Abril 26–Mayo 2

Doktrina ken Katulagan 45

“Matungpalton … dagiti Kari”

Kas maysa a mannursuro, ti naespirituan a panagsaganam ti kapatgan. Irugim babaen ti panagadal iti Doktrina ken Katulagan 45 ken panagkararag para iti pannarabay iti Espiritu Santo. Mangipaay daytoy a balabala kadagiti kapanunotan a makatulongto kenka. Mabalin a makakitaka pay kadagiti kapanunotan iti balabala ita a lawas iti Umaykayo, Sumurot Kaniak—Para kadagiti Indibidual ken Pamilia wenno iti Liahona wenno Friend.

Isuratmo dagiti Impresionmo

Yawis ti Panagbibinninglay

Kiddawen kadagiti ubbing no kayatda ti mangibinglay iti maysa a banag a nasursuroda manipud kadagiti nasantuan a kasuratan itoy a lawas. Pumili ti maysa nga ubing a mangibinglay, ken kiddawem kadagiti dadduma pay nga ubbing a mangingato kadagiti imada no nakasursuroda maipapan iti maysa nga umasping a banag.

Isuro ti Doktrina: In-inaudi nga Ubbing

Doktrina ken Katulagan 45:32

Kabaelak ti “agtakder kadagiti nasantuan a lugar.”

Insuro ti Apo iti Doktrina ken Katulagan 45:32, a makasapulto dagiti disipulona iti kinatalged babaen iti panagtakderda kadagiti nasantuan a lugar—dagiti lugar a naisangsangayan iti Apo. Kasano a matulongam dagiti ubbing a mangilasin kadagiti nasantuan a lugar iti biagda?

Dagiti Mabalin nga Aktibidad

• Mangikabil kadagiti ladawan ti maysa a pagtaengan, pasdek ti simbaan, ken maysa a templo iti nadumaduma a lugar iti intero a siled. Mangtedka kadagiti pamugtuan a mangiladladawan kadagitoy a lugar, ket awisem dagiti ubbing nga agtakderda iti asideg ti ladawan nga iladladawanmo. Basaem ti umuna a linia manipud iti Doktrina ken Katulagan 45:32. Paneknekam a mabendisionantayo no mangbubostayo iti panawen kadagiti nasantuan a lugar kas kadagiti pagtaengantayo, pasdek ti simbaantayo, ken ti templo. Kiddawem kadagiti ubbing nga agsarita maipangggep iti no ania ti riknada no addada kadagiti nasantuan a lugar a kas kadagitoy.

• Awisem dagiti ubbing a mangileppas iti panid ti aktibidad iti daytoy a lawas. Tulongam ida a mangisurat ti “Matulongak nga agbalin a nasantuan a lugar ti pagtaengak” ken “Doktrina ken Katulagan 45:32” iti drowingda. Ania ti maaramidanda a makatulong nga agbalin a nasantuan a lugar ti pagtaenganda?

• Tapno matulongan dagiti ubbing a mangpanunot no ania ti kaipapanan ti “saan a matignay,” kiddawem kadakuada nga agtakder a siiintek a saan nga agkutkuti iti maysa a minuto. Basaem ti umuna a linia manipud iti Doktrina ken Katulagan 45:32. Tulongam dagiti ubbing a makaawat a ti “agtakder kadagiti nasantuan a lugar, ken … saan a matignay” kaipapananna ti panangpili iti rumbeng iti amin a kanito, ania man a mapaspasamak. Awisem ida a “saan a matignay” nga umadayo manipud kadagiti nalinteg a pampanunot ken ar-aramid.

Doktrina ken Katulagan 45:44–45

Umayto manen ni Jesucristo.

Idi naammuan dagiti Santo ti Kirtland, Ohio ti paltiing a masarakan iti Doktrina ken Katulagan 45, a mangdakdakamat kadagiti maudi nga aldaw ken ti Maikadua a Yaay ti Mangisalakan, sirarag-o nga inawatda daytoy. Panunotem no kasano a matulongam dagiti ubbing a sirarag-o nga agsagana para iti Maikadua nga Yaay.

