“Abril 19–25. Doktrina ken Katulagan 41–44: ‘Ti Lintegko a Mangituray iti Simbaanko,’” Umaykayo, Sumurot Kaniak—Para iti Primary: Doktrina ken Katulagan 2021 (2020)
“Abril 19–25. Doktrina ken Katulagan 41–44,” Umaykayo , Sumurot Kaniak—Para iti Primary
Abril 19–25
Doktrina ken Katulagan 41–44
“Ti Lintegko a Mangituray iti Simbaanko”
Bayat ti panagsaganam ita a lawas, ikasom dagiti impresion a maawatmo manipud iti Espiritu. Ania ti mariknam a kasapulan dagiti ubbing a masursuroda manipud iti Doktrina ken Katulagan 41–44?
Isuratmo dagiti Impresionmo
Yawis ti Panagbibinninglay
Mangipasa ti bola iti maysa nga ubing, ket kiddawem ti ubing a mangibinglay ti maysa a bilin nga ammona. Itultuloy nga ipasa ti bola agingga a naaddaan ti tunggal ubing ti gundaway a mangibinglay iti maysa a banag.
Isuro ti Doktrina: In-inaudi nga Ubbing
Matungpalko dagiti linteg ti Dios.
Bayat ti panagdakkel ti Simbaan ken naguummong dagiti miembro iti Kirtland, Ohio, impaltiing ti Apo ken ni Propeta Joseph Smith ti inawaganna a “lintegna” ken binilinna dagiti Santo nga “imdengan ken denggen ken tungpalen” daytoy. Kasano a matulongam dagiti ubbing a makaawat a mabendisionantayo no managtungpaltayo?
Dagiti Mabalin nga Aktibidad
-
Basaem ti Doktrina ken Katulagan 42:2, a mangyunay-unay iti balikas a “tungpalen.” Ikkam dagiti ubbing ti sumagmamano a simple a senario a pakapagpilian ti maysa nga ubing nga agtungpal wenno agsukir iti maysa a linteg wenno turay. Kiddawen kadagiti ubbing a dumngeg a nasayaat ken umisemda no agtungpal ti tao iti estoria ken agmisuot no agsukir ti tao. Ibinglaymo dagiti bendision a naawatmo idi nagtungpalka kadagiti linteg ti Dios.
-
Agay-ayam babaen ti panangted kadagiti ubbing ti pagannurotan a surotenda. Kas pagarigan, mabalinmo nga ibaga kadakuada a nasken nga itayagda ti imada ket maawaganda a sumungbat kadagiti saludsod. Kalpasanna pagpraktisem ida nga agtungpal babaen iti panagdamag kadagiti saludsod ken panangawagmo kadagiti nangitayag ti imada. Ania dagiti linteg nga inted kadatayo ti Dios?
-
Leppasem ti panid ti aktibidad kadagiti ubbing, wenno agkansion iti maysa a kanta maipapan iti panagtungpal kadagiti linteg ti Dios, kas iti “I Want to Live the Gospel” (Children’s Songbook, 148). Isaritam kadagiti ubbing no kasano a nangyeg kenka iti ragsak ti panagtungpal kadagiti linteg ti Dios.
Ladawanklase ti PrimaryMasursurotayo dagiti bilin ti Dios iti Primary.
Agserserbiak ken ni Jesucristo no agserbiak kadagiti dadduma.
Kayat ti Apo nga aywanan dagiti Santo dagiti nakurapay ken agkasapulan. Tulongam dagiti ubbing a makaawat a no agserserbida kadagiti tao nga agkasapulan, agserserbida pay iti Mangisalakan.
Dagiti Mabalin nga Aktibidad
-
No adda ni Jesuscristo iti klaseyo ita, ania koma ti ibagayo Kenkuana? Kasano ti panangtratoyo Kenkuana? Ipakita ti ladawan ti Mangisalakan, ken ilawlawag ti pannursuro ni Jesus a no mangipakitatayo iti ayat kadagiti dadduma, ipakpakitatayo met ti ayattayo Kenkuana. Tulongam dagiti ubbing nga ulitenda ti bersikulo 38 kenka, iti sumagmamano a balikas iti maminsan.
