Agparintumengto Amin a Tumeng, ni J. Kirk Richards

Marso 22–28

Doktrina ken Katulagan 29

Ummongento ni Jesucristo dagiti Taona

Am-ammom dagiti ubbing a sursuruam, ket adu dagiti kinapudno iti Doktrina ken Katulagan 29 a mabalin a mangbendision kadakuada. Surotem ti pammaregta ti Espiritu Santo bayat ti panagadalmo iti benneg 29, ket isuratmo dagiti impresion maipapan iti no kasano a suruamto dagiti ubbing kadagitoy a kinapudno.

Isuratmo dagiti Impresionmo

Yawis ti Panagbibinninglay

Ibilang ti panangawis kadagiti sumagmamano nga ubbing a mangibinglay kadagiti sumagmamano a wagas a pakasursuruanda iti ebanghelio iti pagtaengan—kas agmaymaysa wenno kadua dagiti pamiliada. Awisem ti maysa wenno ad-adu pay nga ubbing a mangibinglay kadagiti pammaneknekda maipapan iti maysa a banag a nasursuroda itoy a lawas iti pagtaengan.

Isuro ti Doktrina: In-inaudi nga Ubbing

Doktrina ken Katulagan 29:1–2

Ummongento ni Jesucristo dagiti taona sakbay iti yaayna manen.

Ummongennatayo ni Cristo no awaten ken surotentayo dagiti pannursurona.

Dagiti Mabalin nga Aktibidad

• Awisem dagiti ubbing a mangkolor iti panid ti aktibidad ita a lawas bayat ti panangipabuyam iti video a “Chicks and Hens” (ChurchofJesusChrist.org). Kiddawem kadagiti ubbing a dumngeg iti no kasano a salakniban ti pamusian dagiti piekna.

• Kalpasan ti panangbasa iti Doktrina ken Katulagan 29:1–2, yakem ti pangngarig ni Cristo a mangum-ummong kadagiti taona “a kas iti panangummong ti pamusian kadagiti piekna.” Mabalin nga agpammarang a pamusian ti maysa nga ubing ket mangpili iti maysa a suli ti siled a pagtakderanna. No mangngegna ti “kurukok,” paguummongem dagiti ubbing iti lawlawna. Mabalin nga agsisinublat dagiti ubbing nga agbalin a pamusian. Iggamam ti maysa a ladawan iti Mangisalakan, ket awisem dagiti ubbing nga agummongda iti lawlawna. Ibinglay no kasano a matulongannatayo ni Jesus no aguummongtayo Kenkuana.

  

  Mamin-ano a Daras, ni Liz Lemon Swindle

Doktrina ken Katulagan 29:2–11

Makapagsaganaak a sumabat iti Mangisalakan.

Iti maysa nga aldaw, adda ti tunggal maysa kadatayo iti imatang ni Jesucristo. Idinto a mabalin nga adayo pay dayta nga aldaw iti masakbayan, mabalin latta a panunoten dagiti ubbing maipapan iti no ania ti kayarigannanto ken no kasano a makapagsaganada para iti daytoy.

Dagiti Mabalin nga Aktibidad

• Ipakitam ti ladawan ti Maikadua a Yaay (kitaen iti Libro ti Arte ti Ebanghelio, num.66), ken tulongam ti maysa nga ubing a mangbasa ti Doktrina ken Katulagan 29:11. Tulongam dagiti ubbing a mangkita kadagiti ragup ti balikas iti nasantuan a kasuratan a mangiladawan no ania ti makitada iti ladawan. Ibinglaymo kadagiti ubbing no kasano ti riknam maipapan iti yaay manen ni Jesucristo iti daga.

• Kas maysa a klase, agkansion ti maysa a kanta maipapan iti Maikadua a Yaay, kas iti “When He Comes Again” (Children’s Songbook, 82–83). Ipakitam dagiti ladawan dagiti banag a mabalinda nga aramiden tapno makapagsaganada a sumabat iti Mangisalakan ken makipagnaed Kenkuana iti agnanayon (kitaen iti Libro ti Arte ti Ebanghelio para kadagiti sumagmamano a kapanunotan). Tulongam ida a mangsapul kadagiti dadduma pay a wagas tapno makapagsagana iti Doktrina ken Katulagan 29:2–10.

