“Marso 8–14. Doktrina ken Katulagan 23–26: ‘Papigsaen ti Simbaan,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Marso 8–14. Doktrina ken Katulagan 23–26,” Umaykayo, Sumurot Kaniak—Para kadagiti Indibidual ken Pamilia: 2021
Marso 8–14
Doktrina ken Katulagan 23–26
“Papigsaen ti Simbaan”
Bayat ti panagbasam iti Doktrina ken Katulagan 23–26, isuratmo dagiti parikna a maawatmo manipud iti Espiritu Santo. Kasano a mayaplikarmo iti balakad kadagitoy a paltiing a mangpapigsa iti bukodmo a kinadisipulo ken iti pay Simbaan?
Isuratmo dagiti Impresionmo
Kalpasan a nabukel ti Simbaan, napadasan dagiti Santo ti baro a karit—ti mangisaknap iti ebanghelio ken mangpatibker kadagiti nakikaykaysan iti Simbaan, bayat ti panagtultuloy a panagkaro ti panagidadanes. Nasaksian ni Emma Smith ti panagsusupiat idi damona. Idi Hunio 1830, kinalikaguman ni Emma ken dagiti miembro ti pamilia Knight ti agpabuniag. Ngem pinadas dagiti kabusor ti Simbaan a mangsinga iti maysa koma a nasagraduan a padas. Umuna ti panangdadaelda iti sangga ti danum (dam) a naipatakder a mangted iti umdas ti kaadalemna a danum para kadagiti panagbuniag. Uray kalpasan a natarimaan ti sangga ti danum (dam), nagguummong dagiti mangidadanes nga agpukkaw iti pangta ken pananglais kadagiti mabuniagan. Kalpasanna, idi dumani kumpirmaan ni Joseph dagiti baro a miembro, tiniliwda isuna gapu ta pinagurana ti komunidad babaen iti panangaskasabana maipapan iti Libro ni Mormon. Simken a kasla makaupay a pangrugian para iti kaisubsubli a Simbaan ti Apo. Ngem iti baet daytoy kinaawan-talged ken danag, nangted ti Apo iti napapateg a balikas a pangbalakad ken pangparegta, a mangibagi iti “timek[na] kadagiti amin” (Doktrina ken Katulagan 25:16).
Kitaen met ti Saints, 1:89–90, 94–97.
Dagiti Kapanunotan para iti Bukod a Panagadal iti Nasantuan a Kasuratan
Makatulongak a mangpatibker iti Simbaan ti Apo.
Itan, iti dumani 200 a tawen kalpasan a nabukel ti naisubli a Simbaan, ti panagkasapulan a “papigsaen ti simbaan” ket agtultuloy (Doktrina ken Katulagan 23:3–5). Ket daytoy nga aramid ti saan laeng a para kada Joseph Smith, Oliver Cowdery, wenno dagiti agdama a lidertayo iti Simbaan—para kadatayo amin daytoy. Iti unos ti panagadalmo iti Doktrina ken Katulagan 23–26, utobem ti balakad nga inted ti Apo kadagiti nagkauna a miembro ti Simbaan a nangtulong kadakuada a nangpapigsa iti Simbaan. Ania iti mariknam a kayat ti Apo nga aramidem tapno makiraman iti daytoy a panagkagumaan?
Maitag-aynak ti Apo “manipud iti rigrigat[ko].”
Mabalin a nadagsen a dagensen ken ni Joseph Smith ti panangidaulo iti Simbaan kabayatan ti panawen ti nakaro a panangidadanes. Sapulem dagiti balikas a pammaregta ti Apo kenkuana iti Doktrina ken Katulagan 24.
Ania ti isingasing kenka dagiti sumaganad a nasantuan a kasuratan maipapan iti no kasano a maitag-aynaka ti Mangisalakan manipud iti rigrigatmo?
Doktrina ken Katulagan 121:7–8
Kasano a naitag-aynaka ni Jesucristo manipud iti rigrigatmo? Ania ti mabalinmo nga aramiden tapno agtultuloy nga agpatulongka Kenkuana kabayatan dagiti narigat a panawen?
Inagasanna ti Adu a Nadumaduma a Kita ti Sakit, ni J. Kirk Richards
Ni Emma Smith ti “napili a babai.”
Idi inkallaysa ni Emma Hale ni Joseph Smith, kasla ammonan nga agaramidto ni Emma kadagiti sakripisio. Sinupringna dagiti pagayatan ti amana ket insukatna ti medio nanam-ay a biag paara iti biag nga awan kasiguraduanna. Mabalin a napanunotna no ania ti ninamnama ti Apo kenkuana iti aramid ti Pannakaisubli. Sapulen dagiti sungbat nga inted ti Apo iti Doktrina ken Katulagan 25. Kitaen dagiti balikas ti Apo iti bersikulo 16—adda kadi ania man a banag a makitam iti daytoy a benneg a pakariknaam iti “timekna [kenka]”?