-
Tulongam dagiti ubbing a mangpanunot kadagiti wagas a makapagserbida ken ni Jesus babaen iti panagserbi kadagiti dadduma. Mabalinda a sapulen ti sumagmamano a kapanunotan manipud iti video a “Pass It On” (ChurchofJesusChrist.org) wenno manipud kadagiti ladawan ti Mangisalakan a mangtultulong kadagiti dadduma, kas kadagiti ladawanna a mangag-agas iti masakit wenno ti kinasayaatna kadagiti ubbing (kitaen ti Libro ti Arte ti Ebanghelio, num. 42, 47). Paneknekam a no agserbida kadagiti dadduma, agserserbida pay iti Dios.
Idauluan ti Apo ti Simbaanna babaen iti propetana.
Mabalinmo a tulongan dagiti ubbing a mangliklik iti pannakaallilaw iti unos ti panagbiagda babaen iti panangisurom kadakuada, no ubbingda pay laeng, iti pagtuladan ti Apo para iti panangidaulona iti Simbaanna babaen ti sibibiag a propeta.
Dagiti Mabalin nga Aktibidad
-
Ipakitam dagiti ladawan ti nadumaduma a tao, agraman ti maysa a ladawan ti agdama a propeta. Idissom a nakapakleb dagiti ladawan, ket saggaysa a pabaliktadmo kadagiti ubbing dagiti ladawan agingga a masarakanda ti propeta. Ilawlawagmo ti pannursuro ti Apo a ti propeta laeng ti “tinudingak kadakayo a mangawat kadagiti bilin ken paltiing manipud [iti Apo] a mangidaulo ti Simbaan (Doktrina ken Katulagan 43:2).
-
Aggigiddan nga agkansion iti maysa a kanta maipapan kadagiti propeta, kas iti maudi a bersikulo ti “Follow the Prophet” (Children’s Songbook, 110–11). Ibinglaymo ti pammaneknekmo a ti propeta ti mangidaulo iti Simbaan.
Isuro ti Doktrina: In-inauna nga Ubbing
Ti disipulo ket maysa a tao nga umawat iti linteg ti Dios ken tungpalenna daytoy.
Ammo kadi dagiti ubbing a sursuruam no ania ti kaipapanan ti agbalin a disipulo ni Jesucristo? Makatulong kadakuada tiDoktrina ken Katulagan 41:5 a makaawat no kasano ti agbalin a nasaysayaat a disipulo.
Dagiti Mabalin nga Aktibidad
-
Isuratmo ti Doktrina ken Katulagan 41:5 iti maysa a papel, ibatim a blangko a nasken a pangisuratan iti balikas a “disipulo.” Kiddawem dagiti ubbing a mangsurat kadagiti blangko, a mangsapsapul iti Doktrina ken Katulagan 41:5 no kasapulanda ti tulong. Ania ti kaipapanan ti agbalin a disipulo ni Jesucristo? Ibinglaymo no kasano nga ikagkagumaanam nga agbalin a nasaysayaat a disipulo ni Cristo.
-
Kalpasan ti panangilawlawag iti Doktrina ken Katulagan 41:5, kiddawen kadagiti ubbing a mangpanunot maipapan kadagiti linteg nga inawattayo manipud iti Apo. Awisem ida nga agsisinnublat iti panangyakem nga agtungtungpal iti maysa kadagita a linteg idinto a padpadasen a pudtuan dagiti dadduma pay iti klase no ania daytoy.
-
Ikkam ti tunggal miembro ti klase iti akikid a papel, ket kiddawem kadakuada a mangisurat ditoy ti maysa a wagas a pakapagbalinanda a nasaysayaat a disipulo. Awisem ti tunggal ubing nga ibinglayna no ania ti insuratna, ket kalpasanna pagtitiponen nga i-tape dagiti akikid a papel tapno mangaramid iti sinan-kawar a papel.
Doktrina ken Katulagan 42:61, 68
Ipaltiing ti Dios ti sirib kadagiti dumawat.
