Marso 8–14

Doktrina ken Katulagan 23–26

“Papigsaen ti Simbaan”

Bayat ti panagsaganam a mangisuro, ibilangmo dagiti kapanunotan iti aktibidad iti agpadpada ti “In-inaudi nga Ubbing” ken “In-inauna nga Ubbing.”

Isuratmo dagiti Impresionmo

Yawis ti Panagbibinninglay

Ipakita ti ladawan ni Emma Smith (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Awisem dagiti ubbing a mangibinglay no ania ti ammoda maipapan kenkuana, agraman dagiti banag a naadalda manipud iti Doktrina ken Katulagan 25 iti daytoy napalabas a lawas. “Makatulong ti “Chapter 13: Joseph and Emma” (Doctrine and Covenants Stories, 51-55).

Isuro ti Doktrina: In-inaudi nga Ubbing

Doktrina ken Katulagan 23:6; 26:1

Kayat ti Dios nga agkararag ken agsursuroak manipud kadagiti nasantuan a kasuratan iti inaldaw.

Imbalakad ti Apo kadagiti immuna a lider ken gagayyem ti Simbaan nga agkararag (kitaen iti Doktrina ken Katulagan 23:6) ken agadal kadagiti nasantuan a kasuratan (kitaen iti Doktrina ken Katulagan 26:1). Kasano a matulongam dagiti ubbing nga aramidenda ti panagkararag ken dagiti nasantuan a kasuratan a paset iti biagda?

Dagiti Mabalin nga Aktibidad

• Ibasam kadagiti ubbing manipud iti Doktrina ken Katulagan 23:6, mangrugi iti “nasken nga agkararagka.” Tulongam ida a mangbigbig kadagiti nadumaduma a wagas ken lugar a kuna ti Apo a nasken a pagkararagantayo. Awisem ida a mangidrowing iti ladawan ti bagbagida nga agkarkararag iti maysa kadagita a wagas wenno lugar.

• No kasapulan, ilawlawag kadagiti ubbing no kasano ti agkararag. Makatulong ti agkansion iti maysa a kanta maipapan iti kararag,kas iti “I Pray in Faith” (Children’s Songbook, 14).

• Ibasam kadagiti ubbing ti, “Ipaayyo ti panawenyo a mangadal kadagiti nasantuan a kasuratan” (Doktrina ken Katulagan 26:1). Ibagam kadakuada no apay nga agadalka kadagiti nasantuan a kasuratan. Tulongam ida nga agpanunot kadagiti wagas a makasursuroda manipud kadagiti nasantuan a kasuratan, uray no saanda pay a makabasa.

• Aggigiddan nga agkansion iti “Search, Ponder, and Pray” (Children’s Songbook, 109) wenno sabali pay a kanta maipapan iti kararag ken panagadal ti nasantuan a kasuratan. Tulongam dagiti ubbing a mangtakuat kadagiti bendision a naikari iti kanta. Isaritam kadakuada maipapan kadagiti naespirituan a rikna a naaddaanka idi nagkararag ken nagbasaka kadagiti nasantuan a kasuratan.

Doktrina ken Katulagan 25:11–12

Ay-ayaten ni Jesus “ti kanta ti puso.”

Kinuna ti Apo a ti sagrado a musika ket “makaay-ayo kaniak.” Tulongam dagiti ubbing a makitada a ti panagkansion ket saan laeng a naragsak nga aktibidad ngem maysa pay a wagas daytoy a pangdaydayaw Kenkuana.

Dagiti Mabalin nga Aktibidad

• Awisem ti tunggal ubing a mangibinglay iti paboritona a himno wenno kanta ti Simbaan, ken aggigiddan a mangkanta iti sumagmamano kadagitoy. Ibasam ti Doktrina ken Katulagan 25:12 kadagiti ubbing, ket awisem ida a mangipapan no kasano ti marikna ti Nailangitan nga Ama ken ni Jesus no mangngeganda a kankantaentayo dagitoy a kanta.

