Agparintumengto Amin a Tumeng, ni J. Kirk Richards

Marso 22–28

Doktrina ken Katulagan 29

Ummungento ni Jesucristo dagiti Taona

Maysa kadagiti panggep ti panagadal kadagiti nasantuan a kasuratan ket isu ti panagsursuro iti doktrina, wenno dagiti kinapudno ti ebanghelio a kasapulan para iti pannakaisalakantayo. Bayat ti panangbasam iti Doktrina ken Katulagan 29 iti daytoy a lawas, agsapul kadagiti doktrina nga addaan kadagiti nalawag a pannakaammo ken pannakaawat a napnuan kaipapanan kenka.

Isuratmo dagiti Impresionmo

Nupay nabuangayen ti Simbaan ni Jesucristo idi 1830, adu pay dagiti kinapudno ti ebanghelio ti maipalgakto, ket adu dagiti saludsod ti sumagmamano a nagkauna a miembro ti Simbaan. Nabasada dagiti padto iti Libro ni Mormon maipanggep iti pannakaummong ti Israel ken ti pannakaipasdek ti Zion (kitaen iti 3 Nephi 21). Kasano a mapasamak dayta? Dagiti paltiing nga imbaga ni Hiram Page a naawatna ket mangrisut iti dayta a pagsasaritaan, a nangpadakkel laeng iti kuriosidad dagiti miembro (kitaen iti Doktrina ken Katulagan 28). Nasdaaw dagiti dadduma a tao maipapan iti Pannakatnag ni Adan ken Eva ken ti naespirituan nga ipapatay. Inawat ti Apo dagitoy a saludsod idi 1830: “Ania man ti dawatenyonto a sipapammati,” Imbagana kadagiti Santo, “iti panagkaykaysayo iti kararag a maibatay iti bilinko, maawatyonto” (Doktrina ken Katulagan29:6). Ket inawatna dagiti saludsodtayo iti agdama; ur-urayennatayo laeng nga agdawat Kenkuana iti kararag. Ti kinaagpaysona, kas iti nabaknang iti doktrina a paltiing iti Doktrina ken Katulagan 29 ipakitana a, no dadduma sungbatanna babaen ti panangibinglayna iti kinapudno ken pannakaammo iti labes dagiti saludsod a nadamagtayon iti damona.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 29

Insagana ti Nailangitan nga Ama ti naan-anay a plano para iti pannakaitan-oktayo.

Isuro ti Doktrina ken Katulagan 29 dagiti adu a kinapudno maipapan iti plano ti Dios para kadagiti annakna. Bayat ti panagbasam, kitaem dagiti kinapudno a masursurom maipapan ti tunggal maysa kadagiti sumaganad a paset ti plano:

• Ti biag sakbay daytoy a biag (kitaen iti bersikulo 36–37)

• Panagparsua (kitaen kadagiti bersikulo 31–33)

• Ti Pannakatnag da Adan ken Eva (kitaen kadagiti bersikulo 40–41)

• Biag ditoy daga (kitaen kadagiti bersikulo 39,42–45)

• Ti Pannubbot ni Jesucristo (kitaen dagiti bersikulo 1, 42–43, 46–50)

• Ti Panagungar (kitaen kadagiti bersikulo 13, 26)

• Ti Maudi a Panangukom (kitaen kadagiti bersikulo 12–13, 27–30)

Ania dagiti kabbarbaro a nalawag a pannakaawat ti nagun-odmo? Kasano a maiduma ti biagmo no saanmo koma a naammuan dagitoy a kinapudno?

Ad-adu ti masursurom maipapan iti plano ti Nailangitan nga Ama iti “The Plan of Salvation” (Preach my Gospel: A Guide to Missionary Service, rev. ed. [2018], ChurchofJesusChrist.org/manual/missionary).

Doktrina ken Katulagan 29:1–8

Ummongento ni Jesuscristo dagiti Taona sakbay ti Maikadua a Yaayna.

Isarita ni Jesucristo maipapan iti panagguummong dagiti taona a “kas panangummong ti pamusian kadagiti piekna iti sirok dagiti payakna” (Doktrina ken Katulagan 29:2). Ania ti isuro daytoy nga imahen kenka maipapan iti panaggagar ti Mangisalakan a mangummong kenka? Bayat ti panangbasam iti Doktrina ken Katulagan 29:1–8, sapulem dagiti nalawag a pannakaammo ken pannakaawat [insights] maipapan ti no apay nga agguummongtayo, asino ti agguummong, ken kasano a makatulongtayo a mangummong kadagiti “napili” (bersikulo 7).

Iti panawentayo, ti kaipapanan ti panangummong iti Zion ket panagkaykaysa kadagiti stake ti Zion iti intero a lubong. Kasano a ti panaguummong kas Sasanto ket matulongannatayo nga “agsagana iti amin a banag” a para kadagiti panagtutuok nga umayto sakbay ti Maikadua a Yaay ti Mangisalakan? (bersikulo 8; kitaen met kadagiti bersikulo 14–28).