Agdamag dagiti ubbing iti adu a saludsod bayat ti panagdur-asda iti pannakaammoda maipapan iti lubong ken ti ebanghelio. Kasano a mausarmo ti Doktrina ken Katulagan 42:61, 68 tapno makatulong a maammuanda no kasano ti pananggun-od ti sirib manipud iti Apo?
Dagiti Mabalin nga Aktibidad
-
Kiddawem kadagiti ubbing nga ibinglayda kenka ti maysa a banag a mangtulong kadakuada a makarikna iti kappia ken maysa a banag a mangtulong kadakuada a makarikna iti rag-o. Awisem dagiti ubbing a basaenda ti Doktrina ken Katulagan 42:61 a mangsapsapul kadagiti balikas a “mannakikappia” ken “rag-o.” Tulongam dagiti ubbing a mangpanunot kadagiti kinapudno nga inpaltiing ti Dios a mangted kadakuada ti kapia ken rag-o.
-
Basaem ti Doktrina ken Katulagan 42:61, 68 kadagiti ubbing, a mangyunay-unay iti ragup dagiti balikas a “paltiing iti kada paltiing, pagsiriban iti kada pagsiriban.” Ilawlawag a saan nga ipaltiing ti Dios ti amin a banag iti mammaminsan, ketdi, mangted kadatayo iti saggabassit iti maminsan. Ipakita no kasano nga in-inut a mabukel ti puzzle, wenno usarem ti maysa a banag a kasta met tapno mangtulong kadagiti ubbing a makaawat iti daytoy a pagbatayan. Ibinglaymo ti maysa a padas idi nakaawatka ti paltiing a nangbendision kenka.
Ti propeta laeng ti mabalin nga umawat iti paltiing para iti intero a Simbaan.
Kabayatan ti panagdakkel dagiti ubbing, mabalin a makaam-ammoda kadagiti tao a mangyaw-awan kadakuada. Kasano a matulongam dagiti ubbing nga agtalek iti pagtuladan ti Dios iti panangiturongna kadagiti annakna babaen ti napili a propetana?
Dagiti Mabalin nga Aktibidad
-
Awisem dagiti ubbing a mangipapan a nagtakder ti maysa a tao ti maysa a miting ti panagpaneknek ket ibagana iti ward a nakaawat isuna ti paltiing para iti Simbaan (kas pagarigan, nasken a saantayon nga uminum iti gatas wenno nasken a rugianantayo nga angayen dagiti miting ti sakramento kadagiti aldaw ti Martes imbes a kadagiti aldaw ti Domingo). Kunana a nasken a dumngegtayo iti isaona imbes a ti propeta. Ania koma ti madi iti dayta? Tulongam dagiti ubbing a mangsukisok iti Doktrina ken Katulagan 43:1–7 tapno ammuen no kasano a mangted ti Apo kadagiti bilin iti Simbaanna.
-
Ipakitam ti ladawan ti maysa a sibibiag a propeta, ken awisem dagiti ubbing nga ibinglayda ti maysa a banag nga insurona itay nabiit pay. No kasapulanda ti tulong, mangipabuya iti maysa a videoclip wenno mangbasa ti maysa a binatog manipud iti mensahe iti kallabes a sapasap a komperensia. Apay a maysa a bendision ti maadaan iti sibibiag a propeta itatta?
Yallukoy ti Panagsursuro iti Pagtaengan
Awisem dagiti ubbing nga agpili ti maysa a linteg wenno bilin a mariknada a nasken nga ipokusda a tungpalen itoy a lawas. Allukoyem ida a mangibinglay iti maysa a panggep a tun-oyenda kadagiti pamiliada.
Panangpadur-as iti Panangisurotayo
Suruam dagiti ubbing a mangisurat kadagiti impresion. Masursuro uray dagiti ubbing nga agsurat kadagiti naespirituan nga impresion. Mabalin nga isurat dagiti impresionda babaen iti panangmarka kadagiti nasantuan a kasuratan, panangidrowing kadagiti ladawan, wenno panagaramid kadagiti simple a maisurat iti journal.