Independence, Missouri, ni Al Rounds

Mayo 24–30

Doktrina ken Katulagan 58–59

“Siaanep a Makiraman iti Nasayaat nga Aramid”

Insuro ni Presidente Dallin H. Oaks, “Tulongannatayonto dagiti nasantuan a kasuratan a mangrisut iti amin a bukodtayo a saludsod gapu ta babaen iti panangbasa kadagitoy maawis ken maikari ti bagbagitayo iti pammaregta ti Espiritu Santo, a mangtarabayto kadatayo iti amin a kinapudno” (iti David A. Edwards, “Are My Answers in There?” New Era, Mayo 2016, 42).

Isuratmo dagiti Impresionmo

Idi immuna a nakita dagiti elder ti Simbaan ti disso a pagpatakderan iti siudad ti Zion—Independence, Missouri—saan daytoy ti kas iti ninamnamada. Impagarup dagiti dadduma a masarakanda ti nadur-as, naganetget a komunidad a pagindegan ti natibker a grupo dagiti Santo. No di ketdi nasarakanda ti manmano ti matagtagitaona a lugar, nga awan ti sibilisasion a nakairuamanda ken nagnaedan dagiti nariribukt nga agindeg imbes a dagiti Santo. Nagbalin a di laeng indawat ti Apo kadakuada nga umay iti Zion—tinarigagayanna kadakuada a mangbangon iti daytoy.

No saan a mapasamak dagiti namnamaentayo, malagiptayo no ania ti imbaga ti Apo kadagiti Santo idi 1831: “Diyo makita iti gagangay a matayo, para iti agdama a panawen, ti plano ti Diosyo … ken ti gloria a sumaruno kalpasan ti adu a panagtutuok” (Doktrina ken Katulagan 58:3). Wen, napno ti biag iti panagtutuok, uray pay ti kinadangkes, ngem kabaelantayo ti “agipatungpal iti adu a kinalinteg; ta adda [kadatayo] ti bileg” (dagiti bersikulo 27–28).

Kitaen met iti Saints, 1:127–33.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 58:1–5, 26–33, 44; 59:23

Sumangbay dagiti bendision a mayannurot iti tiempo ti Dios ken iti kinapasnektayo.

Rinugian a binangon dagiti Santo ti pamuon ti Zion iti Jackson County, Missouri, a nagibturanda iti adu a pannubok. Awan duadua a ninamnamada a bayat ti unos ti panagbiagda dumur-asto daytoy a disso kas maysa a lugar a mabalin a paguummongandagiti amin a Santo. Nupay kasta, napaksiat dagiti Santo iti Jackson County iti uneg ti sumagmamano a tawen, ket impalgak ti Apo kadagiti taona nga “aguray iti bassit a panawen para iti pannakasubbot ti Zion” (Doktrina ken Katulagan 105:9).

Bayat ti panagadalmo kadagiti sumaganad a binatog, sapulem dagiti gapu a maipaidam dagiti bendision iti maysa a panawen. Makatulong kenka nga agutob dagiti saludsod iti baba.

Doktrina ken Katulagan 58:1–5; 59:23. Ania dagiti mensahe kadagitoy a bersikulo a mangpatibkeriti kabaelam a naan-anusnga agandur iti rigat? Ania dagiti bendision a naawatmo kalpasan ti panagtutuok? Apay nga iti panagkunam a sumangbay laeng ti sumagmamano a bendision kalpasan ti panagtutuok?

Doktrina ken Katulagan 58:26–33. Ania ti papel nga akmen ti panagbalin a “siaanep a makiraman iti nasayaat nga aramid” iti pannakaipatungpal dagiti kari ti Dios? Ania ti papel nga akmen ti kinatulnogmo?

Doktrina ken Katulagan 58:44. Ania ti pagnaigan ti ti “kararag ti pammati” ken ti pagayatan ti Apo para kadatayo?

Doktrina ken Katulagan 59, paulo ti benneg

Asino ni Polly Knight?

Ni Polly Knight ken ti asawana, ni Joseph Knight Sr., ti sumagmamano kadagiti immuna a namatpati iti napadtuan a takem ni Joseph Smith. Nangted da Polly ken Joseph iti napateg a suporta iti Propeta iti aramid a pannakaipatarus ti Libro ni Mormon. Pimmanaw ti pamilia Knight iti Colesville, Nueva York, tapno makiummong kadagiti Santo iti Ohio ket kalpasanna nabilinda nga umakar iti Jackson County, Missouri. Bayat ti panagdaliasatda, nangrugi a kimmapuyti salun-at ni Polly, ngem determinado a makitana ti Zion sakbay a pumusay. Nagtalinaed iti Missouri iti sumagmamano laeng nga aldaw sakbay a pimmusay (kitaen iti Saints, 1:127–28, 132–33). Naawat tiDoktrina ken Katulagan 59 iti aldaw ti ipupusayna, ken kasla maitudo dagiti bersikulo 1 ken 2 a naipangpangruna kenkuana.