Dagiti Mabalin nga Aktibidad

• Tulongam dagiti ubbing nga agpanunot maipapan iti no ania ti riknada no ammoda a maysa a naisangsangayan a tao ti umay sumarungkar kadakuada, kas iti maysa a lelang wenno lelong wenno maysa a gayyem. Kasano nga agsaganada para iti isasarungkar? Ipakitam ti ladawan ti Mangisalakan, ken basaem ti maysa a paset wenno ti intero a Doktrina ken Katulagan 45:44–45. Isaritam kadagiti ubbing no ania ti mariknam maipapan iti yaay manen ti Mangisalakan, ket paibinglaymo kadakuada dagiti riknada.

• Mangipakita iti ladawan ti Maikadua a Yaay ti Mangisalakan (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia), ket kiddawen kadagiti ubbing a mangibinglay no ania ti riknada no makitada ti ladawan. Ibinglaymo ti pammaneknekmo nga umayto manen ni Jesucristo.

• Agkansion ti maysa a kanta maipapan iti Maikadua a Yaay ti Mangisalakan, kas iti “When He Comes Again” (Children’s Songbook, 82–83). Usarem ti kanta tapno pagsasaritaan dagiti wagas a pakapagsaganaantayo para iti yaay manen ni Jesus, kas iti panangaramidtayo iti pagayatan ti Dios ken pagsilnagen ti lawagtayo para kadagiti dadduma.

Isuro ti Doktrina: In-inauna nga Ubbing

Doktrina ken Katulagan 45:3–5

Ni Jesucristo ti Mangibabaet kadatayo iti Ama.

Kasano a matulongamto dagiti ubbing a mangpapigsa iti pammatida a ni Jesucristo ti Mangibabaet kadakuada? Kasano a naammuam daytoy para iti bukodmo?

Dagiti Mabalin nga Aktibidad

• Mangisurat iti sumagmamano a balikas ken ragup ti balikas a masarakan iti Doktrina ken Katulagan 45:3–5 kadagiti nagsisina a papel. Ikkam iti maysa a minuto dagiti ubbing nga agadal kadagitoy a bersikulo kadagiti nasantuan a kasuratanda, ket kalpasanna awisem ida a mangiserra kadagiti nasantuan a kasuratanda ken mangyurnos kadagiti balikas iti papel no kasano a maipakitada iti bersikulo. Segun kadagitoy a bersikulo, ania ti kuna ti Mangisalakan a mangipakaasi iti panggeptayo iti Nailangitan nga Ama?

• Tulongam dagiti ubbing a mangted iti kaipapanan ti balikas a mangibabaet, nalabit a babaen ti panangkitada iti daytoy iti maysa a diksionario. Ania ti inaramid ti Mangisalakan tapno maaramid daytoy a posible para Kenkuana nga agbalin a Mangibabaet kadatayo? Ibinglaymo dagiti riknam maipapan iti no ania ti inaramid ni Jesucristo para kadatayo, ken pangibinglayem dagiti ubbing kadagiti riknada.

Doktrina ken Katulagan 45:9

Ti ebanghelio ni Jesucristo ti silaw iti lubong.

Tulongam dagiti ubbing a sursuruam nga agpanunot kadagiti wagas a pangisaganaan ti ebanghelio iti lubong para iti Maikadua a Yaay ti Mangisalakan.

Dagiti Mabalin nga Aktibidad

• Mangipakita kadagiti ladawan iti maysa a silaw ken maysa a bandera, wenno mangidrowing kadagitoy a banag iti pisarra. Awisem dagiti ubbing a mangbasa iti Doktrina ken Katulagan 45:9 ken mangpanunot kadagiti wagas a ti ebanghelio ket maipada iti maysa a silaw, maysa a pagalagadan (wenno wagayway), ken maysa a mensahero. Mabalinmo nga ilawlawag nga idi un-unana, ti pagalagadan ket maysa a wagayway wenno maysa a bandera a naawit a naipan iti paggugubatan. Nakatulong daytoy kadagiti soldado a mangammo no sadino ti paguummongan ken no ania ti aramiden.