• Suruam dagiti ubbing iti maysa a kanta maipapan iti panagkansion kas iti “Lift Up Your Voice and Sing” (Children’s Songbook, 252), wenno maysa a kanta maipapan ken ni Jesucristo, kas iti “He Sent His Son” (Children’s Songbook, 34–35). Awisem ida a kantaenda daytoy a kanta kadagiti pamiliada ita a lawas.

  

  Ti panagkanta ti maysa a wagas a maipakitatayo ti panagayattayo iti Dios.

Doktrina ken Katulagan 25:13, 15

Makapagsaganaak a mangaramid kadagiti sagrado a katulagan.

Agsagsagana dagiti ubbing a sursuruam a mangaramid ti umuna a katulaganda iti Nailangitan nga Ama no mabuniaganda. Kasano a matulongam ida a makitada no kasano ti kinapateg dagiti katulagantayo?

Dagiti Mabalin nga Aktibidad

• Ibasam ti Doktrina ken Katulagan 25:13 kadagiti ubbing. Ilawlawag a ti kaipapanan ti balikas a “kumpet” iti daytoy a bersikulo ket isu ti nairut a panangiggemtayo iti maysa a banag. Tapno mangtulong kadakuada a makaawat, ipasa ti maysa a solido a banag a kas iti bato (wenno maysa a sarukod a landok), iti lawlaw ti siled ket awisem dagiti ubbing nga iggamanda a nairut daytoy a banag agigga a kabaelanda. Ilawlawag a ti kaipapanan ti panagkumpet kadagiti katulagantayo ket isu ti panagiggemtayo (wenno panagtungpal) kadagiti kari nga aramidentayo iti Nailangitan nga Ama ken saantayo pulos a baybay-an (wenno isardeng).

• Usarem ti panid ti aktibidad iti daytoy a lawas a mangisuro kadagiti ubbing maipapan iti sumagmamano a panawen idi nagaramidtayo ti katulagan iti Nailangitan ng Ama. Basaem ti Doktrina ken Katulagan 25:15, ket ilawlawag a ti “korona ti kinalinteg” mangibagi kadagiti bendision iti panagsubli nga agnaed iti Dios, ti Nailangitan nga Aritayo.

Isuro ti Doktrina: In-inauna nga Ubbing

Doktrina ken Katulagan 23:3–7; 25:7

Kayat ni Jesus a papigsaek dagiti adda iti aglawlawko.

Idi immuna a nabukel ti Simbaan, manmano ti miembrona. Kiniddaw ti Apo dagiti Sasanto a bukelen ti Simbaan babaen iti panangibinglay ti enbanghelio ken panangpabileg iti tunggal maysa. Maaramidtayo met ti kastoy ita.

Dagiti Mabalin nga Aktibidad

• Kiddawem kadagiti ubbing a mangsapul ti tunggal pagarigan dagiti balikas a “panangigunamgunam” ken “mangigunamgunam” iti Doktrina ken Katulagan 23:3–7; 25:7. Tulongam ida a mangilawlawag iti kaipapanan dagitoy a balikas. Kasano a makapapigsa kadakuada ti panangigunamgunam iti maysa a tao? Awisem dagiti ubbing a mangyakem iti “panangigunamgunam” iti maysa a tao ngem aramidenna daytoy nga addaan iti ayat.

• Kasano a nasaysayaat a makaaramidtayo iti trabaho a panangpapigsa kadagiti dadduma a miembro ti Simbaan? Tapno mailadawan daytoy a pagbatayan, ikkam ti maysa nga ubing ti trabaho a kasapulan ti adu a katulongan. Kalpasana kiddawem dagiti dadduma nga ubbing a tumulong, ket pagsasaritaan no kasano a napagbalin a nalaglag-an ti trabaho. Ibinglay ti maysa a padas idi pinapigsanaka ti serbisio ti pada a miembro ti Simbaan.

Doktrina ken Katulagan 24:1, 8

Itag-aynakto ti Mangisalakan kadagiti “rigrigat[ko].”

Nagsagaba ni Joseph Smith ti adu a pannubok, ngem kinabaelanna ti “aganus kadagiti rigrigat” gapu ta inkari ti Apo a kanayonto a mangkadkadua kenkuana.

