dagiti nagkauna a misionario ti Simbaan

Abril 5–11

Doktrina ken Katulagan 30–36

“Naawaganka a Mangikasaba iti Ebangheliok”

Bayat iti nainkararagan a panagadalmo ti Doktrina ken Katulagan 30–36 a sipapanunot kadagiti ubbing iti klasem, mabalin a mangted kenka ti Espiritu kadagiti kapanunotan maipapan iti no kasano ti panangisurom kadakuada. Mangsarak kadagiti mainayon a kapanunotan iti daytoy a balabala.

Isuratmo dagiti Impresionmo

icon iti panagbibinninglay

Yawis ti Panagbibinninglay

Itag-aymo ti maysa a ladawan dagiti misionario, ket kiddawem kadagiti ubbing nga ibinglayda ti ammoda maipapan iti aramid ti misionario.

icon iti panangisuro

Isuro ti Doktrina: In-inaudi nga Ubbing

Doktrina ken Katulagan 33:2–3, 6–10

Maibinglayko ti ebanghelio ni Jesucristo.

Makaibinglay uray pay dagiti babassit nga ubbing iti pammaneknekda iti ebanghelio ni Jesucristo. Kasano a mausarmo dagitoy a bersikulo tapno maparegtam ida a mangaramid iti daytoy?

Dagiti Mabalin nga Aktibidad

• Awisem dagiti ubbing a mangpadas a mangisao iti ragup dagiti balikas kas iti “Ay-ayatennakayo ti Dios” a nakaserra dagiti ngiwatda. Ilawlawag a saantayo makaisuro kadagiti tao maipapan iti ebanghelio no ditayo ungapen ti ngiwattayo. Basaem ti Doktrina ken Katulagan 33:8–10, ket awisem dagiti ubbing nga ungapenda dagiti ngiwatda tunggal kanito a mangngegda ti ragup dagiti balikas nga “ungapenyo dagiti ngiwatyo.” Apay a kayat ti Nailangatan nga Ama nga ungapentayo dagiti ngiwattayo ket ibinglay ti ebanghelio kadagiti dadduma?

• Yarasaas ti maysa a banag a siuulimek unay kadagiti ubbing, kas iti “Maysa a Propeta ti Dios ni Joseph Smith,” ket kiddawen kadakuada nga ulitenda no ania ti insaom. Kalpasanna isao ti isu met laeng a ragup dagiti balikas iti napigpigsa a timek. Basaen ti Doktrina ken Katulagan 33:2. Tulongam dagiti ubbing a makaawat iti kaipapanan ti “[panangpa]pigsa iti timek[tayo]” ket saan nga agbuteng a mangibaga kadagiti dadduma maipapan ken ni Jesucristo, ti Libro ni Mormon, ken dagiti dadduma pay a kinapudno ti ebanghelio.

• Mangipan kadagiti papel a munieka wenno ladawan dagiti tao iti aglawlaw ti siled. Awisem dagiti ubbing a mangsarak kadagiti tao ken pagtitiponen dagitoy iti sango ti siled. Basaem ti Doktrina ken Katulagan 33:6, ket ilawlawag no ania ti kaipapanan ti Apo ket “ummongen[nanto] dagiti pili[na].” Paneknekam a makatulongtayo a mangummong kadagiti tao iti Apo bayat ti panangibinglaytayo iti ebanghelio.

• Aggigiddan nga agkansion iti maysa a kanta maipapan iti panangibinglay iti ebanghelio kas iti “I Want to Be a Missionary Now” (Children’s Songbook, 168). Tulongam dagiti ubbing a mangpanunot kadagiti wagas a pakatulonganda kadagiti dadduma a tao nga agsursuro maipapan ken ni Jesucristo.

Doktrina ken Katulagan 33:12–17

Mabangonko ti biagko iti ebanghelio ni Jesucristo.

Ti balakad nga inted ti Apo kada Ezra Thayer ken Northrop Sweet ket makatulong kadagiti ubbing a sursuruam a mangbangon iti biagda iti ebanghelio ni Jesucristo.

