Ti Talon ni Martin Harris, ni Al Rounds

Pebrero 22–28

Doktrina ken Katulagan 18–19

“Napateg dagiti Kararua”

Naited dagiti paltiing iti Doktrina ken Katulagan kas sungbat kadagiti masinunuo a kasasaad iti dumani 200 a tawen ti napalabas, ngem awan paggibusanna dagiti pagbatayan nga isuroda. Sarakem dagitoy a pagbatayan bayat ti panagbasam, ket ibilang no kasano a mayaplikarda kenka.

Isuratmo dagiti Impresionmo

Kukua da Martin ken Lucy Harris ti maysa kadagiti kasasayaatan a talon iti Palmyra, Nueva York Nagurayda iti adu a tawen tapno magun-odda, nangpabael kadakuada a mangpatanor iti maysa a pamilia, ken nangited kadakuada iti nasayaat a sasaaden iti komunidad. Ngem idi 1829 nagbalin a nalawag a maipablaakto laeng ti Libro ni Mormon no maisalda ni Martin ti talonna tapno mabayadan ti agimalmaldit. Adda pammaneknek ni Martin iti Libro ni Mormon, ngem awan ken ni Lucy. No matuloy ti panangisalda ni Martin ket saan a malako a nasayaat ti Libro ni Mormon, mapukawna ti talonna ket agpeggad ti kallaysana. No dadduma wenno sabali a panawen, maipasangotayo amin kadagiti saludsod a kapada dagidi mabalin a sangsanguen ni Martin: Ania ti pateg ti ebanghelio ni Jesucristo kaniak? Ania ti mabalinko nga isakripisio tapno makatulongak iti pannakabangon ti pagarian ti Dios? Mabalin a makatulong kadatayo a manglagip nga awan ti nagbayad iti nangatngato a gatad tapno mabendisionan dagiti annak ti Dios ngem ni Jesucristo, “ti kaindaklan ti amin” (Doktrina ken Katulagan 19:18).

Nagdesision ni Martin a mangisalda iti talonna. Ti sakripisiona ti nagbayad iti pannakaimaldit ti umuna a 5,000 a kopia ti Libro ni Mormon. Ket itan, nasurok nga190 milion a kopian idi agangay, minilmillion a kararua iti intero a lubong ti nabendisionan.

Para iti ad-adu pay nga impormasion maipapan iti pannakaipablaak ti Libro ni Mormon, kitaen iti Saints, 1:76–84.

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 18:10–16

Agragsak ti Apo no agbabawitayo.

Kitaen no kasano ti kasansan a naaramat dagiti balikas nga agbabawi ken panagbabawi iti unos ti Doktrina ken Katulagan 18 ken 19, ket utobem no ania ti masursurom manipud kadagitoy a balikas tunggal kanito a maaramatda. Ibilangmo nangnangruna iti Doktrina ken Katulagan 18:10–16; kasano nga aringan dagitoy a bersikulo ti no kasano ti mariknam maipapan iti panagbabawi— ti bukodmo a panagbabawi ken ti pagrebbengam a mangawis kadagiti dadduma pay nga agbabawi?

Kitaen met iti Alma 36:18-21; Dale G. Renlund, “Repentance: A Joyful Choice,” Ensign wenno Liahona, Nob. 2016, 121–24.

Doktrina ken Katulagan 18:34–36

Mangngegko ti balikas ti Apo iti Doktrina ken Katulagan.

No adda maysa nga agdamag kenka no ania ti kapadpada ti balikas ti Apo, ania koma ti isaom? Panunotem maipapan iti daytoy a saludsod bayat ti panangbasam iti Doktrina ken Katulagan 18:34–36. Ania ti masursurom maipapan ti balikas ti Apo manipud ti panagbasbasam iti Doktrina ken Katulagan? Ania ti mabalinmo nga aramiden tapno umawat iti pammaregta kenkuana?

Doktrina ken Katulagan 19:15–20

Nagsagaba ni Jesucristo tapno makapagbabawiak ket umayak Kenkuana.

Iladawan ti Baro a Tulag ti panagsagsagaba ti Mangisalakan iti Getsemani manipud iti pannirigan dagiti nakapaliiw daytoy. Iti Doktrina ken Katulagan 19:15–20, imbaga ni Jesucristo ti maipapan iti panagsagsagabana kadagiti bukodna a balikas. Bayat ti panagbasam itoy sagrado, personal a pakaammuan,sarakem dagiti balikas ken ragup dagiti balikas a mangiladawan iti panagsagaba ti Mangisalakan. Ibilangmo ti tunggal balikas wenno ragup dagiti balikas nu ana ti maisurona kenka. Apay nga immannugot ti Mangisalakan nga agsagaba? Ibilang ti mangisurat ti marikriknam maipanggep ken ni Jesucristo ken ti sakripisiona para kenka.