  

  Wagayway ti Wayawaya, ni Larry Conrad Winborg.

• Tulongam dagiti ubbing a mangyulo iti amin wenno paset ti bersikulo 9 babaen ti panangisuratda iti daytoy iti pisarra ken panangpugasda iti sumagmamano a balikas iti maminsan.

Doktrina ken Katulagan 45:37–38

Umayto manen ni Jesucristo.

Mabalin a nakabutbuteng daytoy a basaen dagiti ubbing maipapan kadagiti gubat, kinadakes, ken pannakadadael a naipadto a mapasamak sakbay ti Maikadua a Yaay ti Mangisalakan. Kasano a matulongam ida a sirarag-o a mangpasungad iti daytoy a naikari nga aldaw?

Dagiti Mabalin nga Aktibidad

• Saludsodem kadagiti ubbing no kasano nga ammoda nga asidegen ti baro a panawen. Ania dagiti pagilasinan a pasungadanda? Ilawlawagmo a kas met laeng iti kaadda dagiti pagilasinan ti baro a panawen, adda met dagiti pagilasinan iti Maikadua a Yaay. Aggigiddan a basaen ti Doktrina ken Katulagan 45:37–38. Ania ti kinuna ni Jesus a kayariganto dagiti pagilasinan iti Maikadua a Yaayna? Tapno matulongan dagiti ubbing a mangtakuat kadagiti pagilasinan a nasken a sapulentayo, dutokam ti tunggal ubing (wenno grupo dagiti ubbing) a mangbasa iti sumagmamano a bersikulo manipud iti Doktrina ken Katulagan 45 a mangiladawan kadagitoy a pagilasinan. Dagiti bersikulo 26–27, 31–33, 40–42 ket mabalin a mausar, kas pagarigan. Pangibinglayem dagiti ubbing no ania ti nasarakanda. Ania kadagitoy a pagilasinan ti matungtungpalen iti agdama?

• Iti nagsisina a papel, mangisurat ti sumagmamano a kari maipanggep kadagiti pasamak iti masakbayan a nasarakam iti panagadalmo iti benneg 45. Masarakan ti sumagmamano kadagitoy a kari kadagiti bersikulo 44–45, 51–52, 55, 58–59, 66–71. Ilistam iti pisarra dagiti bersikulo a pakasarakan kadagiti kari. Itedmo dagiti papel kadagiti ubbing, ket kiddawem kadakuada nga usarenda dagiti nasantuan a kasuratanda a mangiyasping kadagiti bersikulo iti pisarra kadagiti kari. Ilawlawagmo ti kaipapanan dagitoy a bersikulo, ket awisem dagiti ubbing a mangibinglay no ania kadagiti kari ti mangtulong kadakuada a makarikna iti gagar maipapan iti Maikadua a Yaay ti Mangisalakan.

Yallukoy ti Panagsursuro iti Pagtaengan

Awisem dagiti ubbing a mangpanunot ti maysa a banag a nasursuroda kabayatan ti klase a mabalinda nga ibinglay kadagiti pamiliada. Awisem ti sumagmamano kadakuada a mangibinglay iti klase no ania ti kayatda nga ibinglay iti pagtaengan.

Panangpadur-as iti Panangisurotayo

Tulongam dagiti ubbing a mangilasin iti Espiritu. Bayat ti panangisurom kadagiti ubbing, ibagam kadakuada no kaano a mariknam ti Espiritu Santo. Isaritam no kasano a mailasinmo ti kaaddana. Kas pagarigan, nalabit a mariknam ti kinatalna wenno kinarag-o kabayatan iti panagkansionyo ti maysa a kanta maipapan iti Mangisalakan. Ti panangilasin kadagitoy a rikna ket makatulongto kadagiti ubbing a mangammo no kaano a ti pannakariknada iti Espiritu.