Isuro ti Doktrina: In-inauna nga Ubbing

Doktrina ken Katulagan 29

Nagsagana ti Nailangitan nga Ama iti plano ti pannakaisalakan para kaniak.

Ti ad-adu a pannakaammo ti maysa nga ubing maipapan iti plano ti pannakaisalakan ti Dios, ad-adda met a maaramatna ti pammati iti Nailangitan nga Ama ken ni Jesucristo a mangsurot iti dayta a plano. Ania kadagiti paset ti plano ti mariknam nga ipamaysa?

Dagiti Mabalin nga Aktibidad

• Kiddawen iti sumagmamano nga ubbing a mangibinglay iti maysa a pagarigan ti panawen idi addaanda iti maysa a plano, kas iti maysa a panagbiahe wenno panangileppas iti maysa nga aramiden. Mabalinmo pay ti mangibinglay kadagiti pagarigan ti plano, kas iti kalendario a nakasuratan dagiti aktibidad iti daytoy wenno pammilin nga agaramid ti maysa a banag. Apay a napateg dagiti plano? Ibinglay kadagiti ubbing a ti Nailangitan nga Ama ket addaan iti plano a mangpalugodto kadatayo nga agbalin a kas Kenkuana.

• Tapno matulongan dagiti ubbing a makaawat iti plano ti Dios, mangaramid kadagiti karatula(pagilasinan) nga addaan kadagitoy a balikas: biag sakbay daytoy a biag, ti Panagparsua, ti Pannakatnag, biag iti daga, ken ti Maikadua a Yaay. Kalpasan ti pannakailawlawag ti tunggal balikas (kitaen iti Doktrina ken Katulagan 29:9–45), itedmo ti tunggal karatula iti sabali nga ubing, ket kiddawem kadakuada a tumakder iti maysa a linia iti umisu nga urnos tapno maipakita no kaano a maaramid ti tunggal pasamak iti plano ti Nailangitan nga Ama. Mabalin nga ibinglay ti tunggal ubing no ania ti ammona maipapan iti adda iti karatulana. Tulongam dagiti ubbing a mangkita no kasano a ti pannakaammo maipapan iti plano ti Nailangitan nga Ama ket mangtulong kadatayo nga ad-adda nga agbalin a kas Kenkuana ken iti Mangisalakan.

• Usarem ti maysa wenno ad-adu pay nga aktibidad iti baba tapno mangisuro kadagiti kinapudno maipapan iti plano ken no kasano a mayaplikar kadatayo dagitoy. Ibilangmo ti panangkiddaw iti sumagmamano kadagiti ubbing nga umay a nakasagana a mangtulong kenka a mangisuro.

  • Karbengan nga Agpili. Tulongam dagiti ubbing a makaawat a ti Nailangitan nga Ama ket nangted kadatayo ti sagut a karbengan nga agpili—ti wayawaya nga agpili—ket tenglennatayo nga agsungbat kadagiti pilientayo (kitaen iti Doktrina ken Katulagan 29:39–40). Mangaramid ti dua a karatula para iti tunggal ubing: ti maysa mangibagi iti panagaramid iti nasayaat a pili (kas pagarigan, ti naisem a rupa) ket ti maysa a mangibagi iti panagaramid iti dakes a pili (kas pagarigan, ti nakarupanget a rupa). Ibinglaymo dagiti pagarigan ti nasayaat pili ken dakes a pili, ket kiddawem kadagiti ubbing nga itag-ayda ti umisu a karatula. Kiddawen kadagiti ubbing a mangibinglay kadagiti bendision a sumangbay no surotentayo ni Jesucristo. Apay a palugodannatayo ti Nailangatan nga Ama nga agaramid kadagiti bukodtayo a pili?

