“Marso 15–21. Doktrina ken Katulagan 27–28: ‘Nasken a Maurnos ti Pannakaaramid dagiti Amin a Banag,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Marso 15–21. Doktrina ken Katulagan 27–28,” Umaykayo, Sumurot Kaniak—Para kadagiti Indibidual ken Pamilia: 2021
Marso 15–21
Doktrina ken Katulagan 27–28
“Nasken a Maurnos ti Pannakaaramid dagiti Amin a Banag”
Kinuna ni Elder D. Todd Christofferson a bayat ti panagadalmo kadagiti nasantuan a kasuratan ken panangisuratmo kadagiti impresion, “mangmangtedkanto iti lugar iti pusom para iti balikas ti Dios, ket makisaritanto Isuna kadakayo” (“When Thou Art Converted,” Ensign wenno Liahona, Mayo 2004, 11).
Isuratmo dagiti Impresionmo
Ti paltiing ket baro pay la a konsepto idi para kadagiti Santo bayat ti panagtultuloy ti pannakaipalgak ti Pannakaisubli. Ammo dagiti nagkauna a miembro ti Simbaan a mabalin nga umawat ni Propeta Joseph Smith iti paltiing para iti Simbaan, ngem makaawat kadi dagiti dadduma? Dagiti saludsod a kastoy ket nagbalin a kritikal idi ni Hiram Page, maysa kadagiti Walo a Saksi dagiti balitok a pinanid, ket namati a nakaawat isuna kadagiti paltiing para iti Simbaan. Adu dagiti napudno a Santo ti mamati a dagitoy a paltiing ket naggapu iti Dios. Insungbat ti Apo a babaen ti panagisuro iti Simbaanna, “nasken a maurnos ti pannakaaramid dagiti amin a banag” (Doktrina ken Katulagan 28:13), a kayatna a sawen adda maysa laeng a “matudinganto nga umawat kadagiti bilin ken paltiing para iti sibubukel a Simbaan (Doktrina ken Katulagan 28:2). Nupay kasta, mabalin dagiti dadduma ti umawat iti bukodda a paltiing para iti pasetda iti aramid ti Apo. Ti kinaagpaysona, dagiti balikas ti Apo ken ni Oliver Cowdery ket maysa a pammalagip kadatayo amin: “Maitedto kenka … no ania ti aramidem” (Doktrina ken Katulagan 28:15).
Kitaen met ti “All Things Must Be Done in Order,” Revelations in Context, 50–53.
Dagiti Kapanunotan para iti Bukod a Panagadal iti Nasantuan a Kasuratan
Nasken a mairanudak iti sakramento a naitalimudok dagiti matak iti dayag ti Dios.
Nabuniagan da Sally Knight ken Emma Smith idi Hunio 1830, ngem sininga dagiti bunggoy a mangriribuk dagiti kumpirmasionda. Kalpasan ti dua bulan, immay sinarungkaran ni Sally ken ti asawana, a ni Newel da Emma ken Joseph, ket napagnanamingan a nasken itan a maannong dagiti kumpirmasion ken makiranud ti grupo iti sakramento a sangkamaysa. Bayat ti kaaddana iti dalanna a manggun-od iti arak ti sakramento, pinagsardeng ti maysa nga anghel ni Joseph. Ania ti insuro ti anghel kenkuana maipapan iti sakramento? (Kitaen iti Doktrina ken Katulagan 27:1–4.
Ania ti isuro dagitoy a bersikulo kenka maipanggep iti no kasano ti kayat ti Mangisalakan kenka a mangpanunot iti sakramento? Ania ti mariknam a makaparegta nga aramiden gapu iti no ania ti masursurom?
Ipalagip kadatayo ti sakramento maipapan iti sakripisio ti Mangisalakan.
Doktrina ken Katulagan 27:15–18
Ti kabal ti Dios ket makatulongto kaniak a mangitakder a maibusor iti dakes.
Kinuna ni Presidente M. Russell Ballard: “Awan iti maymaysa a naindaklan ken nadayaw a banag a maaramidtayo a mangarmas a naespirituan ti bagbagitayo. Agpannuray dagiti pudno a naespirituan a bileg iti adu a babbabassit a tignay a nayabel a sangkamaysa iti maysa a tela ti naespirituan a sarikedked a mangsaluad ken mangkalasag manipud iti amin a kinadakes” (“Be Strong in the Lord,” Ensign, Hulio 2004, 8).
Bayat ti panagbasam iti Doktrina ken Katulagan 27:15–18, mabalinmo ti agaramid ti maysa a tsart a kas iti maysa iti baba. Ania ti ar-aramidem tapno maipan ti tunggal pedaso ti kabal ti Dios?
|
Pedaso ti kabal |
Paset ti bagi a masaluadan |
No ania ti mabalin nga itakderan dayta a paset ti bagi |
|---|---|---|
|
Kabal ti kinalinteg |
Puso |
Dagiti tarigagay ken panagayattayo |
|
Bistukol ti pannakaisalakan |
Ulo wenno panunot |
kitaen met iti Taga Efeso 6:11–18; 2 Nephi 1:23.