Kitaen met iti Pagannurutan ti Pammati 1:10; Russell M. Nelson and Wendy W. Nelson, “Hope of Israel” (worldwide devotional for youth, Hunio 3, 2018, ChurchofJesusChrist.org).

Namin-ano a Gundaway, ni Liz Lemon Swindle

Doktrina ken Katulagan 29:31–35

“Naespirituan amin a banag kaniak.”

Iti ania a kaipapanan a naespirituan ti amin a bilin? Ania ti isuro kadatayo maipapan iti panggep dagiti amin a bilin a ti pannakaammo nga amin a bilbilin ket naespirituan? Mabalinmo nga ilista ti sumagmamano a bilin ket ibilangmo dagiti naespirituan a pagbatayan a mainaig iti tunggal maysa.

Ania ti mabalin nga agbalbaliw no sinapulmo ti naespirituan a kaipapanan wenno panggep iti inaldaw nga aramidmo, uray dagiti kasla temporal wenno nainlubongan?

Kitaen met iti Taga Roma 8:6; 1 Nephi 15:30–32.

Doktrina ken Katulagan 29:36–50

Subbotennatayo ni Jesucristo manipud iti Pannakatnag.

Naluktan daytoy a paltiing babaen iti Apo a mangyam-ammo iti Bagina kas Mannubbottayo, a “nangsubbot kadagiti basol[tayo]” (bersikulo 1). Agtultuloy ti paltiing a mangilawlawag iti sumagmamano a gapu no apay kasapulantayo ti Mannubbot? Ibilang ti no kasano a maaramatmo dagiti bersikulo 36–50 a mangilawlawag no apay a kasapulantayo ti pannakasubbot babaen ti Mangisalakan a ni Jesucristo. Kadagiti adu a kannawidan ti pammati, ti Pannakatnag ket maysa a trahedia; ania ti masarakam kadagitoy a bersikulo a mangisuro iti positibo a resulta ti Pannakatnag? (Kitaen met iti 1 Taga Corinto 15:22; 2 Nephi 2:6–8, 15–29; Mosiah 3:1–19; Moises 5:9–12.)

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Doktrina ken Katulagan 29.Mabalinmo nga aramaten dagiti imahen iti udi daytoy balabala a kadua ti Doktrina ken Katulagan 29 a mangisuro iti pamiliam maipapan ti plano ti pannakaisalakan. Kas pagarigan, mabalin a masursuro dagiti miembro ti pamilia maipapan dagiti nadumaduma a paset ti plano babaen ti panangbasa ken panangilawlawag kadagiti naisingasing a bersikulo. Mabalin a sapulenda dagiti nayon a kinapudno iti Gospel Topics (topics.ChurchofJesusChrist.org) wenno ti Pangiwanwan iti Nasantuan a Kasuratan (scriptures.ChurchofJesusChrist.org). Isuratmo no ania ti masursurom. Apay nga agyamantayo a mangammo maipapan iti plano ti pannakaisalakan? Kasano a ti panangammo maipapan itoy ket makaimpluensia kadagiti inaldaw a biagtayo?

Doktrina ken Katulagan 29:2, 7–8.Ania ti kaipapanan ti agpaummong iti Mangisalakan? Kasano a makatulongtayo Kenkuana a mangummong kadagiti napili?

Doktrina ken Katulagan 29:3–5.Ania ti masursurotayo maipapan iti Mangisalakan manipud kadagitoy a bersikulo a makatulong kadatayo nga “itag-ay ti puspuso[tayo] ket agragsak[tayo]”? (bersikulo 5). Ti video a “We Can Find Happiness” (ChurchofJesusChrist.org) ket matulongannaka a mangilawlawag no kasano a nangisangbay iti ragsak iti pamiliam ti pannakaammo maipapan iti plano ti pannakaisalakan.

Doktrina ken Katulagan 29:34–35.Ti panangbasa kadagitoy a bersikulo ket makaited iti pamiliam iti maysa a gundaway a pagsasaritaan maipapan kadagiti naespirituan a rason iti likudan dagiti sumagmamano a bilin wenno napadtuan a pammagbaga nga ikarkarigatam a suroten. Kas pagarigan, apay a kayatnatayo ti Apo nga agbasa kadagiti nasantuan a kasuratan kas maysa a pamilia? Ania dagiti naespirituan a pagsayaatan a nakitatayo iti panagtungpal kadagiti bilin?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Israel, Israel, God Is Calling,” Hymns, no. 7.

Panangpadur-as iti Panangisurotayo

Sapulem ni Jesucristo. Isurodatayo dagiti nasantuan a kasuratan nga amin a pinarsua ti Dios ket paneknekanda ni Jesucristo (kitaen iti Moises 6:62–63), isu a sapulentayo Isuna bayat ti panagbasatayo kadagiti nasantuan a kasuratan. Ibilangmo ti panagsurat wenno panangmarka kadagiti bersikulo a mangisuro maipapan Kenkuana.