Dagiti Mabalin nga Aktibidad

• Tulongam dagiti ubbing a mangilista iti pisarra ti sumagmamano kadagiti rigrigat wenno pannubok a naipasango ken ni Joseph Smith ken dagiti nagkauna a Santo (kitaen iti “Chapter 11: More People Join the Church,” Doctrine and Covenants Stories, 46–47, wenno ti maitutop a video iti ChurchofJesusChrist.org). Kalpasanna awisem ida a mangtakuat no ania ti kinuna ti Apo ken ni Joseph Smith maipapan kadagiti rigrigatna iti Doktrina ken Katulagan 24:1, 8. Kasano a masarakantayo ti tulong ti Mangisalakan no addaantayo iti narigat a panawen?

• Tapno maisuro kadagiti ubbing a no dadduma kasapulantayo ti “aganus kadagiti rigrigat[tayo],” mabalinmo nga ipabuya ti video “Continue in Patience” (ChurchofJesusChrist.org). Kiddawem kadakuada a mangpanunot iti maysa a banag a talaga a kayatda ngem masapul nga agurayda. Apay a no dadduma idawat ti Apo kadatayo nga agan-anus bayat dagiti mapannubok a panawen iti biagtayo? Kasano nga ipakaammona kadatayo nga Isu ket “adda kadatayo” iti panawen ti panagrigrigattayo?

Doktrina ken Katulagan 25:13

Kabaelak ti “kumpet kadagiti katulagan” nga inaramidko.

Di nagbayag kalpasan a nabuniagan ni Emma Smith, kinuna ti Apo kenkuana, “Kumpetka kadagiti katulagan nga inaramidmo.” Ibilang no kasano a mabendisionan dagiti ubbing a sursuruam iti daytoy a ballaag.

Dagiti Mabalin nga Aktibidad

• Aggigiddan a basaen ti Doktrina ken Katulagan 25:13, ket saludsodem kadagiti ubbing no ania ti kaipapanan daytoy a bersikulo a “kumpet kadagiti katulagan” nga aramidentayo. Tapno mailadawan, ipasa iti aglawlaw dagiti banag a nagdedekket ket padasenda a pagsisinaen daytoy. Apay a ti balikas a “kumpet” ket maysa a nasayaat a balikas a mangiladawan no kasano ti nasken a mariknatayo maipapan kadagiti katulagantayo?

• No kasapulan, irebyum kadagiti ubbing dagiti katulagan nga aramidentayo no mabuniagantayo (kitaen iti Mosiah 18:8–10; Doktrina ken Katulagan 20:37). Ania ti kayat a sawen ti “kumpet” kadagitoy a katulagan?

• Aggigiddan a mangrebyu iti sumagmamano kadagiti ammom maipapan ti biag ni Emma Smith (kitaen iti “Chapter 13: Joseph and Emma” [Doctrine and Covenants Stories, 51–55], wenno ti maitutop a video iti ChurchofJesusChrist.org). Ikkam ti tunggal ubbing iti maysa a bersikulo wennno dua manipud iti benneg 25, ken awisem ida a mangibinglay no kasano a ti ballaag ken dagiti naituding nga aramiden ti Apo ket mabalin a nakatulong ken ni Emma a “kumpet kadagiti katulagan” nga inaramidna. Kasano a masurottayo ti pagwadanna?

Yallukoy ti Panagsursuro iti Pagtaengan

Awisem dagiti ubbing a mangpili ti paggugusto a bersikulo a nagsasaritaanyo a sangsangkamaysa, isurat ti reperensia, ken ibinglay daytoy iti miembro ti pamilia wenno gayyem.

Panangpadur-as iti Panangisurotayo

Yallukoy ti panagraem. Tulongam dagiti ubbing a makaawat a ti napateg nga aspekto ti panagraem ket ti panangpanunot maipapan iti Nailangitan nga Ama ken ni Jesucristo. Mabalin nga ipalagipmo kadakuada nga agbalinda a managraem babaen ti siuulimek a panangkansion wenno panangdayyeng iti maysa a kanta wenno panangipakita iti ladawan ni Jesus.