Umakar dagiti Santo iti Kirtland, ni Sam Lawlor

Abril 12–18

Doktrina ken Katulagan 37–40

“No Saankayo nga Agkaykaysa Saankayo a Kukua”

Ammo ti Nailangitan nga Ama no ania ti kasapulan dagiti ubbing iti klasem a masursuro. Agpaiwanwanka iti Espiritu bayat ti panangpilim kadagiti pagbatayan ken aktibidad a mangtulong kenka a mangisuro kadakuada.

Isuratmo dagiti Impresionmo

Yawis ti Panagbibinninglay

Ipasam ti maysa a kopia dagiti nasantuan a kasuratan. Bayat ti panangiggem ti maysa nga ubing iti nasantuan a kasuratan, paibinglaymo iti dayta nga ubing ti maysa a banag a malagipna manipud iti leksion iti napalabas a lawas wenno manipud ti panagbasa kadagiti nasantuan a kasuratan iti pagtaengan itoy a lawas.

Isuro ti Doktrina: In-inaudi nga Ubbing

Doktrina ken Katulagan 38:24–27

Maayatko dagiti dadduma.

Kayat ti Apo nga aguummong dagiti Santo iti Ohio ken ayatenda ti tunggal maysa a kas agkakapada. Kasano a matulongam dagiti ubbing a makarikna iti panagkaykaysa ken panagayat kadagiti dadduma?

Dagiti Mabalin nga Aktibidad

• Usarem ti panid ti aktibidad tapno maipakitam kadagiti ubbing nga idi kabarbaro pay laeng ti Simbaan, kiniddaw ti Apo kadagiti miembro nga aggigiddanda nga ummakar iti Ohio (kitaen met ti mapa iti balbala itoy a lawas iti Umaykayo, Sumurot Kaniak—Para kadagiti Indibidual ken Pamilia). Kayat ti Dios a masursuroda no kasano ti agayat ken makipulapol iti tunggal maysa. Kiddawem kadagiti ubbing para kadagiti kapanunotan maipapan iti no kasano a maipakitada ti panagayat iti tunggal maysa.

• Ibasam ti Doktrina ken Katulagan 38:25 kadagiti ubbing, ket isaritam kadakuada ti bukodmo a balikas no ania ti kaipapanan ti ipategmo ti kabsatmo a lallaki wenno babai kas iti bagim (kitaen met iti Mateo 7:12). Tulongam ida a mangulit iti nasantuan a kasuratan, a mangsukat iti “kabsatna a lallaki” iti nagan ti tunggal maysa.

• Agkansion iti maysa a kanta maipapan iti panagayat ken panangibilang kadagiti dadduma kas iti “I’ll Walk with You” wenno “We Are Different” (Children’s Songbook, 140–41, 263). Bayat ti panagkantayo, paiggamam kadagiti ubbing dagiti ladawan dagiti ubbing iti nadumaduma a lugar iti lubong.

• Tulongam dagiti ubbing a mangyakem ti maysa a buya idi dumar-ay ti maysa a kabarbaro a tao iti klaseda iti Primary. Kasano a matulongantayo a maiparikna kaniana ti nabara nga isasangbay? Mabalin a maragsakan dagiti ubbing nga aramiden daytoy a panagyakem nga usaren ti ramay a sinan-puppet wenno dagiti nagetteng a ladawan.

Doktrina ken Katulagan 38:30

No nakasaganaak, saanak nga agbuteng.

Maysa a wagas a pakatulongan kadatayo ti Nailangitan nga Ama a saantayo nga agbuteng ket ti panangisuro kadatayo nga agsagana.

Dagiti Mabalin nga Aktibidad

• Uliten iti sumagmamano a daras ti ragup dagiti balikas a “No nakasaganakayo saankayo nga agbuteng” (bersikulo 30). Kalpasan iti sumagmamano a daras, mangibati iti maysa a balikas, ket paisaom kadagiti ubbing ti awan a balikas. Isaritam kadagiti ubbing maipapan iti maysa a panawen idi nakasaganaka para iti maysa a banag ket ti panagbalin a nakasagana ket nakatulong kenka a saan nga agbuteng.