Kitaen met iti “An Elect Lady” (video, ChurchofJesusChrist.org); “Thou Art an Elect Lady,” Revelations in Context, 33–39; Joy D. Jones, “An Especially Noble Calling,” Ensign or Liahona, May 2020, 15–18.
Ania ti sapasap a pammalubos?
No awaten dagiti miembro dagiti akem wenno dagiti ordinasion iti priesthood iti Simbaan, addaantayo iti pormal a panangkanunong kadakuada babaen ti panangitag-ay kadagiti imatayo kas panangipakita iti suporta. Ti pagbatayan ti panangipakita ti tulong ken pannakitulag ket maawagan iti sapasap a pammalubos. Kas iti insuro ni Presidente Gordon B. Hinckley, “Ti wagas ti panagkanunong ket napalpalalo ngem iti nakairuaman a panangitayag iti ima. Daytoy ti maysa a panagkumit a mangitandudo, mangsuporta, mangtarabay kadagiti napili” (“This Work Is Concerned with People,” Ensign, Mayo 1995, 51).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
-
Doktrina ken Katulagan 23:6.Apay a kayat ti Dios nga agkararagtayo “iti kaamaan[tayo] ken kadagiti gagayyem[tayo], ken iti amin a lugar”? Ania ti isuro kadatayo ti kanta a “Love Is Spoken Here” (Childrens Songbook, 190)—wenno sabali pay a kanta maipapan iti kararag—mangisuro kadatayo maipanggep iti bileg ti kararag?
Kitaen met iti 2 Nephi 32:8–9; 3 Nephi 18:18–23.
-
Doktrina ken Katulagan 24:8.Makatulong ngata para iti pamiliam a pagsasaritaan maipanggep iti no ania ti kayat a sawen ti “aganus kadagiti rigrigat”? No addaanka kadagiti babassit nga ubbing, mabalin nga agbalin a naragsak ti mangaramid manen ti pamadasan [experiment] ni Presidente Dieter F. Uchtdorf a nailadawan iti “Continue in Patience” (Ensign wenno Liahona, Mayo 2010, 56; kitaen met iti video iti ChurchofJesusChrist.org). Ania ti isuro kadatayo ti Doktrina ken Katulagan 24:8 maipapan iti kinaanus? Kasano a tulongannatayo ti Apo nga agbalin a naanus kadagiti rigrigattayo?
-
Doktrina ken Katulagan 25:11–12.Nalabit a mabalinmo a kantaen ti paggugusto a himno wenno kanta ti tunggal miembro ti pamilia ket pagsasaritaan ti maipapan ti no apay a daytoy ti “kanta ti puso[na].” Kasano a maipada dagitoy a kanta iti “maysa a kararag iti [Dios]”?
-
Doktrina ken Katulagan 26:2.Mabalin a makatulong ti mangkita ti “Sapasap a Pammalubos” iti Pangiwanwan iti Nasantuan a Kasuratan (scriptures.ChurchofJesusChrist.org). Kasano nga ipakitatayo ti suporta kadagiti dadaulotayo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Lift Up Your Voice and Sing,” Childrens Songbook, 252 (kitaen iti “Dagiti Kapanunotan a Mangpadur-as ti Panagadal ti Pamiliam iti Nasantuan a Kasuratan”).
Dagiti Timek ti Pannakaisubli
Emma Hale Smith
Ipalgak dagiti balikas ti Apo ken ni Emma Smith a naisurat iti Doktrina ken Katulagan 25 no kasano ti nariknana maipapan kenkuana ken dagiti saranay wenno kontribusion a maitedna iti aramidna. Ngem ania ti kinayat ni Emma? Ania ti ammotayo maipapan iti kinataona, dagiti pannakilangenna, ken dagiti pagpigsaanna? Maysa a wagas tapno maam-ammo daytoy a “napili a babai” (Doktrina ken Katulagan a 25:3) ket isu ti panangbasa kadagiti balikas dagiti tao a nakaam-ammo kenkuana mismo.