  • Dagiti Bilin. Awisem dagiti ubbing a mangilista iti pisarra kadagiti sumagmamano a bilin. (Kas pagarigan, mabalinda ti agsapul iti Exodo 20:3–17 ken Libro ti Arte ti Ebanghelio, 103–15.) Apay a mangted kadatayo ti Nailangitan nga Ama kadagiti bilin? Ania ti masursurotayo manipud iti Doktrina ken Katulagan 29:35 maipapan kadagiti bilin ti Nailangitan nga Ama?

  • Ti Pannubbot ni Jesucristo. Tulongam dagiti ubbing a mangkita a nangisagana ti Nailangitan nga Ama iti maysa a wagas tapno mapakawantayo no makaaramidtayo kadagiti biddut a pili. Kiddawem iti maysa nga ubing a mangbasa ti maysa kadagiti bersikulo iti Doktrina ken Katulagan 29:1, 42–43 ken mangibinglay no ania ti isuro daytoy maipapan iti Pannubbot ti Mangisalakan. Mangsapulka iti managpartuat a wagas a pangawisam kadagiti ubbing a mangibinglay iti nasarakanda, kas iti panagsasaganad dagiti kasangayda, wenno kapandekan agingga iti katayagan, ken dadduma pay.

Doktrina ken Katulagan 29:1–2

Ummongento ni Jesucristo dagiti taona sakbay iti yaayna manen.

Kasano a matulongam dagiti ubbing a sursuruam nga aggagar maipapan iti panaguummong ti Israel?

Dagiti Mabalin nga Aktibidad

• Awisem dagiti ubbing a mangbasa iti Doktrina ken Katulagan 29:1–2 ken sapulenda no ania ti inyarig ti Apo iti Bagina. Ania ti mapanunot dagiti ubbing no mabasada daytoy a panangyarig? Ania ti kinuna ti Apo a nasken nga aramidentayo tapno agpaummongtayo Kenkuana?

• Maysa a wagas tapno mapagagar dagiti ubbing maipapan iti panaguummong ket mangisarita iti estoria iti maysa a tao a nagkameng iti Simbaan. Kas pagarigan, siasino ti nangiyam-ammo ti pamiliam iti Simbaan? Ibilangmo ti panangidawat kadagiti ubbing iti nasapsapa tapno maammuan maipapan iti umuna a miembro ti Simbaan kadagiti pamiliada ket isalaysayda ti estoriada iti klase.

• Awisem dagiti ubbing a mangilista kadagiti wagas a pakatulonganda a mangummong kadagiti tao iti Mangisalakan. Kas pagarigan, mabalinda nga awisen dagiti gagayyem wenno miembro ti pamilia iti maysa nga aktibidad ti Primary wenno iti maysa a home evening a kaduada dagiti pamiliada.

• Ti maikasangapulo a pagannurotan ti pammati ket maipapan iti panaguummong ti Israel. Adda kadi kadagiti ubbing ti makayulo iti daytoy a pagannurotan ti pammati? No adda makayulo kadakuada, awisem ida a mangisao iti daytoy iti klase. No awan, tulongam ida a mangituding iti maysa a panggep a tun-oyen a mangyulo iti daytoy.

Yallukoy ti Panagsursuro iti Pagtaengan

Awisem dagiti ubbing a mangisurat iti maysa a kinapudno a nasursuroda iti klase. Agkiddaw iti sumagmamano a kapanunotan no anianto ti aramidenda a mangibinglay iti daytoy a kinapudno kadagiti pamiliada.

Panangpadur-as iti Panangisurotayo

Mangikasoka. Ikasom no kasano ti panagsungbat dagiti ubbing iti klasem kadagiti aktibidad iti panagsusuro. No saanda a makatalna, mabalin nga orasen tapno baliwam iti sabali nga aktibidad wenno mapankayo agpagnapagna. No madlawmo a makiraman ken makasursuron dagiti ubbing, saanmo a piliten ti mangbalbaliw.