Marso 29–Abril 4

Paskua ti Panagungar

“Siak ti Nagbiag, Siak ti Napapatay”

Ti klase iti Primary iti Paskua ti Panagungar ket maysa a napintas a gundaway a pakatulongan kadagiti ubbing a mapapigsa ti pammatida ken ni Jesucristo ken ti Pannubotna. Dawatem ti pannarabay ti Apo no kasano nga aramiden daytoy. Mabalin a masarakam dagiti sumagmamano a makatulong a kapanunotan iti daytoy a balabala.

Isuratmo dagiti Impresionmo

Yawis ti Panagbibinninglay

Paibinglaymo kadagiti ubbing kenka no ania ti ammoda maipapan iti gapu ti panagrambaktayo iti Paskua ti Panagungar. Saludsodem kadakuada no ania ti ar-aramiden dagiti pamiliada a magrambak iti Panagungar ni Jesucristo iti panawen ti Paskua ti Panagungar. Wenno paibinglay kadakuada no ania ti masursuroda maipapan ken ni Jesucristo iti pagtaengan ken kadagiti nasantuan a kasuratan.

Isuro ti Doktrina: In-inaudi nga Ubbing

Doktrina ken Katulagan 138:11–17

Gapu ken ni Jesucristo, agungarakto.

Bayat ti panangisurom kadagiti ubbing maipapan iti Panagungar ni Jesucristo, Doktrina ken Katulagan 138:11–17 ket makatulong kenka a mangilawlawag no ania ti kaipapanan ti agungar. Makatulong met dagitoy a bersikulo a mangpatibker iti pammatida nga agungardanto iti maysa nga aldaw.

Dagiti Mabalin nga Aktibidad

• Mangipakita kadagiti ladawan ti ipapatay, pannakaitanem, ken Panagungar ti Mangisalakan (kitaen iti Libro ti Arte ti Ebanghelio, num. 57, 58, ken 59). Saludsodem kadagiti ubbing no ania ti ammoda maipapan kadagitoy a pasamak. Paneknekam a natay ni Jesus para kadatayo ken nagungar manipud iti patay tapno makapagungartayo amin kalpasan ti ipapataytayo.

• Mangpanunot ti maysa a banag nga adalen [object lesson] a makatulong kadagiti ubbing a maawatanda no ania ti mapasamak no mataytayo (agsinanto dagiti espiritu ken bagitayo) ket inton angungartayo (agtiponto dagiti espiritu ken bagitayo). Kas pagarigan, ania ti mapasamak no ikkatentayo ti bateria manipud iti maysa a flashlight wenno ti pagyanan ti tinta manipud iti pluma? Ania ti mapasamak no agtitipon dagitoy a banag?

• Ibasam kadagiti ubbing manipud iti Doktrina ken Katulagan 138:17: “Agtiponto manen ti espiritu ken ti bagida ket saanton nga agsina pay, tapno maawatda ti pakabuklan ti rag-o.” Apay nga agyamantayo para kadagiti bagitayo? Ibinglaymo ti rag-o a mariknam nga ammom nga agungartayonto amin ken maaddaantayo manen iti bagi.

• Aggigiddan nga agkansion ti maysa a kanta maipapan iti Panagungar kas iti “Did Jesus Really Live Again?” wenno “Jesus Has Risen” (Children’s Songbook, 64, 70). Ikkam dagiti ubbing kadagiti ladawan a mangibagi kadagiti balikas wenno ragup dagiti balikas iti kanta (kas pagarigan, kitaen iti Libro ti Arte ti Ebanghelio, num. 59, 60, ken 61), ket awisem ida nga itag-ayda dagiti ladawan no kantaenda dagita a balikas.

Doktrina ken Katulagan 76:11–24; 110:1–7; Joseph Smith—Pakasaritaan 1:14–17

Nakita ni Propeta Joseph Smith ni Jesucristo.