Ti sibibiag a propeta ti pannakangiwat ti Dios iti Simbaan.
Panunotem no ania koma ti kayariganna no makaawat ti tunggal maysa kadagiti bilin ken paltiing para iti sibubukel a Simbaan. Idi imbaga ni Hiram Page a nakaawat iti kasta a paltiing, adda pannakatikaw kadagiti miembro ti Simbaan. Iti Doktrina ken Katulagan 28, impalgak ti Apo ti maysa nga urnos para iti paltiing iti Simbaanna. Ania ti masursurom manipud iti daytoy a benneg maipapan ti nalawag nga akem ti Presidente ti Simbaan? Ania ti masursurom manipud kadagiti balikas ti Apo ken ni Oliver Cowdery iti bersikulo 3? Ania ti masursurom manipud iti daytoy a benneg maipapan no kasano a maiturongnaka ti Dios?
Kitaen met iti Dallin H. Oaks, “Two Lines of Communication,” Ensign wenno Liahona, Nob. 2010, 83–86.
Apay a napateg ti mision ni Oliver Cowdery kadagiti Lamanite?
Maysa a panggep ti Libro ni Mormon ket tapno “dumteng iti pannakaammo dagiti Lamanite kadagiti ammada, ken bareng no maammuanda dagiti kari ti Apo” (Doktrina ken Katulagan 3:20). Maitunos daytoy kadagiti kari nga inaramid ti Apo iti adu a propeta iti Libro ni Mormon (kitaen, kas pagarigan, iti 1 Nephi 13:34–41; Enos 1:11–18; Helaman 15:12–13). Imbilang dagiti nagkauna a miembro ti Simbaan dagiti American Indian nga an-annabo dagiti tao iti Libro ni Mormon. (Ti opisial a posision ti Simbaan ita ket dagiti Lamanite ket “isuda dagiti an-annabo dagiti American Indian” [pakauna ti Libro ni Mormon].)
Tapno mabasa ti ad-adu pay maipapan iti mision ni Oliver iti asideg dagiti tribu ti American Indian, kitaen iti “A Mission to the Lamanites” (Revelations in Context, 45–49). Ania iti isuro kenka daytoy a mision maipapan iti Apo ken ti aramidna?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
-
Doktrina ken Katulagan 27:1–2.Kasano a nasaysayaat ti pannakalagiptayo iti sakripisio ti Mangisalakan para kadatayo no makiranudtayo iti sakramento?
-
Doktrina ken Katulagan 27:5–14.Ania ti ammotayo maipapan kadagiti propeta kadagitoy a bersikulo? Mabalinmo a sukisoken iti impormasion maipapan kadakuada iti Pangiwanwan iti Nasantuan a Kasuratan (scriptures.ChurchofJesusChrist.org). Ania dagiti bendision a maaramattayo gapu kadagiti tulbek nga iggemda? Para iti ad-adu pay nga impormasion maipapan iti sumagmamano kadagitoy a tulbek, kitaen iti Mateo 16:16–19; Doktrina ken Katulagan 110:11–16.
-
Doktrina ken Katulagan 27:15–18.Nalabit a kaay-ayo ti pamiliam ti mangipabuya iti sinsinan a dangadang nga addaan iti nayon a kawes a mangiladawan ti kabal ti Dios, kas dagiti kallugong, tsaleko, apron, wenno sapatos. Kasano a masaluadannatayo ti kabal iti dangadang? Pagsasaritaan ti sumagmamano kadagiti dakes nga impluensia a sangsanguen ti pamiliam ken dagiti banag a maaramidmo tapno maikawes ti naespirituan a kabal. Ibilangmo ti panangipakita iti video “Put on the Whole Armor of God” (ChurchofJesusChrist.org).
-
Doktrina ken Katulagan 28:2–7.Ania ti masursurotayo manipud kadagitoy a bersikulo maipanggep iti takem [calling] ti maysa a propeta? Nalabit a mabalin nga irebyu dagiti miembro ti pamilia dagiti napalabas a mensahe manipud iti sibibiag a propetatayo ket ibinglayda no kasano a matulongannatayo ti pammagbagana a mangsurot ken ni Jesucristo.
-
Doktrina ken Katulagan 28:11.No kayattayo nga idiaya ti panangatur iti maysa a tao, apay a nasken nga aramidentayo daytoy “iti nagbaetanyo laeng”?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Come, Listen to a Prophet’s Voice,” Hymns, no. 21.
Panangpadur-as iti Bukod a Panagadal
Adalem dagiti balikas dagiti propeta ken apostol iti ud-udina nga aldaw. Basaem ti insuro dagiti propeta ken apostol iti ud-udina nga aldaw maipapan kadagiti pagbatayan a masarakam kadagiti nasantuan a kasuratan. Ibilangmo ti panangrebyu iti topic index ti sapasap a komperensia iti conference.ChurchofJesusChrist.org wenno iti Gospel Library app.