Ti Pagtaengan ni Peter Whitmer, ni Al Rounds

Marso 1–7

Doktrina ken Katulagan 20–22

“Ti Ilulutuad ti Simbaan ni Cristo”

Bayat ti panangbasam iti Doktrina ken Katulagan 20–22, ikasom dagiti parikna ti Espiritu Santo. Ibilangmo ti panangisurat ida tapno mapagbasaramto ida.

Isuratmo dagiti Impresionmo

Ti aramid ni Propeta Joseph Smith a panagipatarus iti Libro ni Mormon ket nakumpleton. Ngem karugrugi laeng ti aramid ti Pannakaisubli. Nalawag manipud kadagiti immun-una a paltiing a kas pangnayon iti pannakaisubli ti doktrina ken turay ti kinasaserdote, nagtarigagay ti Apo a mangisubli iti pormal a pannakabukel—ti Simbaanna (kitaen iti Doktrina ken Katulagan 10:53; 18:5). Isu nga idi Abril 6, 1830, nagdudupudop ti nasurok a 40 a mamati iti kayo a pagtaengan ti pamilia a Whitmer iti Fayette, Nueva York, a mangsaksi iti pannakabukel ti Simbaan ni Jesucristo.

Adda latta dagiti tao a masdaaw, no apay a kasapulan ti nabukel a Simbaan? Mabalin a masarakan ti sungbat, uray iti kabassitan a paset, kadagiti paltiing a konektado iti dayta umuna a miting iti Simbaan idi 1830. Ditoy, nailadawan dagiti bendision nga imposiblento no ti pudno a Simbaan ni Jesucristo ket awan iti “umno a pannakaurnosna ken nabangon” iti ud-udina nga aldaw (Doktrina ken Katulagan 20:1).

Kitaen met ti Saints, 1:84–86, ken “Build Up My Church,” Revelations in Context, 29–32.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 20:1–36

Naipasdek ti Ti Simbaan ni Jesucristo dagiti Santo iti Ud-udina nga Aldaw iti pudno a doktrina.

Nayam-ammo ti benneg 20 kas maysa a “paltiing maipanggep iti urnos ken pannakaiwanwan ti Simbaan” (paulo a benneg). Ngem sakbay ti panangbalabala kadagiti pagannurotan iti Simbaan, dagiti saad iti priesthood, ken dagiti wagas para iti panangannong kadagiti ordinansa, rugian daytoy a paltiing babaen ti panangisuro iti kangrunaan a doktrina. Bayat ti panangbasam iti umuna a 36 a bersikulo daytoy a paltiing, saludsodem ti bagim no apay a mabalin a kasta. Mabalinmo ti agaramid iti listaan dagiti kinapudno ti ebanghelio a masarakam. Dagitoy ti sumagmamano a pagarigan:

• Ti Libro ni Mormon ken ti akemna iti Pannakaisubli (dagiti bersikulo 8–12)

• TI saguday ti Dios (dagiti bersikulo 17–19)

• Ti Pannubbot ni Jesucristo (dagiti bersikulo 20–27)

Apay dagitoy a kinapudno ket napateg a yunay-unay bayat ti pannakaipasdek ti Simbaan?

Doktrina ken Katulagan 20:37, 75–79

Dagiti sagrado nga ordinansa ket napateg a paset ti naisubli a Simbaan.

Idi nabukel ti Simbaan, insuro ti Apo dagiti Santona maipapan kadagiti sagrado nga ordinansa, agraman ti panagbuniag ken ti sakramento. Bayat ti panangbasam kadagiti pagannurotan “maipanggep ti wagas ti panagbuniag” iti bersikulo 37, panunotem maipapan iti bukodmo a pannakabuniag. Naaddaanka kadi ti ania man a rikna a nailadawan iti daytoy a bersikulo? Adda kenka kadi dagitoy itan? Utobem no ania ti kabaelam nga aramiden a mangpatalinaed a naregta ti “pangngeddeng[mo] nga agpaay ken ni [Jesucristo] agingga iti panungpalan.”

Bayat ti panangbasam maipapan iti sakramento iti Doktrina ken Katulagan 20:75–79, padasem a mangbasa kadagitoy sagrado a kararag manipud iti pannirigan ti maysa a tao a dumdumngeg kadagitoy iti umuna a gundaway. Ania dagiti maawatmo a nalawag a pannakaammo ken pannakaawat [insights] maipanggep iti sakramento? maipapan iti bagim? Kasano a mabalin nga aringan dagitoy a nalawag a pannakaammo ken pannakaawat ti wagas a panagsaganam a mairanud iti sakramento itoy a lawas?

Ti sakramento ket maysa a sagrado nga ordinansa.

Doktrina ken Katulagan 20:38–60

Ti serbisio iti priesthood ti mangbendision kadagiti miembro ti Simbaan ken dagiti pamiliada.

