libtong iti panagsingising ti init

Mayo 10–16

Doktrina ken Katulagan 49–50

“Silaw Dayta Nagtaud iti Dios”

“ Isu nga umawat iti lawag, ken agtultuloy iti Dios, umawat iti ad-adu a lawag; ket rumanraniag a rumanraniag dayta a lawag agingga iti naan-anay nga aldaw” (Doktrina ken Katulagan 50:24). Utobem no kasano nga umawatka iti lawag babaen ti panagtultuloy iti Dios.

Isuratmo dagiti Impresionmo

Ti Mangisalakan ti “nasayaat a pastor[tayo]” (Doktrina ken Katulagan 50:44). Ammona a no dadduma mayaw-awan dagiti karnero ken addaan ti langalang iti adu a peggad. Ngarud siaayat Isuna a mangiturong kadatayo iti kinatalged ti doktrinana, manipud kadagiti peggad a kas iti “sinsinan nga espiritu, a nagwaras iti daga, a mangal-allilaw iti lubong” (Doktrina ken Katulagan 50:2). Ti panangsurot Kenkuana masansan a kayatna a sawen ti saanen a panamati kadagiti palso a kapanunotan wenno kannawidan. Pudno daytoy ken ni Leman Copley ken dagiti dadduma pay iti Ohio a nangawat iti naisubli nga ebanghelio ngem nagtultuloyda a namati pay laeng iti sumagmamano a pammati a saan nga umno. Iti Doktrina ken Katulagan 49, impakdaar ti Apo dagiti kinapudno a nangatur kadagiti immun-una a pammati ni Leman maipapan kadagiti topiko a kas iti panagasawa ken ti Maikadua a Yaay ti Mangisalakan. Ket idin a dagiti napasurot iti Ohio “inawat[da] … dagiti espiritu a di[da] maawatan,” insuro ti Apo ida no kasano ti panangilasin kadagiti pudno a parangarang ti Espiritu (Doktrina ken Katulagan 50:15). Naanus ti Naimbag a Pastor; ammona a dagitoy nagkauna a Santo—kas kadatayo amin—“babassit nga ubbing” a “nasken a dumakkel iti parabur ken iti pannakaammo iti kinapudno” (Doktrina ken Katulagan 50: 40).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 49:5–23

Makatulong kaniak dagiti kinapudno ti ebanghelio a makailasin kadagiti palso a pannursuro.

Sakbay ti panagkamengna iti Simbaan, miembro ni Leman Copley iti maysa a grupo ti relihion a maaw-awagan ti Nagkaykaysa a Timpuyog dagiti Mamatpati iti Maikadua a Panagparang ni Cristo, nga isu ti maaw-awagan pay a dagiti Shaker (kitaen iti “Leman Copley and the Shakers,” Revelations in Context, 117–21). Kalpasan ti maysa a pannakisarsarita ken ni Leman, pinanggep ni Joseph Smith ti pannakailawlawag manipud iti Apo maipapan iti sumagmamano a pannursuro dagiti Shaker, ket simmungbat ti Apo babaen ti paltiing iti benneg 49.

Makasarakka iti sumagmamano a pammati dagiti Shaker a nadakamat iti paulo ti benneg 49. Ibilangmo ti panangmarka wenno panangisurat kadagiti kinapudno iti bersikulo 5–23 a mangatur kadagita a pammati. Panunotem maipapan kadagiti dadduma pay a palso a pannursuro wenno kannawidan iti lubong iti agdama. Ania dagiti kinapudno ti ebanghelio ti mangsalaknib kenka kontra kadagita?

Doktrina ken Katulagan 49:15–17

Napateg ti kallaysa ti lalaki ken babai iti agnanayon a plano ti Dios.

Ania dagiti kinapudno maipapan iti kallaysa a masursurom manipud iti Doktrina ken Katulagan 49:15–17? Apay a mariknam a napateg ti kallaysa ti maysa a lalaki ken maysa a babai iti agnanayon a plano ti Nailangitan nga Ama. Nangted ni Elder David A. Bednar iti dua a gapu: “Gapu 1: dagiti nakaparsuaan dagiti espiritu a babai ken lalaki ti mangkumpleto ken mangan-anay iti tunggal maysa, ket ngarud naisangrat dagiti lallaki ken babbai a dumur-as a sangkamaysa nga agturong iti pannakaitan-ok. … Gapu 2: Babaen ti nadiosan a plano, kasapulan ti maysa a babai ken maysa a lalaki a mangisangbay kadagiti annak iti mortalidad ket mangipaay iti kasayaatan a panangipakita para iti panangpatanor ken panangisuro kadagiti annak” (“Marriage Is Essential to His Eternal Plan,” Ensign, Hunio 2006, 83–84).

Kitaen met iti Genesis 2:20–24; 1 Taga Corinto 11:11; “Ti Kaamaan: Maysa a Waragawag iti Lubong,” Ensign wenno Liahona, Mayo 2017, 145.

agassawa iti ruar ti templo

Inordenan ti Dios ti kallaysa ti lalaki ken babai.

Doktrina ken Katulagan 50

Masalaknibannak dagiti pannursuro ti Apo manipud kadagiti panangallilaw ni Satanas.

