Mayo 10–16

Doktrina ken Katulagan 49–50

“Silaw dayta Nagtaud iti Dios”

Bayat ti panagbasam ti Doktrina ken Katulagan 49–50, sapulem dagiti mensahe wenno pagbatayan a mariknam a naisangsangayan ti kinapategna kadagiti ubbing a sursuruam. Naisingasing ti sumagmamano iti daytoy a balabala.

Isuratmo dagiti Impresionmo

Yawis ti Panagbibinninglay

Ipakitam ti ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ken tulongam dagiti ubbing a mangisarita maipapan iti no kasano a ni Jesucristo ket kas maysa a naimbag a pastor.

Isuro ti Doktrina: In-inaudi nga Ubbing

Doktrina ken Katulagan 49:12–14

Masurotko ni Jesucristo.

Tulongam dagiti ubbing a makaawat a mabalinda a suroten ni Jesucristo babaen iti pammatida Kenkuana, panagbabawi, panagpabuniag, ken panangawat ti Espiritu Santo.

Dagiti Mabalin nga Aktibidad

• I-display dagiti uppat a tugot a papel ken uppat a ladawan a mangibagi iti panamati ken ni Jesucristo, panagbabawi, panagbuniag, ken panangawat ti Espiritu Santo. Basaem ti Doktrina ken Katulagan 49:12–14, ket kiddawem kadagiti ubbing nga itudoda ti umno a ladawan no madakamat ti tunggal maysa kadagiti bersikulo. Bay-am a tumulong kenka dagiti ubbing a mangikabil kadagiti tugot iti suelo iti abay dagiti ladawan, ket awisem dagiti ubbing nga agsisinublatda a magna kadagiti tugot. Ibinglaymo ti pammaneknekmo a no aramidentayo dagiti banag kadagitoy a ladawan, ket sursurotentayo ni Jesucristo.

• Usarem ti panid ti aktibidad ita a lawas tapno mangaramid kadagiti finger puppets a makatulong kadagiti ubbing a makasursuro no kasanoda a suroten ni Jesucristo babaen iti pammati, panagbabawi, panagpabuniag, ken panangawat ti sagut ti Espiritu Santo.

Doktrina ken Katulagan 50:23–25

Mabalin a lumawlawag a lumawlawag ti naespirituan a silawko.

Narigat para kadagiti ubbing a makaawat kadagiti naun-uneg a kapanunotan kas iti kinapudno ken espiritu, ngem ti panakaidiligda iti lawag, kas iti ar-aramiden ti Apo iti Doktrina ken Katulagan 50:23–25, ket mabalin a makatulong.

Dagiti Mabalin nga Aktibidad

• Mangusar iti aktibidad a mangiladawan no kasano a mabalin a lumawlawag a lumawlawag ti naespirituan a silawtayo. Mabalin a mangipakitaka kadagiti ladawan dagiti banag a mangted ti silaw (a kas iti kandila, bombilia, ken ti init) ket paurnosmo dagitoy kadagiti ubbing sigun iti idadakkel ti kinaraniagda. Wenno awisem dagiti ubbing nga agpammarang a silaw a lumawlawag babaen iti panagrukobda ken siiinayad nga agtakder ken mangunnat kadagiti takiagda. Tulongam ida nga agpanunot kadagiti naimbag a banag a maaramidda tapno mapagbalinda a nalawlawag dagiti naespirituan a silawda.

• Makipagkansion kadagiti ubbing iti maysa a kanta maipapan iti naespirituan a silawda, kas iti “Shine On” (Children’s Songbook, 144). Paneknekam no kasano a timmulong kenka ti Nailangitan nga Ama a lumawlawag ti silawmo. Ibagam kadagiti ubbing maipapan iti silaw a makitam kadakuada.

Doktrina ken Katulagan 50:41–44

Ay-ayatennak ni Jesucristo.

Ni Jesucristo ti Naimbag a Pastor. Datayo dagiti karnerona, ket ay-ayatenna ti tunggal maysa kadatayo. Ania ti makatulong kadagiti ubbing a sursuruam a makariknada ti ayatna kadakuada?

Dagiti Mabalin nga Aktibidad

• Ipakitam ti ladawan ni Jesucristo a kaduana dagiti ubbing (kitaen iti Libro ti Arte ti Ebanghelio, num. 47, 84, wenno 116), ket saludsodem dagiti ubbing no kasano nga ammoda nga ay-ayaten ni Jesus dagiti ubbing. Ibinglaymo no kasano nga ammom nga ay-ayatennaka ni Jesus ken ti tunggal maysa kadagiti ubbing iti klasem.

• Mangaramidka kadagiti papel a karnero, isuratmo kadagitoy dagiti nagan dagiti ubbing iti klase, ket ilemmengmo dagitoy iti lawlaw ti siled. I-displaymo ti ladawan ti Mangisalakan, ken basaem ti Doktrina ken Katulagan 50:41–42. Tulongam dagiti ubbing a maawatanda no ania ti isursuro dagiti bersikulo maipapan iti no kasano ti rikna ni Jesucristo maipapan kadakuada. Pagsapulem dagiti ubbing ti karnero iti lawlaw ti siled ket ikabil daytoy iti pisarra iti asideg ti ladawan ni Jesus tapno “awan kadakuada … ti mapukaw” (bersikulo 42).

Isuro ti Doktrina: In-inauna nga Ubbing

Doktrina ken Katulagan 49:12–14

Masurotko ni Jesucristo.

Kasapulannatayo amin ti Apo a mangisuro kadagiti dadduma a makaumaydanto Kenkuana babaen iti pammatida, panagbabawi, panagpabuniag, ken panangawat iti sagut ti Espiritu Santo.