• Tulongam dagiti ubbing a mangpanunot kadagiti banag a kayat ti Nalilangitan nga Ama nga isaganaanda, kas iti panagbuniag wenno panagapan iti templo. Usarem dagiti ladawan wenno banag tapno mangted kadakuada iti kapanunotan. Isaritam maipapan kadagiti wagas a pakapagsaganaanda, ket pagdrowingem ida kadagiti ladawan ti bagida nga agsagsagana wenno makiramraman kadagiti banag a panunotenda.

Doktrina ken Katulagan 39:6, 23

Naawatko ti sagut ti Espiritu Santo idi nakumpirmaanak.

Ania ti kasapulan dagiti ubbing iti klasem tapno maawatanda ti maipapan iti panakaawat ti sagut ti Espiritu Santo? Mabalin a makatulong ti panangiturong ti Apo ken ni James Covel maipapan iti daytoy nga ordinansa.

Dagiti Mabalin nga Aktibidad

• Ipakitam ti ladawan ti maysa a tao a mabunbuniagan ken makumkumpirmaan (kitaen iti Libro ti Arte ti Ebanghelio, num. 104, 105). Basaem ti Doktrina ken Katulagan 39:23, ket kiddawem kadagiti ubbing nga itudoda ti umno a ladawan no mangngegda a basaem ti maipapan iti panagbuniag ken panagkumpirma.

• Aggigiddan a basaenyo ti Doktrina ken Katulagan 39:6, ket ipakitam kadagiti ubbing dagiti ladawan ken banag a mangibagi kadagiti wagas a pakabendisionnantayo ti Espiritu Santo (agraman dagiti nadakamat iti bersikulo 6). Pagsisinnublatem dagiti ubbing a mangiggem kadagiti ladawan wenno banag, ket bayat ti panangar-aramidda iti daytoy, paneknekam ti maipapan iti no kasano a nabendisionanka ti Espiritu Santo kadagitoy a wagas. Tulongam dagiti ubbing a mangilasin kadagiti panawen idi mabalin a nariknada ti impluensia ti Espiritu.

Isuro ti Doktrina: In-inauna nga Ubbing

Doktrina ken Katulagan 37; 38:31–33

Ummongennatayo iti Dios tapno bendisionannatayo.

Ti panaguummongda iti Ohio ket dakkel a sakripisio iti kaaduan kadagiti nagkauna a Santo. Ita saantayo a nabilin nga aguummong iti maysa a lugar, ngem aguummongtayo kas pamilia, ward, ken stake.

Dagiti Mabalin nga Aktibidad

• Ipakita kadagiti ubbing ti panid ti aktibidad itoy a lawas wenno ti mapa iti balabala iti daytoy a lawas iti Umaykayo, Sumurot Kaniak—Para dagiti Indibidual ken Pamilia. Aggigiddan a basaen ti Doktrina ken Katulagan 37, ket tulongam dagiti ubbing a mangsarak iti mapa dagiti lugar a nadakamat iti paltiing. Ania ti imbilin ti Apo nga aramiden dagiti Santo?

• Mangpili iti maysa a kangrunaan a ragup dagiti balikas wenno binatog [sentence] manipud iti Doktrina ken Katulagan 38:31–33 a mariknam a mangiladawan no apay a kayat ti Apo nga aguummong dagiti taona. Iwaras dagiti balikas manipud iti binatog iti aglawlaw ti siled, ket awisem dagiti ubbing nga ummongenda dagitoy, ikabil ida iti umisu nga urnos, ken biroken no sadino a makita ti binatog kadagiti bersikulo. Apay a kayat ti Apo nga aguummongtayo?

Doktrina ken Katulagan 38:24–27

Kayat ti Apo nga agkaykaysa dagiti taona.

Tapno maisagana dagiti Santo nga aguummong, insuro ti Apo kadakuada a tratuen ti tunggal maysa a kas agkakapada ket “agkaykaysa” (bersikulo 27). Kasano a mabendisionan dagiti ubbing a sursuruam iti daytoy a panangiturong?