Naggagar dagiti baro a napasurot iti Ohio nga umawat kadagiti naespirituan a parangarang a naikari kadagiti nasantuan a kasuratan, ngem naggagar met ni Satanas a mangallilaw kadakuada. Insiddaawda, No agpukkaw wenno matalimudaw ti maysa a tao, impluensia kadi dayta ti Espiritu?

Ipapanmo a naidawat kenka a mangtulong kadagitoy baro a napasurot a makaawat no kasano a mailasin dagiti pudno a parangarang ti Espiritu Santo ken maliklikan ti pannakaallilaw babaen dagiti panagtulad ni Satanas. Ania dagiti pagbatayan a masarakam iti Doktrina ken Katulagan 50 a mabalinmo nga ibinglay? (kitaen nangnangruna kadagiti bersikulo 22–25, 29–34, 40–46).

Kitaen met iti 2 Timoteo 3:13–17.

Doktrina ken Katulagan 50:13–24

Maintandudo a sangkamaysa dagiti mannursuro ken agsursuro babaen ti Espiritu.

Maysa a wagas tapno mabalinmo nga adalen ti Doktrina ken Katulagan 50:13–24 ket mangidrowing iti ladawan ti maysa a mannursuro ken ti agad-adal ken, iti abay ti tunggal maysa, agaramidka iti listaan dagiti balikas ken ragup dagiti balikas manipud kadagitoy a bersikulo a mangisuro kenka ti maysa a banag maipapan iti panagsursuro ken panangisuro iti ebanghelio. Kaano a naaddaanka kadagiti padas a nangisuro kenka iti kinapateg ti Espiritu iti panangisuro ken panagsursuro? Ibilang no ania ti mabalinmo nga aramiden a mangpadur-as kadagiti panagkagumaanmo kas maysa nga agad-adal ken mannursuro iti ebanghelio?

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 49:2.Ania ti kayatna a sawen ti “tarigagayanda a maammuan ti paset laeng ti kinapudno, ngem saan nga amin”? Nalabit a mabalinmo nga ipakita ti apagparang a ladawan ket papugtuam kadagiti miembro ti pamilia no ania daytoy. Ania ti mapasamak no awatentayo ti paset laeng ti kinapudno? (kitaen iti 2 Nephi 28:29). Kasano a parabur kadatayo ti pakabuklan ti ebanghelio?

Doktrina ken Katulagan 49:26–28.Kasano a nabendisionantayo babaen iti kari ti Apo “Umayakto kadakayo ket sarunuenkayo; ket addaakto iti tengngayo”? Mabalin nga ibinglay dagiti miembro ti pamilia dagiti padasda idi nariknada a ti Apo ket “umayto [kadakuada]” wenno nariknada nga addanto Isuna “iti tengnga[da].”

Doktrina ken Katulagan 50:23–25.Mabalin nga aguummongkayo iti nasipnget a siled a mangbasa iti Doktrina ken Katulagan 50:23–25 ket in-inut a mangnayon iti ad-adu pay a lawag babaen ti panangsindi iti kandela wenno saggaysa a panagpasindi kadagiti silaw. Mabalinmo met a basaen dagitoy a bersikulo bayat ti panangbuya ti ilulutuad ti init iti agsapa. Ania ti mabalin nga aramidentayo a mamagtuloy a dumakkel ti silawtayo iti ebanghelio? No masursuro dagiti miembro ti pamilia ti maysa a baro a banag maipapan iti ebanghelio kabayatan ti lawas, allukoyem ida a mangibinglay iti daytoy iti pamilia babaen ti panagsurat ket idekket daytoy iti lampara wenno dadduma pay a silaw iti balay.

Doktrina ken Katulagan 50:40–46.Kalpasan ti panagbasa iti Doktrina ken Katulagan 50:40–46, mabalinmo nga ipakita ti ladawan ti Mangisalakan a naipakuyog iti daytoy a balabala ket agdamag kadagiti saludsod kas kadagitoy: Kasano a maiibagam nga ay-ayaten ti Mangisalakan dagiti karnero? Kasano a kas maysa a pastor kadatayo ti Mangisalakan? Ania dagiti ragup ti balikas manipud kadagiti nasantuan a kasuratan a mangyanninaw iti kapanunotan a maysa a pastor ti Mangisalakan ket datayo dagiti Karnerona?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Shine On,” Children’s Songbook, 144.

Panangpadur-as iti Panangisurotayo

Agbalin a mannakibagay. Dagiti kasayaatan a kanito iti panangisuro, nangnangruna iti pagtaengan, ket masansan a mapasamak lattan ken saan a mapakpakadaan: ti maysa a pannangan ti pamilia ket mabalin a mangparegta iti maysa a panaglilinnawag maipapan iti panagpennek iti balikas ti Dios, ken ti maysa a bagyo ket mabalin a gundaway a panagpaneknek maipapan iti nabiag a danum. No naespirituan a nakasaganaka, maikkannaka ti Dios “iti dayta mismo a kanito, no anianto ti sawem” (Doktrina ken Katulagan 100:6).

Ni Jesus nga addaan iti maysa a karnero

Nadungngo a Pastor, ni Kim Yongsung