Dagiti Mabalin nga Aktibidad

• Ipakitam kadagiti ubbing ti maysa a ladawan ti pundasion ti maysa a pasdek, ket kiddawem kadakuada a mangiladawan iti daytoy. Apay a kasapulan ti maysa a pasdek ti napigsa, solido a pundasion? Basaem kadagiti ubbing ti Doktrina ken Katulagan 33:12–13, ken ilawlawag a kayat ti Apo a bangonentayo ti biagtayo iti ebangheliona. Tulongam dagiti ubbing a mangpanunot kadagiti sumagmamano a wagas a pakabangonanda iti biagda iti ebanghelio ni Jesucristo.

• Ikkam dagiti ubbing iti sumagmamano a banag a mabalinda nga usaren a mangbangon iti torre, kas kadagiti bloke wenno plastik a baso. Ikkan iti label ti tunggal banag nga addaan iti ladawan a mangibagi kadagiti banag a kinuna ti Apo iti Doktrina ken Katulagan 33:14–17. Awisem dagiti ubbing a mangbangon iti maysa a torre bayat iti pannakisaritam kadakuada maipapan no kasano a makatulong kadatayo dagitoy a banag a mangbangon iti biagtayo iti ebanghelio ni Jesucristo.

icon iti panangisuro

Isuro ti Doktrina: In-inauna nga Ubbing

Doktrina ken Katulagan 30:1–2

Nasken nga ad-adda nga ipokusko dagiti banag ti Dios imbes a dagiti banag iti daga.

Ti balakad nga inted ti Apo ken ni David Whitmer iti benneg 30 ket makatulong kadagiti ubbing a sursuruam nga agtalinaed a napudno iti ebanghelio ni Jesucristo.

Dagiti Mabalin nga Aktibidad

• Basaen ti Doktrina ken Katulagan 30:1 nga aggigiddan, ket kiddawem kadagiti ubbing a manggupgop, iti bukodda a balikas, ti balakad ti Apo ken ni David Whitmer. Iti ania kadagiti wagas ti mabalin a no dadduma ket “agbutengtayo kadagiti tao,” wenno madanagantayo iti no ania ti panunoten dagiti sabsabali, imbes nga aramidentayo ti ammotayo a nasken a maaramid?

• Kiddawem dagiti ubbing a mangpadas a mangaramid ti dua a trabaho iti maminsan, kas iti panangisao iti maysa a pagannurotan iti pammati bayat ti panangisuratda kadagiti nagan ti amin nga ubbing iti klase. Saludsodem kadakuada no apay a narigat nga agpokus iti umuna a trabaho. Ania dagiti sumagmamano a “banag iti daga” (Doktrina ken Katulagan 30:2) a makasinga kadatayo iti panangpanunot ken ni Jesucristo ken ti ebangheliona? Kasano a mapagtalinaedtayo ti pokustayo Kenkuana imbes a kadagiti saan unay a napateg a banag?

Doktrina ken Katulagan 30–34

Maibinglayko ti ebanghelio ni Jesucristo.

Adu kadagiti ubbing iti Simbaan ti mangpadpadaan iti panagserbi iti full-time wenno service mission. Dagiti padas dagiti misionario a nadakamat kadagiti benneg 30–34 ket makatulong kadakuada nga agsagana.

Dagiti Mabalin nga Aktibidad

• Awisem ti maysa a miembro ti ward a mangsursuro iti maipapan iti maysa kadagiti misionario a naawagan iti Doktrina ken Katulagan 30–34 ket ibinglay kadagiti ubbing ti nasursuroda (kitaen iti “Timek ti Pannakaisubli: Dagiti Nagkauna a Napasurot” iti Umaykayo, Sumurot Kaniak—Para kadagiti Indibidual ken Pamilia wenno “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” Revelations in Context, 54–69).