Dagiti Mabalin nga Aktibidad

• Aggigiddan a basaenyo ti Doktrina ken Katulagan 38: 24–27, ket awisem dagiti ubbing nga isuratda dagiti balikas manipud kadagitoy a bersikulo a mariknada a napateg, agraman dagiti balikas a maulit-ulit. Apay ngata nga impaulit-ulit ti Apo dagitoy a balikas? Paibinglaymo kadakuada ti insuratda, ken paglilinnawagan no ania ti nasursuroda manipud kadagita a balikas.

• Tulongam dagiti ubbing a mangpanunot kadagiti situasion a pakariknaan ti maysa a tao a mailaksid, kas iti panagbalin a baro a miembro ti Simbaan wenno yaaakar iti baro a sangakaarrubaan wenno eskuelaan. Ania ti isingasing ti Doktrina ken Katulagan 38:24–27 maipapan iti no kasano ti panagtratotayo ti maysa a tao kadagitoy a kasasaad? Agakem ti sumagmamano a posible a kasasaad.

• Ibinglay ti maysa nga adalen a banag [object lesson] a mangiladawan no kasano a dagiti banag ket mabalin a mapagtitipon wenno mapagkaykaysa , kas kadagiti pedaso ti lupot a makaaramid ti tugpa-tugpa a pagtakup wenno dagiti rekado a makaaramid ti nagtimbukel a tinapay. Ania ti isuro kadatayo dagitoy pagarigan maipapan iti panagkaykaysa a kas tao ti Dios?

Doktrina ken Katulagan 39–40

Makapagtungpalak kadagiti inkarik.

Nagkari ni James Covel a tungpalenna ti Apo, ngem dina tinungpal ti inkarina. Makatulong kadagiti ubbing daytoy a padas tapno malaglagipda ti kinapateg ti panagbalin a managtungpal.

Dagiti Mabalin nga Aktibidad

• Awisem dagiti ubbing a basaenda dagiti paulo ti benneg iti Doktrina ken Katulagan 39 ken 40, ket kiddawem kadakuada a gupgopenda dagiti balikas wenno drowing no ania ti nasursuroda maipapan ken ni James Covel.

• Mangisurat kadagiti saludsod iti pisarra a makatulongto kadagiti ubbing a makaawat iti benneg 40, kas iti Ania ti katulagan nga aramiden ni James Covel? Apay a dina tinungpal ti katulaganna? Awisem dagiti ubbing a mangsapul kadagiti sungbat iti benneg 40.

• Tulongam dagiti ubbing a manglagip kadagiti kari nga inaramidda idi nabuniaganda (kitaen iti Mosiah 18:8–10). Tulongam dagiti ubbing a mangilista iti sumagmamano kadagiti panagbuteng wenno “pannagessem iti lubong” (Doktrina ken Katulagan 40:2) a mabalin a manglapped iti maysa a tao a mangtungpal kadagitoy a kari. Awisem dagiti ubbing a mangisurat ti bassit a mensahe para iti bagbagida a kas pammalagip a ti panagtungpal kadagiti bilin ti Nailangitan nga Ama ket makatulong kadakuada a mangparmek iti panagbuteng wenno pagesman iti lubong. Allukoyem ida a mangikabil iti pammalagipda iti maysa a lugar a makitada daytoy a masansan.

Yallukoy ti Panagsursuro iti Pagtaengan

Awisem dagiti ubbing a mangilawlawag kadagiti nagannakda wenno dadduma pay a miembro ti pamiliada no kasano nga ad-adda nga agkaykaysada kas maysa a pamilia.

Panangpadur-as iti Panangisurotayo

Mangyulo iti maysa a nasantuan a kasuratan. Ibilangmo ti panangpili iti maysa a binatog iti nasantuan a kasuratan a panagkunam ket makatulong a mangpapigsa iti pammaneknek dagiti ubbing, ken tulongam ida a mangyulo iti daytoy. Makayulo dagiti in-inaudi nga ubbing iti sangkapaset ti nasantuan a kasuratan wenno gagangay a ragup dagiti balikas.