Maysa a wagas tapno makatulong kadagiti ubbing a mangpapigsa iti pammatida iti Mangisalakan ket ti panangibinglay kadakuada iti pammaneknek ni Propeta Joseph Smith: “A sibibiag! Ta nakitami, uray iti makanawan ti Dios” (Doktrina ken Katulagan 76:22–23).

Dagiti Mabalin nga Aktibidad

• Ipakita kadagiti ubbing ti ladawan ti Umuna a Parmata ni Joseph Smith (kitaen iti Enero 4–10 a balabala iti Umaykayo, Sumurot Kaniak—Para kadagiti Indibidual ken Pamilia. Awisem dagiti ubbing nga isaritada kenka no ania ti mapaspasamak iti ladawan, ket kiddawem kadakuada a sarakenda ni Jesucristo. Kiddawem kadagiti ubbing no ammoda ti dadduma pay a panawen a nakakitaan ni Joseph Smith iti Mangisalakan. Iti bukkodmo a balikas, isaritam maipapan kadagiti padas a nailadawan iti Doktrina ken Katulagan 76:11–24; 110:1–7. Isaritam kadagiti ubbing no kasano a pinapigsa dagitoy a nasantuan a kasuratan ti pammatim ken ni Jesucristo.

• Bayat ti panagkolor dagiti ubbing iti panid ti aktibidad iti daytoy a lawas, ibasam kadakuada dagiti nasantuan a kasuratan a pagibasaran ditoy. Ilawlawag dagiti detalye kadagiti ladawan a nailawlawag kadagiti bersikulo. Paneknekam kadagiti ubbing a nakita ti Propeta Joseph Smith ni Jesucristo, daytoy ti maysa a gapu nga ammotayo a sibibiag ni Jesus.

Isuro ti Doktrina: In-inauna nga Ubbing

Doktrina ken Katulagan 76:11–24; 110:1–10; Joseph Smith—Pakasaritaan 1:14–17

Nagpaneknek ni Propeta Joseph Smith a sibibiag ni Jesucristo.

Ti kapatgan a mision ti maysa a propeta ket ti agpaneknek maipapan ken ni Jesucristo. Tulongam dagiti ubbing a mangpapigsa iti pammatida iti Mangisalakan babaen ti panagsursuroda manipud iti pammaneknek ni Propeta Joseph Smith maipapan Kenkuana.

Dagiti Mabalin nga Aktibidad

• Iladawan dagiti sumaganad a binatog dagiti panawen idi nagpakita ni Jesucristo ken ni Joseph Smith: Doktrina ken Katulagan 76:11–24; 110:1–10; Joseph Smith—Pakasaritaan 1:14–17. Iti pisarra, ilista dagiti sumagmamano a kinapudno a masursurotayo maipapan iti Mangisalakan manipud kadagitoy a bersikulo. Awisen dagiti ubbing a mangilasin no ania kadagitoy a bersikulo ti mangisuro kadagiti kinapudno a nailista iti pisarra. Ania pay ti masursurotayo maipapan ken ni Jesucristo manipud kadagiti padas ni Joseph Smith?

• Iti daytoy a panid iti aktibidad itoy a lawas, tulongam dagiti ubbing a mangiparis kadagiti ladawan kadagiti bersikulo iti nasantuan a kasuratan. Apay a maysa a bendision a maammuan a nakita ni Joseph Smith ti nagungaren a Mangisalakan? Ibinglaymo ti pammaneknekmo a sibibiag ni Jesucristo ken maysa a propeta ni Joseph Smith.

Doktrina ken Katulagan 63:49; 88:14–17, 27; 138:11, 14–17

Gapu ken ni Jesucristo, agungarakto.

Kasano a matulongam dagiti ubbing a mapatibker ti panagyamanda iti sagut ti panagungar ti Mangisakan para kadatayo amin?