No adda maysa a mangidawat kenka a mangibaga kadagiti pagrebbengan ti maysa a priesthood holder, ania ti makunam? Basaen ti Doktrina ken Katulagan 20:38–60, a nakaisuratan dagiti pagrebbengan ti nadumaduma a saad ti priesthood. Adda kadi ania man kadagitoy a bersikulo ti mamagbalbaliw iti wagas ti panagpanunotmo maipapan kadagiti pagrebbengan iti priesthood ken no kasano nga aramiden ti Mangisalakan ti aramidna? Kasano a binendisionannaka ti aramid a nailadawan kadagitoy a bersikulo?

Tapno masursuro maipapan ti no kasano nga aramaten dagiti babbai ti turay ti priesthood iti aramid ti Simbaan, kitaen iti Dallin H. Oaks, “The Keys and Authority of the Priesthood,” Ensign wenno Liahona, Mayo 2014, 49–52.

Doktrina ken Katulagan 21

Ti Simbaan ni Jesucristo ket idauluan ti maysa a sibibiag a propeta.

Ania ti masursurom manipud iti Doktrina ken Katulagan 21:4–9 maipanggep kadagiti balikas dagiti propeta ti Apo? Ibilang dagiti kari a nailadawan iti bersikulo 6 para kadagiti umawat kadagiti balikas ti Apo babaen iti propetana. Ania ti kayat a sawen dagitoy a kari kenka?

Kasano a maawatmo ti balikas ti sibibiag a propeta a “kasla naggapu manipud iti bukod a ngiwat ti [Dios]? (bersikulo 5). Ania ti balakad ti agdama a propeta a naited a mabalin a mangiturong kadagiti bendision a naikari iti bersikulo 6?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Doktrina ken Katulagan 20.Ania koma ti isaotayo iti maysa a tao nga agsaludsod kadatayo no apay a kasapulantayo ti Simbaan? Ania dagiti sungbat a masarakantayo iti Doktrina ken Katulagan 20? Kitaen met iti D. Todd Christofferson, ““Why the Church,” Ensign wenno Liahona, Nob. 2015, 108–11.

Doktrina ken Katulagan 20:69.Ania ti kayat a sawen ti “[magna] iti amin a kinasanto iti imatang ti Apo”? Mabalin a kaay-ayo dagiti miembro ti pamilia ti mangidrowing wenno mangisurat iti papel ti sumagmamano a banag a makatulong kadakuada a magna iti amin a kinasanto wenno dagiti banag a mabalin a makasinga kadakuada a mangaramid iti kasta. Kalpasanna mabalinda ti agaramid iti maysa a dalan nga agaramat kadagiti papel ket padasenda a magna iti dalan, paddakanda laeng dagiti drowing a mangyasidegto kadakuada ken ni Cristo.

Doktrina ken Katulagan 20:37, 71–74.No adda maysa iti pamiliam a saan pay a nabuniagan, maiturong dagitoy a bersikulo ti panaglilinnawag maipapan iti no kasano nga agsagana para iti panagbuniag (kitaen iti bersikulo 37) ken no kasano a maannong dagiti panagbuniag (kitaen kadagiti bersikulo 71–74). Mabalin nga ibinglay dagiti miembro ti pamilia dagiti ladawan wenno pakalaglagipan manipud ti aldaw ti panagbuniagda.

Doktrina ken Katulagan 20:75–79.Kasano a maaramat ti pamiliam dagitoy a bersikulo a mangisagana para iti napnuan kaipapanan, naraem a padpadas iti sakramento? Mabalin nga isingasing dagitoy a bersikulo kadagiti banag a mabalinmo nga utoben kabayatan ti sakramento, ket mabalin a sapulen wenno idrowing dagiti miembro ti pamilia dagiti ladawan dagitoy a banag. No maitutop, mabalinmo nga itugot dagitoy a ladawan iti sumaruno a miting iti sakramento a kas pammalagip ti no ania ti panunotem kabayatan ti sakramento.

Doktrina ken Katulagan 21:4–7.Ibilangmo ti panangawis kadagiti miembro ti pamilia nga agsapul kadagiti balikas ken ragup dagiti balikas kadagiti bersikulo 4–5 a mangisuro kadatayo maipapan ti panangsurot iti propeta ti Apo. Ania ti kayat a sawen ti umawat kadagiti balikas ti propeta iti kinaanus? iti pammati? Kaano a naawattayo dagiti bendision a naikari iti bersikulo 6?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “The Church of Jesus Christ,” Children’s Songbook, 77.

Panangpadur-as iti Panangisurotayo

Tuladen ti Biag ti Mangisalakan “Ti bileg ti Mangisalakan a mangisuro ken mangparegta kadagiti dadduma ket naggapu manipud iti wagas ti panagbiagna ken ti kita ti kinataona. Ti napaspasnek a panagkagumaanam nga agbiag a kas ken ni Jesuscristo, ket ad-adda a kabaelamto ti mangisuro a kas Kenkuana” (Panangisuro iti Wagas ti Mangisalakan, 13).

Ordenan ni Oliver Cowdery ni Joseph Smith, ni Walter Rane