Dagiti Mabalin nga Aktibidad

• Awisem dagiti ubbing nga idasig ti Doktrina ken Katulagan 49:12-14 iti insuro ni Pedro iti Dagiti Aramid 2:38 ken iti maikapat a pagannurotan ti pammati. Ania a pagpapadaan ti masapulanda? Apay a napateg dagitoy a kinapudno?

• Awisem dagiti ubbing a sagsangaparis nga agaramid ken agpammarang a maysa kadakuada ket kayatna a maammuan no kasano ti panangsurotna ken ni Jesucristo. Mabalin a mangisuro ti sabali nga ubing iti agparis nga usarenna ti Doktrina ken Katulagan 49:12–14.

Doktrina ken Katulagan 49:15–17

Ti panagasawa ti lalaki ken babai ket napateg unay iti plano ti Dios.

Mabalin a mapasangoan dagiti ubbing a sursuruam kadagiti makariro a mensahe maipapan iti panagasawa. Doktrina ken Katulagan 49:15–17 ket makatulong kadakuada a makaawat no kasano ti marikrikna ti Apo maipapan iti panagasawa.

Dagiti Mabalin nga Aktibidad

• Ilawlawagmo a dagiti Shakers ket maysa a grupo a namati a nasken a saan nga agasawa dagiti tao (kitaen ti paulo ti benneg iti Doktrina ken Katulagan 49). Awisem dagiti ubbing a mangsapul kadagiti banag nga insuro ti Apo maipapan iti panagasawa iti Doktrina ken Katulagan 49:15–17.

• Tulongam dagiti ubbing a maawatanda no ania ti kaipapanan ti ragup dagiti balikas nga “Imbilin ti Dios ti panagasawa”. Awisem dagiti ubbing nga agpaparisda nga idasig ti Doktrina ken Katulagan 49:15–17 dagiti umuna a tallo a parapo iti “Ti Kaamaan: Maysa a Waragawag iti Lubong.” Apay a napateg unay iti Nailangitan nga Ama ti panagasawa?

• Aggigiddan a kantaen ti maikadua a bersikulo ti “Families Can Be Together Forever” (Children’s Songbook, 188) wenno sabali a kanta maipapan kadagiti pamilia. Tulongam dagiti ubbing a mangpanunot kadagiti wagas a makapagsaganada nga agasawa iti templo iti maysa nga aldaw ken maaddaanda iti agnanayon a pamilia.

  

  Inordenan ti Dios ti panagkallaysa ti maysa a lalaki ken maysa a babai.

Doktrina ken Katulagan 50:40–46

Ni Jesucristo ti Naimbag a Pastor.

Linaon tiDoktrina ken Katulagan 50:40-46 dagiti ladawan a makatulong kadagiti ubbing a sursuruam a maawatan no kasano ti marikrikna ti Mangisalakan maipapan kadakuada.

Dagiti Mabalin nga Aktibidad

• Mangaramidka ti panagyasping nga ay-ayam a mausar ti ragup dagiti balikas manipud iti Doktrina ken Katulagan 50:40–46. Kas pagarigan, mabalinmo nga isurat ti “Dikayo agbuteng, babassit nga ubbing” iti maysa a kard a maiyasping iti sabali a kard nga agkuna ti “ta kukuakayo” (bersikulo 41). Basaen nga aggigiddan ti Doktrina ken Katulagan 50:40–46 . Kalpasanna paglalaokem dagiti kard iti suelo, lamisaan, wenno iti pisarra, ket kiddawem kadagiti ubbing a pagkakamangenda dagiti ragup ti balikas. Ania ti isuro kadatayo dagitoy a ragup ti balikas maipapan ken ni Jesucristo?

• Tapno matulongan dagiti ubbing a maawatanda no kasano a ti Mangisalakan ket kas maysa a naimbag a pastor, kiddawem kadakuada nga aggigiddan a mangbasa iti Doktrina ken Katulagan 50:40–46 . Kalpasanna ipabuyam ti video a “Jesus Declares the Parable of the Lost Sheep” (ChurchofJesusChrist.org), ket kiddawem kadagiti ubbing a mangsapulda iti video kadagiti makapalagip kadakuada no ania ti nabasada. Kasano nga alawennatayo ni Jesus? Kasano a makapagbalintayo a naimbag a pastor kadagiti dadduma?

Yallukoy ti Panagsursuro iti Pagtaengan

Mangisaganaka iti bassit a surat para iti tunggal ubing nga addaan kadagitoy a balikas Saludsodem kaniak maipapan iti . Bay-am nga suratan dagiti ubbing dagiti blanko iti maysa a banag a nasursuroda iti klase (tulongam ida no kasapulan) ken iyaspilim ti surat kadagiti badoda tapno mangipalagip ti panagsasarita iti pagtaengan.

Panangpadur-as iti Panangisurotayo

Ibagay dagiti aktibidad para iti tawen dagiti ubbing nga sursuruam. Bayat ti panagdakkel dagiti ubbing, ad-adu ti maitulongda iti klase. Ad-adu ti kapadasanda ken mabalin a nasaysayaat pay iti panangibinglayda kadagiti kapanunotanda. No mangisursuro kadagiti in-inaudi nga ubbing, mabalin a kasapulam nga ad-adda ti panangilawlawagmo ngem kadagiti natataenganen nga ubbing. Ikkam a kanayon dagiti ubbing iti gundaway a makiraman iti bukodda, ket kalpasanna tulongam ida no kasapulan.