Dagiti Mabalin nga Aktibidad

• Idutokmo iti tunggal ubing ti maysa kadagiti sumaganad a binatog ti nasantuan a kasuratan: Doktrina ken Katulagan 63:49; 88:14–17, 27; 138:11, 14–17. Awisem dagiti ubbing nga agsukisok kadagiti bersikuloda tapno sapulen ti ragup dagiti balikas nga iti panagriknada ket makaala ti atension a mensahe ti Paskua ti Panagungar. Paibinglay kadakuada dagiti kapanunotanda. No ipalubos ti oras, pagaramidem ida kadagiti kard a mangipakita kadagiti ragup dagiti balikas a nasarakanda a mabalinda nga ited kadagiti miembro ti pamilia wenno gagayyem.

• Kiddawen kadagiti ubbing no kasano nga ilawlawagda iti maysa nga ub-ubing a kabsat wenno gayyem no ania ti kaipapanan ti mapagungar. Para kadagiti kapanunotan, aggigiddan a basaen ti Doktrina ken Katulagan 138:14–17, ket ibilang dagiti saludsod a kas kadagitoy: Ania ti mapasamak kadagiti espiritu ken bagitayo no mataytayo? Ania ti mapasamak no agungartayo? Kasano nga inaramid ni Jesucristo a mapasamak ti panagungar?

• Ipabuyam ti video “Because He Lives” (ChurchofJesusChrist.org), ken paibinglaymo kadagiti ubbing no kasano ti riknada maipapan iti no ania ti inaramid ti Mangisalakan kadakuada.

  

  Apo ti Kararag, ni Yongsung Kim

Doktrina ken Katulagan 18:10–13; 19:16–19; 45:3–5; 58:42–43

Babaen ken ni Jesucristo, mapakawanak kadagiti basbasolko.

Kas nayon iti panangisalakanna kadatayo manipud iti ipapatay a pisikal, nangipaay ni Jesucristo iti wagas tapno maisalakannatayo manipud iti ipapatay nga espiritual—iti sabali a pannao, tapno mapakawan kadagiti basbasoltayo ken makasubli iti sidong ti Dios.

Dagiti Mabalin nga Aktibidad

• Isurat iti pisarra dagiti dua a paulo a kas met kadagitoy: No ania ti inaramid ti Mangisalakan ken Ania ti nasken nga aramidek. Awisem ti tunggal ubing a mangsukisok iti maysa kadagiti sumaganad a binatog tapno mangsapul iti maysa a banag a mainaig iti baba dagitoy a paulo: Doktrina ken Katulagan 18:10–13; 19:16–19; 45:3–5; 58:42–43. Ibinglay ti rag-o ken panagyamanmo iti inaramid ti Mangisalakan para kadatayo.

• Tulongam dagiti ubbing a makasursuro iti maikatlo a Pagannurotan ti Pammati. Mabalin a matulongam ida a mangyulo iti daytoy babaen ti panangipakita kadagiti ladawan a mainaig kadagiti kangrunaan a ragup dagiti balikas.

• Ipabuya ti video “The Shiny Bicycle” (ChurchofJesusChrist.org), wenno isalaysay iti bukodmo nga estoria maipapan iti maysa nga ubing a nagaramid iti biddut a pili ket nagbabawi. Tulongam dagiti ubbing a mangilawlawag no ania ti inaramid ti ubing iti estoria tapno makaawat iti pammakawan. Kasano nga inaramid a posible ti Mangisalakan a mapakawantayo?

Yallukoy ti Panagsursuro iti Pagtaengan

Tulongam dagiti ubbing a mangpanunot iti maysa a banag a mabalinda nga aramiden tapno maibagada kadagiti dadduma a tao—nangruna kadagiti miembro ti pamiliada—no ania ti inaramid ni Jesucristo para kadatayo. Iti sumaruno a panagkikitayo, kiddawem kadakuada nga ibinglayda kenka no ania ti inaramidda.

Panangpadur-as iti Panangisurotayo

Mangted iti pagsayaatan kadagiti ubbing ti panangulit-ulit. Dika agkedked a mangulit kadagiti aktibidad iti mamin-adu a gundaway, nangruna kadagiti in-inaudi nga ubbing. Ti panangulit-ulit ket makatulongto kadagiti ubbing a manglagip no ania dagiti nasursuroda.