Emma Smith, ni Lee Greene Richards
Joseph Smith Jr., ti asawana
“Napalalo ti ragsakko ta diak payen mailadawan, ket nariknak lattan ti aglaplapunosan a ragsak, idi inyasidegko iti sibayko, iti dayta a rabii, ti patpatgek nga Emma—isu nga asawak, ti asawak uray pay iti kinaagtutubok; ken ti pili ti pusok. Adu dagiti napanunotko idi inutobko dagiti adu a paspasamak a nakaawaganmi a pagpasaran. Dagiti pannakabannog, ken dagiti nadagsen a trabaho, dagiti leddaang, ken dagiti panagsagaba, ken dagiti ragsak ken dagiti pannakaliwliwa iti sagpaminsan ket napasamak iti unos ti panagbiagmi ket binendisionanda ti biagmi. O! ania ketdin a pannakalagipko amin dagiti naimbag ken dagiti dakes itoy a kanito, Ngem manen adda pay la ditoy isuna, ania man dagiti pannubok nga umay kadakami, di maupay, natibker ket di maisin, di agbalbaliw, Emma a nadungngo.”1
Ni Lucy Mack Smith, ti katuganganna
“Naubing idi isuna, ket kas maysa a gagangay a managpursigi, naan-anay ti kinaanepna iti aramid ti Apo, ken awan ti pagessemna malaksid no para iti Simbaan ken iti gapu ti kinapudno. Ania man nga aramidenna, inusarna iti amin a pigsana ken saan a managimbubukod a nangsaludsod ‘Ad-adda kadi a mairanudak ngem iti asinoman?’ No maibaon iti adayo dagiti elder tapno mangasaba, isu ti umuna a mangiboluntario kadagiti serbisiona a mangkawes kadakuada para iti panagdaliasatda, uray ania man dagiti pannubok a mapasaranda.”2
“Diak pay pulos nakaam-ammo iti maysa a babai iti biagko, a makaandur iti tunggal kita ti bannog ken rigat, manipud iti binulan-bulan, ken tinawen-tawen, nga addaan iti di agrukma a kinatured, kinatalged, ken anus, a kanayonna nga aramiden; ta ammok dagiti bambanag a nasken nga ibturanna; ta naibturannan ti kinaawan talgedna a biag; ta naibturanna idin ti rigat ti pannakaidadanes, ket naparmekna ti pungtot ti tattao ken dagiti sairo, inggana a naparmekna wenno naanduranna dagiti pannubok ken rigrigat ti biag a mabalin a sagabaen koma ti dumani amin nga asino man a sabali a babai.”3
Joseph Smith Sr., ti katuganganna a lalaki
Imbalikas ni Joseph Smith Sr, ti agserserbi kas patriarka ti Simbaan, ti bendision a patriarka (patriarchal blessing) ni Emma:
“Emma, manugangko, bendisionannaka ti Apo, gapu iti kinamanagtalekmo ken kinapudnom: mabendisionankanto a kaduam ti asawam, ket agrag-oka iti dayag a dumtengto kenkuana: Naparigat ti kararuam gapu iti kinadangkes dagiti tao iti panagkalkalikagumda a mangdadael iti asawam, ket ti sibubukel a kararuam aglippias iti kararag iti pannakaisalakanna: agrag-oka, gapu ta nangngeg ti Apo a Diosmo ti ararawmo.
“Nagladingitka iti kinatangken ti puspuso ti pamilia ti amam, ket nagtarigagayka para iti pannakaisalakanda. Raemento ti Apo dagiti ar-ararawmo, ket babaen dagiti panangukomna bay-annanto ti sumagmamano kadakuada a makita dagiti kinamaagda ken agbabawi kadagiti basolda; ngem babaento iti rigat a maisalakandanto. Makitamto ti adu nga al-aldaw; wen, ilikliknakanto ti Apo agingga a mapnekkanto, ta makitamto ti Mannubbotmo. Agrag-onto ti pusom iti naindaklan nga aramid ti Apo, ket awan ti asino man a mangala iti dayta a panagragrag-o manipud kenka.
“Laglagipemto a kanayon ti naindaklan a pannakipulapol ti Diosmo iti panangpalubosna kenka a mangkuyog ti anakko idi inted ti anghel ti kasuratan dagiti Nephite iti aywanna. Nakitam ti nakaro a leddaang gapu ta innala ti Apo manipud kenka ti tallo kadagiti annakmo: iti daytoy saanka a mababalaw, ta ammona dagiti natarnaw a tarigagaymo a mangpatanor iti maysa a pamilia, tapno mabendisionan ti nagan ti anakko. Ket ita, adtoy, kunak kenka, a kastoy ti kuna ti Apo, no mamatika, mabendisionankanto pay iti daytoy a banag ket ipasngaymonto ti dadduma pay nga annak, a pagragsakan ken pakapnekan ti kararuam, ken iti panagrag-o dagiti gagayyemmo.
“Mabendisionankanto iti pannakaawat, ken maaddaanka iti bileg a mangisuro kadagiti dadduma pay a babbai. Isurom ti pamiliam iti kinalinteg, ken dagiti babassit nga annakmo iti wagas ti biag, ket aywanandakayonto dagiti nasantuan nga anghel: ket maisalakankayonto iti pagarian ti Dios; pudno a kasta. Amen.”4
Ni Emma Smith a kaduana dagiti annakna. Panawen ti Panagkatawa, ni Liz Lemon Swindle
Dagiti Himno ni Emma, ni Liz Lemon Swindle