Doktrina ken Katulagan 59:9–19

Mangyeg kadagiti naindagaan ken naespirituan a bendision ti panangngilin iti Sabbath.

Kalpasan ti panagkari a bendisionanna dagiti Santo iti Zion “kadagiti bilin a saan la a bassit,” inted ti Apo ti naisangsangayan a panangyunay-unay iti maysa a kangrunaan a bilin: ti bilin a mangdayaw iti “nasantuan nga aldawna” (Doktrina ken Katulagan 59:4, 9). Bayat ti panagadalmo iti Doktrina ken Katulagan 59:9–19, utobem no apay a ti panagdayaw iti Sabbath nagbalin a nakapatpateg unay kadagitoy a Santo bayat ti panangpadasda a bangonen ti Zion?

Mabalinmo met nga utoben dagiti saludsod kas kadagitoy: Us-usarek kadi ti aldaw ti Sabbath iti wagas nga inranta ti Apo? Kasano a matulongannak ti panangngilinko a nasantuan ti aldaw ti Sabbath nga agtalinaedak nga “awanan mulit iti lubong”? (bersikulo 9). Ania ti maaramidko tapno maitedko ti “panagdaydayawko iti Kangatuan”? (bersikulo 10).

Kalpasan ti panangbasam kadagiti sumaganad a bersikulo, ania ti makaparegta kenka nga agaramid ti ad-adda a panangngilinmo a nasantuan ti aldaw ti Sabbath? Genesis 2:2–3; Exodo 20:8–11; 31:13, 16; Deuteronomio 5:12 – 15; Isaias 58:13–14; Marcos 2:27; Juan 20:1–19; Dagiti Aramid 20:7.

Mabalin pay a mairanudka manipud iti maysa kadagiti adu a video wenno dadduma pay a resources maipapan iti Sabbath a masarakan iti sabbath.ChurchofJesusChrist.org.

Kitaen met iti Russell M. Nelson, “The Sabbath Is a Delight,” Ensign wenno Liahona, Mayo 2015, 129–32; Bible Dictionary, “Sabbath.”

Ti pannakiranud iti sakramento ket paset ti panangngilin iti Sabbath a nasantuan nga aldaw.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 58:26–29.Nalabit a makaaramid dagiti miembro ti pamilia iti listaan ti sumagmamano a banag “siaanep a makiraman[da].” “Naimbag nga [ar]-aramid” kadi amin dagitoy? Apay a kayatnatayo ti Apo nga agaramid iti “adu a bambanag iti bukod[tayo] a pagayatan”? Idawat iti tunggal miembro ti pamilia nga agpanunot iti no ania ti mabalinda nga aramiden itoy a lawas a “makaaramid iti adu a kinalinteg.” Kalpasanna, mabalinda nga ireport no ania ti inaramidda.

Doktina ken Katulagan 58:42–43.Ania ti marikna dagiti miembro ti pamilia no basaenda dagitoy a bersikulo? Kasano a makatulong dagitoy a bersikulo iti maysa a tao nga agkasapulan nga agbabawi?

Doktrina ken Katulagan 59:3–19.Ania ti mabalin a kayat a sawen ti “makoronaandanto … kadagiti bilin”? (bersikulo 4). Bayat ti panangbasam kadagiti bilin kadagiti bersikulo 5–19, paglilinnawagan dagiti bendision a naawatmon babaen iti panagtungpal iti tunggal maysa kadagitoy a bilin.

Mabalin met a madlawmo no kasano a dagiti balikas a kas “rag-o,” “agragragsak,” “siraragsak,” ken “naragsak” ket nausar a pangiladawan iti bilin a panangdayaw iti aldaw ti Sabbath. Kasano a maaramidmo a naragrag-o ti Sabbathmo? Nalabit a makaaramid ti pamiliam iti maysa nga ay-ayam a parisparis nga addaan kadagiti kard a mangipakita kadagiti banag a mabalinyo nga aramiden a mangngilin iti Sabbath a nasantuan nga aldaw.

Doktrina ken Katulagan 59:18–21.Ania ti maaramidtayo a “mangipudno … iti ima ti [Dios] iti amin a banag”? (bersikulo 21). Ibilangmo ti mapan magna wenno mangkita kadagiti ladawan, kitaen dagiti banag a “mangparagsak iti mata ken … mangparag-o iti puso” (bersikulo 18). Mabalinmo ti agretrato wenno agdrowing kadagiti ladawan a masarakam ket kalpasanna isaritam maipapan no kasano a maipakitam ti panagyamanmo para kadagitoy a banag. Kasano a naimatangantayon ti ima ti Dios iti biagtayo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Choose the Right,” Hymns, no. 239.

Panangpadur-as iti Panangisurotayo

Mangibinglay kadagiti nasantuan a kasuratan Ikkam dagiti miembro ti pamilia iti oras a mangibinglay kadagiti binatog ti nasantuan a kasuratan a nasarakanda a napapateg kadakuada kabayatan iti bukodda a panagadal.

Panangiladawan ni Marti Major