Kitaen iti Juan 15:13; Mosiah 3:7; Alma 7:11–12; Doktrina ken Katulagan 18:10–13.

Ti Pateg ti Maysa a Kararua, ni Liz Lemon Swindle

Doktrina ken Katulagan 19:26–27, 34–41

Dagiti bendision ti Apo ket nain-indaklan ngem dagiti gameng ti daga.

Saan unay nga adu ti nalako a Libro ni Mormon iti Palmyra, kas bungana, naggibus a nangilako ni Martin Harris iti dakkel a paset ti talonna tapno pagbayad iti utang (kitaen iti “The Contributions of Martin Harris,” Revelations in Context, 7–8). Utobem dayta a sakripisio—ken dagiti bendision a naawatmo gapu iti dayta—bayat ti panangbasam kadagitoy a bersikulo. Mabalin met a panunotem ti maipapan iti no ania ti dinawat ti Apo nga isakripisiom. Ania ti masarakam kadagitoy a bersikulo a mangparegta kenka tapno maaramid dagitoy a sakripisio nga addaan iti “panagdir-i” ken “kinaayat”? (kitaen met kadagiti bersikulo 15–20).

Doktrina ken Katulagan 19:23

Sumangbay ti kappia manipud iti panagsursuro ken ni Jesucristo ken panangsursurot Kenkuana.

Ibilangmo ti awis ti Mangisalakan nga “Agsursurokayo kaniak.” Ania ti masursurom maipanggep ken ni Jesucristo iti Doktrina ken Katulagan 19? Isuratmo dagiti kapanunotam ken impresionmo maipanggep iti no kasano ti mangyaplikar kadagiti kinapudno a masursurom. Ania ti kayat a sawen kenka ti “magnakayo iti kinapakumbaba ti Espiritu[na]”?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Doktrina ken Katulagan 18:1–5.Nalabit a mabalin nga ibinglay dagiti miembro ti pamilia ti sumagmamano iti “namin adu a daras” (bersikulo 2) a nangipalgakan ti Espiritu kadakuada a pudno dagiti nasantuan a kasuratan, kas iti inaramidna para ken ni Oliver Cowdery. Kasano a mabalin nga “agtalek kadagiti banag a naisurat” ti pamiliam (bersikulo 3) kadagiti nasantuan a kasuratan? Kasano a maipasdekmo ti pamuon ti pamiliam iti “bato” (bersikulo 4) ti ebanghelio?

Doktrina ken Katulagan 18:10–13; 19:16–19.Mabalin a basaen ti tunggal miembro ti pamilia ti Doktrina ken Katulagan 18:10–13 ket sukatanna iti naganna dagiti balikas a “kararua,” “dagiti kararua,” ken “amin a tao.” Kalpasanna mabalinmo nga ilawlawag no kasano a makatulong dagitoy a bersikulo a mangipaawat iti pategtayo iti Ama ken ti Anak (kitaen iti Doktrina ken Katulagan 19:16–19).

Doktrina ken Katulagan 18:21–25.Adda kadi espesial a kaipapanan ti nagnagan dagiti miembro ti pamiliam? Nalabit a mabalinmo a saritaen maipapan no apay a napateg dagiti nagan ken no ania ti kaipapanan ti awaten iti bagbagitayo ti nagan ni Jesucristo (kitaen iti Mosiah 5:7). Daytoy ket mabalin a nasayaat a gundaway a mangtulong kadagiti miembro ti pamilia nga agsagana nga umawat iti nagan ni Cristo iti bagbagida no mabuniaganda.

Doktrina ken Katulagan 19:15–20.Tapno matulongam ti pamiliam a maddaan iti maysa a napnuan kaipapanan a padas kadagitoy a bersikulo, nalabit a mabalinmo a basaen ida bayat ti panangipakitam iti maysa a ladawan ni Jesucristo (maysa ti maikadua iti daytoy balabala). Kalpasanna mabalin nga iburay dagiti miembro ti pamilia dagiti riknada maipapan iti Mangisalakan. Mabalin pay a mangawis iti Espiritu ti maysa a paborito a himno.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I Stand All Amazed,” Hymns, no. 193.

Panangpadur-as iti Bukod a Panagadal

Agdamag kadagiti saludsod. Ti Doktrina ken Katulagan ket pakakitaan a dagiti saludsod ti mangiturong iti paltiing. Bayat ti panagadalmo kadagiti nasantuan a kasuratan, isuratmo dagiti saludsod a sumangbay kenka. Kalpasanna agutob ken agkararag nga agbirok kadagiti sungbat.

Ni Cristo nga Agkarkararag iti Minuyongan ti Getsemani, ni Hermann Clementz