• Mangidrowing ti dakkel a ngiwat iti pisarra, ken tulongam dagiti ubbing a mangsarak iti Doktrina ken Katulagan 33:8–10 dagiti inkari ti Apo kadatayo no ungapentayo dagiti ngiwattayo tapno ibinglay ti ebanghelio. Paisurat kadagiti ubbing dagiti kari iti pisarra, ken tulongam ida a makaawat no ania ti kaipapanan dagitoy a kari. Kiddawem iti tunggal ubing a mangisurat iti uneg ti ngiwat ti maysa a kinapudno ti ebanghelio a mabalinda nga ibinglay kadagiti dadduma.

• Ipakitam ti maysa a ladawan ti trumpeta, ket isaritam ti kaipapanan ti mangikasaba iti ebanghelio “a kas iti aweng ti trumpeta.” Kasano ti “mangipigsa” kadagiti timektayo? (Doktrina ken Katulagan 33:2; 34:6).

• Paibinglay kadagiti ubbing no kasano nga agsagsaganada nga agserbi iti mision iti maysa nga aldaw. No adda am-ammoda a maysa a tao (nalabit maysa a miembro ti pamilia) nga agserserbi, awisem ida a mangisarita maipapan kadagiti padasna. Wenno awisem dagiti misionario, maysa a nagsublin a misionario, wenno maysa nga agsagsagana nga agmision a mangibinglay iti kinagagarna iti aramid ti misionario. Ibinglaymo ti sumagmamano a padasmo iti panangibinglay ti ebanghelio, agraman dagiti padasmo iti inaldaw a biagmo.

  ubbing a lallaki nga agay-ayam

  Maibinglayko ti ebanghelio kadagiti gagayyemko.

Doktrina ken Katulagan 33:12–17

Mabangonko ti biagko iti ebanghelio ni Jesucristo.

No makasursuro dagiti ubbing iti nasapa nga edad no kasano a binangonda ti biagda iti ebanghelio ni Jesucristo, nalabit nga ad-adda nga agtalinaedda a napudno Kenkuana. Makatulong kadakuada ti balakad a naited kadagitoy a bersikulo.

Dagiti Mabalin nga Aktibidad

• Mangitugot iti klase iti nagduduma a natangken a banag, kas iti abalbalay nga ayup, maysa nga espongha, pila, ken maysa a bato. Awisem dagiti ubbing nga iggamanda ti tunggal maysa. Kiddawem kadakuada a kitaenda iti Doktrina ken Katulagan 33:12–13 tapno maammuan no kasano nga iladawan ti Apo ti ebangheliona. Apay a nasayaat a balikas ti “bato” a mangiladawan iti ebanghelio? Kasano a mabangontayo ti biagtayo iti bato ti ebanghelio?

• Tulongam dagiti ubbing a mangbasa iti Doktrina ken Katulagan 33:12–17 ken mangsarak kadagiti banag a mabalin nga aramidentayo tapno mabangon ti biagtayo iti ebanghelio ni Jesucristo. Awisem dagiti ubbing a mangidrowing iti maysa a ladawan ti maysa a banag a masarakanda, ket papugtuam kadakuada no ania ti iladladawan dagiti ladawan ti tunggal maysa.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing nga agbalinda a kas dagiti misionario babaen ti panangibinglayda kadagiti pamiliada ti maysa a banag a nasursuroda iti Primary ita nga aldaw.

Panangpadur-as iti Panangisurotayo

Paneknekam maipapan kadagiti naikari a bendision. No awisem dagiti ubbing iti Primary nga agtungpal iti maysa a pagbatayan ti ebanghelio, mangibinglay kadagiti kari nga inaramid ti Dios para kadagiti agtungpal iti dayta a pagbatayan. Kas pagarigan, mabalin a paneknekam maipapan kadagiti bendision nga ited ti Apo kadagiti mangungap kadagiti ngiwatda ken mangibinglay ti ebanghelio.

panid ti aktibidad: maibinglayko ti ebanghelio