Maibatay iti Doktrina ken Katulagan 68:25–28, ania dagiti sumagmamano kadagiti “kangrunaan a doktrina ti ebanghelio” a nadakamat ni Sister Jones a rumbeng nga isuro dagiti nagannak kadagiti annakda? Apay a naited daytoy napateg a pagrebbengan kadagiti nagannak? Ania ti masaom iti maysa a naganak a dina marikna iti bagina a maikari a mangisuro kadagitoy a banag kadagiti annakna?

Kitaen met iti Tad R. Callister, “Parents: The Prime Gospel Teachers of Their Children,” Ensign wenno Liahona, Nob. 2014, 32–34.

Ti pagtaengan ti kasayaatan a lugar a pagsursuruan dagiti ubbing iti ebanghelio.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 67:10–14.Kasano a lapdannatayo iti panangdur-as nga umas-asideg iti Apo ti apal, buteng, ken pasindayag? Apay a di makaibtur iti sango ti Apo ti maysa a “nailubongan a tao”? (bersikulo 12; kitaen met iti Mosiah 3:19). Ania ti masarakantayo kadagitoy a bersikulo a mangparegta kadatayo nga “ituloy[tayo] a siaanus agingga nga agbalin[tayo] a naan-anay”? (bersikulo 13).

Kas maysa a pamilia, mabalinyo pay nga irebyu ti mensahe ni Elder Jeffrey R. Holland “Be Ye Therefore Perfect—Eventually” (Ensign wenno Liahona, Nob. 2017, 40–42).

Doktrina ken katulagan 68:3–4.Mabalin nga ibinglay dagiti miembro ti pamilia dagiti padas a nangpapigsa iti pammatida a dagiti balikas dagiti katulongan ti Apo ket “pagayatan ti Apo,” “panunot ti Apo,” ken “bileg ti Dios iti pannakaisalakan” (bersikulo 4). Wenno mabalinda a sapulen dagiti kaudian a mensahe ti sapasap a komperensia a mayaplikar iti maysa a karit a mabalin a sangsanguen ti pamiliayo.

Doktrina ken Katulagan 68:25–35.Naglaon dagitoy a bersikulo iti napateg a balakad “kadagiti agindeg iti Zion” (bersikulo 26). Ania ti nakaparegtaantayo a pasayaaten kalpasan ti panangbasa kadagitoy a bersikulo? Mabalin a naragsak ti agaramid kadagiti ladawan a mangipakita iti sumagmamano a pagbatayan kadagitoy a bersikulo ket ilemmeng dagitoy iti intero a pagtaenganyo. Kalpasanna, kadagiti masungad nga aldaw no masarakan ti maysa a tao ti maysa a ladawan, mausarmo dayta a kas maysa a gundaway a mangisuro maipapan iti dayta a pagbatayan. Apay a ti pagtaengan ti kapintasan a lugar a pagsursuruan dagiti ubbing kadagitoy a banag?

Doktrina ken Katulagan 69:1–2.Naibaon ni Oliver Cowdery iti Missouri nga inkuyogna dagiti naisurat a kopia dagiti paltiing ti Propeta tapno maimaldit, kasta met ti kuarta a pangtulong a mangbangon iti Simbaan sadiay. Ania a balakad ti inted ti Apo iti bersikulo 1 maipapan iti panagdaliasat ni Oliver? Apay a napateg a kadua dagiti tao a “pudno ken napudno”? (bersikulo 1). Kaano a nangimpluensia kadatayo dagiti gagayyem nga agaramid kadagiti naimbag wenno dakes a pangngeddeng? Kasano a makapagbalintayo a nasayaat nga impluensia kadagiti dadduma?

Doktrina ken Katulagan 70:1–4.Inted ti Apo kadagiti masinunuo nga elder ti pagrebbengan a mangaywan iti pannakaipablaak dagiti paltiing. Nupay awan kadatayo dayta a masinunuo a pagrebbengan, iti ania a kaipapanan a mabalintayo a maibilang nga “agaywan kadagiti paltiing ken bilin”? (bersikulo 3).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Home Can Be a Heaven on Earth,” Hymns, no. 298.

Panangpadur-as iti Panangisurotayo

Yaplikar dagiti nasantuan a kasuratan iti biagtayo. Kalpasan ti panangbasam iti maysa a binatog ti nasantuan a kasuratan, awisem dagiti miembro ti pamilia a mangyaplikar iti daytoy iti biagda. Kas pagarigan, mabalinmo nga awisen ida a mangpanunot kadagiti maipada a situasion a mabalin a pakaipasanguanda a kapada met laeng dagiti pagbatayan ti ebanghelio.

Ti Libro dagiti Bilin, pakauna iti Doktrina ken Katulagan, ket naimaldit iti pagipablaakan a kas itoy.